1. Jakob koslea familint vaddlolo?

 JAKOBACHI famil Jehovacher purnn visvas dovortali. * Karonn tachim avoi-bapui, Juze ani Maria, Jehovacho khub mog kortalim ani Jehovachi seva korunk tim khub vavurtalim. Toxench, tacho vhoddlo bhav Jezu, fuddarak bhasailʼlo Mesias zaun aslo. Khorench, Jakob ek ekdom borea familint vaddlolo!

2. Jezucho xis zaunk Jakoba kodden koslim karonnam aslim?

² Jakob aplea vhoddlea bhava thaun khub xikonk xoktalo. (Mt. 13:55) Udharonnak, Jezu 12 vorsancho aslo tednam Devachea Utrachi taka bori zannvai asli, ani vhoddle-vhoddle xastri tachem aikon ojap zatale. (Lukas 2:46, 47) Jakoban Jezu sangata thovoi-achem kam pasun kelolem astolem. Tea vellar, to Jezuk anik bore toren zannam zaunk pavlo astolo. Bhav Nathan H. Knorr khub pavtti oxem mhunnttalo, “Jednam tum konnam sangata kam korta tednam tum taka anik bore toren vollkhonk pavta.” * “Jezu zannvaien, piraien, ani kurpen Deva ani monxam mukhar vaddot vetalo,” hacherui Jakoban dhean dilʼlem astolem. (Lukas 2:52) Hea karonnak lagon Jakob Jezucho poilo xis zalo astolo, oxem amkam disonk puro. Punn toxem zaunk na.

3. Jezu prithumer astana Jakob koso vaglo?

³ Jezu prithumer aslo tednam Jakob tacho xis zaunk na. (Juanv 7:3-5) Tea bhair, Jezuchea her soiream bhaxen  Jakoban pasun, “tachi mot firlea” oxem mhunnttlolem astolem. (Marku 3:21) Ani Jezu khambhear melo tea vellar, Marie sangata Jakob thoim aslo vo na, hea vixim Bible amkam kainch sangona.​—Juanv 19:25-27.

4. Hea lekhant ami kitem polloitolim?

⁴ Punn uprant, Jakoban Jezucher bhavarth dovorlo ani Kristi sobhent to ek vhoddil zaunk pavlo. Tor hea lekhant, Jakoba koddlean xikonk zatat teo don vostu ami polloum-ia: (1) Ami kiteak khalti asonk zai? (2) Ami bore xikoupi koxe zaunk xoktat?

5. Jezu punorjivont zaun Jakobak mellʼllea uprant kitem zalem?

⁵ Jakob kednam Jezucho xis zaunk pavlo? Jezu purnorjivont zalea uprant ‘soglea dhormdutank dixtti poddchea poilim to Jakobak mellʼllo.’ (1 Kor. 15:7) Ani tednam thaun Jakoban aplem jivit bodolʼlem ani to Jezucho xis zalo. Tea uprant, Jerusalem-ant xisancho ek zomo, eka ghorachea unchlea kuddant povitr xokti mellonk ektthaim zalo tednam, Jakob pasun tanchea sangata aslo. (Itihas 1:13, 14) Toxench, poilea xekddeantlea sonchalon monddollacho pasun to ek bhag zaun aslo. (Itihas 15:6, 13-22; Gal. 2:9) Ani 62 K.X.-achea thoddea vella poilim, obhixikt Kristanvank pasun tannem ek chitt boroili, ji aiz pasun amkam sogleank, mhunnche, sorgar vo hea prithumer jieuncho bhorvonso asa tankam faideak poddtta. (Jak. 1:1) Ani Josephus nanvachea poilea xekddeantlea itihaskara pormonnem, Anasacho put, Ananiasan, Jakobak jivexim marunk formonn marlem. Punn Jakob moro porian Jehovak visvaxi ravlo.

6. Jakob ani tea tempa voilea dhormik fuddaream modem kitem ontor aslo?

⁶ Jakob khalto aslo. Oxem ami kiteak mhunnonk zata? Hem zannam zaunk Jezu punorjivont zalea uprant, Jakoban kitem kelem ani tea tempa voilea dhormik fuddareamnim kitem kelem tacher dhean diat. Jezu punorjivont zalea uprant toch Devacho Put mhunn Jakobak puravo mellʼllo tednam tannem tem khaltikaien manun ghetlem. Punn dhormik fuddareank, Jezu Mesias mhunn manun gheunk purave asle, tori astana tannim taka nakarlo. Udharonnak, Jezun Lazarak punorjivont kelʼlo mhunn te zannam asle. Punn Jezu Devacho Put mhunn manun gheunchea bodlek te Jezuk ani Lazarakui jivexim marunk sodhtale. (Juanv 11:53; 12:9-11) Toxench, Jezu purnorjivont zala hi khobor lokam koddlean lipounk tannim zaito proitn kelo. (Mt. 28:11-15) Te gorvixtt asle dekhun te oxe toren vagle.

