1-2. Jezuchea dholim lagim aslolea bailank eka devdutan kitem sanglem, ani Jezu tankam kosleo suchounneo dita?

SOKALLIM fuddem, 33 K.X.A.-chea Nisan 16 tarker, Devacho mog kortoleo thoddeo bailo khontiborit kallzan, tancho Somi Jezu Kristak dovorlolea tea dholi lagim geleo. Jezuchi kudd 36 voram poros chodd vell tea dholint dovorloli. Punn Jezuchea kuddicher lavunk mosale ani pormollit tel gheun ailoleo teo bailo Jezuchi kudduch na ti polloun ojap zalim. Jezu mel’leantlo punorjivont zala mhunn ek devdut tea bailank sangta, ani to fuddem mhunntta: “To tumche fuddem Galileiak veta; thoi tumi Taka dekhtoleat.”—Mt. 28:1-7; Lukas 23:56; 24:10.

² Dholi lagim asloleo bailo, thoim thaun bhair sorlea uprant, Jezu tankam melltta ani tankam hi adnea dita: “Vochun Mhojea bhavank Galileiak vochat mhonn sangat. Thoi te Mhaka dekhtole.” Aplea punorjivontponnam uprant Jezun aplea xisam sangata dovorloli hi poili mitting zaun asli. (Mt. 28:10) Ani hea mittingent to tankam thoddeo khub mhotvacheo suchounneo dita.

3-4. Matev 28:19, 20-ant asloli adnea fokot Jezuchea apostlankuch nasli mhunn ami kiteak sangonk xoktat? (Masikachem fuddlem chitr polloiat.)

³ Matev 28:16-20 vachat. Jezuchea xisamnim tea vellar khoinchem mhotvachem kam korunk zai aslem, tea vixim Jezun tea mittingent tankam sanglem. Ani aizui ami tench kam korit asat. Jezun sanglem: “Vochun soglea raxttrank Mhoje xis korat, . . . Hanvem tumkam dileat teo soglleo adnia pallunk tankam xikoiat.”

⁴ Aplea soglea pattlavdaramnim, porgottnni kel’li Jezuk zai, punn hi adnea tannem fokot aplea 11 visvaxi apostlankuch diunk  na mhunn ami koxim zannant? Dhean diat. Galileiachea tea dongrar, Jezun xis korchi adnea dili tednam, thoim fokot tache apostluch asle kai? Devdutan tea bailank kitem sanglem tem ugddas korat. “Tumi  taka [Galilei-ant] dekhtoleat.” Tor, ghoddie tea mittingent teo visvaxi bailo pasun asleo astoleo. Punn titlench lok nhoi. Karonn “ekach farak, paixeam-von choddam amchea bhavam-bhoinnink To dixtti poddlo” mhunn, apostl Paulu Jezu vixim sangta. (1 Kor. 15:6) Khoim?

5. 1 Korintkarank 15:6-ant sanglam tem Galileiant zalolea mittinge vixim aslem mhunn ami kiteak mhunnonk xoktat?

⁵ Matev 28 odheai-ant sanglolea Galileiantlea tea mhotvachea mittinge vixim, Paulu 1 Korintkarank 15:6-ant sangtalo mhunn amkam borim karonnam asat. Koslim karonnam? Poilem, Jezuche choddxe xis, Galileikar asle. Tor zaitea zannank Jerusalemantlea eka ghorant apounchea bodlek, Galileiachea eka dongrar apoilem zalear tankam ektthaim zaunk sompem zatolem aslem. Dusrem, aplea punorjivontponna uprant, Jezu aplea 11 xisank, Jerusalemantlea eka ghorant adinch mell’llolo. Tor xis korchi ani porgott korchi adnea fokot aplea apostlankuch asli zalear to tea bailank ani herank Galileiantlea dongrar apoun diunchea bodlek tankam Jerusalemantuch diunk xoktalo.—Lukas 24:33, 36.

