OBHESACHO LEKH 2
GIT 132 Atam Ami Ek Zalim
Ghovamno—Tumchea Bailek Man Diat
“Ghovamno . . . tankam man diat.”—1 PED. 3:7.
MUKHEL MUD’DO
Eka ghovan aplea bailek utramnim ani korneamnim koso man diunk zata tem ami hea lekhant polloum-ia.
1. Jehovan kazarachem dennem diunk ek karonn kitem?
JEHOVA ek ‘khuxal Dev’ zalʼlean ami pasun khuxal aslolim taka zai. (1 Tim. 1:11) Tea pasot ami khuxalkaien jieunk tannem amkam zaitim dennim dileant. (Jak. 1:17) Tantuntlem ek dennem zaun asa, kazar. Jednam ek dadlo ani bail kazar zatat, tim eka-mekacho mog kortolim ani eka-mekak resped ditolim mhunn bhas ditat. Ani tim eka-meka pasot mog vaddounk vavr kortat tednam tanchea jivitant khori khuxalkai asta.—Mho. 5:18.
2. Aiz zaite ghov aplea baile sangata koxe vagtat?
2 Punn dukhachem mhunnttlear, aiz zaitim ghov-bailam tannim kazara disa eka-mekak kitem utor dilʼlem tem visron geleant. Haka lagon tim khuxal nant. World Health Organization-achea eka ripotta pormonnem zaite ghov aplea bailek boddoitat, tika ekdom dukhoitat toslim utram uloitat ani her vattamnim tichea sangata krur toren vagtat. Oxem korpi thodde ghov, lokam mukhar apunn aplea bailecho mog korta ani tichi kallji gheta mhunn dakhoitat. Punn ghora ailea uprant poristhiti vegllich asta. Toxench, zaite ghov pornography polloitat dekhun, tanche bailek to aplo mog korina oxem bhogta ani tim niraxi astat.
3. Ek ghov koslea karonnank lagon aplea bailecher otʼteachar korit?
3 Thodde ghov aplea baile sangata vaitt toren kiteak vagtat? Ghoddie te lhan astana, tancho bapui tanchea avoi sangata krur toren vagtalo. Tor apnnem pasun aplea baile sangata krur toren vaglear hantunt kainch vaitt na oxem tankam disot. Toxench thodde dadle oslea sonskrutint vaddleat zait zoim aplea bailecher hukum choloilear apleak chodd man ditole ani apunn “ek khoro dadlo” mhunn chintʼtole oxem tankam disonk xokta. Titlench nhoi, her dadleank lhanponnim thaun tanchea bhavnancher, zoxem tanchea ragacher tabo dovrunk xikounk na zait. Tea bhair thoddea dadleank pornography pollounchi sonvoim asta, jea vorvim tankam bailam vixim ani sex-a vixim chukichem chintop asta. Toxench thodde ripott dakhoitat ki COVID-19 pidde vellar anikui chodd ghovamnim aplea bailancher otʼteachar kelo. Punn ghovamnim khoincheach karonnank lagon aplea bailecher kednanch otʼteachar korcho nhoi.
4. Kristi ghovamnim kitem chotrai dovrunk zai, ani kiteak?
4 Bailam vixim aslolem sonvsarachem chintop apnnaina zaunk Kristi ghovamnim chotur ravonk zai. a Karonn jem ami chintʼtat tench ami korunk pavtat. Tea pasot apostl Paulun Romantlea makhlolea Kristanvank oxi xittkaunni dili. “Sonvsarachea vostum pormonnem tumkam akar divop bond korat.” (Rom. 12:1, 2) Paulun tankam chitt boroili tednam tim Kristanvam zaun zaito temp zalʼlo. Tori astana, Pauluchea hea utrantlean kolltta ki tanchea modlea thoddeancher tea kalla voilea chintpacho ani riti-rivazancho probhav poddlolo. Tea pasot tanchem chintop ani vagnnuk bodlunk Paulun tankam solʼlo dilo. To solʼlo aiz pasun Kristi ghovank lagu zata. Karonn tanchea modlea thoddeamnim hea sonvsarachem chintop apnnailam ani aplea bailecher otʼteachar pasun kela. b Hem kitlem dukhachem zaun asa nhoi! Punn ghovamnim aplea baile sangata koxem vaglolem Jehovak zai? Hacho zobab amkam hea lekhachea mukhel versant melltta.
5. 1 Pedru 3:7-a pormonnem eka ghovan aple baile sangata koxe toren vagonk zai?
