1-2. Jehovachea visvaxi sevokank kosle tras sosunk poddot?

 AMCHEA jivitant vaitt ghoddnneo ghoddttat tednam, ratiam bhitor amchem akʼkhem jivit bodolta. Zoxem, visvaxiponnan Jehovachi seva korpi, Luis a nanvachea eka bhavak, taka gombhir torecho cancer asa mhunn kollʼllem. Ani to anik thoddech mhoine jietolo mhunn tachea dotoran taka sanglem. Toxench bhoinn Monika ani ticho ghov urben Jehovachi seva kortalim. Punn ek dis bhoinnicho ghov, zo vhoddil mhunn seva kortalo, to khub tempa thaun lipon Jehova add patok korit aslo mhunn tika kollʼllem. Tea bhair Olivia nanvachi ek ankvar bhoinn ravtali tea zagear ek vhoddlo hurricane ieuncho aslo dekhun, tika tichem ghor soddun vochonk poddlem. Punn uprant ti porot aili tednam tichem akʼkhem ghor nas zalʼlem mhunn tinnem polloilem. Tor ekuch dhopkeak hea bhav-bhoinnanchem akʼkhem jivit bodolʼlem. Tumchea-i jivitant kosli-i vaitt ghoddnni ghoddlea kai, zaka lagon ratiam bhitor tumchem jivit bodolʼlam?

² Ami visvaxiponnan Jehovachi seva kortat tem khorem. Punn her lokam bhaxen ami-i duent poddttat ani amkam-i zaite tras sosunk poddttat. Toxench Jehovachea lokancho dves kortat tim munxam, amcho virodh korunk vo amkam dhumallo diunk xoktat. Amcher ietat te tras Jehova addaina tem khorem, punn amkam modot kortolo mhunn to bhas dita. (Iz. 41:10) Ani amchi poristhiti kitli-i kotthin aslear pasun, Jehovache modotin ami amchi khuxalkai samballunk xoktat, bore nirnnoi gheunk xoktat ani taka visvaxi ravonk xoktat. Tor ekdom kotthin poristhitint Jehova amkam khoinchea char vattamnim modot korta, tem hea lekhant polloum-ia. Ani tachi modot gheunk ami kitem korunk zai tem zannam zaum-ia.

 JEHOVA AMCHI RAKHONN KORTOLO

3. Kotthin poristhitincho fuddo korunk poddtta tednam amkam kitem korunk kotthin zaunk xokta?

³ Amkam kitem korunk kotthin zaunk xokta? Amkam kotthin poristhitincho fuddo korunk poddtta tednam, sarke toren chintunk ani nirnnoi gheunk amkam kotthin zaunk xokta. Karonn tea vellar ami khub niraxi astat. Oxem disonk xokta ki ami oslea zagear ubim asat, zoim khub datt dov poddtta ani khoim voichem tem amkam kollona. Kotthin poristhitincho fuddo korunk poddlo tednam, Monika-k ani Olivia-k koxem bhoglem tacher dhean diat. Olivia sangta: “Hurricane-ak lagon mhojea ghorachem nisonntton zalem tednam, soglem kabar zalem oxem mhaka dislem ani kitem korchem tem kainch somzona zalem.” Toxench Monika-chea ghovan, tika ghat kelea uprant tinnem oxem mhunnttlem: “Hanv samkich niraxi zalim. Konnem mhojea kallzak bhalo toplo oxem mhaka dislem. Sodanchim kamam korunk pasun mhaka khub kotthin zatalem. Mhojea sovem oxem ghoddttolem mhunn hanvem sopnant pasun chintunk naslem.” Tor amkam pasun oxem bhogta tednam, Jehova amkam koso modot kortolo mhunn tannem bhas dilea?

4. Filipkarank 4:6, 7-a pormonnem, Jehova amkam kosli bhas dita?

⁴ Jehova amkam koso modot korta? To amkam apli xanti ditolo mhunn bhas dita. Ani ti xanti mhunnttlear, “Devachi xanti” mhunn Bible sangta. (Filipkarank 4:6, 7 vachat.) Hi xanti fokot Jehova sangata lagxilʼli ixttagot aslolean melltta. Ani ti amchea “somzon gheupachea tanki poros vorti asa,” mhunnche ami chintunk na titli vorti asa. Tumi kednam-i tori Jehova lagim magnnem kelam, ani uprant tumkam eke torechi xanti bhoglea kai? Tich “Devachi xanti” zaun asa.

