1. Jehova vixim chintʼtana tumchea monant kitem ieta?

 JEHOVA koso dista tea vixim chintunk tumi kednam-i proitn kela kai? Tache lagim magnnem kortana tumchea dolleam mukhar kitem ieta? Jehova amkam disona to khoro, punn Bible-ant tache vixim zaite kitem sanglam? Zoxem Jehovak ‘Uzvadd vo Suria,’ ani ek “Ddhal” mhunnttlolo asa. Toxench, taka “bhosm korta toslo uzo” mhunnttla. (St. 27:1; 144:2; Heb. 12:29) Tea bhair, Ezekielan eka dorxonant Jehovak, eka safair fatrak, jhigjhigtolea dhatuk ani chokchokit donddubalak sor kelo. (Ez. 1:26-28) Tor Jehova vixim sangloleo heo vostu vachun ami ghoddie ekdom ojap zaunk xoktat vo ami bhieunk pasun xoktat.

2. Jehovak lagim soronk thoddeank kiteak kotthin zaunk xokta?

² Jehovak ami pollounk xokonant dekhun, to amcho mog korta mhunn manun gheunk amkam kotthin zaunk xokta. Thoddeank ghoddie tanchea jivitant adim jem kitem ghoddlem taka lagon, zoxem tanchea bapaik tanchem kainch poddonk naslem dekhun, Jehova kednanch tancho mog korunk xokchona oxem disot. Punn amkam koxem bhogta, ani taka lagim soronk amkam kiteak kotthin zata, tem Jehova bore bhaxen somzota. Ani amkam modot korunk tannem aplea Utrant tachea sobit gunnam vixim sanglam.

3. Ami Jehova ani tachea moga vixim anik bariksannen kiteak zannam zaunk zai?

³ Jehova vixim sangonk ami ek utor uzar kortolim zalear tem zaun asa mog. (1 Ju. 4:8) Bible-ant tachea vixim oxem sanglam: “Dev mhollear Moguch!” Jehova korta tem soglem to mogak lagon korta. To udarponnan mog dakhoita. Ani tacho mog itlo vorto asa ki aplo mog korinant tancho pasun to mog korta. (Mt. 5:44, 45) Tor hea lekhant, ami Jehova ani tachea moga vixim anik bariksannen polloitolim. Karonn ami tachea moga vixim jitlim chodd zannam zatolim, titloch tache pasot amcho mog vaddttolo.

JEHOVA AMCHO KHUB MOG KORTA

4. Jehovachea aplemponna vixim tumkam koxem bhogta? (Chitr pasun polloiat.)

⁴ “Jehova khub aplemponn dakhoupi.” (Jak. 5:11) Bible-ant, Jehovan  apleak eke mogall avoik sor kela. (Iz. 66:12, 13) Ek avoi aplea ballkachi mogan koxi kallji gheta tea vixim tumi chintunk zata. Ti taka aple manddier khelloita ani mogan tachea sangata uloita. Toxench, to bhurgo roddtta vo taka kosli-i dukh asta tednam tachea pasot goroz tem soglem ti korta. Tor ami pasun dukhant astat tednam Jehova amcho mog korta mhunn ami khatri dovrunk zata. Hea vixim stotrkaran pasun oxem boroilem: “Mhojea kallzant huske choddtat tedna Tuji buzvonn mhojea otmeak sukh-sontos dita.”—St. 94:19.

5. Jehovachea visvaxi moga vixim tumkam koxem dista?

⁵ Jehova visvaxi asa. (St. 103:8, NW) Ami chuktat tednam to amcho mog korop bond korina. Hem amkam Izraelitkaranchea udharonnantlean kolltta. Izraelitkaramnim zaite pavtti Jehovak dukhoilo. Punn uprant tannim poschatap kelo ani tim porot Jehova lagim ailim tednam, to azun poriant tancho mog kortalo mhunn Jehovan tankam khatri dili. Tannem tankam oxem mhunnttlem: ‘Mhojea dolleam mukhar tumi omolik dekhun, Hanv tumkam man ditam ani tumcho mog kortam.’ (Iz. 43:4, 5) Aiz amche-i pasot Jehovacho mog bodlonk na. Ami gombhir chuki kelear pasun to amkam soddun dina. Punn ami poschatap korun porot tache lagim ietat tednam, to amcho mog korta mhunn amkam dison ietolem. ‘To amkam udar kallzan bhogxitolo’ mhunn bhas dita. (Iz. 55:7) Ani hea bhogsonnea vorvim ‘Jehova amkam novean ghottai melltta tosle dis haddttolo’ mhunn Bible-ant sanglam.—D.I. 3:19.