6. Xis korchi adnea aiz pasun lagu zata mhunn Matev 28:20 koso dakhoita, ani aiz ti adnea lok koxi pallit asat?

⁶ Atam tisrea mhotvachea karonnacher dhean diat. Jezun diloli xis korchi adnea, fokot tea vellar aslolea Kristanvam pasotuch nasli. Hem ami koxim mhunnonk xoktat? Jezun aplea pattlavdarank suchounneo dilea uprant, xevttak mhunnttlem: “Sodanch-sodam, hoi, kallam-iuganche sompadnne porian, Hanv tumchea sangata asam!” (Mt. 28:20) Jezun sanglole bhaxen xis korchem kam aiz vegan cholot asam. Chintat, dor vorsa sumar 3,00,000 lakh lok bautizm gheun Jehovache Sakxi zatat ani Jezu Kristache xis zatat.

7. Atam ami kitem bhasabhas kortolim, ani kiteak?

⁷ Bible obheas gheta te zaite lok vaddavoll kortat ani bautizm ghetat. Punn, amchea sangata Bible xiktat te thodde lok xis zaunk fattim sortat. Tankam Bible xikonk avoddtta punn fuddem soron bautizm gheunk tankam naka. Tumi ek Bible obheas ghetat zalear, tumchea videarthean xikta tem apnnaun taka Jezucho xis zaunk modot korunk tumi axetat. Amchea videarthean Jehovacho mog korunk ani vaddavoll korunk, ami tankam koxi modot korunk xoktat tea vixim hea lekhant ami bhasabhas kortolim. Kiteak? Karonn thoddea vella uprant kednam tori, to Bible obheas ami chalu dovrunk zai vo bond korunk zai tea vixim amkam nirnnoi gheunchoch poddttolo.

8. Jehovacho mog korunk thodde pavtti videartheank kiteak kotthin zaunk xokta?

⁸ Aplo mog kortat dekhun lokamnim apli seva keloli Jehovak zai. Jehova dor ekleachi kallji gheta ani tancho khub mog korta. Hem amchea videartheank zannam zaunk modot korop amcho dhei zaun asa. Jehova “onath-bhurgeancho Bapui ani vidvancho askari vo rakhnnar” zaun asa. Hem zannam zaunk ami tankam modot korunk zai. (St. 68:5) Dev aplo kitlo mog korta tem tumche videarthi zannam zatat tednam, tim pasun tacho mog korunk pavtolim. Punn thoddea Bible videartheank aplea bapai thaun mog ani moipas mellonk na dekhun, Jehovak aplo mogall bapui mhunn lekhunk tankam kotthin zaunk puro. (2 Tim. 3:1, 3) Tor tumi Bible obheas ghetana, Jehovachea borea gunnancher zor diat. Amchea mogall Devak tannim sasnachem jivit zoddlolem zai. Ani tem zoddunk to modot korunk toiar asa hem tumchea Bible  videartheank somzonk modot korat. Tea bhair, ami anik kitem korunk zata?

9-10. Bible obheas gheunk ami khoinchim prokaxonam uzar korunk zai, ani tinch prokaxonam kiteak?

⁹ “Bible Khorench Kitem Xikoita?” ani “How to Remain in God’s Love” (Inglez bhaxen) him pustokam uzar korat. Him prokaxonam khas korun amchea videartheanchea kallzant Jehova pasot mog vaddounk amkam modot korunk toiar keleant. Udharonnak, Bible Kitem Xikoita, hacho odheai 1, hea prosnanche zobab dita. Zoxe, Dev khorench amchi kallji gheta?, Amcher on’neai zatat tednam Devak koxem dista?, ani Ami khorench Jehovache ixtt zaunk zata kai? Remain in God’s Love hea pustoka vixim kitem? Bible-antlim totvam amchea videartheanche jivit koxem sudharunk xokta, ani to Jehovak koso lagim soronk xokta tem somzonk hem pustok modot kortolem. Tumi hea pustokantlean herank xikoilam zalear pasun, tumi dor ek Bible obheas ghetana tea videartheacho gorzo motint dovrun toiari korat.

