1-3. Koslea karonnank lagon ami roddonk xoktat?

 AMI soglim kednam-na-kednam roddttat. Thodde pavtti ami khuxal zatat tednam roddttat. Punn choddxe pavtti ami dukhi zatat tednam roddttat. Udharonnak, amcho mogacho konnui morta tednam. United States-antli, Lorilei nanvachi bhoinn oxem mhunntta: “Mhoji dhuv bhair poddli tednam mhaka itlem dukh zalem ki mhaka kitench vo konnuch bhuzvonn diunk xokona oxem distalem. Ani tea dukha thaun hanv bhair sortoli mhunn hanvem kednanch chintunk na.” *

² Dukham gollounk anik ek karonn kitem tem Japan-antli pioneer bhoinn Hiromi sangta: “Porgottnnent lok amcho sondex aikonant tednam hanv khub nirax zata. Ani sot sodhtat toslea lokank sodhunk modot kor mhunn hanv thoddea pavtti dukham golloun Jehova lagim magnnem kortam.”

³ Hea bhoinnik dislem toxem, amchea modlea zaiteank dista astolem. (1 Ped. 5:9) Ami ‘khuxalkaien Jehovachi seva korunk’ sodhtat. Punn thodde pavtti amcho mogacho konnui morta tednam, ami nirax zatat tednam, vo eke oddchonnek lagon Jehovak visvaxi ravonk amkam kotthin zata tednam ami dukhi zaun roddonk xoktat. (St. 6:6; 100:2) Tor tea vellar ami kitem korunk zata?

4. Ami hea lekhant kitem polloitolim?

⁴ Ami Jezuchea udharonnantlean xikonk zata. Taka khub dukh zalem tednam “Jezuk roddunk ailem.” (Juanv 11:35; Lukas 19:41; 22:44; Heb. 5:7) Tor Jezu kednam roddlo, ani tantuntlean ami kitem xikonk zata tem atam  polloum-ia. Toxench, koslea-i karonnak lagon amkam roddonk ieta tednam ami kitem korunk zata tem-ui ami zannam zaum-ia.

5. Juanv 11:32-36-antlean Jezu vixim ami kitem zannam zatat?

⁵ Jezu Lazaracho ani tachea dogaim bhoinnicho, Marta ani Mariecho, khub mog kortalo. Punn 32 K.X.-achea thonddechea disamnim, tacho ho boro ixtt Lazar duent zaun bhair poddlo. (Juanv 11:3, 14) Tednam tachea dogaim bhoinnink khub dukh zali. Tea vellar, Jezu tankam mellonk Betanient tim ravtalim thoim pavlo tednam Marta rokddich taka mellonk geli. Ani tinnem mhunnttlem: “Somia, Tum hangasor asloi zalear, mhozo bhav morcho naslo.” (Juanv 11:21) Tor him utram mhunnttana, tim kitlim dukhi aslim astolim tem ami chintunk zata. Ani tea uprant, Jezun Mariek ani dusreank roddtta tem polloilem tednam taka-i “roddunk ailem.”​—Juanv 11:32-36 vachat.

6. Jezu kiteak roddlo?

⁶ Tor Jezuk kiteak roddonk ailem, hea vixim Insight on the Scriptures hem pustok amkam oxem sangta: “Tacho lagxilʼlo ixtt Lazar bhair poddlo ani taka lagon tachea bhoinnank zalʼlem dukh polloun ‘Jezuk roddunk ailem.’” * Tor Lazar duent astana taka je tras sosunk poddle ani apunn beginuch morcho asa mhunn Lazarak kollʼllea uprant taka koxem dislem astolem, hea vixim Jezun chintlem astolem. Toxench, tancho bhav melo mhunn Mari ani Marta roddtta tem polloun Jezuk roddonk ailem astolem. Tumcho-i konn lagincho ixtt vo familintlo konnui mornnant sanddla zalear tumkam-i oxench bhoglem astolem. Tor hea ghoddnnentlean ami khoinchim tin lisanvam xikonk zatat tem atam polloum-ia.

