1. Dev amcho mog korta dekhun amkam koxem bhogta?

“DEV mhollear moguch,” oxem apostl Juanvan boroilem. (1 Juanv 4:8) Him utram vachtat tednam amkam hem mhotvachem sot ugddasak ieta: Amkam jivit Deva thaun ieta ani mog pasun amkam tachea thaunuch melltta. Jehova amcho mog korta. To amcho mog korta mhunn ami zannam aslolean amkam khuxalkai, dhadosponn ani surokxotai melltta.

2. Matev 22:37-40-a pormonnem, sogleam-von vhoddleo don adnea khoincheo, ani dusri adnea pallunk amkam kiteak kotthin zaunk xokta?

² Kristanvamnim mog korunk zai vo na, hem tannim vinchun kaddunk zaina. Karonn eka-mekacho mog korop hi Deva thaun ek adnea zaun asa. (Matev 22:37-40 vachat.) Amkam Jehovachi bori vollokh asta tednam poili adnea pallunk amkam sompi zata. Karonn Jehova ek poripurnn Dev, taka amchi kallji asa ani to amchea sangata doiall toren vagta. Punn dusri adnea pallunk amkam kotthin zaunk xokta. Kiteak? Karonn amchi bhav-bhoinnam ji amchim sogleam-von lagxil’lim xezarim zaun asat, tim opurnn asat. Taka lagon thodde pavtti tim hea toren ulounk vo vagonk xoktat zaka lagon tim amchi porva korinant vo tankam amcho mog na, oxem amkam disonk puro. Punn hi adnea pallunk kotthin zaunk xokta mhunn Jehova zannam. Taka lagon, ami eka-mekak mog kiteak ani koso dakhouncho hea vixim tannem thoddea Bible boroupeank borounk lailem. Tantuntlo ek boroupi Juanv aslo.—1 Juanv 3:11, 12.

3. Juanv kitea vixim zor dita?

³ Kristanvamnim eka-mekacho mog korunk zai mhunn Juanvan zaite pavtti boroilem. Tin xubhvortoman boroupeamnim sangata mellon “mog” hem utor aplea  boroupant kitle pavtti uzar kelem, tachea poros chodd pavtti Juanvan tachea ek xubhvortomanant uzar kelem. Juanv sumar xembor vorsancho aslo tednam tannem aplem xubhvortoman ani tin chittio boroileo. Ek Kristanv korta tem soglem mogan korunk zai mhunn hea boroupam thaun amkam kollon ieta. (1 Juanv 4:10, 11) Punn hem khorem mhunn Juanv uprant xiklo.

4. Juanv sodanch heram lagim mogan vagtalo kai?

⁴ Juanv tornnatto aslo tednam, to sodanch mogan vagonaslo. Udharonnak, Jezu ani tache xis ek pavtti Samariachea ganvantlean Jerusalamak voitale. Tea ganvchea lokamnim tancho poramos korunk na. Tednam Juanvan kitem mhunnttlem? Sorgavoilo uzo ieun tea lokank lasun uddounk hukum dium kai, mhunn tannem Jezuk vicharlem! (Lukas 9:52-56) Anik ek pavtti Juanv her apostlam sangata mogan vagonk na. Juanvan ani tachea bhavan Jezuk aplea Rajeant tankam mhotvachi vhodd podvi di mhunn sangonk ghoddie aplea avoik Jezu lagim dhaddli. Hea vixim her apostlank koll’llem tednam te Jakobacher ani Juanvacher ragar zale! (Mt. 20:20, 21, 24) Juanvan itleo chuki keleo tori astana, Jezun tacho mog kelo.—Juanv 21:7.

5. Hea lekhant ami kitem xiktolim?

⁵ Hea lekhant ami Juanvachea udharonnacher ani tannem moga vixim jem boroilam tacher dhean ditolim. Oxem kortat tednam ami bhav-bhoinnank koso mog dakhounk xoktat tem ami xiktolim. Tea bhair, eklo familicho vhoddil aplea familicho mog korta mhunn khoinchea eka mhotvachea ritin dakhounk xokta, tem-ui ami xiktolim.