¹⁰ Punn chintat, tumcho Bible videarthi ek  oslo prosn vicharta, zacho zobab Seve Pasot Mukhel Prokaxonamnim mellona. Tednam, tumi kitem korunk zata? Ghoddie tem prokaxon Bible videarthean svota zaun vachunk tumi taka urba diunk zata. Hea toren Bible obheas gheunk lagon aslolea prokaxonacher tumi tumcho obheas fuddem vhoronk pavtolim.

11. Eka Bible obheasachea survatek ani xevottak magnnem korop kednam suru korunk zai, ani hem gorjechem mhunn tumi tumchea Bible videartheank koxem somzaunk zata?

¹¹ Magnnem korun obheas suru korat. Ek Bible obheas suru kelea uprant, thoddeach sumanamnim obheasachea survatek ani xevottak magnnem korop borem. Fokot Devachea povitr xoktechea modotinuch ami Devachem Utor somzonk xoktat mhunn amchea videartheak kollonk zai. Bible obheas ghetana ami kiteak magnnem kortat tem somzaunk thodde Bible xikoupi, Jakob 1:5 uzar kortat. Zoim mhunntta: “Dev dita ti zannvai tumche modlea konnank-ui na zalear, tannim ti Deva lagim magchi.” Tea uprant te aplea videartheank oxem vichartat, “Devachi zannvai zai zalear ami kitem korunk zai?” Choddxem pavtti, ami Deva lagim magnnem korunk zai mhunn videarthi sangtat.

12. Tumchea Bible videarthean magnnem kortana Jehova lagim kallzant thaun ulounk tumi Stotr 139:2-4 koxem uzar korunk xoktat?

¹² Koxem magnnem korchem tem tumchea videartheank xikoiat. Tannem kallzant thaun kel’lim magnnim, Jehova aikonk sodhta mhunn taka somzaiat. Amchea monantlim chintnam Jehovak adim fuddench khobor asa dekhun aplim bhavnam ani dusreank sangonk sodhinant tosle vixoi aplea magnneant Jehovak sangonk fattim soronaka mhunn taka somzaiat. (Stotr 139:2-4 vachat) Chukichem chintop ani vaitt sonvoim-o pois korunk modot kor mhunn Deva lagim magonk pasun tumchea videartheank urba diat. Udharonnak, thoddo temp Bible xiklea uprant, ek fest vo porob monovop chukichem mhunn zannam aslear pasun eka Bible videartheak tem korunk avoddtta mhunn chintat. Tor tea festa vo porbe vixim apleak koxem dista tem sangonk, ani Jehovak avoddtta tacho mog korunk modotik lagon Jehova lagim magonk taka urba diat.—St. 97:10.

13. (a) Ami amchea videartheank zata title begin mittingek ieunk kiteak amontronn diunk zai? (b) Amcho videarthi Raj-ghorant ieta tednam to eka onvollkhi zagear aila mhunn disona zaunk ami kitem korunk zai?

¹³ Zata titlea begin tumchea Bible videartheak mittingek amontronn diat. Kristi mittingent ghoddtta tem tumcho videarthi polloita ani aikota tednam taka Jehovachi seva korunk urba melltta ani vaddavoll korunk modot zata. Taka Raj-ghorant Kitem Ghoddta? ho viddeo dakhoiat, ani tumchea sangata mittingek ieunk amontronn diat. Zata zalear, mittingek ieunk taka modot korat. Bible obheasak veg-vegllea porgottnnarank tumchea sangata gheun vochop borem. Oxem kel’lean, videartheak sobhentlea veg-vegllea bhav-bhoinnanchi vollokh zatoli. Ani taka apunn onvollkhi lokam modem aila oxem dischem na.

