1-2. (a) Jezuchem jivit ani porgottnne vixim ami niallttat tednam amkam koxem bhogta? (b) Hea lekhant ami kitem polloitolim?

 AMCHO mogacho konnui bhair poddtta tednam amkam tacho khub ugddas ieta. Survatek, taka morchea poilim kitem ghoddlolem, ani chodd korun morchea poilim taka tras sosunk poddlole zalear, tea vixim chintʼtat tednam amkam khub dukh zata. Punn vell soron voita toso, tannem kitem xikoilʼlem, vo amkam urba diunk vo amchea tonddar hanso haddunk tannem kitem kelʼlem vo mhunnttlolem, tea vixim ami chintʼtat tednam ami khuxal zatat.

² Teach bhaxen, Jezu kitle tras sosun melo tea vixim ami vachtat tednam amkam khub dukh zata. Ugddas Disachea poilim ani uprantchea sumanamnim, Jezuchem bolidan kitlem moladik tea vixim niallunk ami khas korun vell kaddttat. (1 Kor. 11:24, 25) Punn hea prithumer astana, Jezun jem kitem mhunnttlolem ani kelʼlem tea vixim ami chintʼtat tednam amkam khub khuxalkai melltta. Toxench, to atam kitem korta ani fuddarak kitem kortolo tea vixim ami niallttat tednam amkam urba melltta. Hea vostuncher ani Jezun amkam dakhoilʼlea mogacher niall kelolean taka upkariponn dakhounk ami fuddem sortat. Tor hem ami khoinchea vattamnim korunk zata tem ami hea lekhant polloitolim.

3. Soddvonne pasot upkari asonk amkam koslim karonnam asat?

³ Jezuchem jivit ani tachea mornna vixim ami niall kortat tednam tache pasot amchem upkariponn vaddtta. Tannem hea  prithumer porgottnni keli tednam, Devachea Rajea udexim munxakullak koslim besanvam mellttolim tem tannem xikoilem. Hea Rajeachea sotancho ami khub valor kortat. Ani soddvonne pasot ami khub upkari asat. Karonn hea vorvim, Jehova ani Jezu sangata ami ek lagxilʼli ixttagot zoddunk pavtat. Toxench, Jezucher bhavarth dovortat tankam fuddarak sasnak jieuncho, ani mornnant sanddlolea aplea mogacheank porot mellcho bhorvonso melltta. (Ju. 5:28, 29; Rom. 6:23) Him besanvam amkam favo zaunk ami kainch korunk na! Itlench nhoi, Jehovan ani Jezun amchea pasot jem kitem kelam tachea bodlek ami tankam kainch diunk xokonant. (Rom. 5:8, 20, 21) Punn ami kallzantlean tanche upkari asat mhunn dakhounk ami kitem korunk xoktat?

4. Magdalachi Marien Jezu pasot aplem upkariponn koxem dakhoilem? (Chitr polloiat.)

⁴ Hea vixim amkam Magdalachi Mariechem udharonn asa. Ti ek Judev asli. Ticher sat noxtte dut asle dekhun ti ekdom tollmollttali. Ani ti hea poristhitintlean kednanch bhair soronk pavchina oxem tika distalem. Punn Jezun ticher aslole noxtte dut kaddun uddoile tednam tika koxem bhoglem tea vixim chintat. Ti Jezuk itli upkari asli, ki ti tachi pattlavdar zali. Ani ti aplo vell, takot ani aplea lagim asloleo vostu uzar korun taka porgottnnechea kamant tenko diunk lagli. (Luk. 8:1-3) Jezun tichea pasot jem kitem kelʼlem taka lagon ti khub upkari asli. Punn to fuddarak tiche pasot anikui kitem korcho aslo, tem tika ghoddie khobor naslem zait. Tem mhunnttlear, ‘tacher bhavarth dovortat tea sogleank’ sasnachem jivit mellchem mhunn, Jezu munxakulla pasot aplo jiv diuncho aslo. (Ju. 3:16) Tori astana, Marie Jezuk visvaxi asli. Jezuk khambear khillailʼlo tednam Magdalachi Marie thoim asli. Karonn tika Jezuchi kallji asli ani thoim aslolea herank ti bhuzvonn diunk sodhtali. (Ju. 19:25) Toxench, Jezu melea uprant, ti ani anikui don bailo, Jezuche kuddik lavunk pormollit mosale gheun ailim. Hea toren ti Jezuk kitli upkari asli tem tinnem dakhoilem. (Mk. 16:1, 2) Mariechea visvaxiponnak lagon Jehovan tika ek vhoddlem besanv dilem jem  choddxea xisank mellonk na. Tem mhunnttlear, Jezu melʼleantlo jivont zalea uprant, taka mellonk ani tachea lagim ulounk tika ek sondhi mellʼlli.—Ju. 20:11-18.