5 1 Pedru 3:7 vachat. Ghovamnim aple bailek man dilʼlo Jehovak zai. Ek ghov aple bailek man dita tednam to tichea sangata mogan ani doiall toren vagta. Tor hea lekhant, eka ghovan aple bailek koso man diunk zata tem ami polloitolim. Punn poilim, eka ghovan kitem kelʼlean to aple bailek man dina mhunn dakhoita tem polloum-ia.
TUMCHE BAILEK DUKHOITA TOXEM KAINCH KORINAKAT
6. Aple bailek marta tea ghova vixim Jehovak koxem bhogta? (Koloskarank 3:19)
6 Eka ghovan aple bailek kednanch marchem nhoi. Hinvsen bhorlolea munxancho Jehova dves korta. (St. 11:5) Ani khas korun ek ghov aple bailek marta tednam Jehovak tem matui avoddna. (Mal. 2:16; Koloskarank 3:19 vachat.) Hea lekhachem mukhel vers, tem mhunnttlear 1 Pedru 3:7-a pormonnem, ek ghov aple bailek man dina zalear Jehova sangata tachi ixttagot piddʼddear zaunk xokta. Ani Jehova ghoddie oslea munxachim magnnim pasun aikochona.
7. Efezkarank 4:31, 32-a pormonnem, ghovamnim koslea torechem ulovop pois korunk zai? (“Utrachi Somzonni” pasun polloiat.)
7 Eka ghovan aple baile sangata kednanch krur toren ulounchem nhoi. Thodde ghov aple baile lagim tapon uloitat ani tankam dukhoitat toslim utram mhunnttat. Punn “rag, krodh, bob marop ani gallio marop” hacho Jehova dves korta. c (Efezkarank 4:31, 32 vachat.) Ami ugddas dovrunk zai ki Jehova soglem aikota. Bhonvtonnim konn na tednam pasun, ek ghov aple baile lagim koso uloita tacher Jehova dhean dita. Ek ghov aple baile sangata vaitt toren uloita tednam, aple baile laginch nhoi punn Jehova sangata pasun tacho sombond piddʼddear zata.—Jak. 1:26.
8. Pornography vixim Jehovachem chintop kitem asa, ani kiteak?
8 Eka ghovan kednanch pornography pollounchi nhoi. Jehova pornography-cho dves korta. Ek ghov pornography polloita zalear, to Jehova sangata apli ixttagot piddʼddear korta ani aple bailek man dina. d Karonn Jezun sanglolem ki konnui munis eke bailek vaitt nodren polloit ravta zalear to tichea sangata “aplea kallzant” pordvar korta. e (Mt. 5:28, 29) Tor ek ghov aplea korneamnim ani aplea chintnamnim pasun aple bailek visvaxi ravlolo Jehovak zai.
9. Ek ghov aple baile sangata loingik otʼteachar korta tednam Jehova tachea vagnnukecho kiteak dves korta?
9 Eka ghovan aple baile sangata oxe toren kednanch vagchem nhoi, jea vorvim tichea sangata loingik otʼteachar zata oxem tika dista. Thodde ghov aplea bailek oxe toren loingik sombond dovrunk ticher dobhav ghaltat, jea vorvim tichem ontoskornn tika khata ani to ticho moguch korina oxem tika dista. Tor ek ghov oxe toren vagon apleach vixim chintʼta ani aplea bailechea bhavnank resped dina tednam, Jehova tachea vagnnukecho khub dves korta. Karonn eka ghovan aplea bailecho mog kelolo, tichea sangata doiallaien vaglolo ani tichea ontoskornnak man dilolo Jehovak zai. (Ef. 5:28, 29) Punn ek Kristi ghov aple baile sangata loingik otʼteachar korta, tika marta, tichea sangata krur toren uloita vo pornography polloita zalear kitem? Tannem aplem chintop ani vagnnuk koxi bodlunk zata?
TUMCHI VAITT VAGNNUK TUMI KOXI SODDUN DIUNK ZATA?
10. Jezun ghovank koxi ek bori dekh dovorli?
10 Ghovank vaitt vagnnuk pois korunk koxi modot zaunk xokta? Tannim Jezuchi dekh gheunk vavr korunk zata. Jezu kazar zaunk na tem khorem, punn to aplea xisam sangata jea toren vaglo tantuntlean ghovamnim aple baile sangata koxem vagchem tea vixim tannem ek bori dekh dovorli. (Ef. 5:25) Udharonnak, Jezu aplea xisam sangata koso vaglo ani uloilo, tantuntlean ghovamnim kitem xikonk zata tacher dhean diat.