14. Eka videartheak vaddavoll korunk kitem modot korunk xokta?

¹⁴ Amchea Bible videartheank Deva sangata apli ixttagot ghott korunk modot korop, ho amcho dhei zaun asa. (Ef. 4:13) Ek munis Bible obheas suru korta tednam apleak tantuntlean kitem faido zatolo tea vixim to chinta. Punn uprant, to Jehovacho mog korunk lagta tednam sobhentlea bhav-bhoinnank toxench herank apunn koso modot korunk xokta hea vixim to chintunk lagta. (Mt. 22:37-39) Sondhi melltta tednam Rajeachea kamank dan korunk aslolea sueoga vixim tumchea videartheank sangonk fattim soro nakat.

15. Somosia suttavi korunk, Bible videartheak ami koxi modot korunk zata?

 ¹⁵ Somosia ieta tednam kitem korchem tem tumi tumchea Bible videartheank xikoiat. Chintat, tumcho Bible videarthi bautizm gheunk naslolo ek porgottnnar zaun asa. Sobhentlea eka bhavan vo bhoinnin apleak dukhoilam mhunn to tumkam ieun sangonk puro. Tea vellar, konn sarko vo konn chukla hem sangchea poros tannem kitem korunk zai, hea vixim Bible kitem sangta tem tumi taka somzaiat. To tea bhavak vo bhoinik bogsun tea vixim visronk xokta. Punn, taka hem korunk zaina zalear, tankam ‘zoddun gheunk’ tannem tanchea lagim mogall ani doiall utramnim ulounk zai. (Matev 18:15 sor korat.) Tachea lagim kitem ulounchem, hea vixim poilinch toiari korunk tumchea videartheank modot korat. Hi somosia suttavi korunk taka JW Library^® app, Research Guide for Jehovah’s Witnesses, ani jw.org^® koxi uzar korchi hem dakhoiat. Bautizm gheunchea poilinch somosia koxi suttavi korchi hem to xiklo zalear bautizm ghetlea uprant sobhentlea bhav-bhoinnam sangata bori ixttagot samballunk taka sompem zatolem.

16. Tumi tumchea Bible obheasak her porgottnnarank tumchea sangata vhortat tednam kitem faido zata?

¹⁶ Tumchea sangata Bible obheasak sobhentlea herank ani sorkittachi dekhrekh korpi bhav ieta tednam taka vo tachea bailek vhoronk zata. Kiteak? Her porgottnnarank tumchea Bible obheasak vhortat tednam anikui faide asat. Tumi modot korunk xokona toslea thoddea vixoi-ancher te taka modot korunk xoktat. Udharonnak, sigar voddchi sonvoim soddunk tumchea Bible videarthean zaito proitn kelo astolo. Punn taka ti soddunk zaunk na mhunn chintat. Tor tumi oslea eka porgottnnarak tumchea sangata vhoronk zata zannem zaito proitn korun sigar voddchi sonvoim soddlea. Tor to tumchea videartheak hea vixim faideak poddttat tosle sol’le diunk xokta. Ek onnbhovi bhava fuddlean tumkam Bible obheas gheunk kotthin dista zalear tumi tea bhavak to Bible obheas gheunk sangonk zata. Bible obheas konnem-i gheum, herank tumchea sangata vhorta tednam tumchea Bible videartheak faido zatolo. Deva sangata Bible videarthean apli ixttagot ghott korchi, ho amcho dhei zaun asa mhunn ugddas dovrat.

17-18. Tumi ek Bible obheas bond korcho vo na ho nirnoi ghetana khoinchea vostuncher dhean diunchi goroz asa?

