Thodde dadle oslea sonskrutint vaddlole astat, zoim bailo kainch valoracheo nhoi oxe toren te tanchea sangata vagtat. Hea vixim Bolivia-ntlo, Hans nanvacho sorkittacho dekhrekh korpi oxem sangta: “Thodde dadle oslea sonskrutint vaddleat zoim dadleank bailam poros vhodd mhunn mantat. Te gorvixtt ritin vagtat ani choddxe pavtti bailank resped dinant.” Toxench Taiwan-antlo, Shengxian nanvacho ek vhoddil oxem sangta: “Hanv ravta tea zagear, bailamnim dadleank aple vichar sangchem nhoi, oxem zaite dadle chintʼtat. Ani ek dadlo tachea ixttam sangata astana, eke bailen sanglole vichar sangta zalear, te tachim fokannam korunk xoktat.” Toxench, thodde dadle her vattamnim bailank resped dinant. Zoxem, te bailam vixim naka zalʼlim fokannam kortat.

Punn ek dadlo khoinchea-i sonskrutint vaddom, to aplem chintop bodlunk xokta. Ani dadle, bailam poros vorte nhoi mhunn to xikonk xokta. (Ef. 4:22-24) Oxem korunk, tannem Jehovachi dekh gheunk zai. Tor hea lekhant, Jehova bailam sangata koso vagta, Jehova tanchea sangata vagta tea toren bhavamnim koxem vagonk zata, ani vhoddilamnim bhoinnank resped diun dusreank ek bori dekh koxi dovrunk zata, tem ami polloitolim.

JEHOVA BAILAM SANGATA KOSO VAGTA?

Bailam sangata bore toren vagchea vixim Jehovan sogleam-von borem udharonn dovorlam. To doia-maia aslolo Bapui zaun aslolean, to aplea soglea bhurgeancho khub mog korta. (Ju. 3:16) Ani to visvaxi bhoinnank apleo moladik dhuvo mhunn lekhta. Tor, Jehova bailancho mog korta ani tankam man dita mhunn tannem khoinchea vattamnim dakhoilam tem ami polloum-ia.

To bailam sangata bhedbhav korina. Jehovan dadleank toxench bailank aplea sarkim rochleant. (Ut. 1:27) Tannem dadleank, bailam poros chodd huxar rochunk nant, vo bailam poros chodd to dadleancho mog korina. (2 It. 19:7) Toxench tankam  dogainkui hea toren rochleant ki tim Bible-antlem sot somzonk xoktat ani tache gunn tim apnnaunk xoktat. Tea bhair, hea prithumer sasnak jieuncho bhorvonso vo sorgar raza ani iadnik mhunn seva korcho sueog tannem dadleank toxench bailank dila. Hantuntlean, tancho dogaincho-i bhavarth taka khub moladik asa mhunn kolltta. (2 Ped. 1:1) Tor Jehova bailam sangata bhedbhav korina mhunn spoxtt toren dison ieta.

To tanchem aikota. Bailank koxem bhogta ani tankam kosleo oddchonneo asat tacher Jehova dhean dita. Udharonnak, Rakel ani Hanan Jehova lagim magnnem kelem tednam, Jehovan kan diun aikolem ani tanchea magnneancho zobab dilo. (Ut. 30:22; 1 Sam. 1:10, 11, 19, 20) Toxench thoddea dadleamnim, bailanchem aikolem teo ghoddnneo Bible-ant boroun dovrunk, Jehovan Bible boroupeank prerit kele. Zoxem, Jehovachi adnea pallun Abrahaman apli bail Sarachem aikolem. (Ut. 21:12-14) Toxench, Raza Davidan Abigailachem aikolem. Khorem mhunnttlear, apnna lagim ulounk Jehovanuch tika dhaddloli oxem pasun taka bhoglem. (1 Sam. 25:32-35) Tea bhair Jezu, zo poripurnn toren aplea Bapaiche gunn apnnaita, tannem apli avoi Mariechem aikolem. (Ju. 2:3-10) Tor hea udharonnantlean, Jehova bailanchem aikon tankam resped dita mhunn kolltta.