5. Jehovan ani Jezun amkam lagon jem kitem kelam tea pasot ami upkariponn koxem dakhounk zata?

⁵ Ami pasun amcho vell, xokti ani poixe Jehovachea kamant uzar korun, Jehovan ani Jezun amkam lagon jem kitem kelam, tea pasot amchem upkariponn dakhounk zata. Udharonnak, Jehovachi bhokti korunk uzar kortat tim bilddingam bandunk ani samballunk ami modot korunk zata.

6. Jezuchi soddvonn amchea modlea dor eklea pasot ek dennem mhunn ami kiteak mhunnonk zata?

⁶ Jehovan ani Jezun amcho kitlo mog kela tea vixim ami chintʼtat tednam ami pasun tancho mog korunk fuddem sortat. (1 Ju. 4:10, 19) Toxench, Jezu amchea modlea dor eklea pasot melo, hem ami vollkhon ghetat tednam, tanche pasot amcho mog anikui vaddtta. Apostl Paulun hem vollkhon ghetlem, ani Galasiekarank chitt boroitana tannem aplem upkariponn dakhoun dilem. Tannem mhunnttlem: ‘Tor Kristan mhozo mog kela ani mhoje khatir apnnakuch somorpun dila.’ (Gal. 2:20) Jezuche soddvonne udexim Jehovan amkam aplim ixttam zaunk tache lagim voddun haddleant. (Ju. 6:44) Tor Jehovan amchea bhitor kitem tori borem polloilam, ani amkam aplim ixttam korun gheunk ek vhodd mol farik kelam, hem zannam zalʼlean amchem kalliz bhoron ieta nhoi! Toxench, Jehova ani Jezu pasot amcho mog anikui vaddtta nhoi! Tor ami amkanch vicharum-ia: ‘Jehovan ani Jezun mhaka dakhoilʼlea mogak lagon hanv kitem korunk fuddem sortam?’

7. Chitrant dakhoilam toxem, ami Jehova ani Jezucho mog kortat mhunn ami koxem dakhounk zata? (2 Korintkarank 5:14, 15; 6:1, 2)

⁷ Ami Jehova ani Jezucho mog kortat dekhun ami dusreankui mog dakhounk fuddem sortat. (2 Korintkarank 5:14, 15; 6:1, 2 vachat.)  Oxem korunk ek vatt mhunnttlear, porgottnnechea kamant ami urben bhag ghetat. Porgottnni kortana ami sogleam lagim uloitat. Tim khoinchea-i kullachim vo zatichim asum, tim gorib vo girest asum vo tankam xikop asum vo na, ami konnachoch bhedbhav korinant. Ami oxem kortat tednam ami Jehovachi khuxi kortat. Karonn “sogllea monxank soddvonn diunk Devachi khuxi, ani somestank purnn sotacho onnbhov mellʼllolo Taka zai.”—1 Tim. 2:4.

8. Ami amchea bhav-bhoinnam pasot mog koso dakhounk zata?

⁸ Ami amchea bhav-bhoinnancho mog kortat tednam pasun, ami Jehova ani Jezucho mog kortat mhunn dakhoun ditat. (1 Ju. 4:21) Bhav-bhoinnanchea gorzam vixim amkam khub kallji asta, ani tanchea trasanchea vellar ami tankam modot kortat. Toxench, tancho mogacho konnui bhair poddla zalear ami tankam bhuzvonn ditat, tanchi bholaiki bori na zalear ami tankam mellonk voitat, ani tim niraxi astat tednam tankam urba diunk ami zata tem soglem kortat. (2 Kor. 1:3-7; 1 Tes. 5:11, 14) Tea bhair, ami tanche pasot magnnem korit ravtat. Karonn, “Devak manovlolea monxachea khotkhotit magnneak khub boll asa” mhunn ami ugddas dovortat.—Jak. 5:16.

9. Ami amchea bhav-bhoinnancho mog kortat mhunn anik koxe toren dakhounk zata?

⁹ Toxench, ami bhav-bhoinnam sangata xanti korunk khub vavr kortat tednam pasun, ami tancho mog kortat mhunn dakhoun ditat. Ami Jehovachi dekh gheun amchea bhav-bhoinnank bhogsunk khub vavr kortat. Tor ami hea vixim chintunk zata. Amchim patkam bhogsunk Jehova aplea ekleach Putak diunk toiar aslo zalear, amchim bhav-bhoinnam amkam dukhoitat tednam, ami tankam rokddench bhogsunk toiar asonk zai nhoi? Ami Jezun sanglolea voparintlea noxttea chakra bhaxen zaunk sodhinant. Tachea dhonian taka ek vhoddlem rinn bhogxilem, punn hea chakran aplea boraborchea chakrachem ek lhan rinn bhogsunk na. (Mt. 18:23-35) Tor amchea ani sobhentlea ek bhav vo bhoinni modem xanti piddʼddear zalea zalear, Ugddas Disa poilim tanchea sangata xanti korunk ami poilem panvl gheunk zata kai? (Mt. 5:23, 24) Ami oxem kelem zalear, ami Jehova ani Jezucho kallzantlean mog kortat mhunn dakhoun ditolim.