6. Amcho mog korta mhunn Jehovan koxem dakhoilam?

⁶ Dusreank mog dakhovop mhunnttlear, tanchea vixim borem chitop vo tanchea sangata borea toren ulovop mhunn ami chitunk puro. Punn tanchea pasot ami doiall korneo kortat tednam ami tankam khoro mog dakhoitat. (Jakob 2:17, 26 sor korat.) Udharonnak, Jehova amcho mog korta. (1 Juanv 4:19) Ani to amcho mog korta mhunn tannem aplea utramnim Bible-ant sanglam. (St. 25:10; Rom. 8:38, 39) Punn to fokot sangta mhunn nhoi, punn to kitem korta tantuntlean to amcho mog korta mhunn amkam khatri melltta. Juanvan boroilem: “Aplea ekleach Puta vorvim amkam Jivit mellche khatir Devan Taka sonvsarant dhaddlo: hantum Dev amcho mog korta mhonn ugddapem zalem.” (1 Juanv 4:9) Jehovan aplea mogall Putak amchea pasot tras sosun moronk dilo. (Juanv 3:16) Hantuntlean Jehova amcho khub mog korta mhunn amkam purnn khatri melltta.

7. Amcho mog asa mhunn Jezun koxem dakhoilem?

 ⁷ Apunn tancho mog korta mhunn Jezun aplea xisank sanglem. (Juanv 13:1; 15:15) To tancho mog korta mhunn tannem fokot utramnim sangonk na, punn korneamnim dakhoilem. Tannem mhunnttlem: “Konnem zor aplea ixttam pasot aplo jiv dilo, hache poros vhodd mog konnak na.” (Juanv 15:13) Jehovan ani Jezun amchea pasot jem kitem kelam tea vixim ami niall kortat tednam ami kitem korunk fuddem soronk zai?

8. Ami kitem korunk zai mhunn 1 Juanv 3:18-ant sanglam?

⁸ Ami Jehovachem ani Jezuchem aikotat tednam amkam tancho mog asa mhunn dhakhoitat. (Juanv 14:15; 1 Juanv 5:3) Ami khas korun eka-mekacho mog korunk zai mhunn Jezun adnea dil’li. (Juanv 13:34, 35) Ho mog ami bhav-bhoinnank fokot utramnim nhoi, punn amchea korneamnim dakhounk zai. (1 Juanv 3:18 vachat.) Tor amkam tancho mog asa mhunn ami khoinchea thoddea vattamnim dakhounk zata?

9. Mog aslo mhunn Juanvan kitem kelem?

⁹ Juanv aplea bapai sangata nustem dhorpachem kam korun zaite poixe zoddunk xoktalo. Punn tachea bodlek tannem aplem jivit herank Jehova vixim ani Jezu vixim sot xikounk uzar kelem. Hem korop taka sompem naslem. Karonn to porgottnni kortalo mhunn taka zaite pavtti dhumallo soscho poddlo. Ani xevottak poilea xekddeachea nimmannea vorsamnim taka koidi kel’lo tednam to zantto aslo. (Itihas 3:1; 4:1-3; 5:18; Prok. 1:9) To koidi aslo tednam pasun taka dusreancho mog asa mhunn tannem dakhoun dilem. Udharonnak to Patmos hea zunvear aslo tednam tannem Prokasovnni hem pustok boroilem ani tem tannem sobhank dhaddlem dekhun “rokddea-rokddem kitem-kitem ghoddchem asa” tem tankam kollon ailem. (Prok. 1:1) Ghoddie taka thoim thaun suttka mell’llea uprant tannem Jezuchea jivita vixim ani porgottnne vixim xubhvortoman boroilem. Tea bhair, aplea bhav-bhoinnank urba ani ghottai diunk tannem tin chitti boroileo. Tumi Juanvachi dekh koxi gheunk zata?

10. Tumi lokancho mog kortat mhunn koso dakhounk zata?

¹⁰ Tumi tumchea jivitant kitem vinchun kaddttat tantuntlean tumkam lokancho mog asa vo na tem kollon ietolem. Tumi tumcho soglo vell ani takot tumcheach pasot uzar keloli, poixe zoddunk uzar keloli ani svota pasot nanv zoddunk uzar keloli hea Soitanachea sonvsarachea lokank zai. Punn sonvsarbhor zaite Jehovache sovok bori khobor porgottunk ani lokank Deva sangata ixttagot zoddunk modot kortat. Hem korunk tim apleachean zata titlo vell uzar kortat. Ani thoddim purnn vell porgottchem ani xikouchem kam kortat.

