1. David Raza sarkim thoddim, kosle prosn vicharunk xoktat?

AMKAM sogleank xantin jieunk zai. Ani amkam uskeam mekllem jivit jieunk avoddtta. Punn, kednam-kednam amkam chodduch uske zaunk xoktat. Takach lagon Jehovache thodde sevok Raza Davidan Jehovak vicharlem toxem vichartat: “Kedna porian mhojea otmeant soschi hanvem khont, dis-rat dukh mhojea kallzant?”—St. 13:2.

2. Hea lekhant ami kitem bhasabhas kortolim?

² Amkam thodde pavtti uske zatat tem khorem, punn ami thoddeo vostu kelolean amche uske unne zaunk xoktat. Tor hea lekhant ami kiteak lagon uskeunk xoktat, tea vixim ami polloitolim. Ani uprant, uske zatat tednam amkam xant ravonk modot korunk xoktat teo sov vatto ami polloitolim.

3. Khoinchea karonnak lagon ami uskeunk xoktat, ani ami tem pois korunk xoktat kai?

³ Zaitea karonnak lagon amkam uske zaunk xoktat, ani thoddeo vostu ghoddttat teo ami addaunk xokonant. Udharonnak, ami dor vorsa vaddtta ti mhargai thambounk xokonant. Toxench amchea sangata kam korpi vo iskolant sangata xikpi bhurgim amkam fottingponn korunk vo onoitik kam korunk kitle pavtti tallnnent ghalunk proitn kortolim tem amchea tabeant na. Ani amchea vattarant zata to ot’teachar  ami bond korunk xokonant. Amkam hea oddchonneancho fuddo korcho poddtta. Karonn Bible totvam pormonnem cholonant toslea lokam modem ami jietat. Thodde lok “hea sonvsaracheo dhasti” vo uskeank lagon Jehovachi seva korop bond kortole mhunn hea sonvsaracho dev, mhunnche Soitanak khobor asa. (Mt. 13:22; 1 Juanv 5:19) Tor, hea sonvsarantlea somosiank lagon lok chodd usketat tem polloun ami ojap zainant!

4. Amchea somosiam vixim ami chodduch usketat zalear kitem zaunk xokta?

⁴ Ami amchea somosiam vixim itlim uskeunk xoktat ki teo soddun ami ghoddie anik kainch chintunk voichimnant. Udharonnak, amchea lagim amkam zai teo vostu gheunk ghoddie poixe aschena vo ami duent zaun kamak vochonk ghoddie pavchimnant vo ami amchem kam ghoddie hogddaitolim, oxem chintun ami uskeunk xoktat. Tea bhair, amcher tallnni ieta tednam ami ghoddie Devache kaide moddit mhunn ami uskeunk xoktat. Toxench, beginuch Soitanak sangat diupi amcher akromonn kortole tednam ami kitem kortolim kai, mhunn chintun ami uskeunk xoktat. Tor, ‘Hea vostum vixim hanv usketam tem chukichem kai?’ mhunn ami chintunk puro.

5. “Huskeum nakat” mhunn Jezun sanglem tednam to kitem sangonk sodhtalo?

⁵ Jezun aplea pattlavdarank “huskeum nakat” mhunn sanglem, hem ami zannant. (Mt. 6:25) Hacho orth ami uskeunchech nhoi, oxem Jezun sanglem kai? Na, toxem nhoi! Karonn Jehovache adle thodde visvaxi sevok pasun usketale, punn Jehova tancher ragar zaunk na. * (1 Raz. 19:4; St. 6:3) Ami amchea jivitant goroz tea vostum vixim chodduch usketat zalear, Jehovachea sevek poilo zago diunk pavchimnant mhunn Jezu zannam aslo. Tor ami chodduch uskelolim Jezuk naka aslem dekhun him utram mhunnon to amkam buzvonn diunk sodhtalo. Tor ami usketat tednam ami kitem korunk zai? “ Hem Koxem Korchem,” hem boks polloiat.