7. Ami gorv kiteak pois korunk zai?

⁷ Jakoba thaun ami kitem xiktat? Ami gorv pois  kelo zalear Jehova sangta tea pormonnem ami amchem chintop bodlunk toiar astolim. Amkam eke torechem duens asa zalear, amchea kallzak sarkea toren kam korunk kotthin zata. Teach toren, amkam gorv asa zalear, Jehova sangta tea pormonnem amchem chintop bodlunk amkam kotthin zaunk xokta. Farizev gorvixtt asle dekhun Devachi povitr xokti Jezucher kam korta mhunn tankam purave aslear pasun, Jezu Devacho Put mhunn manun gheunk te toiar nasle. (Juanv 12:37-40) Ani taka lagon tannim sasnachem jivit hogddailem. (Mt. 23:13, 33) Punn Jakob khalto aslo. Tea pasot, to Jehovachea Utra pormonnem aplem chintop bodlunk toiar aslo. Tor ami khaltim asat zalear, Jehovachea chintpa pormonnem nirnnoi gheunk ani amchea chintpant bodol korunk ami toiar astolim. (Jak. 3:17) Ani hem ekdom gorjechem! Tor atam, Jakob khalto aslolean to ek boro xikoupi koso zaunk pavlo tem polloum-ia.

8. Ami bore xikoupi koxe zaunk xoktat?

⁸ Jakobak chodd xikop naslem. Hea pasot, tea tempa voile dhormik fuddari, Pedruk ani Juanvak “oxikxit ani chalte” mhunn lekhtale toxe, tannim Jakobakui lekhlo astolo. (Itihas 4:13) Punn Devachea preronnan Jakoban boroil’lem pustok ami vachtat tednam to ek boro xikoupi zaun aslo mhunn amkam kollon ieta. Tor aiz Jakoba bhaxen amkam pasun chodd xikop na astolem. Tori punn, Devachea povitr xoktechea modotin ani tachem songotton dita tea proxikxonnantlean ami bore xikoupi zaunk xoktat. Tor atam, Jakob koso xikoitalo ani tachea thaun ami kitem xikonk zata tacher dhean dium-ia.

9. Jakobachi xikounn koxi asli?

⁹ Jakoban sompim utram uzar kelim ani sompe ritin somzailem. Oxem kelolean, aiknnareank tannim kitem korunk zai ani tem koxem korchem tem rokddench somzotalem. Udharonnak, Kristanvancher onʼneai zatalo tednam aplea kallzant rag dhorinastana to sosunk zai mhunn Jakoban sanglem. Tednam tannem oxem mhunnttlem: “Tanche sosnnikaie pasot tankam ami subhagi mhonnttanv. Jobache sosnnikaiechi khobor tumi aikolea, ani koso Sorvesporan xevottak taka subham axirvad dilo, tem tumi zannont. Kiteak Sorvespor konnvallo ani maiemogacho.” (Jak. 5:11) Tor hantuntlean amkam kollon ieta ki Jakoban ekdom sompe  toren, Joba bhaxen Jehovak visvaxi ravtat tankam to inam dita mhunn somzailem. Punn dhean diat ki oxem korunk tannem Devachem Utor uzar kelem. Tor tannem lokanchem dhean apnnacher nhoi punn Jehovacher dovrunk tankam modot keli.

10. Dusreank xikoitana ami Jakobachi dekh koxi gheunk zata?

¹⁰ Jakoba thaun ami kitem xiktat? Sompe ritin xikoiat, ani Devachem Utor uzar korat. Ami dusreank xikoitat tednam ami kitlem zannant tacher nhoi, punn Jehovak kitli zannvai asa ani taka tanchi kitli kallji asa tacher ami dhean diunk zai. (Rom. 11:33) Hem korunk ami Devachem Utor uzar korunk zai. Udharonnak, umkech poristhitint ami tanchea suvater aslim zalear kitem kortolim aslim tem sangchea bodlek ami tankam Bible-antlim udharonnam sangonk zatat ani Jehova tea vixim kitem chintʼta tem tankam somzonk modot korunk zata. Oxem kelolean, tim xiktat tem tim apnnaunk pavtolim. Ani hem, tim amkam khuxal korunk nhoi, punn Jehova Devak khuxal korunk kortolim.

