1. Ami Jehova sangata vell koso sarunk zata?

 AMI mog kortat tanchea sangata vell sarunk amkam khub borem dista. Zoxem, kazari zoddpeank eka-meka sangata, tornatteank apleam ixttam sangata, ani amkam sogleank amchea bhav-bhoinnam sangata vell sarunk khub avoddtta. Punn khas korun, amkam Jehova sangata vell sarunk ekdom borem dista. Ani Jehova sangata ami sartat to vell amkam khub moladik zaun asa. Tor ami Jehova sangata vell koso sarunk zata? Magnnem korun, tachem Utor vachun, ani tacho udʼdhex ani sobit gunnancher niall korun ami oxem korunk zata.—St. 139:17.

2. Jehova sangata vell sarunk amkam kiteak kotthin zaunk puro?

² Jehova sangata ami vell sarunk sodhtat tem khorem, punn aiz amchem jivit khub bizi zalam. Amchea kamak, familik vo her zobabdareank lagon, Jehovachi bhokti, zoxem magnnem, Bible obheas vo tacher niall korunk, amche lagim velluch na vo vell kaddunk kotthin zata oxem amkam disonk puro.

3. Anik koslea karonnank lagon Jehova sangata vell sarunk amkam kotthin zaunk xokta?

³ Anik thoddea karonnank lagon pasun, Jehova sangata vell sarunk amkam kotthin zaunk puro. Ek udharonn mhunnttlear, monoronjon. Borea monoronjonant vell sarop chukichem nhoi. Punn ami monoronjonant  chodduch vell ghatlo zalear Jehova sangata vell sarunk amche lagim velluch aschona. Tor thoddeo vostu korop chukichem nhoi tem khorem, punn tea vostunk Jehovache bhokte poros chodd vell dina zaunk ami chotrai dhorunk zai.—Mho. 25:27; 1 Tim. 4:8.

4. Ami hea lekhant kitem polloitolim?

⁴ Tor amchea jivitant kitem chodd mhotvachem tem ami kiteak tharaunk zai, Jehova sangata ami vell koso sarunk zata, ani hea toren amchea vellacho boro upeog kelolean amkam koso faido zatolo tem ami hea lekhant polloitolim.

5. Eka tornatteak aplea jivitant sogleam-von borem tem vinchun kaddunk, Efezkarank 5:15-17 koxi modot korunk xokta?

⁵ Jivitant sogleam-von borem tem vinchun kaddat. Aplea jivitant kitem kortolim tea vixim tornattim zaite pavtti usketat. Tea vellar, tancheo iskolantleo ttichereo ani sotant naslolim tanchea familintlim, tankam borea pagarachi sirvis mellonk chodd xikxonn gheunk lagon urba diunk xoktat. Oxem korunk tankam zaito vell ghalunk poddot. Punn tanchim avoi-bapui ani sobhentlim bhav-bhoinnam, tankam Jehovache sevent aplem jivit sarunk urba diunk puro. Tor tornatteamnim bore nirnnoi koxe gheunk zatat? Tannim Efezkarank 5: 15-17 vachun hea prosnancher niall korunk zata. (Vachat.) Zoxe, ‘Hanga mhunnttlea ti, “Somiachi [“Jehovachi,” NW] khuxi” mhunnche kitem? Hanvem koslo nirnnoi ghetlo zalear Jehova khuxal zatolo? Hanvem kitem kelem zalear mhozo vell hanv bore toren uzar korunk xoktolo?’ Hea toren chintlolean, Jehovacho mog kortat tea tornatteank kollon ietolem ki Jehovak khuxal korunk lagon tannim vell sarlo zalear tem xanneponnachem zatolem. Karonn tea versant sanglam toxem ‘vaitt khub vaddlolo’ ho Soitanacho sonvsar beginuch kabar zauncho asa.

6. Marien kitem kelem, ani tinnem boro to vantto vinchun kaddla oxem Jezun kiteak mhunnttlem?

⁶ Tumchea jivitant kitem chodd mhotvachem tem tharaiat. Hem somzonk, Jezu, Mari ani Martachea ghora jevnnak ailo tednam kitem ghoddlem tem polloum-ia. Jezu tanchea ghora jevnnak aila mhunn Marta ekdom khuxal zalem ani taka ek vhoddlem jevonn randunk tem khub vavr korunk laglem. Punn Mari Jezu lagim boson to kitem xikoitalo tem aikotalem. Tor Martan, Jezuk ek vhoddlem jevonn randun kainch chuk korunk na. Punn Marien “boro to vantto vinchun kaddla,” oxem Jezun mhunnttlem. (Lukas 10:38-42) Kiteak? Karonn, uprant tea vellar, tim kitem jevlolim tem ghoddie Mari visorlem astolem. Punn Jezun kitem xikoilem tem Mari kednanch visronk na. Jezu sangata sarlolea vellacho tannem khub valor kelo. Toxench, Jehova sangata sartat tea vellacho ami khub valor kortat. Tor amchea jivitant ami zaitem kitem korunk xoktat. Punn chodd mhotvachem kitem tem tharaunk, taka ami vell diunk zai. Tor amcho vell ami bore toren koso uzar korunk zata tem polloum-ia.

