1-2. Zaite Jehovache Sakxi koslea poristhitincho fuddo kortat, ani tacho tancher koslo porinnam zata?

HEA tin poristhiti vixim chintat: Eka tornnattea bhavak apleak chodd ani chodd oskot korta toslem ek duens asa mhunn kollon ieta. Khub mhenotin kam korpi sumar 50 vorsam piraiechea bhavachem kam voita ani kitlem-i sodlear pasun tankam dusrem kam mellona. Ek visvaxi zantti bhoinn adim kortali titli Jehovachi seva atam korunk pavona.

² Tumchi poristhiti voir dil’lea eka poristhiti sarki asa zalear tumi kainch faideachim nant oxem tumkam disonk puro. Toxem tumi chintlear, tumi khuxal aschimnant, svota vixim tumkam borem dischem na ani dusream sangata tumcho sombond pidd’ddear zatolo.

3. Soitan ani tachea tabeant aslole lok munxachem jivit koxem lekhtat?

³ Survatek thaun Soitan jea toren munxam lagim vagla tantuntlean to tankam kainch valorachim na oso lekhta mhunn kollon ieta. Ani aiz sonvsar pasun munxank tosoch lekhta. Devachem aikona zalear Eve mortoli mhunn Soitan zannam aslo. Tori astana, toxem kelear svotontrtai mellttoli mhunn sangon apunn kitlo krur tem tannem dakhoun dilem. Hea sonvsarachea veapar, rajkaronn ani dhormik songottnnank Soitanan sodanch aplea tabeant dovorlea. Aiz zaite veapari, rajki odhikari ani dhormik fuddari munxachea jivitak kainch valor korinant, ani lokank koxem dista tacho valor korina tednam te Soitanacho pattlav kortat.

4. Hea lekhant ami kitem bhasabhas kortolim?

⁴ Punn Jehova Soitana sarko nhoi. Taka ami moladik asat mhunn zannam zalolim zai ani thoddea poristhitimnim ami valorachim nhoi mhunn amkam dista tednam to amkam modot korta. (St. 136:23; Rom. 12:3) Hea fuddlea poristhitimnim Jehova amkam koso modot korta tea vixim ami hea lekhkant  bhasabhas kortolim: (1) Amkam eka duensacho fuddo korcho poddtta tednam, (2) Poixe zoddunk amkam kotthin zata tednam, ani (3) Zantteponnak lagon Jehovachea sevent ami kortat tem faideachem nhoi oxem amkam dista tednam. Punn survatek ami dor eklim Jehovak moladik zaun asat mhunn kiteak khatri dovrunk zata, tem ami polloum-ia.

5. Jehova munxank moladik mhunn lekhta, hacho kitem puravo asa?

⁵ Amkam matiechim rochleant tori astana ami matie poros ekdom chodd moladik zaun asat. (Ut. 2:7) Jehova amkam moladik lekhta mhunn ami koxim zannant, hachim ami thoddim karonnam polloum-ia. Apleak aslole gunn munis dakhounk xoktat tea toren Devan tankam rochleant. (Ut. 1:27) Hea toren tannem amkam dusrea rochnne poros vortim rochleant ani prithumecher ani zonvarancher amkam odhikar dila.—St. 8:4-8.

6. Jehova opurnn munxank moladik lekhta mhunn anik kitem puravo asa?

⁶ Adanvan patok kelea uprant pasun Jehova munxank moladik mhunn lekhta. To amkam itlo moladik mhunn lekhta ki amchea patkanchea soddvonne pasot tannem aplea ekleach Putak amchea pasot dilo. (1 Juanv 4:9, 10) Jezun dil’lea soddvonne udexim Adanvachea patkank lagon melolea “borea toxench vaitt monxanchem” Jehova punorjivontponn kortolo. (Itihas 24:15) Tor ami duent, gorib vo zanttim asum, amkam to moladik mhunn lekhta oxem tachem Utor amkam dakhoun dita.—Itihas 10:34, 35.