10-11. Apunn Jehova ani Jezucho mog kortat mhunn vhoddilamnim koxem dakhounk zata? (1 Pedru 5:1, 2)

¹⁰ Apunn Jehova ani Jezucho mog kortat mhunn vhoddilamnim koxem dakhounk zata? Ek mhotvachi vatt mhunnttlear, Jezuchea xellianchi kallji gheun. (1 Pedru 5:1, 2 vachat.) Jezuk pasun hench zai aslem mhunn tannem apostl Pedruk spoxtt ritin dakhoilem. Jezuk tin pavtti nakarlea uprant, apunn Jezucho kitlo mog korta tem dakhounk Pedru axetalo. Tor jivont zalea uprant, Jezun Pedruk vicharlem: “Simanv, Juanvachea puta, tum mhozo mog korta?” Hea vellar, apunn aplea dhoniacho kitlo mog korta tem dakhoun diunk, Pedru kitem-i korunk toiar aslo mhunn ami khatri dovrunk zata. Jezun taka mhunnttlem: “Mhojea dhakttea menddranchi kallji ghe.” (Ju. 21:15-17) Ani jivitbhor Pedrun Jezuchea menddranchim kallji ghetli ani hea toren apunn Jezucho mog korta mhunn tannem dakhoilem.

¹¹ Vhoddilamno, Jezun Pedruk mhunnttlolim utram tumkam khub mhotvachim asat mhunn Ugddas Disachea poilim ani uprantchea sumanamnim tumi koxem dakhounk zata? Tumi Jehova ani Jezucho kitlo mog kortat tem dakhounk tumi gonvlli bhett korunk zata, ani seva bond kelolea porgottnnarank porot Jehovachi seva korunk modot korunk tumi anik chodd vavr korunk zata. (Ez. 34:11, 12) Toxench, Ugddas Disak hajir zatat tea Bible vidʼdheartheank ani thoim poilech pavtti aileant tankam urba diunk tumi proitn korunk zata. Tankam amchea modem ieukar asa mhunn ami dakhounk sodhtat. Karonn ek-na-ek dis, tim Jezuchim pattlavdaram zatolim mhunn ami bhorvonso dovortat.

12. Jezun morchea adlea ratik sanglolea utrancher niall kelolean amkam dhir kiteak melltta? (Juanv 16:32, 33)

¹² Morchea adlea ratik Jezun aplea xisank sanglem: “Sonvsarant tumcher tras ietolech, punn dhir dhorat! Hanvem sonvsaracher zoit vhelam.” (Juanv 16:32, 33 vachat.) Dusmanancho dhiran fuddo korunk ani moro porian visvaxi ravonk Jezuk koxi modot mellʼlli? To Jehovacher patieun ravlo. Ani aplea pattlavdarankui toslech tras ietole mhunn Jezu zannam aslo dekhun, tancho samball kor mhunn tannem Jehova lagim maglem. (Ju. 17:11) Hem zannam zalolean amkam kiteak dhir melltta? Karonn amchea dusmanam poros Jehova bollixtt asa. (1 Ju. 4:4) Tache nodre thaun kainch lipona. Ami Jehovacher patieun ravlim zalear, ami amche bhiranticho fuddo korunk pavtolim ani dhir dakhounk pavtolim mhunn amkam khatri asa.

13. Arimatheachea Juzen dhir koso dakhoilo?

¹³ Ami Arimatheachea Juzechem udharonn polloum-ia. To Mha-sobhecho ek vangddi aslo ani Judev lok taka khub man ditale. Juze vixim Juanvan sanglem ki to “Jezucho xis aslo, punn Judevanche bhiranten tannem hea vixim konnak kollonk diunk naslem.” (Ju. 19:38) Jezu porgottʼttalo to sondex sot mhunn Juze mantalo tem khorem, punn apnnak Jezucher bhavarth asa mhunn tannem lokank kollonk diunk na. Karonn tea vellar to dhirvont naslo. Apunn Jezucho xis mhunn lokank kollʼllem zalear tim apleak man diunchimnant, oxem ghoddie taka distalem zait. Punn Bible-ant sanglam ki Jezu melea uprant, Juzen “dhiran Pilata mukhar vochon Jezuchi kudd magli.” (Mk. 15:42, 43) Tor tea uprant, apunn Jezucho ek xis mhunn Juzen lipounk proitn korunk na.