6. Filipkarank 4:6, 7-a pormonnem, ami usketat tednam amkam kitem modot korunk xokta?

⁶ (1) Zaite pavtti magnnem korat. Aichea somosiam vixim tumkam usko zata tednam tumi Jehova Deva lagim tumkam modot kor mhunn magnnem korunk zata. (1 Ped. 5:7) Tumi toxem kortat tednam, tumchea “gineana poros vorti Devachi xanti” to tumkam ditolo. (Filipkarank 4:6, 7 vachat.) Ani ti xanti to aple povitr xokte udexim amkam ditolo.—Gal. 5:22.

7. Jehova lagim magnnem kortana ami kitem ugddas dovrunk zai?

⁷ Jehova lagim magnnem kortana tumkam koxem bhogta tem soglem taka sangat. Tumkam aslolea umkeach torechea somosia vixim taka sangat. Ani tachea vixim tumkam koxem bhogta tem-ui sangat. Ti somosia suttavi zaunk xokta zalear, ti suttavi korunk Jehova lagim tumkam zannvai ani xokti di mhunn magat. Tumchea somosia vixim tumi kainch korunk xokonant zalear chodduch uskenastana ravonk tumkam modot kor mhunn Jehova lagim magat. Tumi tumchea umkeach somosia vixim magnnem kortat tednam Jehova tumchea magnneak koso zobab dita tem tumkam sarkem kollon ietolem. Tumchea magnneacho zobab tumkam rokddoch mellona zalear, tea vixim magnnem korchem bond korinakat. Tumi tumchea umkeach somosia vixim magnnem korit ravlolem Jehovak zai.—Lukas 11:8-10.

8. Amchea magnneant Jehovak ami anik kitem sangonk zai?

 ⁸ Tumchea uskeam vixim Jehovak magnneant sangtana, tumi kitea pasot upkari asat tea vixim taka sangonk visronakat. Oxem kelolean amkam zaiteo somosia astat tednam, borea vostu vixim chintlolean amkam faido zata. Punn tumkam koxem bhogta tem Jehovak koxem sangop, hem tumkam somzona zalear tumi kitem korunk zata? Ugddas dovrat, ‘Mhaka modot kor!’ itlench ami maglear pasun Jehova aikotolo.—2 It. 18:31; Rom. 8:26.

9. Amkam bhirant dista tednam ami kitem korunk zai?

⁹ (2) Jehovachea zannvaiecher patieun ravat, tumchea svotachea nhoi. Izaiasachea disamnim Asirieche lok akromonn kortole mhunn Judachea lokank bhirant asli. Tor surokxa mellonk tannim Ejiptachi modot magli. (Iz. 30:1, 2) Punn, Ejiptkaranchi modot ghetli zalear te trasant poddttole mhunn Jehovan adim fuddench tankam xittkailolem. (Iz. 30:7, 12, 13) Tor khori surokxa mellonk zai zalear, tannim kitem korunk zai tem Jehovan Izaiasa udexim sanglem. Tannem mhunnttlem: ‘Tumi xant ravun Jehovacher visvas tthevttat zalear tumi bollixtt zatolim.’—Iz. 30:15b.

10. Khoinchea poristhitimnim ami Jehovacher patietat mhunn amkam dakhounk poddot?

¹⁰ Amkam Jehovacher visvas asa mhunn amkam kednam dakhounk poddot? Thoddim udharonnam polloum-ia. Chintat, tumkam oslem ek kam melltta zaka tumi chodd vell diunk poddtt’ttolo. Ani tea kamak lagon tumi atam kortat titli Jehovachi seva tumkam ghoddie korunk mellchina. Vo tumchea kamachea zagear Jehovacho mog korinant toslim konn tori tumchea lagim kazar zaunk sodhta. Vo tumchea familintlim tumkam oxem mhunnot: “Tuka hanv zai vo tuzo Dev, hem tunvem vichun kaddunk zai.” Hea dor eka poristhitint, nirnnoi gheunk tumkam kotthin zaunk puro. Punn Jehova tumkam tea vellar margdorxon ditolo mhunn tumi khatri dovrunk zata. (Mt. 6:33; 10:37; 1 Kor. 7:39) Tor atam ho prosn ieta, Jehovacher patieun tumi tachem margdorxon pallttolim kai?

11. Lok amkam dhumallo ditat tednam xant ravonk, Bible-antlea khoinchea udharonnancher niall kelolean amkam modot zatoli?

