1-2. (a) Amcho mogacho konnui bhair poddla zalear, amkam tancho chodd ugddas kednam ieta? (b) Jezun morchea adlea ratik kitem kelem?

 AMCHIM mogachim konnui bhair poddon khub vorsam zaleant zalear pasun, amkam tancho khub ugddas ieta. Ani chodd korun tim bhair poddlolim tea disak, amkam tancho chodd ugddas ieta.

² Oxech toren, sonvsarbhor hozaramnim lok Jezu Kristacho khub mog kortat dekhun dor vorsak tachea mornnacho dis ugddas korunk tim ektthaim zatat. Ani ami pasun tanchea sangata mellon ietat. (1 Ped. 1:8) Karonn tannem amkam patkantlim ani mornnantlim soddounk aplo jiv bolidan kelo. (Mt. 20:28) Ani Jezuk pasun aplea xisamnim, tacho mornnacho dis ugddas kelʼlo zai aslo. Tea pasot, morchea adlea rati tannem tanchea sangata ek khas rat jevonn kelem ani tankam oxi adnea dili: “Mhozo ugddas korun oxench tumi korat.”—Lukas 22:19.

3. Hea lekhant ami kitem polloitolim?

³ Jezuchea mornnachea Ugddas Disak hajir zatat, tantuntlea fokot thoddeankuch sorgar jieuncho bhorvonso asa. Punn thoim hajir zatolea choddxea lokank, hea prithumer jieuncho bhorvonso asa. Tor he donui zome dor vorsak Ugddas Disak kiteak hajir zatat, ani thoim hajir zalolean tankam koso faido zata tem ami hea lekhant polloitolim. Tor poilim, ami sorgar jieuncho  bhorvonso asa, mhunnttlear obhixikt asat tim koslea karonnank lagon Ugddas Disak hajir zatat tem polloum-ia.

4. Ugddas Disak dovorlolo unddo ani dakhancho soro, fokot obhixikt Kristanvam kiteak khatat ani pietat?

⁴ Dor vorsak, obhixikt Kristanvam Ugddas Disak dovorlolo unddo khatat ani dakhancho soro pietat. Kiteak? Tem zannam zaunk Jezu morchea poilim, aplea xisam sangata Pask monoilea uprant kitem zalem tem polloum-ia. Jezun aplea ikra visvaxi xisank unddo ani dakhancho soro dilo ani tankam to khaunk ani pieunk sanglem. Haka Somiachem Rat Jevonn mhunnttat. Tea vellar Jezun tanchea sangata don korar kele—novo korar ani Rajeacho korar. * (Lukas 22:19, 20, 28-30) Hea koraram udexim, Jezuchea ikra xisank ani anik thoddea zannank, sorgar raza ani iadnik zaun seva korchi sondhi mellʼlli. (Prok. 5:10; 14:1) Tor fokot obhixikt Kristanv hea korarant asat dekhun tea zomeantlim prithumer asat tinch, Ugddas Disak unddo khatat ani dakhancho soro pietat.

5. Obhixikt Kristanvam tankam aslolea bhorvonxea vixim kitem ugddas dovortat?

⁵ Tea bhair, Ugddas Disak hajir zalolean, obhixikt Kristanvank tankam aslolea sorginchea bhorvonxea vixim niallunk sondhi melltta. Hea bhorvonxea vixim chintʼtana tankam khub khuxalkai bhogta. (Titak 2:13) Karonn tankam sorgar ek omor ani ovinaxi jivit jieunk mellttolem. Toxench, tim punorjivont zalʼlo Jezu Krist ani her obhixikt Kristanvam sangata mellon, Jehova asa thoim ravon tachi seva kortolim. (1 Kor. 15:51-53; 1 Juanv 3:2) Ho bhov vhoddlo sueog tankam Jehova Devan dila mhunn 1,44,000 obhixikt Kristanvam vollkhon ghetat. Punn tim moro porian visvaxi ravlearuch, tankam ho inam mellttolo mhunn tim ugddas dovortat. (2 Tim. 4:7, 8) Tor atam, ‘her menddram’ Ugddas Disak kiteak hajir zatat tem polloum-ia.—Juanv 10:16.