6. Zekaria 2:12-ntlean ami Jehova vixim kitem xiktat?

⁶ Zekaria 2:12 vachat. Jehova amkam tachea dolleantle bhaulek sor korta. Amcho dollo khub nazuk ani ekdom moladik asa mhunn ami zannant. Tor eka orthan, Jehovan oxem mhunnttlolea sarkem zaun asa, ‘Mhojea lokank tras korta to, mhaka jem moladik asa taka tras korta.’ Khorench, Jehova amcho itlo mog korta dekhun amkam koxem bhogta tem to rokddoch somzonk xokta ani to amchi rakhonn korunk axeta. Ami dukhant astat tednam taka dukh bhogta. Tor hi khatri dovrun ami oxem magnnem korunk zata: “Tujea dolleantle bhaule vori Tum mhaka rakh.”—St. 17:8

7. Jehova amcho mog korta mhunn amchi khatri ami kiteak ghott korunk zai?

⁷ Punn amchea jivitant adim jem kitem ghoddlam vo amkam atam ghoddie trasancho fuddo korunk poddtta dekhun, Jehova amcho mog korta mhunn vollkhon gheunk amkam kotthin zaunk xokta. Ani hem Jehova bore bhaxen zannam. Tori astana, to amcho mog korta mhunn amkam purnn khatri asloli taka zai. Tor hi khatri ghott korunk ami kitem korunk zata? Jezuk, makhloleank ani amkam sogleank Jehova koxe toren mog dakhoita tem ami xikonk zata.

 JEHOVA MOG KOSO DAKHOITA?

8. Jehova aplo mog korta mhunn Jezuk kiteak dubhav naslo?

⁸ Jehovan ani Jezun sangata sarla titlo vell anik konnench sarunk na. Tannim eka-meka sangata sorgar koroddamnim vorsam sarleant. Tea vellar tanchem natem anik ghott zalem. Ani Jehova, Jezucho kitlo mog kortalo tem Matev 17:5-ant, tannem ukteponnim sanglem. Thoim Jehovan oxem mhunnonk zatalem, ‘Ho mhaka manvola.’ Punn apunn Jezucho kitlo mog korta tem ami zannam zalʼlim taka zai aslem dekhun, Jehovan taka “mhozo opurbaiecho Put,” oxem mhunnttlem. Jezu vixim Jehovak khub gorv bhogtalo, khas korun to dusream pasot aplo jiv diunk toiar aslo dekhun. (Ef. 1:7) Ani Jehova aplo mog korta mhunn Jezuk pasun kosloch dubhav naslo. Hea pasot aplo Bapui aplo mog korta mhunn to zaite pavtti khatren sangonk xoklo.—Ju. 3:35; 10:17; 17:24.

9. Jehova makhloleancho mog korta mhunn amkam khoinchea utrantlean kollon ieta? Somzaiat. (Romkarank 5:5)

⁹ Jehova makhloleancho pasun khub mog korta. (Romkarank 5:5 vachat.) Hea versant “votoila” hem utor uzar kelam. Ani Bible-a vixim aslole eke dictionary-nt hea utra vixim oxem sanglam ki Devacho mog eke “zhori porim amcher votʼta.” Hantuntlean, Jehova makhloleancho kitlo mog korta tem kolltta. Ani makhloleank pasun, tim ‘Devachea opurbaiechim’ mhunn khatri asa. (Jud. 1) Apostl Juanvan makhloleank Jehovachea moga vixim koxem bhogta tea vixim oxem boroilem: “Polleiat, Bapan amcho kedo vhoddlo mog korun dakhoilo. Khud Bap amkam mhonntta: Tumi Mhojim bhurgim.” (1 Ju. 3:1) Punn Jehova fokot makhloleanchoch mog korta kai? Na. To amcho sogleancho mog korta mhunn tannem dakhoun dilam.

