1. Jehovache zaite visvaxi sevok koslea kotthin poristhitincho fuddo kortat?

SONVSARBHOR zaitea Jehovachea sevokank khub kotthin ani dukh haddtta toslea poristhitincho fuddo korcho poddtta. Tumchea sobhent oslea kotthin poristhitincho fuddo kortat tea bhav-bhoinnancher tumi dhean dilam kai? Thoddim gombhir duensacho fuddo kortat asot vo aplea mogacho konnui moron gela mhunn dukhi asot. Aplea familicho sodosio vo laginchea ixttan Jehovachi seva korunk bond kelea mhunn thoddim khub dukhi asonk puro ani thoddim odruxttak lagon tras sosunk puro. Oslea soglea bhav-bhoinnank buzvonnechi goroz asa. Tor ami tankam koxim modot korunk zata?

2. Thodde pavtt Pauluk buzvonnechi kiteak goroz asli?

² Zaite pavtti Pauluk aplo jiv dhokeant poddtta toslea poristhitincho fuddo korcho poddlo. (2 Kor. 11:23-28) Ani taka aplea ‘angant romblolea eka kanttea sarkea’ duensacho ghoddie fuddo korcho poddlo astolo. (2 Kor. 12:7) Tea bhair, aplea sangata kam korpi Demas, ‘hea sonvsarache axek lagon Pauluk soddun gelo’ tednam taka niraxiponn bhoglem. (2 Tim. 4:10) Paulu ek dhirvont obhixikt Kristanv aslo ani tannem svarth nastana dusreank modot keli. Punn thodde pavtt taka pasun niraxiponn bhoglem.—Rom. 9:1, 2.

3. Pauluk konnam thaun buzvonn ani tenko mell’llo?

³ Pauluk goroz ti buzvonn ani tenko mell’llo. Koso? Aplea povitr xokte udexim Jehovan taka ghottai dili mhunn kainch dubhav na. (2 Kor. 4:7; Filp. 4:13) Punn Jehovan taka bhav-bhoinnam udexim pasun buzvonn dili. Aplea bhav-bhoinamnim apleak khub adar vo buzvonn dili oxem  Paulun sanglem. (Kol. 4:11) Tantuntlea thoddeanchim nanvam Paulun sanglim. Zoxe, Aristark, Tikikus ani Marku, zannim taka tras sosunk modot keli. Tankam kosle gunn aslolean te buzvonn diunk xokle? Ami dusreank buzvonn ani urba diunk proitn kortat tednam ami tanchim dekh koxi gheunk zata?

4. Aristark Paulucho visvaxi ixtt aslo mhunn tannem koxem dakhoilem?

⁴ Aristark, Tesalonikechea Masedonia xarantlo ek Kristanv zaun aslo. To Paulucho visvaxi xitt aslo. Paulu aplea tisrea mixinori bhonvddent Efezak bhett diunk ailo tednam ami Aristarka vixim poile pavtt Bible-ant vachtat. Aristark Paulu sangata aslo tednam eka zomean tankam bollan dhorun vhele. (Itihas 19:29) Punn taka uprant soddoilo tednam pollon voichea bodlek to visvaxiponnan Pauluk chittkun ravlo. Thoddea mhoinea uprant, Gres-ant Pauluche virodi taka marunk sodhtale tednam pasun Aristark Pauluchea sangata aslo. (Itihas 20:2-4) Sumar 58 K.X.-ant Pauluk Rom-ant koidi mhunn dhaddlo tednam, taka ek lamb provas korcho poddlo ani to voitalo tem tarum vatter futtlem. Punn tea soglea vellar Aristark Paulu sangata aslo. (Itihas 27:1, 2, 41) Tor, Rom-ak te pavle tednam, Aristarkan Paulu sangata bondkhonnint thoddo vell sarlo astolo. (Kol. 4:10) Oslea visvaxi ixtta thaun Pauluk urba ani buzvonn mell’lli mhunn kainch dubhav na.

5. Mhonn’nneo 17:17 pormonnem, ami visvaxi ixtt koxim zaunk xoktat?

⁵ Aristarka bhaxen ami fokot borea vellaruch nhoi punn ‘oddchonnechea vellar’ vo kotthin poristhitint pasun ami amchea bhav-bhoinnanchim visvaxi ixtt zaunk xoktat. (Mhonn’nneo 17:17 vachat.) Eka oddchonnecho fuddo korunk, zaitea tempa uprant pasun eka bhavak vo bhoinnik buzvonnechi goroz asot. Udharonnak, tin mhoinea bhitor Frances-achi * avoi-bapui cancer zaun bhair poddlim. To mhunntta: “Amkam kotthin poristhitincho fuddo korcho poddtta tednam, zaito temp poriant amkam tem dukh soschem poddtta. Mhojim avoi bapui moron thoddo temp zalo. Tori punn, tem dukh  mhaka aiz pasun asa. Punn mhojem dukh somzon ghetat toslim visvaxi ixtt mhaka asat mhunn hanv khub upkari.”