7. Magnnem, Bible obheas, ani niall korop, sogleam-von mhotvachem kiteak zaun asa?

⁷ Magnnem, Bible obheas ani niall korop amche bhoktecho bhag zaun asa mhunn ami ugddas dovrunk zai. Karonn, ami magnnem kortat tednam amchea mogall sorginchea Bapa sangata ami uloitat. (St. 5:7) Ami Bible obheas kortat tednam zannvaiechi zhor aslolea ‘Jehova Devachem ginean’ ami ghetat. (Mho. 2:1-5) Toxench, ami niall kortat tednam  Jehova, tache gunn ani to amchea pasot ani akʼkhea munxakulla pasot kitem korunk sodhta, tea vixim ami bariksannen chint’tat. Ani oxem ami kortat tednam ami amcho vell sogleam-von bore toren uzar kortat. Tor hem korunk amkam koxi modot zatoli?

8. Jezun oronneant vell kiteak sarlo, ani hantuntlean ami kitem xiktat?

⁸ Zata zalear, ek xant zago vinchun kaddat. Hea vixim amkam Jezuchem borem udharonn asa. Prithumer porgottnni suru korchea poilim tannem challis dis oronneant sarle. (Lukas 4:1,2) Thoim eksuro astana, Jehova lagim magnnem korunk ani tachi khuxi kitem asa tacher niall korunk taka vell mellʼllo. Oxem kelolean, fuddarak tacher ieunche asle tea trasancho fuddo korunk taka modot zali. Tor Jezu thaun ami kitem xikonk zata? Ami ghoddie eka vhodd familint ravtat ani amchea ghorant choddso bovall asta astolo. Tor Jehova sangata vell sarunk, ek xant zago mellonk amkam kotthin zaunk puro. Tea vellar, Jezun ek xant zago vinchun kaddlo toso ami amchea ghora bhair ek xant zago vinchun kaddunk zata. Julie nanvachi ek bhoinn pasun oxench korta. Ti ani ticho ghov, France-ant eka lhan flat-ant ravtat. Ani thoim choddso bovall asta ani xant zago mellonk khub kotthin zata. Tor Jehova lagim magnneant vell sarunk ti kitem korta? Ti mhunntta: “Hanv dor disa, garden-ant voitam ani thoim koslich addkholl nastana Jehova lagim kallzantlean magnnem korunk mhaka vell melltta.

9. Jezu khub bizi aslo tori astana tannem magnnem korunk koso vell kaddlo?

⁹ Jezuchem jivit ekdom bizi aslem. To hea prithumer porgottʼttalo ani eka zagear thaun dusrea zagear voitalo tednam lokancho zomo tachea fattlean ietale. Karonn te Jezuchem aikonk ani tachea sangata vell sarunk sodhtale. Udharonnak, eka vellar, “tachea darar, nogor-bhor lok zomun, khett zali.” Tori astana, suria udeunche poilim, “eka eksurea zagear” Jehova lagim magnnem korunk Jezun vell kaddlo.—Marku 1:32-35.

10-11. Matev 26:40, 41-a pormonnem, Jezun aplea xisank magnnea vixim kosli gorjechi vost sangli, punn tannim kitem kelem?

¹⁰ Aplea jivitache nimanne rati, Jezun portun niall korunk ani magnnem korunk ek xant zago vinchlo. To apleam xisam sangata Getsemani bagent gelo. (Mt. 26:36) Tea rati tannem aplea xisank magnnea vixim ek gorjechi vost sangli.