7. Jezu roddlo hea vixim ami chintʼtat tednam amkam Jehova vixim kitem kollon ieta?

⁷ Amkam koxem bhogta tem Jehova somzota. Jezu vixim Bible sangta ki to “Devacho sopurnn rupkar.” (Heb. 1:3) Hantuntlean amkam hem kollon ieta, ki Jezu roddlo tednam Jehovak koxem dislem astolem tem  Jezun dakhoilem. (Juanv 14:9) Tor amcho mogacho konnui morta tednam Jehova polloita tem khorem, punn amchea sangata to-ui dukhi zata. Ani to amchem dukh pois korunk sodhta.​—St. 34:18; 147:3.

8. Moron gelʼlea amchea mogacheank Jezu purnojivont kortolo mhunn ami kiteak khatri dovrunk zata?

⁸ Mornnant sanddlolea amchea mogacheank Jezu porot jivont korunk axeta. Jezun dukham gollounchea poilim, tannem Martak oxem mhunnon khatri dili: “Tuzo bhav novean jivo zatolo.” Ani Martak Jezuchea hea utrancher visvas aslo. (Juanv 11:23-27) Karonn ti Jehova Devachi ek visvaxi sevok asli. Tor adlea kallar, provadi Elija ani Elishan lokank punorjivont kelʼle tea vixim ti zannam asli. (1 Raz. 17:17-24; 2 Raz. 4:32-37) Toxench, Jezun kelʼlea punorjivontponnam vixim tinnem aikolʼlem astolem. (Lukas 7:11-15; 8:41, 42, 49-56) Tor hantuntlean amkam kitem khatri melltta? Amkam hi khatri melltta ki amchim mogachim meleant tim amkam portun pollounk mellttolim. Ani toxench, aplea ixttam sangata roddon Jezun tankam bhuzvonn dili. Hantuntlean, to amchea mogachea melʼleank portun jivont korunk axeta mhunn amkam khatri melltta!

9. Jezu bhaxen, aplea mogacheank mornnant sanddleant tankam tumi koxi modot korunk zata? Ek udharonn diat.

⁹ Aplim mogachim meleant mhunn dukhest asat tankam ami modot korunk zai. Jezu Marta ani Marie sangata fokot roddonk na, punn tannem tanchem aikolem ani tankam bhuzvonnechim utram sanglim. Teach bhaxen, ami herank koxi modot korunk zata tem amkam Dan nanvachea eka bhavak koxi modot mellʼlli hantuntlean kollon ieta. Australia-nt ravpi ho vhoddil oxem sangta: “Mhoji bail bhair poddli tednam mhaka modotichi goroz asli. Mhojem dukh sangon hanv roddttalo tednam mhojem aikonk zaitim zoddpim sodanch toiar aslim. Ani hanv roddtta tem polloun tankam loz bhogonk na. Toxench, mhaka thoddim kamam korunk kotthin zatalem tednam tim tem mhojea pasot kortalim. Tim mhoji gaddi dhutalim, bazar kortalim, ani jevonn pasun randun ditalim. Tea bhair, tim zaitea pavtti mhojea sangata magnnem kortalim. Khorench, tim mhojim khorim ixttam ani ‘oddchonniche gorje khatir zolmota toslim bhav-bhoinnam’ zaunk pavlim.’”​—Mho. 17:17.

10. Lukas 19:36-40-ant amkam kitem sanglam?

¹⁰ 33 K.X.-achea Nisan 9 tarker Jezu Jerusalem-ant gelo. To tea xarant pavlo toso thoinchea lokamnim taka aplo Raza mhunn vollkhon ghetla hem dakhounk, tannim aplim angvostram kaddun rostear ghatlim. Ho khorench ek khuxalkaiecho vell aslo. (Lukas 19:36-40 vachat.) Ani taka lagon thoddeach vella uprant Jezu oso kortolo mhunn tachea xisamnim pasun chintunk naslem astolem. Tor Jezun kitem kelem? Bible amkam sangta: ‘Ani lagim pavtam, Xar nodrek poddtoch, tache voir Jezun dukam golloilim.’ Ani fuddarak tea xarachi got kitem zatoli tea vixim to sangonk laglo.​—Lukas 19:41-44.