14. Tumkam munxanchi bhirant dista zalear tumi kitem korunk zai?

¹⁴ Tumkam-i Juze bhaxen munxanchi bhirant dista kai? Iskolant vo kamachea zagear tumi Jehovachim Sakxi mhunn sangonk tumkam loz dista kai? Dusrim tumchea vixim kitem chintʼtolim tea vixim chodd uskeun tumi ek porgottnnar zaunk vo bautizm gheunk fattim sortat kai? Oslea bhavnank lagon sarkem tem korunk fattim soronakat. Jehova lagim kallzantlean magnnem korat ani tachi khuxi korunk tumkam dhir di mhunn magat. Jehova tumchea magnneancho koso zobab dita tem tumi polloitat tednam tumcho bhavarth anikui ghott zatolo ani tumkam anikui dhir mellttolo.—Iz. 41:10, 13.

15. Jivont zaun Jezu aple xisank mellʼllo tednam khuxal zaun te kitem korunk pavle? (Lukas 24:52, 53)

¹⁵ Jezu melo tednam tache xis khub dukhi zale. Tumi tanchea zagear aslim zalear tumkam koxem bhogtolem aslem tea vixim chintat. Tannim fokot tanchea lagxilʼlea ixttakuch hogddaunk  naslo, punn atam tankam kosloch bhorvonso na oxem tankam dislem. (Luk. 24:17-21) Punn Jezu jivont zaun tankam mellʼllea uprant, tannem vell kaddun, aplea udexim Bible-antleo bhasaunneo koxeo purnn zaleo tem somzonk tankam modot keli. Toxench, tannem tankam ek mhotvachem kam dilem. (Luk. 24:26, 27, 45-48) 40 disam uprant Jezu sorgar gelo tea meren, tache xis dukhi nhoi punn khuxal asle. Karonn tancho Dhoni jivo asa ani tannem dilʼlem kam korunk to tankam modot kortolo mhunn te zannam asle. Ani hea khuxalkaiek lagon te Jehovachi seva korit ravonk pavle.—Lukas 24:52, 53 vachat; D.I. 5:42.

16. Ami Jezuchea xisanchi dekh koxi gheunk zata?

¹⁶ Ami Jezuchea xisanchi dekh koxi gheunk zata? Ami fokot Ugddas Disachea poilim ani uprantchea sumanamninch nhoi, punn voros-bhor Jehovachea sevent chodd vavr korun khuxalkai melloun gheunk zata. Oxem korunk ami Devachem Raj amchea jivitant poilea zagear dovrunk zai. Udharonnak, zaitea zannamnim porgottnnent vochonk, mittingek hajir zaunk ani chukonastana kuttumbik bhokti korunk aplea kamant bodlav keleat. Zoxem, tim disachim umkinch voram kam kortat vo aplea kamam thaun begin bhair sortat. Toxench, dusreank gorjecheo koxeo distat tosleo vostu pasun gheunk, thoddim bhav-bhoinnam fattim ravtat. Karonn tim sobhechea kamamnim anikui modot korunk sodhtat vo porgottnnaranchim chodd goroz asa thoim vochon seva korunk sodhtat. Tor Jehovachi seva korit ravonk amkam sosnikaiechi goroz asa tem khorem. Punn ami Devachem Raj amchea jivitant poilea zagear dovorlear, Jehova amkam zaitim besanvam ditolo mhunn bhas dita.—Mho. 10:22; Mt. 6:32, 33.

17. Hea vorsa, Ugddas Disachea poilim ani uprantchea sumanamnim tumi kitem korunk nichov kela? (Chitr polloiat.)

¹⁷ Mongllar, Abrilache 4 tarker Ugddas Dis korunk ami axeun ravtat. Punn Jezuchem jivit, tachem moronn, ani tannem toxench Jehovan amkam koso mog dakhoila, tea vixim niallunk ami Ugddas Dis ieum porian ravchi goroz na. Ami atanch thaun, ani Ugddas Disa uprant pasun, dor ek sondhi uzar korun hea vixim niallunk vell kaddunk zai. Udharonnak, Amchem Kristi Jivit ani Porgottnni—Mittingechi Pustika Abril 2019-achea, pan 4-acher ek chartt dilʼlo asa. Tea charttant dilʼleo ghoddnneo vachunk ani niallunk ami vell kaddunk zai. Oxe toren, Jezuchea jivita vixim ami vachtat tednam amchem upkariponn, mog, dhir ani khuxalkai vaddoitat toslea Bible-antlea ghoddnneancher ami dhean diunk zai. Toxench, ami khoinchea vattamnim amchem upkariponn dakhounk zata tea vixim ami chintunk zai. Oxem korun, Ugddas Disachea poilim ani uprantchea sumanamnim, Jezucho ugddas korunk tumi kortat tea sogleacho Jezu valor korta mhunn tumi khatri dovrunk zata.—Prok. 2:19.