¹¹ Te Getsemani bagent pavle tednam ghoddie ratchim bara zaun gelʼlim astolim. Tea vellar, Jezun aplea xisank “zagronn korat,” oxem sanglem ani magir to magnnem korunk gelo. (Mt. 26:37-39) Jezu gelea uprant tache xis nhidle. Ani Jezu porot ailea uprant tache xis nhidleat tem tannem polloilem. Ani tannem tankam portun “zagrut ravat ani  magnnem korat” mhunn sanglem. (Matev 26:40, 41 vachat.) Aplea xisamnim dis bhor khub kam kel’lem ani tea pasot te khub thoklole mhunn Jezu zannam aslo. Tea pasot, Jezun “kudd osokt” oxem mhunnttlem. Tori astana, Jezun tankam magnnem korunk sanglem. Punn uprant, Jezu anik don pavtti magnnem korun ailo tednam tache xis magnnem korchea bodlek nhidleat mhunn tannem polloilem.—Mt. 26:42-45.

12. Magnnem korunk ami khub thokleant vo amchea monant khub chintnam asat oxem amkam dista zalear, ami kitem korunk zata?

¹² Sarko vell vinchun kaddat. Zaite pavtti amchea monant khub chintnam astat vo ami khub thoklolim astat dekhun amchean magnnem korunk zaunchem na oxem amkam disot. Punn bejar zainakat. Tumchea bhaxen zaitea zannank oxench dista. Tor tannim kitem kelolean tankam modot zalea? Thoddea zannamnim aplea magnneacho vell bodolʼla. Udharonnak, tim poilim ratchim magnnim kortalim. Punn tednam tim khub thoklolim aslolean magnnem korunk tankam kotthin zatalem. Tea pasot, tim sanjechem magnnem kortat ani oxem kelolean tankam magnneancher dhean diunk modot zata. Toxench, thoddeank nitt boson vo dimbi ghalun magnnem kelolean faido zala. Tori punn, tumkam khub uske asat vo tumi niraxi asat dekhun tumkam magnnem korunk kotthin zata zalear kitem? Tumkam koxem bhogta tem Jehovak sangat ani to amcho doiall Bapui zalolean, to tumkam somzon ghetolo mhunn khatri dhorat.—St. 139:4.

13. Jehovachea sangata ami vell sartat tednam electronic sadhonam amchem dhean koxem halounk xoktat?

¹³ Obheas kortat tednam tumchem dhean halonk dium nakat. Jehova sangata tumchi ixttagot ghott korunk magnnench kelear puro kai? Na. Ami Bible-acho obheas korop ani mittingek hajir zavop pasun khub gorjechem. Punn oxem kortana, amchem dhean halona zaunk ami kitem korunk zata? Ami amkanch vincharunk zai, ‘Mhojem dhean kiteak lagon halonk xokta?’ ‘Mhaka konnui fon korta vo message vo e-mail dhaddtta tednam tem gheunk vo pollounk hanv vetam kai?’ Aiz zaiteam lagim smartphone vo her electronic sadhonam asat ani tim amkam khub faideak poddttat. Punn thodde sodh korpi sangtat ki amcho fon amchea laginch aslo zalear amchem dhean rokddench halonk xokta. Tea bhair, ek zannar sangta ki fonak lagon amchem  dhean amchea kamacher urona punn dusrea vostuncher voita. Toxench, sorkittachi zomat vo odhivexon suru zaunchea poilim, amkam amcho fon vo tablet dusreank addkholl zaina toslea setting-acher dovrunk sangtat. Tor, dusreanchem dhean halona zaunk ami oxem kortat zalear amchem svotachem dhean halona zaunk ami oxem korop kitlem gorjechem nhoi!

14. Filipkarank 4:6, 7-a pormonnem, Jehova amkam dhean diunk koso modot kortolo?

¹⁴ Dhean diunk modot kor mhunn Jehova Deva lagim magat. Zaite pavtti amkam usko zata tednam amchim chintnam pois korun mittingecher vo ami svotacho obheas kortat tednam dhean diunk amkam kotthin zaunk puro. Punn hem korop ekdom gorjechem zaun asa. Tor tumkam dhean diunk modot kor mhunn Jehova Deva lagim magat ani to tumkam xanti ditolo ani hi xanti fokot tumchim kallzanch nhoi punn “monam” pasun rakhtoli.—Filipkarank 4:6, 7 vachat.

15. Jehova sangata vell sarlolean amkam zata to poilo faido khoincho?

¹⁵ Ami Jehova lagim ulounk, tachem aikonk ani tache vixim chintunk vell sartat tednam amkam zaite toren faido zata. Poilem mhunnttlear, ami bore nirnnoi gheunk pavtat. Oxem ami kiteak mhunnonk zata? Karonn Bible sangta: “Xanneam borabor bhonvlear xannom zata.” (Mho. 13:20) Tor sogleam poros Xanno vo zannvaien bhorlolea, Jehova Deva sangata ami vell sartat tednam ami xannim zaunk pavtat. Hea vorvim, Jehovak manvota tem korunk ami kitem korunk zai, ani ami kitem kelear to dukhi zatolo tem ami somzonk pavtolim.