To tancher visvas dovorta. Udharonnak, Jehovan Evecher visvas dovorlo ani Adanva sangata hea akʼkhea prithumechi kallji gheunk tannem Evek pasun zobabdari dili. (Ut. 1:28) Hantuntlean Eve, Adanva poros oskot nhoi, punn tachea pasot ek ekdom bori sangatin oxem Jehovan lekhli mhunn kolltta. Toxench Jehovan, provadin Debora and Huldacher visvas dovorlo, ani aplea lokank, toxench eka fuddareak ani razak pasun solʼlo diunchi zobabdari dili. (Fudd. 4:4-9; 2 Raz. 22:14-20) Aiz pasun aplem kam korunk, Jehova Kristi bailank uzar korta. Heo visvaxi bhoinno porgottnnaram, pioneer, ani mixinori mhunn seva kortat. Toxench Raj-ghoram ani xakha ofisache design kaddunk, tim bandunk ani samballunk tim modot kortat. Tea bhair, tim Bethel-ant ani RTO-nt seva kortat. Khorench, heo bhoinno Jehovache songottnnent ek vhoddli soin koxi zaun asa, jea vorvim Jehova apli khuxi purnn korta. (St. 68:11, NW) Tor, bailo oskot vo kainch faideacheo nhoi mhunn Jehova polloina.

JEHOVA BAILAM SANGATA VAGTA TEA TOREN BHAVAMNIM KOXEM VAGONK ZATA?

Bhavamno, Jehova jea toren bailam sangata vagta tea toren tumi vagtat kai? Hem zannam zaunk bailam vixim tumchem chintop kitem asa, ani tanchea sangata tumchi vagnnuk koxi asa tea vixim chintat. Hem korunk tumkam modot zai poddot. Zoxi ek X-ray kaddlolean amchem kalliz borem cholta vo na tem amkam kollon ieta. Teach bhaxen, borim ixttam ani Bible-a udexim, ami Jehovak manvota tea toren bailam sangata vagtat vo na tem kollon ietolem. Tor bhavamno, hi modot mellonk tumi kitem korunk zata?

Tumchea eka borea ixttak vicharat. (Mho. 18:17) Tumi visvas dovrunk xoktat, tumcho mog korta, ani tumkam sarkem tench sangta, toslea eka ixttachi modot gheiat. Tumi taka oxem vicharunk zata: “Hanv bhoinnam sangata koso vagtam oxem tuka dista? Mhojea vagnnukentlean hanv bhoinnank man ditam oxem tankam dista kai? Vo tanchea sangata anik bore toren vagonk hanvem sudharnni korunk zai kai?” Tumi khoim sudharnni korunk zai, tea vixim tumcho ixtt tumkam sangta tednam, ragar zainakat vo nimitam dium nakat. Punn tacho solʼlo apnnaun goroz te bodlav korat.

Devachea Utracho obheas korat. Bhavamno, Devachea Utracho obheas korun, tumi bailam sangata sarke toren vagtat vo na tem tumi zannam zaunk zata. (Heb. 4:12) Bailam sangata sarke toren vagle ani vagonk nant, toslea dadleanchim udharonnam Bible-ant dilʼlim asat. Tor tim udharonnam vachtana, tumi konna bhaxen vagtat tacher dhean diat. Toxench, Bible-antlem fokot ekuch vers polloun, bailam vixim tumkam aslolem chukichem chintop sarkem asa mhunn tharainakat. Punn zaitim versam sor korun, dadleamnim bailam sangata koxe toren vagonk zai tem zannam zaiat. Udharonnak, 1 Pedru 3:7-ant “bailo, khub samballun uzar korunk poddtta toslea aidonam bhaxen asat mhunn vollkhon gheun tankam man diat,” oxem sanglam. a Tor hem vers vachun bailo oskot vo teo kainch valoracheo nhoi, oxem eka bhavan chintchem nhoi. Karonn  tannem Galasiekarank 3:26-29-ant Pedrun sanglolim utram vachlear, dadleam sangata bailank pasun Jezu sangata sorgar raz cholounk vinchun kaddleant mhunn taka kollttolem. Tor hea toren apunn bailam sangata sarke toren vagta vo na tem zannam zaunk, ek bhav aplea eka ixttachi modot gheta ani Bible-acho obheas korta tednam, to bhoinnank favo to man diunk pavtolo.