7. Jehova amkam moladik mhunn lekhta oxem mhunnonk amkam anik koslim karonnam asat?

⁷ Jehova amkam moladik mhunn lekhta oxem mhunnonk amkam anik karonnam asat. Tannem amkam aplea lagim oddun haddleant ani bori khobor aikon ami kitem kelem tacher to dhean dita. (Juanv 6:44) Ami tachea sangata ek ghott ixttagott zoddunk fuddem sorlim tednam to amcho ghott ixtt zalo. (Jak. 4:8) Amkam xikounn diunk pasun Jehova vell dita ani proitn korta. Hea toren ami taka moladik asat mhunn to dakhoita. Aiz ami koslim munxam zaun asat ani fuddarak ami koslim munxam zaunk xoktat hem to zannam. Ani amcho mog korta dekhun to amkam xist dita. (Mho. 3:11, 12) Tor Jehova amkam moladik lekhta mhunn ho ek kitlo voddlo puravo!

8. Amcher oddchonneo ietat tednam sarke toren chintunk Stotr 18:27-29-an aslolim utram amkam koxim modot kortat?

⁸ David Raza valoracho nhoi mhunn thoddeank dislem. Punn Jehova aplo mog korta ani apleak adar dita mhunn David zannam aslo. Hem zannam aslolean to aplea poristhiticho borea toren fuddo korunk xoklo. (2 Sam. 16:5-7) Ami niraxi zatat tednam vo amkam oddchonneancho fuddo korcho poddtta tednam ami sarke toren chintunk Jehova modot korunk xokta ani koslea-i oddchonneancho fuddo korunk to amkam modot kortolo. (Stotr 18:27-29 vachat.) Jehovacho tenko amkam asta tednam khuxalkaien tachi seva korunk amkam kitench addaunk xokona. (Rom. 8:31) Khas korun tea tin poristhitimnim Jehova amcho mog korta ani amkam moladik mhunn lekhta mhunn ami ugddas dovrunk zai. Tor atam ami tea tin poristhitincher bhasabhas korum-ia.

9. Duent poddttat tednam ami amchea vixim kitem chintunk puro?

⁹ Ami duent poddttat tednam amchea bhavnancher probhav zaunk xokta ani ami konnakuch faideachim na oxem amkam  disonk xokta. Amcheo oskotaieo dusreank dista tednam vo amkam dusreanchim modot gheunchim poddtta tednam tem amkam lojechem oxem disot. Ami duent asat hem dusreank khoborna zalear pasun amkam loz disonk puro. Karonn, ami poilim korunk xoktalim tem ghoddie ami atam korunk xokonant. Toslea kotthin poristhitint Jehova amkam koxi urba dita?

10. Mhonn’nneo 12:25-a pormonnem, ami duent astat tednam amkam kitem modot korunk xokta?

¹⁰ Ami duent astat tednam ek ‘doiall vo borem utor’ amkam urba diunk xokta. (Mhonn’nneo 12:25 vachat.) Bible-ant, Jehovan zaitim borim utram boroun dovorleant. Tim utram ami vachtat tednam to amkam molachim mhunn lekhta hem amkam kolltta. (St. 31:19; 41:3) Ami duent astat tednam ami Bible-antlim utram portun-portun vachtat zalear tea vellar zatat tea uskeank tondd diunk Jehova amkam modot kortolo.