11. Jakobachea disamnim aslolea Kristanvank koslim unnemponnam aslim, ani Jakoban tankam koslo solʼlo dilo? (Jakob 5:13-15)

¹¹ Jakoban aplea bhav-bhoinnanchim unnemponnam somzon ghetlim. Jakoban boroilʼlea chittintlean amkam kollon ieta ki aplea bhav-bhoinnanchim unnemponnam to zannam aslo. Ani tea vellar, tannem tankam spoxtt ani doiall toren solʼlo dilo. Udharonnak, thoddea bhav-bhoinnank Devachea Utrant dilʼlo solʼlo rokddoch apnnaunk kotthin zatalem. (Jak. 1:22) Toxench, thoddim zannam gorib bhav-bhoinnam poros girest bhav-bhoinnank chodd valor ditalim. (Jak. 2:1-3) Tea bhair, thoddeank aplea uloupacher tabo dovrunk kotthin zatalem. (Jak. 3:8-10) Tor hea bhav-bhoinnamnim aplea unnemponnacher kam korunk khub vavr korunk zai aslo. Punn Jakoban tim kednanch bodolchim nant vo sudorchimnant, oxem chintunk na. Ani tannem modotichi goroz asli tankam vhoddilam koddlean modot gheunk urba dili.​—Jakob 5:13-15 vachat.

12. Amchea Bible videartheam vixim ami kitem ugddas dovrunk zai?

¹² Jakoba thaun ami kitem xiktat? Dusreanchim unnemponnam somzon gheiat, ani tim sudorchimnant oxem chintinakat. Amchea Bible videartheank Bible-antlo solʼlo apnnaunk ghoddie kotthin zaunk puro. (Jak. 4:1-4) Toxench, tanche vaitt gunn pois korun Kristi gunn vaddounk tankam thoddo vell lagonk puro. Tori punn, Jakoba bhaxen, tannim aplea jivitant khoim sudharunk zai tem ami tankam spoxtt ritin sangonk fatti soronk zaina. Ani tim sudhorchim nant oxem chintchea bodlek, ami Jehovacher visvas dovrunk zai ki khaltea munxak to aplea lagim oddun haddtta, ani tankam aplea jivitant bodlav korunk modot korta.​—Jak. 4:10.

13. Jakob 3:2-a pormonnem, Jakoban kitem vollkhon ghetlem?

¹³ Jakoban apunn dusream poros vorto oxem kednanch chintunk na. Jakob Jezucho bhav aslo ani taka zaiteo khas zobabdareo asleo. Tori astana, apunn her bhav-bhoinnam poros vorto oxem tannem kednanch chintunk na. Punn tannem aplea bhav-bhoinnank, “mhojea pritichea bhavam-bhoinnimno,” oxem mhunnttlem. (Jak. 1:16, 19; 2:5) Toxench, apunn kednanch chuki korina oxem dakhounk tannem proitn korunk na. Tachea bodlek, “khorench ami sogllim zaitea vattamnim chuki kortanv” oxem tannem mhunnttlem.​—Jakob 3:2 vachat.

14. Ami pasun chuki kortat mhunn vollkhon ghevop kiteak gorjechem?

¹⁴ Jakoba thaun ami kitem xiktat? Ami soglim chuki kortat mhunn ami ugddas dovrunk zai. Ami amchea Bible videartheak xikoitat tednam, ami kednanch chuki korinant, vo ami tanchea poros vortim asat mhunn dakhounk ami proitn korunk zaina. Karonn ami oxem kelem zalear amchim Bible videarthi niraxi zatolim. Ani tim  Devachi seva kednanch korunk pavchimnant oxem tankam distolem. Punn Bible-achea totvam pormonnem cholonk amkam-i sompem naslem mhunn ami vollkhon ghetat tednam, ani Jehovan amkam amchea oddchonneancho fuddo korunk koxi modot kelea tem ami tankam somzaitat tednam, tim pasun Jehovachi seva korunk pavtolim hem zannam zaunk tankam modot zatoli.

15. Jakobachim udharonnam koxim aslim? (Jakob 3:2-6, 10-12)

¹⁵ Jakoban dusreank somzonk sompim zatolim toslim udharonnam uzar kelim. Hem to koxem korunk pavlo? Ek mhunnttlear, Jehovachea povitr xokten taka modot keli. Ani dusrem mhunnttlear, chodd korun aplo vhoddlo bhav, Jezu koddlean, udharonnam uzar korun koxem xikounk zai tem to xikonk pavlo. Hea pasot, Jakob aplea chittient ekdom sompim udharonnam uzar korunk pavlo. Ani hea vorvim, lokamnim kitem korunk zai tem tankam rokddench somzotalem.​—Jakob 3:2-6, 10-12 vachat.