¹⁷ Tumcho videarthi aplea jivitant bodlav korina zalear kednam tori tumi tumkam ho prosn vicharcho poddttolo. ‘Hanvem ho Bible obheas bond korcho kai?’ Ho nirnnoi ghetana tumchea Bible videartheachi poristhiti ani tank ugddas dovrat. Thoddim heram poros rokddinch vaddavoll kortat. Tumi tumkanch vicharat, ‘Mhozo videarthi aplea poristhiti ani tanke pormomnem vaddavoll korit asa kai?’ ‘To xikta tem “pallunk” vo apnnaunk tannem survat kelea kai?’ (Mt. 28:20) Eka videartheak xis zaunk chodd vell lagonk xokta punn tannem aplea jivitant bodlav korit ravonk zai.

 ¹⁸ Tumcho ek videarthi thoddo temp xiklea uprant pasun aplea jivitant kainch bodlav korina zalear kitem? Chintat, tumchea videarthean Bible Kitem Xikoita hem pustok obheas korun sompoila, ani Remain in God’s Love hea pustokantlean obheas korunk suru kela. Tori punn, to Jezuchea mornnachea Ugddas Disa vo eka mittingek pasun hajir zaunk na. Ani lhan-lhan karonnank lagon, to obheas gheta tea disa obheas naka mhunn sangta. Oslea vellar tumchea Bible videarthea lagim tumi spoxtt ritin ulounchi goroz asa. *

19. Tumcho Bible videarthi Bible obheasak mhotv dina oxem tumkam dista zalear tumi taka kitem sangtolim, ani tednam tumkam koslo nirnnoi gheuncho poddot?

¹⁹ Tumi tachea lagim ho prosn vicharun hea vixim ulounk suru korunk zata. ‘Tuka ek Jehovacho Sakxi zaunk sogleam-von vhodd oddchonn kitem mhunn tuka dista?’ ‘Mhaka Bible xikonk avoddtta, punn hanv ek Jehovacho Sakxi kednanch zaunchona,’ oso ghoddie to videarthi zobab diunk puro. Thoddo temp obheas zalear uprant pasun, taka oxench dista zalear to obheas ani fuddem vhoronk koslo tori faido asa kai? Vo, to videarthi ghoddie apunn kiteak lagon fattim sorta tem sangonk puro. Udharonnak, apleak ghora-ghora vochon porgottnnim korunk zaunchich na mhunn taka disonk puro. Punn, taka koxem dista tem tumkam atam koll’llem dekhun tumi taka modot korunk pavtolim.

20. Ek Bible obheas ami bond korunk zai vo naka, ho nirnnoi gheunk Itihas 13:48 amkam koso modot korta?

²⁰ Dukhachem mhunnttlear, thodde videarthi Ezekielachea disamnim asloloea Israelitkaram sarkim astat. Zanche vixim Jehovan Ezekielak sanglem: “Ani tum mhollear tankam fokot ek mogachim gitam gavpi, modhur talleacho ani vazontram hikmotin vazovpi. Tujim utram aikotat, punn tankam pallo dinant.” (Ez. 33:32) Amchea Bible videartheak ami Bible obheas bond korta mhunn sangonk amkam ghoddie kotthin zaunk xokta. Punn ‘kallachi sompadnnim pavlea’ mhunn ami ugddas dovrunk zai. (1 Kor. 7:29) Tor vaddavoll korinant toslea videartheam sangata ami Bible obheas korit ravchea bodlek “sasnik jivit zoddunk favo asat,” tankam sodunk ami proitn korunk zai.—Itihas 13:48 NW, vachat.

21. 2020 hea vorsachem vers kitem, ani hem amkam kitem korunk urba dita?

²¹ Xis korchem kam anink bore toren korunk 2020 hea vorsachem vers amkam urba dita. Galileiachea eka dongracher zalolea tea mhotvachea mittingent Jezun uloil’lim thoddim utram tantunt asat: “Vochun soglea raxttrank Mhoje xis korat . . . , tankam snan diat.”—Mt. 28:19.