11. Eka bhavak Jehovan koxi modot keli?

¹¹ Jorge-acho onnbhov polloum-ia. Tachea tornnattponnantuch Jorge-ak rokddench vaddtta toslem ek duens zalem. Ani taka lagon apunn kainch faideacho nhoi mhunn taka disonk laglem. To mhunntta: “Duensak lagon mhaka koxem bhogtalem tacho ani lokanchem dhean mhojer poddttalem tednam mhaka sosunk poddtta tea lojecho fuddo korunk hanv toiar naslo. Mhoji bholaiki bhigddot voita toxi mhojem jivit koxem bodoltolem hea vixim hanv uskeunk laglom. Hanv sarko tuttlo ani modotik lagon hanvem Jehova lagim magnnem kelem.” Jehovan taka koso adar kelo? To fuddem mhunntta: “Mhaka dhean diunk kotthin zatalem dekhun Jehova aplea sevokanchi kallji koso gheta tea vixim dakhoita toslim Strotr pustokantlim thoddim versam hanv vachunk laglo. Dor disa hanv tinch versam portun-portun vachtalo ani hantutlean  mhaka buzvonn mell’lli. Vell sorlo toso mhojea tonddar lokank hanso dixtti poddonk laglo. Hanv khuxal asta tem polloun tankam urba mell’lli mhunn pasun tim sangonk laglim. Tednam Jehovan mhojem magnnem aikolem mhunn mhaka kollon ailem. Mhojem chintop bodlunk Jehovan mhaka adar kelo. Hanv duent aslear pasun to mhaka koso lekhta tea vixim Bible-ant jem kitem sanglam tacher hanv dhean diunk laglo.”

12. Duensacho fuddo kortat tednam Jehovachi modot mellonk tumi kitem korunk zata?

¹² Tumi eka duensacho fuddo kortat zalear tumkam koxem bhogta tem Jehova zannam mhunn tumi khatri dovrunk zata. Tumchea poristhiti vixim sarke ritin chintunk modotik lagon tache lagim magat. Uprant, Jehovan Bible-ant tumchea pasot boroun dovorlolim buzvonnechim utram sodhun kaddat. Jehova aplea sevokancho kitlo valor korta tem dakhoita toslea versancher dhean diat. Tumi oxem kortat tednam visvaxiponnan apleachi seva kortat tanchea sangata Jehova kitlo doiallaien vagta tem tumkam dison ietolem.—St. 84:11.

13. Ek familicho vhoddil apli sirvis hogddaita tednam taka koxem disonk xokta?

¹³ Ek familicho vhoddil aplea familicheo gorzo purnn korunk axeta. Punn chintat to bhav apli kaim chuk nastana apli sirvis hogddaita. To dusrem kam mellonk proitn korta, punn taka mellona. Oslea vellar apunn kainch faideacho na mhunn taka disonk puro. Tor Jehovan kel’lea bhasaunneancher dhean dilear taka koxi modot zaunk xokta?

14. Jehova apnnem kel’leo bhasaunneo kiteak purnn korta?

¹⁴ Jehova apleo bhasaunneo sodanch purnn korta. (Josh. 21:45; 23:14) Hem to zaitea  karonnak lagon korta. Ek karonn mhunnttlear, hantuntlean tachea nanvacher probhav poddtta. Aplea visvaxi sevokanchi kallji ghetolo mhunn Jehovan utor dilam ani tannem dilolem hem utor pallunk to fattim sorona. (St. 31:1-3) Tea bhair, Jehova aplea familichea sodoxianchi kallji ghena zalear tim dukhi vo niraxi zatolim mhunn to zannam. Amkam jieunk ani visvaxiponnan tachi seva korunk zai tem soglem ditolo mhunn tannem bhasailam. Ani hi bhasaunni purnn korunk taka kitench addaunk xokona!—Mt. 6:30-33; 24:45.

15. (a) Poilea xekddeantlea Kristanvank koslea oddchonneancho fuddo korcho poddlo? (b) Stotr 37:18, 19-antlean amkam kitem khatri melltta?

¹⁵ Jehova apleo bhasaunneo kiteak purnn korta tem ami ugddas dovortat zalear, amkam poixe zoddunk kotthin zata tednam to amkam modot kortolo mhunn khatri melltta. Poilea xekddeanchea Kristavanchem udharonn polloum-ia. Jerusalemachea sobhecher chodd dhumallo ailo tednam ‘dhormdut mat bhairaun her soglim ximpoddlim.’ (Itihas 8:1) Haka lagon kitem zalem astolem tem chintat. Kristanvamnim ghoddie aplem ghor ani kam hogddailem, ani tankam poixe zoddunk kotthin zalem. Punn Jehovan tankam soddun diunk na ani tim sodanch khuxal ravlim. (Itihas 8:4; Heb. 13:5, 6; Jak. 1:2, 3) Jehovan tea visvaxi Kristavank modot keli ani to amkam-i modot kortolo.—Stotr 37:18, 19 vachat.