5. Devachi xanti amchea kallzachi ani chintnanchi rakhonn koxi korta?

⁵ Toxench, Devachi xanti ‘amchea kallzanchi ani chintnanchi rakhonn kortoli’ mhunn Filipkarank 4:7-ant sanglam. “Rakhonn” hea utrak uzar kelʼlem Grik utor, soinikank uzar kortale, je dusmanamnim xaracher akromonn korina zaunk tachi rakhonn kortale. Ani hea pasot xarantle lok susegad nhidonk xoktale. Karonn soinik tea xarachi rakhonn kortat mhunn tankam khatri asli. Teach bhaxen, Devachi xanti amchea monachi ani kallzachi rakhonn korta tednam amkam xanti melltta, karonn ami surokxit astat mhunn ami zannant. (St. 4:8) Ani Hana bhaxen amchi poristhiti rokddich bodolna zalear pasun hi xanti amkam melltta. (1 Sam. 1:16-18) Ani hea karonnak lagon amkam sarke toren chintunk ani nirnnoi gheunk chodd korun modot zata.

6. Devachi xanti mellonk ami kitem korunk zata? (Chitr pasun polloiat.)

⁶ Ami kitem korunk zai? Tumkam usko zata tednam, eka orthan rakhonndarak apoiat. Tem  mhunnttlear, tumkam Devachi xanti mellosor magnnem korit ravat. (Luk. 11:9; 1 Tes. 5:17) Luis zachea vixim ami poilim uloilʼlim tache thodde dis urleat mhunn tankam kollʼllea uprant, hea oddchonnecho fuddo korunk taka ani tachi bail Ana-k koxi modot zali, tea vixim to sangta: “Hea vellar bholaike vixim ani her vixoi-ancher nirnnoi gheunk khub kotthin aslem. Punn ami magnnem kelem dekhunuch, hea kotthin poristhitint ami xant ravonk pavlim.” Tanchem mon ani kalliz xant dovrunk ani sarke nirnnoi gheunk zannvai di mhunn, Luis ani tache bailen kallzantlean ani porot-porot Jehova lagim magnnem kelem mhunn tannim sanglem. Ani oxem kelʼlean, tankam modot zali. Tor tumi pasun kotthin poristhitincho fuddo kortat zalear, magnnem korit ravat. Oxem kelʼlean, Jehovachi xanti tumchim monam ani kallzam rakhta mhunn tumi onnbhovunk pavtolim.—Rom. 12:12.

JEHOVA AMKAM HALONK DIUNCHONA

7. Eke kotthin porisithiticho fuddo kortat tednam amkam koxem disonk xokta?

⁷ Amkam kitem korunk kotthin zaunk xokta? Ami koslea-i oddchonneancho fuddo kortat tednam amchim bhavnam, chintop ani vagnnukent bodol zata. Eka vadollant, ek tarum lharancher halta-dolta tea bhaxen amkam disonk xokta. Bhav Luis melea uprant, bhoinn Ana-kui toxench dislolem. Ti sangta: “Thodde pavtti hanv khub niraxi zatalem. Mhaka mhojech churchure dison roddonk ietalem. Toxench atam to na dekhun mhaka rag ietalo.” Tea bhair bhoinn Ana-k eksurponn bhogtalem. Adim Luis ghetalo tea vixoi-ancher atam tika nirnnoi gheunk poddttale dekhun, ti khub bejar zatali. Thodde pavtti ti vadoll aslolea doriant asa, oxem tika distalem. Tor chintnamnim ani uskeamnim ami buddon voitat tednam, Jehova amkam koso modot korta?

8. Stotr 16:8-a pormonnem, Jehova kitem kortolo mhunn amkam khatri asa?

⁸ Jehova amkam koso modot korta? Jehova amkam halonk diunchona mhunn amkam khatri melltta. (Stotr 16:8 vachat.) Vadoll ieta tednam, ek tarum hevtten-tevtten halonk lagta. Punn zaitea tarvank pondak paktte astat dekhun, tim titlim halonk pavonant ani hea pasot tantunt provas kortoleank surokxotai bhogta ani tancho provas boro asta. Punn he paktte tem tarum fuddem vochot asta tednam anik bore toren kam kortat. Teach bhaxen, ami pasun kotthin poristhitint visvaxiponnan Jehovachi seva korit ravtat tednam, to amkam halonk dina vo thir ravonk modot korta.