VHODDILAMNIM BHOINNANK RESPED DIUN DUSREANK EK BORI DEKH KOXI DOVRUNK ZATA?

Sobhentlea soglea bhavamnim bailank man diunchea vixim, vhoddilanchi pasun dekh gheunk zata. Tor vhoddil bhoinnank koxe man ditat tacheo thoddeo vatto ami polloum-ia.

Vhoddil bhoinnank xabaski ditat. Hea vixim, apostl Paulun vhoddilank ek ekdom borem udharonn dovorlam. Romantlea sobhek chitt boroitana, tannem zaitea bhoinnank xabaski dili. (Rom. 16:12) Tor Pauluchi hi chitt sobhent vachtana, tea bhoinnank kitli khuxalkai mellʼlli astoli tea vixim chintat. Teach bhaxen, amcheo bhoinno dakhoitat tea borea gunnank lagon ani tim Jehovache sevent kortat tea vavrak lagon, vhoddil tankam xabaski ditat tednam, bhav-bhoinnam tancho valor kortat ani tankam man ditat mhunn bhoinno zannam zaunk pavtat. Toxench, thodde pavtti vhoddil tankam oslea vellar xabaski ditat, jednam tankam tachi goroz asta. Hea vorvim tankam boll melltta ani tim visvaxiponnan Jehovachi seva korit ravonk pavtat.—Mho. 15:23.

Bhoinnank xabaski ditana, vhoddilamnim ti kallzantlean diunk zai ani ti koslea karonnak lagon ditat tem spoxtt ritin sangonk zai. Kiteak? Bhoinn Jessica sangta: “Bhav mhaka, ‘tunvem borem kam kelem’ oxem sangtat tednam, mhaka borem dista. Punn te umkeach karonnak lagon, zoxem hanv mhojea bhurgeank mittingek vogi bosonk xikoitam, vo mhojea Bible vidʼdheartheak mittingek haddunk-vhoronk vavr kortam tem polloun te mhaka xabaski ditat tednam, mhaka anikui urba melltta.” Tor vhoddil bhoinnank xabaski ditana, te ti kiteak ditat tem spoxtt toren sangtat tednam, sobhent bhoinnanchi  goroz asa ani tim valorachim asat mhunn tankam kolltta.

Te bhoinnanchem aikotat. Khaltikaien vagpi vhoddil apleach lagim sogle bore vichar asat mhunn chintinant. Punn te bhoinnanche vichar zannam zaun ghetat ani tanchem kan diun aikotat. Oxem kelʼlean, bhoinnank urba melltta ani vhoddilank pasun faido zata. Koso? Hea vixim, Bethel-ant seva korpi Gerardo nanvacho ek vhoddil oxem sangta: “Bhoinnanche vichar zannam zalʼlean, hanv mhojem kam anik bore toren korunk pavtam. Choddxe pavtti, bhavam poros chodd bhoinnank onnbhov asta. Toxench, sobhamnim pasun zaiteo bhoinno pioneer mhunn seva kortat. Tor vattarantlea lokam vixim tankam bori khobor asta.” Tea bhair, Bryan nanvacho ek vhoddil sangta: “Amchea bhoinnank zaite bore gunn ani kola asat, zachi songottnnek goroz asa. Tor tanchea onnbhovantlean faido melloun gheiat!”

Zannvaien vagpi vhoddil rokddech bhoinnanche vichar nakarnant. Kiteak? Hea vixim Edward nanvacho vhoddil oxem sangta: “Eke bhoinnicho vichar zannam zalʼlean, ek vixoi anik bore toren somzonk ani dusreanchim bhavnam bore bhaxen zannam zaunk, eka bhavak modot zaunk xokta.” (Mho. 1:5) Thodde pavtti bhoinnin sanglolo vichar vhoddilank apnnaunk mellona zalear pasun, tinnem to sanglo dekhun te ticho upkar attoitat.