11. Zaitim Kristanvam apleak Jehovacho ani bhav-bhoinnancho mog asa mhunn koxim dakhoitat?

¹¹ Apnnak ani aplea familik posunk zaitea Kristanvank purnn vell sirvis korunk poddtta. Tori astana, tim apleachean zata titlo Devachea songottnnek tenko ditat. Udharonnak, thoddim odruxttank sampoddloleank modot kortat ani her zannam sogottnnechea bandkamachea kamank tenko ditat ani toxench sogleank sonvsarbhorchea kamak dan diunchi sondhi asa. Tankam Devacho ani lokancho mog asa mhunn tim oxim kortat. Tea bhair, ami dor sumanak mittingek hajir zaun bhag ghetat tednam amchea bhav-bhoinnam pasot ami mog dakhoitat. Ami thoklolim astat tednam pasun mittingek hajir zatat. Amkam bhirant dislear pasun ami zobab ditat. Ani amkam somosia aslear pasun ami mittinge poilim ani uprant herank urba ditat. (Heb. 10:24, 25) Amchim  bhav-bhoinnam kortat tea hea soglea kamam pasot ami kitlim upkari asat!

12. Juanvan aplea bhav-bhoinnak anik khoinchea toren mog dakhoilo?

¹² Juanvan aplea bhav-bhoinnank fokot xabaski diunuch nhoi, punn sol’lo diun pasun aplo mog dakhoilo. Udharonnak, aplea chittimnim Juanvan aplea bhav-bhoinnancho bhavarth ani borea kamam pasot xabaski dili. Punn patok korop kitlem gombhir tea vixim pasun tannem sol’lo dilo. (1 Juanv 1:8–2:1, 13, 14) Teach bhaxen, amchi bhav-bhoinnam kortat tea borea kamam pasot ami tankam xabaski diunk zai. Punn tankam ek vaitt sobhav asa zalear vo Jehova sangata tanchi ixttagot pidd’ddear zaunk xokta toslem tim kitem-i kortat zalear tankam mogan sol’lo diunk ami fattim sorchem nhoi. Eka ixttak sol’lo diunk dhirachi goroz asta. Punn khorim ixttam eka-mekak sol’lo ditat mhunn Bible sangta.—Mho. 27:17.

13. Amkam bhav-bhoinnancho mog asa zalear ami kitem korchimnant?

¹³ Anik ek vatt mhunnttlear, ami amchea bhav-bhoinnancho mog kortat zalear ami thoddeo vostu korchimnant. Udharonnak, tannim kitem-i mhunnttlem zalear ami rokddinch ragar zaunchimnant. Jezu morchea thoddea tempa poilim kitem zal’lem tacho ugddas korat. Jivit mellonk zai zalear tannim aplem mas khaunchem poddttolem ani aplem rogot pieunchem poddttolem mhunn Jezun aplea xisank sanglem. (Juanv 6:53-57) Jezun sanglolem tem tachea zaitea xisank manun gheunk kotthin zalem dekhun tim taka soddun gelim. Tache khore ixtt zoso Juanv taka soddun vochonk na. Jezun kitem mhunnttlem tem tankam somzonk na ani te ojap zale astole. Punn Jezun sanglolem tem chukichem aslem mhunn chintun te tacher ragar zaunk na. Bodlek, Jezu sangtalo tem sot aslem mhunn tankam visvas aslo. (Juanv 6:60, 66-69) Teach bhaxen, amchim ixttam kitem sangtat tem aikon ami rokddinch ragar zaunchim nhoi. Tachea bodlek tim kitem sangonk sodhtalim tem somzaunk ami tankam sondhi diunk zai.—Mho. 18:13; Up. 7:9.

14. Ami amchea bhav-bhoinnancho dves kiteak korcho nhoi?

¹⁴ Ami amchea bhav-bhoinnancho dves korcho nhoi mhunn pasun Juanvan sanglem. Hea sol’leak ami kan dinant zalear Soitan amcher probhav ghalunk xokta. (1 Juanv 2:11; 3:15) Poilea xekddeachea xevottak thoddea Kristanvam sangata oxem zalem. Tea vellar, Devachea lokamnim eka-mekacho dves korunk  ani tanchea modem futt ghalunk Soitanan zaito proitn kelo. Tor Juanvan apleo chitti boroileo tednam Soitana sarko sobhav aslolo lok Kristanv sobheche bhag zal’le. Udharonnak, Diotrefes eka sobhent bhavam modem futt ghaltalo. (3 Juanv 9, 10) Sonchalon monddollan sobhank dhaddlolea prothinidink to man dinaslo. Taka avoddna toslea lokankancho poramos kortolea bhav-bhoinnank, sobhentlean bhair ghalunk to proitn kortalo. Hem ekdom vaitt aslem! Aiz pasun Soitan Devachea lokam modem futt ghalunk khub proitn korta. Tor ami amchea bhav-bhoinnancho kednanch dves korcho nhoi.