¹¹ (3) Borea ani vaitt udharonnantlean xikat. Xant ravon Jehovacher visvas dovrop ekdom gorjechem mhunn zaitea Bible-antlea udharonnantlean kollon ieta. Hea Devachea sevokanchea udharonnancher tumi niall kortat tednam, tancher dhumallo ailo tea vellar xant ravonk tankam koxi modot zali tea vixim chintat. Udharonnak, Judevanchea sogleant vhoddlea korttan porgottnni bond korunk apostlank hukum dilo tednam, te bhieunk nant. Tachea bodlek, tannim dhiran oxem sanglem: “Monxanchi adnia nhoi, punn Devachi adnia ki ami pallunk zai.” (Itihas 5:29) Tankam marle tori astana, te ghabrunk nant. Karonn Jehova tankam modot kortolo mhunn te zannam asle. Tankam Jehovachi maniotai asli ani te bori khobor porgottit ravle. (Itihas 5:40-42) Toxench, anik eklo xis, Istevak jivexim marchea poilim to itlo xant aslo ki “tachem mukhamoll eka devdutachem mukhamoll koxem distalem.” (Itihas 6:12-15) Karonn Jehovachi maniotai asa mhunn taka khatri asli.

12. 1 Pedru 3:14 ani 4:14-a pormonnem, amkam dhumallo ditat tednam pasun ami kiteak khuxal ravonk xoktat?

¹² Jehovan apostlank vizmit korpachi xokti dil’li dekhun to tanchea sangata asa mhunn tankam khatri asli. (Itihas 5:12-16; 6:8) Jehova aiz amkam vizmitam korunk xokti dina hem khorem, punn Devak manta tem kortana ami dhumallo sonstat tednam amkam tachi maniotai asa ani to amkam povitr xokti dita mhunn aplea Utrantlean khatri dita. (1 Pedru 3:14; 4:14 vachat.) Tor, khor dhumallo ieta  tednam ami kitem kortolim hea vixim ami atam uskeunchi goroz na. Tachea bodlek, Jehova amkam modot kortolo ani vattaitolo mhunn tacher asloli amchi khatri ami ghott korunk zai. Adlea xisam bhaxen, ami Jezuchea hea utrancher visvas dovrunk zata: “Hanv tumkam oxi jib ani zannvai ditolom, ki ti addaunk ani ticher portem ulounk tumchea sogllea dusmanam kodde ghoddchem na.” Ani toxench tannem mhunnttlem: “Thir ravat, ani oxem khorem Jivit tumi zoddunk pavtoleat.” (Lukas 21:12-19) Tea bhair, aplea visvaxi sevokank porot jivont korunk tanchea vixim sogli mahiti Jehova ugddas dovorta mhunn visrom nakat.

13. Xant ravonk ani Jehovacher visvas dovrunk chukloleanchea udharonnacher niall kelolean amkam koso faido zata?

¹³ Xant ravonk ani Jehovacher visvas dovrunk chukloleanchea udharonnantlean pasun ami xikonk xoktat. Oxem kelolean, tannim kel’leo chuki ami korina zaunk amkam modot zatoli. Udharonnak, Asa Raza-chea razvottkechea survatek Juda raxttra add vhodd soin aili tednam tannem Jehovacher visvas dovorlo. Ani Jehovan taka zoit dilem. (2 It. 14:9-12) Punn uprant, Israelacho Raza Baasha apli lhan soin gheun Judah raxttra add ailo tednam Asa-n poilim kel’lem toxem korunk na. Jehovachi modot magchea bodlek tannem rupem ani bhangar diun Siriechi modot magli. (2 It. 16:1-3) Ani aplea jivitachea xevottak Asa khub duent poddlo tednam, Jehova apnnak modot kortolo mhunn tannem visvas dovrunk na.—2 It. 16:12.

14. Asa-n kel’lea chuki thaun ami kitem xikonk zata?

¹⁴ Asa-cher somosia aili tednam modotik lagon survatek to Jehovacher patieun ravlo. Punn uprant to apnnacheruch patieunk laglo. Asa-n Siriechi modot ghetlolean Israela thaun Judak xanti mell’lli koxi disli astoli. Punn ti xanti chodd temp uronk na. Jehovan Asa-k aplea provadia udexim sanglem: “Tunvem Sorvespora Devacher nhoi punn Siriechea razacher tuzo visvas thevlo dekhun Siriechea razachi fouz tujea hatantli suttun vetoli.” (2 It. 16:7) Tor, Devachea Utrachi modot ghenastana ami amchi somosia suttavi korunk xoktat hem chintop ami pois korunk zai. Toxench, amkam ek nirnnoi gheunk thoddoch vell asta tednam pasun ami xantponnim Jehovacher patieunk zai. Tednam amkam ies mellttolem.