10. Jehova amcho mog korta mhunn sogleam-von vhoddlo puravo khoincho?

¹⁰ Jehova amcho mog korta mhunn sogleam-von vhoddlo puravo khoincho? Soddvonnechi manddavoll. Hea vorvim konnench mog dakhounk na titlo mog Jehovan amchea pasot dakhoilo! (Ju. 3:16; Rom. 5:8) Jehovan amchea pasot tachea opurbaiechea Putak moronk dhaddlo, jea vorvim amkam amchea patkanchem bhogsonnem mellttolem aslem ani ami tachim ixttam zatolim aslim. (1 Ju. 4:10) Tor Jehovan ani Jezun amchea pasot jem mol farik kelem tea vixim ami jitlim chodd chintʼtat, titloch te amcho kitlo mog kortat tem ami somzonk pavtat. (Gal. 2:20) Tor fokot neai korunk lagonuch Jehovan hi soddvonnechi manddavoll korunk na. Punn to amcho mog korta mhunn tannem hem dennem amchea pasot dilem. Oxem ami kiteak mhunnonk zata? Karonn Jezu Jehovak sogleam poros chodd moladik zaun asa. Tori astana, tannem taka amchea pasot tras sosunk ani moronk dhaddlo.

11. Jeremias 31:3-antlean ami kitem xiktat?

¹¹ Tor ami polloilem toxem, Jehova amcho kitlo mog korta tem to amkam ukteponnim sangta. (Jeremias 31:3 vachat.) To amcho mog korta dekhunuch tannem amkam apnnam sorxim voddun haddleant. (D.S. 7:7, 8 sor korat.) Ani tachea moga thaun konnuch vo kitench amkam vegllim korunk xokona. (Rom. 8:38, 39) Tor Jehovachea moga vixim tumkam koxem bhogta? Tumi Stotr odheai 23 vachun pollounk zata. Oxem kortana, Jehovacho mog ani aplemponna vixim chintun tumkam ghoddie Davidak bhoglem toxench bhogonk xokta.

JEHOVACHEA MOGA VIXIM TUMKAM KOXEM BHOGTA?

12. Stotr 23-ant amkam kitem vachunk melltta?

¹² Stotr 23:1-6 vachat. Stotr 23-ant, Jehova tacho mog korta ani tachi kallji gheta mhunn Davidan khatren sanglem. Toxench, Jehovachem ani tachem natem kitlem ghott aslem tem-ui tannem sanglem. Ani tannem taka aplo Gonvlli mhunnttlo. Jehovachem margdorxon pallun apunn surokxit asa oxem Davidak bhogtalem ani to Jehovacher purnn toren patietalo. Toxench, Jehova taka dor disak mog dakhoitolo mhunn Davidak khatri asli. Kiteak?

13. Jehova apli kallji gheta mhunn Davidak kiteak khatri asli?

¹³ “Kainch mhaka unnem na!” Jehovan sodanch  Davidacheo sogleo gorzo purnn keleo dekhun, to apleachi kallji gheta mhunn Davidak bhoglem. Toxench, Jehova aplo ixtt ani apunn taka manvola mhunn David zannam aslo. Tor fuddem kitem-i zalear pasun Jehova apleo sogleo gorzo purnn korit ravtolo mhunn Davidak kainch dubhav naslo. Tor Jehova aplo mog korta ani kallji gheta mhunn Davidak visvas aslo dekhun chodduch usko korina zaunk, toxench khuxal ani dhadoxi ravonk Davidak modot zali.—St. 16:11.