6. Dor vorsak her menddram pasun Ugddas Disak kiteak hajir zatat?

⁶ Her menddram Ugddas Disak hajir zatat tednam tim to unddo khainant ani dakhancho soro pienant tem khorem. Tori punn, thoim hajir zaunk tim khub khuxal zatat. Ani hem 1938 vorsa thaun suru zalem, jednam her menddram pasun Ugddas Disak hajir zaunk laglim. Hea vixim Mars 1, 1938-acho Pahrogopur oxem mhunntta: “Ugddas Disak, her menddramnim pasun hajir zavop ekdom sarkem zaun asa . . . Ho vell tankam-i khub khuxal zauncho vell zaun asa.” Zoxem ek zoddpem kazar zata tednam tanchim ixttam tanchea kazarak hajir zaunk khub khuxal zatat, teach bhaxen her menddram pasun Jezuchea Ugddas Disak hajir zaunk khub khuxal zatat.

7. Her menddram Ugddas Disachem bhaxonn aikonk kiteak axeun ravtat?

⁷ Her menddram pasun Ugddas Disak hajir zatat tednam tankam hea prithumer aslolea bhorvonxea vixim niallunk ek sondhi melltta. Khas korun, Ugddas Disak aslolem bhaxonn aikonk tim axeun ravtat. Karonn hea bhaxonant Kristachea Ek Hozar Vorsanchea Razvottkechea vellar, Jezu Krist ani tachea sangata raj choloupi 1,44,000 obhixikt Kristanv, munxakullak koslim besanvam ditole tem sangtat. Zoxem, hi prithum ek sobit bhag koxi zatoli, munxam koxe toren porot poripurnn zatolim, toxench, Izaias 35:5, 6; 65:21-23; ani Prokasovnni 21:3, 4-ant asloleo bhasaunneo koxeo purnn zatoleo, tea vixim  pasun uloitat. Tea vellar, novea sonvsarant tim ani tanchim mogachim jietolim tednam jivit koxem astolem, hea vixim her menddram niallttat tednam fuddara pasot aslolo tancho bhorvonso ani Jehovachi seva korit ravonk tancho nichov ghott zata.—Mt. 24:13; Gal. 6:9.

8. Her menddram Ugddas Disak anik koslea karonnak lagon hajir zatat?

⁸ Her menddram Ugddas Disak hajir zatat tednam tim obhixikt Kristanvank aplo mog ani tenko ditat mhunn dakhoitat. Ani Bible-ant, tim sangata mellon kam kortolim mhunn adim fuddench boroun dovorlam. Tea vixim atam ami polloum-ia.

9. Zekaria 8:23-antlean, her menddrank obhixikt Kristanvancho mog asa mhunn amkam koxem kollon ieta?

⁹ Zekaria 8:23 vachat. Hea bhasaunnentlean her menddrank obhixikt Kristanvacho kitlo mog asa tem kollon ieta. Hea versant, ‘ek Judev’ ani “tumche sovem” him utram prithumer urlolea obhixikt Kristanvank lagu zatat. (Rom. 2:28, 29) Toxench, “sogllea bhasanchea raxttrantle dha dadle” him utram her menddrank lagu zata. Te “Judevachea mangak dhortole” hacho orth, her menddram obhixikt Kristanvam sangata mellon visvaxiponnan Jehovachi bhokti kortolim. Ani heach karonnak lagon, Ugddas Disak obhixikt Kristanvam sangata her menddram pasun hajir zatat.

10. Ezekiel 37:15-19, 24, 25-ant sangloli bhasaunni purnn korunk Jehovan kitem kelam?

¹⁰ Ezekiel 37:15-19, 24, 25 vachat. Hea bhasaunnent, obhixikt Kristanvam ani her menddram modem ek lagxilʼlo sombond astolo mhunn amkam kollon ieta. Hea bhasaunnent amkam don boddiam vixim sanglam. Ek boddi ‘Judachea’ kullak suchit korta. (Hea kullantlean Israelachea razank vinchun kaddttale.) Hi boddi obhixikt Kristanvank lagu zata. Dusri boddi, ‘Efraimachea’ kullak suchit korta. Ani hi boddi, hea prithumer jieuncho bhorvonso asa tankam lagu zata. * Zoxem Jehova heo donui boddio, “ek boddi” kortolo mhunn sanglolem, toxench to hea donui zomeank ek korta. Hacho orth, hea donnui zomeank ekuch Raza asa. To mhunttlear Jezu Krist. Ani tachea odhikara khala, te mellon Jehovachi seva kortat. Tor dor vorsak obhixikt Kristanvam ani her menddram, Ugddas Disak, don veg-veglle zome koxe nhoi, punn ‘ekuch gonvllea’ khala “ekuch hindd” koso hajir zatat.—Juanv 10:16.