11. Jezu aplea xisam sangata koso vaglo?
11 Jezu aplea xisam sangata sodanch doiall toren ani respedan vagtalo. To tanchea sangata kednanch krur toren uloinaslo vo tancher hukum cholounk proitn korinaslo. To tancho Somi ani Dhoni aslo mhunnttoch, tanchea poros khub xoktivont aslo. Punn tannem apli xokti tankam bhivounk vo te aplea poros khub oskot asat mhunn dakhounk kednanch uzar korunk na. Khorem mhunnttlear, tannem khaltikaien tanchi seva keli. (Ju. 13:12-17) Tannem tankam oxem sanglem: “Mhojea thaun xikat, jea vorvim tumkam novean ghottai mellttoli, karonn hanv movall ani khalto.” (Mt. 11:28-30) Tor Jezu movall aslo hacher dhean diat. Ek movall munis oskot asona. Karonn to aplea bhavnancher tabo dovrunk xokta. Konnui taka rag haddtta vo to bejar asta tednam pasun to xant ravta ani aplim bhavnam tabeant dovorta.
12. Jezu dusream sangata koso uloilo?
12 Jezun aplea utram vorvim dusreank bhuzvonn ani urba dili. To aplea pattlavdaram sangata kednanch krur toren ulounk na. (Luk. 8:47, 48) Tache dusman tacho opman kortale ani taka rag haddunk proitn kortale tednam pasun “tannem porot opman korunk na.” (1 Ped. 2:21-23) Thodde pavtti to vogi ravlo ani kednach ragan zobab diunk na. (Mt. 27:12-14) Jezun ghovank ek ekdom borem udharonn dovorlam nhoi!
13. Eka ghovan ‘aple bailek ektthovlolo’ asonk kitem korunk zai? (Matev 19:4-6) (Chitr pasun polloiat.)
13 Jezun ghovank aple bailek visvaxi ravonk sanglem. Aplea Bapachea utrancho ul’lekh korun Jezun mhunnttlem ki ek ghov “aplea bailek ektthovtolo.” (Matev 19:4-6 vachat.) “Ektthovtolo” hea utrak uzar kelʼlea Grik utracho orth mhunnttlear, “chittkop.” Tor ek ghov ani bailecho sombond itlo ghott asonk zai zoxim eka orthan tim eka-mekak chittkololim asat. Eklean aplea sangateak dukhoita toxem kitem-i kelem zalear tacho probhav dogaincherui poddtta. Ek ghov zo aple bailecho kallzantlean mog korta to sogle torechi pornography pois kortolo. ‘Polkea vostuncher tachi nodor poddona’ zaunk to rokddich apli nodor pois kortolo. (St. 119:37) Khorem mhunnttlear, to khoinchech ostorek vaitt nodren polloina zaunk aplea dolleam sangata korar kortolo.—Job 31:1.
Aple bailek visvaxi aslolo ghov pornography pollounk nakarta (Peregraf 13 polloiat) g
14. Jehova ani aple baile sangata sombond porot ghott korunk eka ghovan khoinchim panvlam gheunk zai?
14 Aple bailek dukhoita toslim utram mhunntta, vo tichea sangata otʼteachar korta tea ghovan, Jehova sangata toxench aple baile sangata aplo sombond porot ghott korunk anikui thoddim panvlam gheunk zai. Tim khoinchim? Poilem, apunn jem kitem korta tem chukichem mhunn tannem vollkhonk zai ani Jehova soglem polloita mhunn tannem ugddas dovrunk zai. (St. 44:21; Up. 12:14; Heb. 4:13) Dusrem, apli vaitt vagnnuk tannem soddun diunk zai ani aplo sobhav bodlunk zai. (Mho. 28:13) Tisrem, aplo guneanv vollkhon tannem aple baile lagim, toxench Jehova lagim kallzantlean bhogsonnem magonk zai. (D.I. 3:19) Toxench bodlav korunk apleak itsa di, ani aplim chintnam, utram ani korneo tabeant dovrunk modot kor mhunn tannem Jehova lagim magnnem korunk zai. (St. 51:10-12; 2 Kor. 10:5; Filp. 2:13) Chovtem, aplea magnneam pormonnem kam korun, tannem gallio marop ani sogle torechi hinvsa soddun diunk zai. (St. 97:10) Panchvem, tannem rokddich sobhechea vhoddilanchi modot gheunk zai. (Jak. 5:14-16) Sovem, to kortalo tim vaitt kamam porot korina zaunk tannem kitem pois korchem tea vixim ek list korunk zai. Je ghov pornography polloitat, tannim pasun him sov panvlam gheunk zai. Tanchi vagnnuk bodlunk te zo vavr kortat tacher Jehova besanv ghaltoloch! (St. 37:5) Punn eka ghovan fokot aplim vaitt utram ani vagnnuk soddlearuch puro nhoi. Tannem aple bailek man diunk pasun xikonk zai. Koso?