11. Jerusalem-achea lokam pasot Jezu kiteak roddlo?

¹¹ Tor hea vellar Jezu kiteak roddlo? Jezu Raza mhunn lokamnim taka ieukar dilo tem khorem. Punn zaite Judev, Rajeachea sondexak kan diunche nant mhunn Jezuk khobor asli. Ani haka lagon, beginuch Jeruzalem xarachem nisontton zaunchem aslem. Ani tea nisonttonant salvar zatat tea Judev lokank koidi korun vhortole asle. (Lukas 21:20-24) Ani oxench ghoddlem. Karonn zaiteamnim Jezuk nakarlo. Tor tumi ravtat tea vattarant pasun choddxe lok Rajeachea sondexak kan dinant kai? Toxem zalear, Jezun tea vellar dukham golloilʼlim  tachea thaun tumi kitem xikonk zata? Ami atam tin lisanvam polloum-ia.

12. Jezun dukham golloilim tantuntlean amkam Jehova vixim kitem xikonk melltta?

¹² Jehova lokanchi kallji gheta. Jezun dukham golloilim tantuntlean amkam Jehova lokanchi kitli kallji gheta tem dison ieta. Karonn “konnachench nisontton zalʼlem Taka naka, soglleamnim aplem jivit bodolʼlolem Taka zai.” (2 Ped. 3:9) Tor aiz lokank vo amchea peleank, Devachea Razvottkechi bori khobor ami xikounk vavr korit ravtat tednam ami tancho mog kortat mhunn dakhoun ditat.​—Mt. 22:39. *

13-14. Jezun doia-maia koxi dakhoili, ani ami ho gunn koso dakhounk zata?

¹³ Jezu porgottnnent khub vavurlo. Jezun porgott kelʼle choddxe lok tache xis zaunk nant. Tori astana, taka sondhi mellʼlli tednam to sogleank porgott korit ravlo karonn taka lokancho mog aslo. (Lukas 19:47, 48) Tea bhair, taka tanchi doia-maia asli dekhun thodde pavtt to ani tache xis tankam xikounk itlo vell sartale ki “jevunk porian tankam fursot nasli.” (Marku 3:20) Anik ek pavtt, tacho ek aiknnaro fokot ratchea vellar tachem aikonk sodhtalo dekhun Jezu tea vellar tachea lagim ulounk toiar aslo. (Juanv 3:1, 2) Tor ami pasun amkam sondhi melltta tednam sogleank porgottunk toiar asonk zai. (Itihas 10:42) Punn oxem korunk ami amchea porgottnnent thodde bodlav korunk poddot.

¹⁴ Ami amchea porgottnnent bodol korunk sodanch toiar asonk zai. Hea vixim, amkam Matilda nanvachea eke pioneer bhoinnichem udharonn asa. Ti mhunntta: “Hanv ani mhozo ghov veg-vegllea vellar porgottnni kortat. Sokallim, veapar-dhondo cholta tea zagear ami porgottnni kortat. Donparam, choddxe lok bhair bhonvtat dekhun ami kartt uzar korun porgottnni kortat. Ani sanjechea vellar, ami ghor-ghoramnim porgottnni kortat. Hea toren, lok melltta tednam ami porgottnni korunk toiar astat zalear ami dusreank doia-maia dakhounk, sakx diunk ani Jehova Devak khuxal korunk pavtolim. Punn ami oxem korinant zalear, bori khobor aikonk sodhtat tosle lok ghoddie amkam mellche nant.

15. Lukas 22:39-44-a pormonnem, Jezu morchea poilim Getsemani bagent kitem ghoddlem?

¹⁵ 33 K.X.-achea, Nisan 14 tarker, sanjechea vellar Jezu Getsemani bagent gelo. Thoim tannem kallzantlean Jehova lagim magnnem kelem. (Lukas 22:39-44 vachat.) Tea vixim oxem sanglolem asa: “Jezun vhoddlean bob marun ani dukam golloun, Devak . . . prarthona bhettoilim.” (Heb. 5:7) Tor hea kotthin vellar Jezu morchea poilim tannem Deva lagim kitem maglem? Jehova Devak visvaxi ravonk ani tachi khuxi korunk ghottai di mhunn tannem magnnem kelem. Ani Jehovan aplea Putachem magnnem aikon taka ghottai diunk eka ainzak dhaddlo.