14. Jehova mogan amchi kallji koxi gheta?

¹⁴ Jehova amchi mogan kallji gheta, khas korun amchea jivitant vaitt ghoddnneo ghoddttat tednam. Hea vixim amkam bhoinn Claire-acho onnbhov asa. a Tinnem 20 vorsam poros chodd Bethel-ant seva keli. Punn okosmat tichea famili sangata eka-fattlean-ek vaitt ghoddnneo ghoddonk lagleo. Tichea daddy-k stroke ailo, tiche eke bhoinnik sobhentlean bhair kaddli, tanchea familichem business bond poddlem, ani loan-ak lagon bank-an tanchem ghor vhelem. Hem soglem ghoddlem tednam kitem korchem tem bhoinnik kainch somzona zalem. Punn Jehovan tanchi mogan koxi kallji ghetli? Hea vixim Claire sangta: “Jehovan dor disa amchea familicheo gorzo purnn keleo. Zaite pavtti amchea gorzam poros chodd tannem amkam dilem. Jehovan amkam koxi modot keli tem hanv khub pavtti chintʼtam. Ani tannem dakhoilʼlo mog hanv kednanch visorchem na! Khorench, Jehovan amchea pasot jem kitem kelam taka lagon mhaka modot zali. Ani mhojea jivitant oddchonneo aileo tednam hanv khuxalkaien tachi seva korit ravonk pavlem.”

15. Davidak novean ghottai kiteak mellʼlli? (Chitr pasun polloiat.)

¹⁵ ‘Jehova mhojea jivak novean ghottai dita.’ Thodde pavtti Davidak tachea oddchonneank ani trasank lagon niraxiponn bhoglem. Punn Jehovacho mog ani aplemponnak lagon taka ghottai mellʼlli. (St. 18:4-6) Trasank lagon thokon gelʼlea aplea ixttak Jehovan “pachvo chorov” ani “xitoll udkam sorim” vhelo. Hea pasot Davidak novean  ghottai mellʼlli ani to khuxalkaien Jehovachi seva korit ravonk xoklo.—St. 18:28-32.

16. Tumkam ghottai mellonk Jehovan kitem kelam?

¹⁶ Aiz pasun Jehovachea “visvaxi doiall mogak xevott na” dekhun, amchea jivitant tras ani oddchonneo ietat tednam ami tancho fuddo korunk pavtat. (Vil. 3:22; Kol. 1:11) Hea vixim amkam bhoinn Rachel-acho onnbhov asa. COVID-19 pidde vellar ticho ghov, tika ani Jehovak soddun gelo tednam ti samkich tuttli. Punn tea vellar, Jehovan tichea pasot kitem kelem tea vixim ti sangta: “Mhojea ixttam vorvim, Jehova mhozo mog korta mhunn tannem mhaka dakhoilem. Tannim mhojea sangata vell sarlo, mhaka jevonn haddlem, mhaka urba ditat tosleo message-o ani versam dhaddlim, tim mhaka bori smile ditalim, ani Jehova mhoji kallji gheta mhunn mhaka ugddas korit ravtalim. Tor mhozo mog korta tosli vhoddli famil Jehovan mhaka dilea mhunn hanv sodanch tache upkar attoitam.”

17. Davidak ‘koslench vaitt tacher ieit mhunn usko’ kiteak naslo?

¹⁷ ‘Koslench vaitt mhojer ieit mhunn mhaka usko na karonn tum mhoje sorxim ubo asa.’ Davidacho jiv zaite pavtti dhokeant aslo ani taka zaite dusman asle, je tachea poros bollixtt asle. Tori astana, Jehovachea mogak lagon apunn surokxit asa ani to apli rakhonn korta mhunn Davidak bhoglem. To koslea-i poristhitint aslear pasun Jehova tachea sangata asa mhunn taka khatri asli. Ani hem zannam zalʼlean taka bhuzvonn mellʼlli dekhunuch, to oxem mhunnonk pavlo: ‘Jehovan soglea mhojea akantantlo mhaka nivarlo.’ (St. 34:4) Tor Davidak thodde pavtti khub bhirant disli tem khorem. Tori astana, Jehova aplo mog korta hem zannam zalʼlean to apli bhirant pois korunk pavlo.