9. Sodh korchim sadhonam uzar kelʼlean amchem mon xant dovrunk amkam koxi modot zaunk xokta? (Chitr pasun polloiat.)

⁹ Ami kitem korunk zai? Ami amchea uskeamnim ani chintnamnim buddlolim astat tednam magnnem korop, mittingek hajir zavop ani porgottnni korop ami bond korunk zaina. Ami poilim kortalim tem soglem atam korunk xokonant zait. Tori astana, amchean zata tem ami korunk  zai. Karonn Jehova amchea lagim zaina tachi opekxa korina mhunn ami ugddas dovrunk zai. (Luk. 21:1-4 sor korat.) Toxench ami svotacho obheas ani niall korunk zai. Karonn Jehovache songottnnen zaitim prokaxonam ani video toiar keleat, je amkam amchem mon xant dovrunk modot kortat. Tor ami sodh korunk, JW Library^® app, Watch Tower Publications Index, ani Research Guide for Jehovah’s Witnesses, him sadhonam uzar korunk zatat. Bhoinn Monika sangta ki tichem mon xant urona toslim chintnam vaddttat mhunn tika kollttalem tednam, ti rokddich him sadhonam uzar korun sodh kortali. Udharonnak “rag,” “ghat” vo “visvaxiponn,” hea utram vixim ti sodh kortali. Ani tichem mon xant zaisor ti vachit ravtali. Ti sangta: “Hanv sodh korunk bostali tednam, mhojem mon uskeamnim buddlolem astalem. Punn hanv ti mahiti vachit ravtali tednam, Jehova mhaka ghott veng marta oxem mhaka bhogtalem. Te lekh vachlolean mhaka koxem bhogta tem Jehova ekdom bore bhaxen zannam, ani to mhaka modot korta mhunn mhaka kollʼllem.” Tor Jehova dita ti modot ami-i ghetli zalear, amchem mon xant dovrunk amkam modot zatoli.—St. 119:143, 144.

JEHOVA AMKAM TENKO DITOLO

10. Amkam kitem-i vaitt ghoddlea uprant koxem disonk xokta?

¹⁰ Amkam kitem korunk kotthin zaunk xokta? Amkam kitem-i vaitt ghoddlea uprant thodde pavtti ami samkinch niraxi zaunk xoktat, vo amche lagim kitench korunk takot na oxem amkam disonk xokta. Amkam ghoddie oslea dhanvpea bhaxen disonk xokta, zo eka tempar boroch fast dhanvtalo, punn mar laglolean to kunttit cholta. Tor adim ami sompeponnim korunk xoktalim teo vostu atam amkam korunk kotthin zata astolem. Toxench amkam khuxalkai haddttaleo teo vostu korunk atam monuch na zait. Amkam Elija bhaxen amchea bhitor kainch takot na oxem disonk xokta ani nhidonuch ravom-xem disonk xokta. (1 Raz. 19:5-7) Tor amkam oxem bhogta tednam Jehova amkam kitem bhas dita?

11. Jehova amkam modot korta ti anik ek vatt khoinchi? (Stotr 94:18)

¹¹ Jehova amkam koso modot korta? Jehova amkam tenko ditolo mhunn bhas dita. (Stotr 94:18 vachat.) Eka mar laglolea dhanvpeak cholonk-bhonvonk dusreanchi modot zai asta toxi, kotthin poristhiti vellar Jehovachi seva korit ravonk amkam-i modotichi goroz asta. Oslea vellar Jehova amkam oxi khatri dita: “Hanv, Sorvespor, tuzo Dev, tujea uzvea hatak ghott dhortam; Hanv tuka sangtam: ‘Bhieum naka, Hanv tujea adarak ietam.’” (Iz. 41:13) Ani Raza Davidan pasun hem onnbhovlem. Taka trasancho ani dusmanancho fuddo korunk poddlo tednam tannem Jehovak oxem  mhunnttlem: “Tujea uzvea hatan mhaka samballʼloi.” (St. 18:35) Tor Jehova amkam koso tenko dita?

12. Ami niraxi astat tednam amkam modot korunk Jehova konnank uzar korunk xokta?

¹² Amkam modot korunk Jehova chodd korun dusreank fuddem kaddtta. Udharonnak, David niraxi aslo tednam, tacho ixtt Jonathanan taka urba ani bhuzvonn dili. (1 Sam. 23:16, 17) Toxench, Elijak modot korunk Jehovan Elishak vinchun kaddlo. (1 Raz. 19:16, 21; 2 Raz. 2:2) Teach bhaxen, amkam modot korunk Jehova amchi famil, ixttam vo vhoddilank uzar korta. Punn ami niraxi astat tednam amkam ekttinch ravonk zai, vo amkam konnachech lagim ulounk naka oxem disonk xokta. Tor oslea vellar, Jehova dita ti modot ami koxi gheunk zata?