16. Jehova amchea bhoktecho valor korina oxem amkam kednam disonk puro?

¹⁶ Ami zanttim zatat toxim ami Jehovak thoddench diunk xoktat oxem amkam disonk puro. David Raza zantto zalo toso taka-i oxench dislem astolem. (St. 71:9) Oslea vellar Jehova amkam koso modot korunk xokta?

17. Jheri nanvachea bhoinnichea onnbhovantlean ami kitem xiktat?

 ¹⁷ Jheri nanvachea eka bhoinnichem udharonn polloiat. Tika Raj-ghorachi dekhrekh korunk ditat tea proxikxonnak apoilem, punn tika vochonk naka aslem. Tinnem mhunnttlem: “Hanv tor zantti, vidva ani Jehovak upkarta tosli koslich kola mhojea lagim na. Hanv kainch faideachi nhoi.” Punn tea proxikxonnachea adlea rati tinnem magnem korun Jehovak aplea monantlem soglem sanglem. Tori astana, dusrea disa ti Raj-ghorant aili tednam apleachean hanga kainch korunk zaunchem na oxem tika dislem. Punn Jehova thaun xikonk toiar asop hem sogleam-von mhotvachi kola mhunn proxikxonn ditana eka bhavan sanglem. Tea disa vixim Jheri mhunntta: “Hanvem chintlem, ‘Mhaka hi kola asa’ ani Jehovan jea toren mhojea magnneacho zobab dilo tem polloun hanv roddonk lagli. Mhojea lagim taka diunk kitem tori moladik asa ani to mhaka xikounk toiar asa mhunn tannem mhaka khatri dili!” Ti fuddem mhunntta: “Tea proxikxonnak voichea poilim mhaka bhirant disli, hanv niraxi zali ani hanv kainch faideachem nhoi oxem mhaka dislem. Punn proxikxonna uprant mhaka dhir mell’llo, urba mell’lli ani hanv moladik mhunn mhaka dison ailem!”

18. Ami zanttim zalear pasun amchi bhokti Jehova valor korta mhunn Bible koso dakhoita?

¹⁸ Ami zanttim zalear pasun Jehovachea sevent amkam kam astolench mhunn ami khatri dovrunk zata. (St. 92:12-15) Jehovachea sevent ami kortat tem thoddem zaunk puro vo mhotvachem na oxem disonk puro. Punn Jehova tem valor korta mhunn Jezun amkam xikoilem. (Lukas 21:2-4) Tor tumchean kitem korunk zata tacher dhean diat. Udharonnak, tumi dusream lagim Jehova vixim ulounk zata, bhav-bhoinnam pasot magnnem korunk zata ani visvaxi ravonk herank urba diunk zata. Tumi kitem korunk xoktat taka lagon nhoi punn tumi tachem utor pallunk toiar asat taka lagon Jehova aplea sangata vaur korpi mhunn tumkam lekhta.—1 Kor. 3:5-9.

19. Romkarank 8:38, 39-ant amkam kitem khatri melltta?

¹⁹ Apli seva kortoleancho valor korta toslo Dev Jehovachi bhokti korunk ami kitlim khuxal asat! Tachi khuxi korunk tannem amkam rochleant ani khori bhokti kortat dekhun ami jivitant khuxal asat. (Prok. 4:11) Ami faideachim nhoi mhunn ho sonvsar amkam lekhit punn Jehovak toxem disona. (Heb. 11:16, 38) Duensak lagon, poixe zoddunk kotthin zata dekhun vo zantteponnak lagon ami niraxi zatat zalear pasun amchea sorgichea Bapachea moga thaun amkam kitench pois korunk xokona mhunn ami ugddas dovrum-ia.—Romkarank 8:38, 39 vachat.