11. Matev 25:31-36, 40-ant sangloleo ‘xellio’ obhixikt Kristanvank tenko koso ditat?

¹¹ Matev 25:31-36, 40 vachat. Hea versant sangloleo ‘xellio’ mhunnttlear, hea nimannea disamnim jietole promannik lok, zankam hea prithumer jieuncho bhorvonso asa. Tim mhunnttlear, her menddram. Tim Jezu Kristan vinchun kaddlolea obhixikt Kristanvachea urlolea zomeank ek vhodd zobabdari purnn korunk, tem mhunnttlear, sonvsarbhor porgottnnechem ani xikounnechem kam korunk visvaxiponnan tenko ditat.—Mt. 24:14; 28:19, 20.

12-13. Her menddram obhixikt Kristanvank anik khoinche toren tenko ditat?

¹² Dor vorsak, Ugddas Disachea thoddea sumana poilim ek khas porgottnni zata. Ani her menddram hea porgottnnent bhag gheun zata titlea lokank Ugddas Disak hajir zaunk amontronn ditat. (“ Tumi Ugddas Disachi Toiari Kortat Kai?” hem boks polloiat) Toxench, choddxea sobhamnim, obhixikt Kristanvam nant zalear pasun, sonvsarbhor aslolea dor eke sobhent, Ugddas Disa pasot bore toren manddavoll kortat. Hea toren, her menddram obhixikt Kristanvank tenko ditat ani oxem korunk tim khub khuxal zatat.  Karonn tim obhixikt Kristanvank modot kortat tednam Jezu tem apleak kelʼlea bhaxen lekhta mhunn tim ugddas dovortat.—Mt. 25:37-40.

¹³ Tor amkam sorgar vo hea prithumer jieuncho bhorvonso asum, punn Ugddas Disak hajir zaunk amkam anikui karonnam asat. Tim khoinchim tem atam polloum-ia.

14. Jehova ani Jezu amcho mog kortat, hacho sogleam-von vhoddlo puravo khoincho?

¹⁴ Jehovan ani Jezun amchea pasot mog dakhoila taka ami upkari asat. Jehovan zaitea vattamnim to amcho mog korta mhunn dakhoila. Punn tachea mogacho sogleam-von vhoddlo puravo mhunnttlear, tannem aplea ekleach mogachea Putak amchea pasot tras sosun moronk dhaddlo. (Juanv 3:16) Jezu pasun amcho khub mog korta. Tea pasot, tannem ap-khuxen aplo jiv amche khatir bolidan kelo. (Juanv 15:13) Jehovan ani Jezun amchea pasot dakhoilʼlea mogacho ami kednanch upkar attounk pavchimnant tem khorem. Punn ami dor dis koxim jietat tantuntlean ami tanche upkari asat mhunn dakhounk xoktat. (Kol. 3:15) Toxench, Ugddas Disak hajir zaun ami Jehovan ani Jezun dakhoil’lea mogacho ugddas kortat ani ami-i tacho mog kortat mhunn dakhoun ditat.

15. Obhixikt Kristanvam ani her menddram Jezuchea bolidanacho kiteak valor kortat?

¹⁵ Jezun amchea pasot dilʼlea bolidanacho ami khub valor kortat. (Mt. 20:28) Jezun aplo jiv bolidan kelolean ani obhixikt Kristanvamnim tacher bhavarth dovorlolean, tankam sorgar jieuncho bhorvonso melltta, tim Jehovak manvololim zatat ani Jehova tankam aplim bhurgim mhunn manun gheta. Ani hea pasot, Jezuchem bolidan tankam ekdom moladik zaun asa. (Rom. 5:1; 8:15-17, 23) Toxench, her menddram Jezuchea bolidanacher bhavarth dovortat dekhun tankam Jehova mukhar ek nitoll ontoskornn melltta, tim povitr zaun tachi seva korunk pavtat ani ‘nixttur dhumalleantlean vo vhodd sontapantlean salvar zauncho’ tankam ek bhorvonso melltta. (Prok. 7:13-15) Tor dor vorsak, obhixikt Kristanvam ani her menddram Ugddas Disak hajir zatat tednam tim eke toren Jezuchea bolidana pasot upkari asat mhunn dakhoun ditat.