16. Ami faideak poddttat toslim sompim udharonnam kiteak uzar korunk zai?

¹⁶ Jakoba thaun ami kitem xiktat? Faideak poddttat toslim sompim udharonnam uzar korat. Ami oslim udharonnam uzar kortat tednam amchea aiknnareank ami kitem sangonk sodhtat tea vixim chintunk, tem somzonk, tacher niall korunk, ani tachea thaun xikonk modot zatoli. Ani toxench, Bible-antlim sotam tim ugddas dovrunk pavtolim. Jezun oslim faideak poddttat toslim sompim udharonnam uzar kelim. Ani tachi dekh gheun Jakoban pasun oxench kelem. Tor atam, ami Jakobachea eka udharonnacher dhean dium-ia ani tem udharonn kiteak itlem borem aslem tem polloum-ia.

17. Jakob 1:22-25-ant, Jakoban sanglolem udharonn ekdom borem kiteak zaun asa?

¹⁷ Jakob 1:22-25 vachat. Hea versamnim, Devachea Utrantlean amkam faido zaunk, tem ami vachlearuch puro nhoi, punn apnnavop gorjechem mhunn sangonk Jakoban ek ekdom borem udharonn dilem. Tannem Devachea Utrak eka arxea sangata sor kelo. Ek munis arxeant polloita tednam apleachem kitem tori sarkem na mhunn taka dison ieta. Punn tea vixim to kainch korina zalear tem pixeponn zatolem. Teach bhaxen, ami Devachem Utor vachtat ani amchea sobhavant kitem-i bodol korunk zai mhunn amkam kollon ieta. Tori astana ami bodlav korinant zalear tem pixeponn zatolem. Tor Jakoban kai borem udharonn uzar kelem nhoi!

18. Udharonnam uzar kortana ami ugddas dovrunk zai te tin mudʼdhe khoinche?

 ¹⁸ Tor ami udharonnam uzar kortana, Jakoban udharonnam koxim uzar kelim tachi ami dekh gheunk zata. Ami tin vostu korunk zatat: (1) Ami xikoitat to mudʼdho amchea aiknnareak borea toren somzaunk lagon ami udharonnam uzar korunk zai. (2) Ami uzar kortat tem udharonn amchea aiknnareak somzota toslem asonk zai. (3) Tea udharonna thaun ami koslim lisanvam xikounk sodhtat tem ami spoxtt ritin somzaunk zai. Borim udharonnam sodhun kaddunk kotthin zata zalear amkam Watch Tower Publications Index-a thaun khub faido zaunk xokta. Karonn tantunt “Illustrations,” hea vixoi-a khala veg-vegllea vixoi-ancher zaitim udharonnam mellonk xoktat. Punn ami hem ugddas dovrunk zai ki udharonnam eka mic-a sarkim asat. Ami eka mic-ant uloitat tednam amcho avaz vhodd zata. Teach bhaxen, udharonnam, ami sangtat tea mudʼdheancher zhor ditat. Taka lagon, ami udharonnam fokot mukhel mudʼdhe somzaunk uzar korunk zai. Toxench, ami hem-ui ugddas dovrunk zai ki ami udharonnam lokanchem dhean amcher oddunk lagon nhoi, punn zata titlea lokank Jehova sangata ixttagot zoddunk uzar korunk zai.

19. Ami amchea bhav-bhoinnancho mog kortat mhunn koxem dakhounk zata?

¹⁹ Jakoba bhaxen amkam ek poripurnn vhoddlo bhav na tem khorem. Punn Jehovachea familichea bhag aslolea bhav-bhoinnam sangata mellon tachi seva korunk amkam ek vhodd sueog asa. Tor ami amchea bhav-bhoinnancho mog kortat mhunn ami koxem dakhounk zata? Tanchea sangata vell sarun, tanchea koddlean xikon, ani porgottnnechea ani xikounchea kamant visvaxiponnan tanchea sangata bhag gheun. Hea toren, ami amchea sobhavant, vagnnukent, ani xikounnent Jakobachi dekh ghetat tednam ami Jehova Devak mhoima haddunk pavtolim ani khaltea kallzachea lokank amchea mogall sorginchea Bapa, Jehova sangata ek lagxilʼli ixttagot zoddunk modot korunk pavtolim.