15. Familichea vhoddilan kitem ugddas dovrunk zai?

¹⁵ Ek familicho vhoddil aplea familicho mog korta mhunn dakhounk ek vatt mhunnttlear, to aplea familicheo gorzo purnn korta. (1 Tim. 5:8) Punn Deva sangata aplea familichi ixttagot samballunk modot korop chodd gorjechem asa mhunn pasun tannem ugddas dovrunk zai. (Mt. 5:3) Jezun familichea vhoddilank koxi ek bori dekh dovorlea ti ami polloum-ia. Jezu khambear umkollttalo tednam taka aplea famili vixim chinta asli mhunn Juanvachea xubhvortomana thaun amkam kollon ieta. Jezu khambear aslo tednam tachea avoichea boglek Juanv ubo aslo. Jezu khub duk’khan aslo tori astana tannem aplea avoicho samball korunk Juanvak saglem. (Juanv 19:26, 27) Jezuchi bhav-bhoinnam Mariecheo gorzo purnn korunk xoktalim. Punn tednam meren tim konnuch tache xis zaunk naslim. Tor tichea gorzam sangata Jehovachi seva korunk tika modot korta toslea konnachi tori Jezuk goroz asli.

16. Juanvak kosleo zobabdari asleo?

¹⁶ Juanvak zaiteo zobabdari asleo. To ek apostl zal’lean tannem porgottnnechea kamant fuddakar gheunk zai aslo. Ghoddie to kazari aslo dekhun taka aplea familichea gorzam sangata tankam Jehova lagim ixttagot zoddunk modot korchi goroz asli. (1 Kor. 9:5) Juanvachea udharonnantlean aiz familiche vhoddil kitem xikonk xoktat?

17. Familichea vhoddilan Jehova lagim aplea familichi ixttagot ghott dovrunk tankam modot korop kiteak gorjechem?

¹⁷ Familichea vhoddilak zaiteo zobabdari astat. Udharonnak, Jehovachea nanvacho opman zaina zaunk to apli sirvis mhenotin korta. (Ef. 6:5, 6; Titak 2:9, 10) Taka  sobhentlea bhav-bhoinnank urba diunk ani kallji gheunchi zobabdari asta. Tea bhair, taka porgottnnechea kamant fuddakar gheunchi pasun zobabdari asta. Teach borabor tannem aplea bail-bhurgeam sangata sodanch Bible obheas korop gorjechem zaun asa. Oxem kelolean tancheo gorzo purnn zatat, tim khuxal astat ani Jehova sangata tanchi ixttagot ghott urta. To korta tea soglea vavra pasot tim tache upkari astat.—Ef. 5:28, 29; 6:4.

18. Juanvak kiteachi khatri asli?

¹⁸ Juanv zaitim vorsam jielo ani tachea jivitant zaiteo boreo ghoddnneo ghoddleo. Tacho bhavarth unno korunk xoktalo toslea zaitea oddchonneancho tannem fuddo kelo. Punn aplea bhav-bhoinnancho mog korunk ani Jezucheo her adnea pallunk apleachean zata tem soglem tannem kelem. Taka lagon, Jehova ani Jezu aplo mog kortat mhunn taka khatri asli. Ani hi khatri aslolean koslea-i trasancho fuddo korunk taka xokti mell’lli. (Juanv 14:15-17; 15:10; 1 Juanv 4:16) Aplea bhav-bhoinnancho mog korunk ani hem tachea utramnim ani korneamnim dakhounk Soitan ani tacho sonvsar Juanvak addaunk xokonaslo.

19. 1 Juanv 4:7 amkam kitem korunk urba dita, ani kiteak?

¹⁹ Juanva bhaxen ami pasun Soitanachea tabeant aslolea sonvsarant jietat. Hea sonvsaracho dev konnachoch mog korina. (1 Juanv 3:1, 10) Ani taka ami amchea bhav-bhoinnancho dves kelolo zai. Punn ami tancho mog kortat zalear to amchea khuxe add vochonk xokona. Tor ami amchea bhav-bhoinnancho mog kortat mhunn amchea utramnim ani korneamnim dakhoum-ia. Tednam ami Jehovachea familicho bhag zaun asat mhunn ami sontostolim ani toxench amchea jivitant pasun ami khuxal astolim.—1 Juanv 4:7 vachat.