16. Anik khoinchea karonnak lagon ami Ugddas Disak hajir zatat?

¹⁶ Ami Jezuchem aikonk sodhtat. Ugddas dis suru kelʼlo tednam Jezun hi adnea dilʼli: “Mhozo ugddas korun, oxench tumi korat.” Tor amkam sorgar vo hea prithumer jieuncho bhorvonso asum, Jezun dilʼli hi adnea ami pallunk sodhtat.—1 Kor. 11:23, 24.

17. Ami Ugddas Disak hajir zatat tednam Jehova sangata amchi ixttagot koxi ghott zaunk pavta?

¹⁷ Jehova sangata amchi ixttagot anik ghott zata. (Jak. 4:8) Koxi? Ami atam meren xikleant toxem, Ugddas Disak hajir zatat tednam Jehovan amcho kitlo mog kela ani tannem amkam fuddarak dovorlolea bhorvonxeacher niallunk amkam ek sondhi melltta. (Jer. 29:11; 1 Juanv 4:8-10) Ani oxem kelolean, Jehova pasot amcho mog anik vaddtta ani tachea sangata asloli amchi ixttagot anikui ghott zata.—Rom. 8:38, 39.

18. Jezuchea udharonnacher niall kelolean ami kitem korunk pavtat?

¹⁸ Jezuchi dekh gheunk amkam modot zata. (1 Ped. 2:21) Koxi? Ugddas Disachea thoddea disam poilim, ami Bible vachop kortat. Tea vellar, Jezu morchea adim ghoddlolea ghoddneancher, tachea mornnacher ani punorjivontponnacher ami dhean ditat.  Toxench, Ugddas Disak ami bhaxonn aikotat tednam Jezun amcho kitlo mog kelo tem amkam kollon ieta. (Ef. 5:2; 1 Juanv 3:16) Ani Jezu dusream pasot koso jielo ani aplo jiv dusream pasot bolidan kelo, hea vixim ami vachtat ani niall kortat tednam ‘Jezu cholʼlo toxench ami cholonk pavtat.’—1 Juanv 2:6.

19. Ami Devachea mogan koxim thir ravonk zata?

¹⁹ Devachea mogan ravonk amcho nichov ghott zata. (Judas 20, 21) Devachea mogan thir ravop mhunnttlear tacheo adnea pallunk, tachem nanv povitr korunk, ani tachem kalliz khuxal korunk amchean zata tem soglem korop. (Mho. 27:11; Mt. 6:9; 1 Juanv 5:3) Tor Ugddas Disak hajir zalolean, dor ek dis Jehova pasot jieunk amcho nichov anikui ghott zata. Ani eka orthan, ami Jehovak oxem mhunnonk pavtat, ‘Hanv, sodankal tujea mogan ravtolom!’

20. Ugddas Disak hajir zaunk amkam koslim borim karonnam asat?

²⁰ Tor amkam sorgar vo hea prithumer jieuncho bhorvonso asum, Ugddas Disak hajir zaunk amkam borim karonnam asat. Dor vorsak, ami Ugddas Disak hajir zatat tednam ami khub mog kortat tea Jezu Kristachea mornnacho ami ugddas kortat. Toxench, Jehovan aplea ekleach Putak amche pasot bolidan korun amkam vhodd mog dakhoilo hem pasun ami ugddas kortat. Hea vorsak, hi kariavoll Sukrar 15 Abril, 2022, hea tarker suria buddlea uprant zatoli. Tor Ugddas Disak hajir zaun ami Jehova ani Jezucho kitlo mog kortat, ani hea disak hajir zavop amkam kitlem mhotvachem tem dakhoum-ia.