6. Ami visvaxi ixttam zaun asat zalear kitem kortolim?

⁶ Visvaxi ixtt aplo vell ani xokti diun aplea bhav-bhoinnank tenko ditat. Udharonnak, Peter-ak aslolem duens begin vaddttolem ani to chodd temp jieuncho na mhunn taka dotoran sanglem. Tachi bail Kathryn sangta: “Amchim sobhentlim ek zoddpim amkam tea dotora lagim gheun gelim. Tea duensa vixim amkam koll’llem tednam, tea kotthin poristhiticho fuddo korunk amkam tim modot kortolim mhunn tannim thoinch nirnnoi ghetlo. Ani tannim toxench kelem.” Tor oddchonneanchea vellar modot korunk khorim ixttam asop kitlem buzvonnechem nhoi!

7-8. Koloskarank 4:7-9 pormonnem, Tikikusan apunn patiepa sarko ixtt mhunn koxem dakoilem?

⁷ Tikikus Rom-achea khala aslolea Aziechea prantantlo ek Kristanv aslo, zo Paulucho patiepa sarko ixtt zaun aslo. (Itihas 20:4) Sumar 55 K.X.-ant, Judea-chea Kristanvank modot korunk lagon Paulun poixe ektthaim korchi ek manddavoll keli. Hea mhotvachea kamant adar diunk lagon tannem ghoddie Tikikusachi modot ghetli astoli. (2 Kor. 8:18-20) Uprant, Paluk Romant poile pavtt bondkhonnint ghatlo tednam sobhenk sondex diunk Tikikus Pauluk modot kortalo. To Azientlea sobhank Paulucheo chitteo ani urbebhorit sondex ditalo.—Kol. 4:7-9.

⁸ Tikikus sodanch Paulucho patiepa sarko ixtt zaun aslo. (Titak 3:12) Sumar 65 K.X.-ant, Pauluk dusrea pavtti bondkhonnint ghatlo. Tea vellar Azientlea prantantle zaite Kristi dadle virodheank bhietale dekhun aplea lagim ieun vell sarunk sodhinasle mhunn Paulu boroita. Tor Pauluchea disamnim sogle Kristanv Tikikusa bhaxen patiepa sarke nasle mhunn kolltta. (2 Tim. 1:15) Punn Paulu Tikikusacher patieunk xoktalo dekhun tannem taka anik ek kam dilem. (2 Tim. 4:12) Paulun khorench hea borea ixttacho valor kelo astolo.

9. Ami Tikikusachi dekh koxi gheunk zata?

⁹ Ami pasun Tikikusa bhaxen ek patiepa sarkim ixtt zaunk xoktat. Udharonnak,  gorjechea vellar ami amchea bhav-bhoinnank modot kortolim mhunn fokot utramnim sangonant punn korneamnim korun dakhoitat. Ani gorjevontank modot korunk ami asat mhunn khatri melltta tednam oslea bhav-bhoinnank khub modot melltta. (Mt. 5:37; Luk. 16:10) Hem kiteak mhunn ek bhoinn oxi sangta: “Gorjechea vellar pavtolim mhunn utor dilolim tim, gorje vellar pavtolim kai na mhunn huskeunchi tuka goroz poddona.”

10. Mhonn’nneo 18:24-a pormonnem, eka oddchonnecho vo niraxiponnacho fuddo kortat tankam konnam thaun buzvonn mellonk xokta?

¹⁰ Eka oddchonnecho vo niraxiponnacho fuddo kortat tannim aplea oddchonneam vixim eka patiepa sarkea ixtta lagim uloilear choddxe pavtti tankam buzvonn melltta. (Mhonn’nneo 18:24 vachat.) Bijay-achea putak sobhentlean bhair kaddlo tednam to khub nirax zalo. To sangta: “Hanv patieunk xokta toslea konnank mhojim bhavnam sangonk zai koxem mhaka dislem.” Carlos-an ek chuk kel’li dekhun taka sobhent asloli ek zobabdari tannem hogddaili. To mhunntta: “Mhojim bhavnam ukteponnim sangtana mhoji nit korina toslea bhavanchi mhaka goroz asli. Ani Carlos-ak to adar voddilam thaun mell’llo. Tachea oddchonneank tondd diunk tannim taka modot keli. Tea bhair, to sangta tem vhoddil dusrea konnank sangchenant mhunn khatri aslolean taka anik buzvonn mell’lli.