15. Ami Bible vachtat tednam kitem korunk zata?

¹⁵ (4) Bible-antlim versam tondd-patt korat. Xant ravop ani Jehovacher visvas dovrop kitlem gorjechem, tem dakhoita toslim Bible-antlim versam tumkam mellttat tednam tantuntlim thoddim tondd-patt korunk proitn korat. Oxem korunk, tumi tim vhoddlean vachunk zata ani boroun dovrun tacher zaite pavtti nodor marunk zata. Joshua zannvaien vagtolo zalear, tannem Somurtichem pustok sodanch vachunk zai mhunn Jehovan taka sanglolem. Oxem kelolean, tantuntlim utram taka bhienastana Devachea lokank vatt dakhounk modot kortolim asli. (Josh. 1:8, 9) Teach bhaxen, tumi usketat vo tumkam bhirant dista zalear, Bible-antlim zaitim versam tumkam monachi xanti diunk xoktat.—St. 27:1-3; Mho. 3:25, 26.

16. Jehova amchea bhav-bhoinnam udexim amkam xant ravonk ani tacher visvas dovrunk koso modot korta?

¹⁶ (5) Devachea lokam sangata vell sarat. Jehova amchea bhav-bhoinnam udexim amkam xant ravonk ani tacher visvas dovrunk modot korta. Ami mittingek voitat tednam machier thaun jem kitem aikotat, bhav-bhoinnanche zobab aikotat, ani mittinge poilim ani uprant bhav-bhoinnanchea urbeborit utram aikotat tednam amkam faido zata. (Heb. 10:24, 25) Tea bhair, sobhent  aslolea amchea laginchea ixttank ami amchim bhavnam sangtat tednam pasun amkam khub urba melltta. Eka ixttan sanglolim ‘doiall utram’ amche uske pois korunk khub modot korunk xoktat.—Mho. 12:25.

17. Hebrevank 6:19-ant sanglolea pormonnem, amkam kotthin poristhiticho fuddo korcho poddtta tednam Devachea Rajeacho bhorvonso amkam xant ravonk koso modot korunk xokta?

¹⁷ (6) Tumcho bhorvonso ghott dovrat. Devachea Rajeacho bhorvonso ‘eka nangra sarko amchem jivit surokxit samballtta.’ Hacho orth, amkam kotthin poristhitincho fuddo korcho poddtta tednam vo uske zatat tednam ho bhorvonso amkam thir ravonk modot korta. (Hebrevank 6:19 vachat.) Fuddarak Jehovan bhasail’lea, uske naslolea jivita vixim niall korat. (Iz. 65:17) Vaittponn nastana, soglea xant aslolea novea sonvsarant tumchem jivit koxem astolem tea vixim chintat. (Mik. 4:4) Tumchea bhorvonxea vixim dusreank sangtat tednam pasun tumcho bhorvonso anik ghott zata. Tor porgottnnent ani xis korchea kamant tumchean zata tem soglem korat. Tumi oxem kortat zalear, “tumcho bhorvanso sompadnnek pavo-sor, tumchi hurba thir samballunk” pavtolim.—Heb. 6:11.

18. Fuddarak kitem zaunk xokta, ani ami tacho koso fuddo korunk zata?

¹⁸ Hea sonvsaracho xevott lagim pavta toso, amkam zaitea somosiancho fuddo korcho poddttolo, zaka lagon amche uske vaddonk xoktat. Hea somosiancho fuddo korunk ani xant ravonk, ami amchea bollacher patieun ravonastana Jehovacher visvas dovrunk amkam 2021 vorsachem vers modot kortolem. Ani ieta tea vorsa Jehovachea hea bhasaunneacher amkam bhavarth asa mhunn ami korneamnim dakhoum-ia: “Xant ravun Mhojer visvas tthevxat tor, Hanv tumkam bollixtt kortolom.”—Iz. 30:15.