“ROTH” hea utrak, Novo Sonvsar Bhaxantor Bible-ant uzar kel’lem utor, veg-vegllea torechea rothank uzar zatalem. (D.I. 8:28, 29, 38) Ethiopiekar odhikarean jem roth uzar kelʼlem, tem zhuzant vo dhanvddent uzar zatalem tem lhan roth naslem, punn ek vhoddlem roth aslem oxem dison ieta. Oxem ami kiteak mhunnonk zata?

Ethiopiekar ek vhoddlo odhikari aslo ani tannem khub lamb provas kelʼlo. “Hea odhikareak Ethiopiechi ranni Kandakechea dorbarant ek vhodd podvi asli, ani taka tichea theveancho dekhrekh korpi mhunn nemlolo.” (D.I. 8:27) Adlea kalla voilea Ethiopia-nt, aichea kalla voilem Sudan, toxench atancho Ejipttacho dokxinnecho bhag mellon aslo. Ethiopiekaran ghoddie tachea akʼkhea provasant tench roth uzar korunk na zait, punn ho lamb provas korunk goroz poddttolem tem zaitem saman tachea lagim aslem astolem. Ani poilea xekddeant, lokank vhoronk uzar kortalim tim rotham char chokranchim astalim ani savlli mellonk tim voilean dhamplolim astalim. Hea vixim Acts—An Exegetical Commentary hea pustokant oxem sanglam: “Oslea rothamnim saman ani her vostu dovrunk anik chodd zago astalo, provas kortoleank susegad provas korunk mellttalo, ani chodd korun lamb provas korunk tankam sompem zatalem.”

Filip Ethiopiekara lagim pavlo tednam to vachtalo. “Filip tea rotha sangata dhanvonk laglo ani tannem to odhikari Izaias provadeachem pustok vachta tem aikolem” mhunn amkam Bible-ant sanglam. (D.I. 8:30) Provas korpi uzar kortalim tim rotham, hea toren toiar kelʼlim ki tim vegan vochonk xokonaslim. Tor tem roth sovkas-sovkas choltalem dekhunuch to odhikari pustokantlim utram vachunk xoklo, ani Filip pasun tea rotha sangata dhanvonk xoklo.

Ethiopiekaran “Filipak rothar choddon aplea sangata bos mhunn vinoti keli.” (D.I. 8:31) Dhanvddent uzar kortale tea rothamnim, choloupi ube astale. Punn provas korunk uzar kortale tea rothamnim bosonk zago astalo. Tor Ethiopiekar aslo tea rothant, taka toxench Filipak bosonk zago aslo.

Itihas pustokachea odheai 8-ant jem kitem sanglam ani itihasa vixim amkam jem kollon ailam taka lagon, halinchea prokaxonamnim Ethiopiekar odhikareak zhuzant vo dhanvddent uzar kortat toslea dhakttea rothant nhoi, punn vhoddlea rothant boson dakhoila.