13. Jehova dita ti modot gheunk ami kitem korchem nhoi, ani kitem korchem? (Chitr pasun polloiat.)

¹³ Ami kitem korunk zai? Eksurim ravom nakat. Ami eksurim ravtat tednam, amchem dhean fokot amcher ani amchea oddchonneancher asta. Ani oslea vellar amkam bore nirnnoi gheunk kotthin zaunk xokta. (Mho. 18:1) Hem khorem, ki amchea jivitant kitem vaitt ghoddtta tednam, thodde pavtti amkam konnacheach lagim ulounk vo konnakuch mellonk naka oxem disot. Punn ami sogleach vellar eksurim ravtat zalear, amkam modot korunk Jehova zankam uzar korta tankam ami nakartolim. Tor amkam kitlem-i kotthin zalear pasun ami amchi famil, ixttam ani vhoddilanchi modot gheunk zai. Karonn khorem mhunnttlear, tanchea vorvim Jehova amkam modot korta.—Mho. 17:17; Iz. 32:1, 2.

JEHOVA AMKAM BHUZVONN DITOLO

14. Amkam kiteak lagon bhirant disonk xokta?

¹⁴ Amkam kitem korunk kotthin zaunk xokta? Kednam-kednam ghoddie amkam-i bhirant disonk xokta. Adlea kalla voile Jehovache visvaxi sevok pasun, tanchea dusmanank lagon ani her oddchonneank lagon bhieun thorthorle mhunn Bible-ant sanglam. (St. 18:4; 55:1, 5) Teach bhaxen, amkam pasun bhirant disonk xokta. Karonn amchea iskolantlim, kamachea zagea voilim, vo familintlim amkam dhumallo di-it, vo sorkara koddlean amkam virodh sosunk poddot, vo amkam aslolea gombhir duensak lagon amcho jiv vochot mhunn ami bhieunk xoktat. Hea vellar, amkam eka adar naslolea ballka bhaxen disonk puro. Tor oslea vellar Jehova amkam koso modot korunk xokta?

15. Stotr 94:19-antlean amkam kosli khatri melltta?

¹⁵ Jehova amkam koso modot korta? To amkam bhuzvonn dita. (Stotr 94:19 vachat.) Hem stotr vachtana, ami oslea eka lhan bhurgea  vixim chintunk zata jem goddgoddak ani vadollak lagon khub bhielam ani taka nhid poddona. Punn tea vellar tacho bapui tache lagim ieta, ani taka nhid poddosor aplea vengent dhorta. Tem vadoll thambonk na tem khorem. Tori astana, tem bhurgem aplea bapaichea vengent asa dekhun, apunn surokxit asa oxem taka bhogta. Teach bhaxen, ami pasun amchea jivitant bhirankull poristhitincho fuddo kortat tednam, amkam xanti mello poriant, eka orthan, amchea sorginchea Bapaichea vengent ravonk poddot. Tor hea toren Jehova koddlean bhuzvonn mellonk ami kitem korunk zata?

16. Jehova koddlean bhuzvonn mellonk ami kitem korunk zata? (Chitr pasun polloiat.)

¹⁶ Ami kitem korunk zai? Bhuzvonn mellonk ami Jehova lagim magnnem korunk zai ani tachem Utor vachunk zai. (St. 77:1, 12-14) Amkam oxem korchi sonvoim asa zalear, amkam tension zata tednam ami sogleam-von poilim amchea sorginchea Bapa lagim modot magtolim. Amkam kiteak bhirant dista vo amkam kosle uske asat tem ami taka ukteponnim sangonk zai. Ani uprant Bible vachun, to amkam kitem sangonk sodhta tem ami aikonk zai. (St. 119:28) Oxem kelʼlean, to amkam koxe toren bhuzvonn dita tem ami zannam zatolim. Bible-antle umkech bhag vo pustokam vachlolean amkam bhuzvonn mellot. Udharonnak, Job, Stotram, Mhonnʼnneo, ani Jezun Matev odheai 6-ant sanglolea utrantlean amkam ghottai mellonk xokta. Tor ami Jehova lagim magnnem kortat ani tachem Utor vachtat tednam, amkam tache thaun bhuzvonn mellttoli.

17. Amkam kitem khatri asa?

¹⁷ Ekdom kotthin poristhitincho fuddo kortana pasun Jehova amkam kednanch eksurim soddchona mhunn ami khatri dovrunk zata. (St. 23:4; 94:14) Jehova amkam rakhtolo, halonk diunchona, tenko ditolo ani bhuzvonn ditolo mhunn bhas dita. Jehova kitem kortolo tea vixim Izaias 26:3-ant oxem sanglam: “Zanchem mon Tujer thir dhorlolem asa, tankam Tum purnn xantin jieunk ditai, kiteak tancho visvas Tujer dovorlolo asa.” Tor Jehovacher visvas dovrat, ani to dita ti modot gheiat. Oxem kelear, kotthin poristhitimnim pasun amkam ghottai mellttoli.