16. Getsemani bagent Jezu itlo dukhi zaun kiteak roddlo?

¹⁶ Getsemani bagent Jezu itlo dukhi zaun kiteak roddlo? Karonn lokanchea nodren to Devachea nanvak opman haddpi zauncho aslo. Tea bhair, apunn Devak visvaxi ravop ani tachea nanvacher ghatlolo arop kaddop kitlem gorjechem tem Jezu zannam aslo. Tor tumkam pasun eke kotthin poristhitint Jehovak visvaxi ravop kotthin zaunk puro. Tea vellar, Jezu roddlo tantuntlean tumi khoinchim tin lisanvam xikonk zatat tem polloum-ia.

17. Jehovan Jezuchem magnnem aikolem, tantuntlean ami kitem xiktat?

¹⁷ Jehova amchea magnneank kan dita. Jehovan Jezuchem magnnem kiteak aikolem? Karonn Jezu aplea Bapak visvaxi ravonk sodhtalo ani tachea nanvacher ghatlolo arop kaddunk sodhtalo. Teach bhaxen, aiz ami Jehovak visvaxi ravonk, ani tachea nanvacher ghatlolo arop kaddunk sodhtat zalear to amchem-i magnnem aikotolo.​—St. 145:18, 19.

18. Jezu amche tras somzota toslea eka ixtta sarko asa oxem ami kiteak mhunnonk zata?

¹⁸ Amkam koxem bhogta tem Jezu somzota. Amchea eka trasak lagon ami nirax zatat, ani tosleach eka trasacho fuddo kelolo ek ixtt amkam bhuzvonn dita tednam, to amkam somzota mhunn ami kitlim khuxal zatat nhoi? Jezu pasun teach ixtta sarko asa. Karonn ami oskot astat tednam amkam koxem bhogta tem to zannam. Ani tea vellar, amkam modotichi goroz asa mhunn to vollkhota dekhun amkam ‘goroz asa tednam’ to modot korta. (Heb. 4:15, 16) Tea bhair, Jezuk eka ainza thaun modot  mellʼlli tednam tannem ti modot ghetli. Teach bhaxen, Jehova ek vhoddil, vo ek bhav vo bhoinnichea bhette thaun, vo ek prokaxon, video, vo bhaxonna thaun amkam modot korunk xokta. Tea vellar ami ti modot gheunk zai.

19. Magnnea udexim Jehova amkam koxi ghottai dita? Ek udharonn diat.

¹⁹ Jehova amkam ‘apli xanti’ ditolo. Ami Jehova lagim magnnem kortat tednam “amchea gineana poros vorti Devachi xanti” amkam mellttoli. (Filp. 4:6, 7) Hacho orth, amkam monachi xanti mellttoli ani toxench, sarkea ritin chintunk modot zatoli. Hea vixim amkam bhoinn Luz-achem udharonn asa. Tim mhunntta: “Zaitea pavtt mhaka eksurponn bhogta. Ani kednam-kednam Jehova mhozo mog korina oxem mhaka dista. Punn tednam hanv rokddench Jehova lagim magnnem korun mhaka koxem dista tem Jehovak sangta. Ani oxem kelolean mhaka borem dista.” Tor bhoinn Luz-achea udharonnantlean amkam kollon ieta ki ami magnnem kortat tednam Jehova apli xanti diun amkam ghottai dita.

20. Jezu roddlo tantuntlean ami kitem xiklim?

²⁰ Tor Jezu roddlo tantuntlean ami hea lekhant kitem xiklim? Poilem, amcho mogacho konnui morta tednam Jehova ani Jezu amkam modot kortat mhunn ami khatri dovrunk zata. Dusrem mhunnttlear, dusreancho konnui mogacho morta tednam ami tankam modot korunk zai. Tisrem, amkam doia-moia asa dekhun ami porgottchem ani xikounchem kam korit ravonk zai. Karonn Jehovak ani Jezuk ho gunn asa. Chovtem, ami eka trasacho fuddo kortat tednam ami osokt asat, oxem amkam disonk puro. Punn tea vellar amkam koxem bhogta tem Jehova ani Jezu somzotat, hem zannam zalolean amkam te tras sosunk bhuzvonn ani modot melltta. Tor Jehova fuddarak amchea “dolleantlim sogllim dukam pusun” kaddtta mhunnsor hea lekhant xiklolim lisanvam ami apnnait ravum-ia!​—Prok. 21:4.