11. Dusreamnim amkam ek patiepa sarkim ixtt mhunn lekhunk zai zalear ani tannim aplea monantlim bhavnam amkam sangonk zai zalear ami kitem korunk zai?

¹¹ Dusreamnim amkam ek patiepa sarkim ixtt mhunn lekhunk zai zalear ani aplea monantlim bhavnam amkam sangonk zai zalear amkam pasiens asop gorjechem. Zhanna-cho ghov tika soddun gelea uprant tinnem aplim bhavnam aplea ghott ixttank sanglim tednam tika buzvonn mell’lli. Ti mhunntta: “Hanv portun-portun sanglolem tench sangtalem. Tori astana tim mhojem pasiensan aikotalim.” Tumi pasun dusrim uloitat tednam kan ditat zalear borim ixttam zaunk xoktat.

12. Marku konn aslo, ani dusreanchi seva korunk apunn toiar asa mhunn tannem koxem dakoilem?

¹² Marku Jerusalem-antlo ek Judev Kristanv zaun aslo. Mixinori aslolea tachea bapul bhav Barnabasak zaitim zann vollkhotalim. (Kol. 4:10) Markuchi famil girest asli. Tori astana, tannem aplea jivitant poixeank vo her vostunk sogleam-von mhotvachem stan diunk na. Marku jivit-bhor dusreanchi seva korunk toiar aslo ani tem korunk to khuxal aslo. Udharonnak, to apostl Paulu ani apostl Pedru sangata kam kortalo tednam to tankam jevonn, ravpak zago ani her vostu diun tanchi zobabdari samballunk tankam modot keli astoli. (Itihas 13:2-5; 1 Ped. 5:13) Marku vixim sangtana, Paulun to ‘Devachea Rajea khatir aplea borabor vavurlo ani khub adar dilo’ mhunn sanglem.—Kol. 4:10, 11.

13. Markun visvaxiponnan kel’lea sevecho Paulun valor kelo mhunn 2 Timotak 4:11 thaun koxem kolltta?

¹³ Marku Pauluchea ghott ixttam modlo ek aslo. Udharonnak, sumar 65 K.X.-ant Pauluk nimannem pavtti Rom-ant bondkhonnint ghatlo tednam tannem Timotak apli dusri chitt boroili. Tea chittient Paulu Timotak Romak ieunk sangta ani sangata Mark-uk gheun ieunk sangta. (2 Tim. 4:11) Markun adim visvaxiponnan seva kel’li ti Paulun valor keli dekhun hea ekdom gorjechea vellar tannem Markuk apoilem. Markun Pauluk veg-vegllea toren modot keli. Tannem ghoddie taka jevonn vo borounk lagtat teo vostu haddun dileo astoleo. Pauluk beginuch jivexim marche asle. Tor tachea poilinchea disamnim Markun Pauluk tenko ani urba dil’li. Tor tea vellar Pauluk kitli buzvonn mell’li astoli.

14-15. Dusreanchea gorje vellar modot korchea vixim Matev 7:12-antlean ami kitem xiktat?

 ¹⁴ Matev 7:12 vachat. Amkam kotthin poristhitincho fuddo korcho poddtta tednam veg-vegllea ritin modot korun tenko ditat tancho ami kitlo valor kortat! Ryan-acho bapui okosmat eka accident-ant bhair poddlo tednam Ryan oso mhunntta: “Ami tras sostat tednam sodanchim zaitim kamam amchean korunk zaunchench na oxem amkam disonk puro. Tor tea vellar dusrim amchea pasot ekdom lhan kamam kortat zalear pasun amkam tantuntlean khub buzvonn melltta.”

¹⁵ Ami dusreancher ani tanchea gorzancher dhean ditat tednam tankam modot korunk amkam veg-veglleo vatto mellttoleo. Udharonnak, Peter ani Kathryn zanchea vixim ami poilim uloil’lim, tankam dor ek pavtt dotora lagim vochonk modot korunk eke bhoinnin tharailem. Peter ani Kathrynak gaddi cholounk zainasli. Tor sobhentlea veg-vegllea bhav-bhoinamnim tankam dotora lagim vhoronk tea bhoinnin ek manddavoll keli. Hea manddavolli thaun faido zalo kai? Kathryn mhunntta: “Ek vhodd vojem amchea bhuzam thaun gelem koxem amkam dislem.” Tor sodanch ugddas dovrat. Tumi dusreank modot korunk doiechim lhan-lhan kamam kelear pasun, tankam tantuntlean buzvonn melltta.