18. Tumkam bhirant dista tednam Jehova tumcho mog korta hi khatri aslolean, tumkam ghottai koxi mellonk xokta?

¹⁸ Amchea jivitant kosli-i vaitt ghoddnni ghoddtta, vo amkam ek bhirankull vo kotthin poristhiticho fuddo korunk poddtta tednam, Jehova amcho mog korta hem zannam zalʼlean amkam ghottai melltta. Pioneer mhunn seva korpi bhoinn Susi-n oxench onnbhovlem. Tanchea putan jiv dilo tednam tika ani tichea ghovak koxem bhoglem, tea vixim ti oxem sangta: “Okosmat osli vaitt ghoddnni ghoddtta tednam, kallzak vhoddlo dhoko bosta. Ani soglem kabar zalem oxem dista. Toxench, faleam anikui kitem-i vaitt zait kai mhunn chintun-chintun bhirant dista. Punn hea vellar Jehovan amchi kallji ghetli ani ami tachea vengent surokxit asat oxem amkam bhoglem.” Toxench, ami poilim uloilʼlim bhoinn Rachel oxem sangta: “Eke ratik hanv ekdom niraxi aslem. Mhojea tokler uskeancho bhar aslo ani hanv samkem bhielʼlem. Tea vellar, hanvem roddon vhoddlean Jehova lagim magnnem kelem. Tednam ek avoi aplea ballkak xant korta tea porim, Jehovan mhaka aplea vengent dhorun vogi kelem oxem mhaka dislem. Tea vellar, mhojem mon ani kalliz xant  zalem ani hanv sust nhidlem. Hi ghoddi hanv kednanch visorchem na.” Tea bhair, Tasos nanvachea eka vhoddilak, ek kotthin poristhiticho fuddo korunk poddlo. To foujent bhorti zaunk na dekhun, taka char vorsam bondkhonnint ghatlo. Tor tea vellar Jehova tacho mog korta ani kallji gheta mhunn tannem koxem onnbhovlem? Bhav sangta: “Mhaka goroz asli tachea poros chodd Jehovan mhaka dilem. Hea vorvim hanv purnn toren tacher patieunk xoktam mhunn mhozo visvas vaddlo. Ani bondkhonnint poristhiti ekdom vaitt asli. Tori astana, Jehovan aplea povitr xokte udexim mhaka khuxal ravonk modot keli. Tor hanv Jehovak jitlom lagim ravtolom, titlo chodd hanv tacho mog onnbhovunk pavtolom mhunn mhaka kollʼllem. Hea pasot hanvem bondkhonnintuch niemit pioneer seva suru keli.”

APLEMPONN DAKHOUPI DEVAK LAGIM SORAT

19. (a) Jehova amcho mog korta hem zannam zalʼlean amchem magnnem koxem astolem? (b) Jehovachea moga vixim jem sanglam tantuntlem khas korun tumkam kitem avoddtta? (“ Jehovacho Mog Ani Aplemponn Dakhoupi Versam,” hem boks polloiat.)

¹⁹ Hea lekhant ami polloilʼle onnbhov dakhoun ditat ki Jehova, ‘amcho mogall Dev’ amchea sangta asa! (2 Kor. 13:11) Taka amchi dor ekleachi kallji asa. Ani tannem amkam tachea ‘maiemogan [“visvaxi mogan,” NW] guttlaileant’ mhunn amkam khatri asa. (St. 32:10) Tor Jehovan amkam koso mog dakhoila tea vixim ami jitlim chodd niallttolim, titlich taka amchi kallji asa mhunn amkam dison ietolem, ani ami taka lagim sortolim. Hea pasot, ami tache lagim ukteponnim uloitolim ani amkam tachea mogachi kitli goroz asa tem taka sangtolim. Toxench, to amkam somzota ani amkam modot korunk axeta mhunn amkam khatri aslolean amche sogle uske ami taka sangtolim.—St. 145:18, 19.

20. Jehovachea mogak lagon ami taka lagim koxim soronk pavtat?

²⁰ Eka thonddaiechea disa amkam ujea vorvim gormi melltta toxi, amchea jivitant oddchonneo ani tras ietat tednam Jehovachea moga vorvim amkam bhuzvonn melltta. Tor Jehovachea moga thaun ami bhuzvonn ani xanti melloun gheum-ia. Ani Jehova amcho mog korta mhunn khuxal zaun ami oxem mhunnom-ia: “Sorvesporachea mogan mhojem kalliz bhorlam.”—St. 116:1.