Te bhoinnank proxikxonn ditat. Zannvaien vagpi vhoddil bhoinnank proxikxonn ditat. Zoxem, porgottnni mitting gheunk, bautizm ghetlolo konnui bhav na zalear, ti mitting koxi gheunchi, tea vixim te tankam proxikxonn ditat. Toxench, sadhonam ani vhoddlim mexinam koxim uzar korchim, tem te bhoinnank xikoitat. Oxem kelʼlean, songottnnechea bandkamant tim pasun modot korunk pavtat. Tea bhair, Bethel-antle dekhrekh korpi bhav, bhoinnank zaitim kamam korunk xikoitat. Zoxem, hixob dovrop, saman viktem ghevop, maintenance, computer programming, ani oslim her kamam. Tor vhoddil hea toren bhoinnank proxikxonn ditat tednam, tim him kamam korunk purtim asat ani visvas dovorpa sarkim asat mhunn te dakhoun ditat.

Zaiteo bhoinno, vhoddilam thaun melltta tem proxikxonn dusreank modot korunk uzar kortat. Udharonnak, bandkamachea kamam vixim proxikxonn mellʼlloleo thoddeo bhoinno, odruxtta uprant dusreanchem ghor bandunk modot kortat. Toxench, jahir porgottnne vixim tankam jem proxikxonn mellʼllam tem uzar korun, dusrea bhoinnamnim jahir porgottnni koxi korunk zata tem tim tankam xikoitat. Vhoddilam thaun mellʼllolea proxikxonna vixim bhoinnank koxem dista? Hea vixim bhoinn Jennifer sangta: “Raj-ghorachea bandkamant hanvem vavr kelo tednam, eka dekhrekh korpean mhaka proxikxonn diunk vell kaddlo. Hanv kortalem tea kamacher to dhean ditalo ani mhaka xabaski ditalo. Tachea sangata kam korun mhaka khub borem dislem. Karonn hanv valorachem asa ani patieupa sarkem asa oxem mhaka bhoglem.”

BHOINNANK MAN DILOLEAN KITEM ZAUNK PAVTA?

Jehova bhaxen ami amchea visvaxi bhoinnancho khub mog kortat. Tim amchi famil koxim zaun asat. (1 Tim. 5:1, 2) Ani tanchea sangata Jehovachi seva korunk amkam khub gorv bhogta. Toxench, ami tankam tenko diunk sodhtat ani tancho mog kortat, hem tim onnbhovtat tednam amkam khub khuxalkai melltta. Hea vixim bhoinn Vanessa sangta: “Hanv Jehovache songottnnecho bhag asa mhunn hanv khub upkari. Karonn hea songottnnent aslolea bhav-bhoinnam vorvim mhaka ghottai melltta.” Toxench, Taiwan-antli ek bhoinn sangta: “Jehova ani tachem songotton bailancho valor korta ani tanchim bhavnam somzon gheta dekhun hanv tanchem khub upkari. Hea vorvim, mhozo bhavarth ghott zata ani hanv hea songottnnecho bhag asa mhunn mhaka gorv bhogta.”

Visvaxi Kristi dadle apleachi dekh gheun bailam sangata bore toren vagtat tem polloun, Jehova kitlo khuxal zata astolo nhoi! (Mho. 27:11) Scotland-ant ravpi Benjamin nanvacho vhoddil sangta: “Aiz sonvsarant zaite dadle bailank matui resped dinant. Tor amcheo bhoinno Raj-ghorant ietat tednam, ami tancho mog kortat ani tankam man ditat mhunn tankam bhoglolem amkam zai.” Tor bhavamno, Jehovachi dekh gheun amchea mogall bhoinnam sangata mogan vagonk ani tankam favo to man diunk amchean zata tem soglem korum-ia.—Rom. 12:10.