16. Dusreank buzvonn diunchea vixim Markuchea udharonnantlean ami koslem mhotvachem lisanv xiktat?

¹⁶ Jezucho xis Marku poilea xekddeant jiel’lo. To khub vavurtalo ani taka Jehovachea sevent zaiteo mhotvacheo zobabdareo asleo. Tantuntli ek mhunnttlear, tannem Jezu Kristachem Xubhvortoman boroilem jem tachea nanvan aslem. Tori astana, tannem Pauluk buzvonn diunk vell kaddlo. Ani Paulu Marku lagim modot magonk fattim soronk na. Angela-chea familint ek khun zal’lo. Punn tea vellar tika buzvonn diunk ailoleancho ti khub valor korta. Ti mhunntta: “Tumchi ixttam tumkam khoreamnim modot korunk sodhtat zalear tanchem lagim ulounk sompem zata ani tim tumkam modot korunk bhienant vo fattim soronant.” Tor ami amkanch vicharunk zata. ‘Mhojea bhav-bhoinnank veg-vegllea vattamnim buzvonn diunk hanv toiar asa toslo mhunn dusrim mhaka vollkhotat kai?’

17. 2 Korintkarank 1:3, 4-acher niall kelolean dusreank buzvonn diunk amkam koxi modot zata?

¹⁷ Zaitea bhav-bhoinnank buzvonnechi goroz asa. Dusreamnim amchea lagim uloilolim tim buzvonnechim utram ami dusreank buzvonn diunk uzar korunk xoktat. Nino nanvachea bhoinnichi aji bhair poddli tednam ti oxi mhunntta: “Ami toiar asat zalear dusreank buzvonn diunk Jehova amkam uzar korunk xokta.” (2 Korintkarank 1:3, 4 vachat.) Frances, zachea vixim ami hea lekhant poilim uloilolim, to mhunntta: “2 Korintkarank 1:4-ant sanglolim utram khori zaun asat. Amkam melltta ti buzvonn ami dusreank diunk zata.”

18. (a) Thoddim buzvonn diunk kiteak bhietat? (b) Ami khori buzvonn diupi koxi zaunk xoktat? Ek udharonn diat.

¹⁸ Dusreank buzvonn diunk amkam bhirant dista zalear pasun tankam buzvonn diunk ami vatto sodhunk zai. Udharonnak, buzvonn zai aslolea eka munxak kitem sangchem vo kitem korchem hem thodde pavtt amkam kollona zait. Paul nanvachea eka voddilacho bapui melo tednam, thoddeamnim taka buzvonn diunk koso proitn kelo tem to ugddasak haddtta. To mhunntta: “Mhojea lagim ieun ulounk, thoddeank khub kotthin zalem. Tanchim utranch bhair soronaslim. Tori astana mhaka buzvonn ani tenko diunk tim sodhtalim. Hacho hanvem khub valor kelo.” Toxench ek vhodd bhuimkamp onnbhovlea uprant, Tajon nanvacho ek bhav oso mhunntta: “Khorem mhunnttlear, bhuimkampa uprant dusreamnim dhaddloleo dor ek message-o mhaka ugddas na. Punn message ghalun apunn surokxit asa vo na tachi tannim khatri korun ghetli. Hacho mhaka ugddas asa.” Ami dusreanchi kallji ghetat zalear ami khori buzvonn diupi zaunk xoktat.

19. Dusreank ‘adar vo buzvonn diunk’ tumi kiteak nichov kela?

¹⁹ Hea sonvsaracho xevott lagim pavta toso poristhiti ani bhigoddtt’ttoli ani jivitant oddchonneo chodd vaddttoleo. (2 Tim. 3:13) Tea bhair, ami opurnn aslolean amchea lagim chukeo ghoddot ravtoleo ani toslea vellar amkam buzvonnechi sodanch goroz astoli. Moro-porian visvaxi ravonk apostl Pauluk modot kel’lem to ek vixoi mhunnttlear, taka aplea bhav-bhoinnam thaun mell’lloli buzvonn. Tor Aristarka bhaxen ami visvaxi ravum-ia. Tikikusa bhaxen patieupa sarkim zavum-ia. Ani Marku bhaxen dusreanchim seva korunk toiar ravum-ia. Oxem kelolean, amchea bhav-bhoinnank Jehovachi seva visvaxiponnim korit ravonk ami modot kortolim.—1 Tes. 3:2, 3.