16. Jehova sangata vell sarlolean bore xikoupi zaunk amkam koxi modot zatoli?

¹⁶ Dusro faido mhunnttlear, ami bore xikoupi zaunk pavtole. Ami konnachea-i sangata Bible obheas kortat tednam ami taka Jehova Deva sangata ek lagxilʼli ixttagot zoddunk modot korunk sodhtat. Tor jitlim chodd ami Jehova Deva lagim uloitolim ani tache vixim xiktolim, titloch tache pasot amcho mog anik vaddttolo. Ani oxem kelolean ami amchea Bible videartheak, Jehovacho mog korunk modot korunk pavtolim. Ani Jezun pasun oxench kelem. To aplea Bapak ekdom bore toren vollkhotalo ani tacho khub mog kortalo. Tea pasot, to tachea xisam lagim hea toren ulounk xoklo ki te pasun Jehovacho mog korunk pavle.—Juanv 17:25, 26.

17. Magnnem ani obheasa vorvim amcho bhavarth koso ghott zaunk pavta?

¹⁷ Tisro faido mhunnttlear, amcho bhavarth anik ghott zata. Ami zaite pavtti Jehova lagim magnneant, margdorxonn, bhuzvonn ani modot magtat. Ani dor ek pavtt, Jehova amchea magnneancho zobab dita tednam amcho bhavarth anik ghott zaunk pavta.  (1 Juanv 5:15) Toxench, ami svotacho Bible obheas kortat tednam pasun amcho bhavarth anik vaddtta. Karonn, ‘sondex aikolea uprant bhavarth utponn zata.’ (Rom. 10:17) Punn, amcho bhavarth ghott korit ravonk obheas kelearuch puro kai? Na. Ami anik kitem tori korunk zai. Tem kitem tem atam polloum-ia.

18. Ami niall kiteak korunk zai tea vixim ek udharonn diat.

¹⁸ Ami xiktat tacher ami niall korunk zai. Ami Stotr 77-achea boroupea thaun hea vixim xikonk zata. Apnnacher ani aplea lokancher Jehovachi maniotai nasli mhunn taka dislem. Ani tea vixim to itlo usketalo ki taka ratik nhid pasun poddonasli. (Versam 2-8) Ani tannem oxem mhunnttlem: “Dev doia korunk visorlo kai? Rag choddlo mhonn kaklut bond keli kai?” (Vers 9) Punn tea uprant tannem kitem kelem? Tannem Jehovak oxem sanglem: “Tujeo soglleo kornnio monant gholloitam, sogllim Tujim ochoriam niallit asam.” (Vers 12) Tor Jehovan adim kitem kel’lem ani aplea lokank kaklut ani doia-maia koxi dakhoili, tea vixim Stotrkaran niall kelo. (Vers 11) Hacho porinnam kitem zalo? Jehova aplea lokank kednanch sanddchona mhunn taka khatri mellʼlli. (Vers 15) Teach bhaxen, Jehovan aplea lokam pasot ani amchea pasot adim kitem kelam tacher ami niall kelolean ami amcho bhavarth ghott korunk pavtolim.

19. Jehova sangata vell sarlolean amkam anik koso faido zata?

¹⁹ Chovto faido mhunnttlear, Jehova pasot amcho mog vaddttolo. Ani hea mogak lagon, ami Jehovachem aikonk, taka manta tem korunk ani amcher ietat te tras sosunk pavtolim. (Mt. 22:37-39; 1 Kor. 13:4, 7; 1 Juanv 5:3) Ani oxem kelolean, Jehova sangata amchi ixttagot anik ghott zatoli. Ani hea ixttagoti poros chodd moladik anik kainch na!—St. 63:1-8.

20. Jehova sangata tumi sartat tea vellacho boro upeog korunk tumi kitem kortolim?

²⁰ Ugddas dovrat, magnnem, obheas ani niall korop amche bhoktecho bhag zaun asa. Tor Jehova sangata vell sartana, Jezu bhaxen ek xant zago vinchun kaddat. Toxench, tumchem dhean halonk dium nakat ani oxem korunk Jehova lagim modot magat. Hea toren, atam tumi tumchea vellacho boro upeog kelear Jehova tumkam novea sonvsarant sasnachem jivit ditolo.—Marku 4:24.