TUMI TUMCHEA BAILEK MAN KOSO DIUNK ZATA?
15. Ghovan aple bailek mog koso dakhounk zata?
15 Tumi tumchea bailecho mog kortat mhunn dakhoiat. Thodde bhav je aplea kazari jivitant khuxal asat, te aplea bailecho mog kortat mhunn dor disak dakhoitat. (1 Ju. 3:18) Ek ghov lhan-lhan kamamnim aplea bailecho mog korta mhunn dakhounk xokta. Zoxem ticho hat dhorun, vo tika veng marun. Toxench to tika ek message dhaddun “Hanv tuka miss kortam” vo “Tuzo dis koso cholta?” mhunn vicharunk xokta. Tea bhair, ek ghov aplea bailecho kitlo mog korta tem dakhounk tannem tika ek kardd korunk zata. Tor ek ghov oxem korta tednam to aplea bailek man diunk pavta ani tanchem kazari jivit anikui ghott zata.
16. Ghovan aple bailechi kiteak tokhnnai korunk zai?
16 Tumchi bail moladik asa mhunn tika sangat. Aplea bailek man dita to ghov ti taka kiteak moladik asa tem sangon tika urba dita. Oxem korunk ek vatt mhunnttlear, apleak tenko diunk ti zo vavr korta tea pasot tiche upkar attounk to kednanch visorna. (Kol. 3:15) Ek ghov kallzant thaun aplea bailechi tokhnnai korta tednam tika khub borem dista ani aplo ghov apleachi porva korta, mog korta ani apleak man dita mhunn tika kollon ieta.—Mho. 31:28.
17. Ghovan aple baile sangata respedan koxem vagonk zata?
17 Tumchea baile sangata doiall toren ani respedan vagat. Aplea bailecho mog korta to ghov ticho khub valor korta ani tichi kallji gheta. Apli bail, Jehovan apleak dilʼlem ek moladik dennem mhunn to lekhta. (Mho. 18:22; 31:10) Haka lagon to soglea vellar, mhunnche tim loingik sombond dovortat tednam pasun tichea sangata doiall toren ani respedan vagta. Tim kuddicho sombond dovortat tednam, to ticher oxem kitench korunk dobhav ghalina, jea vorvim ticher loingik ritin otʼteachar zata oxem tika distolem vo tichem ontoskornn tika sotaitolem. f Toxench Jehova mukhar to aplem svotachem ontoskornn pasun nitoll dovrunk khub vavr korta.—D.I. 24:16.
18. Ghovamnim kitem korunk nichov korunk zai? (“ Tumchea Bailek Man Diunk Char Vatto” hem boks pasun polloiat.)
18 Ghovamno, tumchea utramnim ani korneamnim tumchea bailek man diunk tumi kortat tea soglea vavracher Jehova dhean dita ani to khub khuxal zata mhunn khatri dovrat. Tor tumchea bailek dukhoita tosli vagnnuk pois korunk, doiall toren ani respedan tichea sangata vagonk, toxench tika mog dakhounk nichov korat. Oxem kelolean, tumi kallzantlean tumchea bailecho mog kortat ani ticho valor kortat mhunn dakhoun ditole. Tor tumche bailek man diat. Oxem kelolean, tumi sogleam-von mhotvachi ixttagot, ti mhunnttlear, Jehova sangata tumchi ixttagot samballunk pavtole.—St. 25:14, NW.
GIT 131 “Devan Jem Zoddlam”
a Janer 2024-achea, Pahrogopur-ant “Bhavamno, Jehova Bailam Sangata Vagta Toso Tumi Vagtat Kai?” ho lekh vachlolean ghovank faido zatolo.
b Tumchea kazari sangatean tumcher otʼteachar kela zalear, JW Library® ani jw.org-acher, “More Topics” hea series-ant aslolo, “Help for Victims of Domestic Abuse” ho lekh tumkam faideak poddonk xokta.
c UTRACHI SOMZONNI: ‘Gallio marop vo dukhoita toslim utram mhunnop’ mhunnttlear, eka munxacho opman korunk vo tachi loz korunk mhunnttlolim krur utram. Tea bhair, dusrea vixim ekleak jem avoddna tem taka porot-porot sangop ani taka nanvam dovrop pasun mellon asa.
d jw.org ani JW Library-cher aslolo “Pornography Can Shatter Your Marriage,” ho lekh polloiat.
e Ek bail jicho ghov pornography polloita, tika Agost 2023-achea Pahrogopur-ant aslolo, “Kazari Sangati Pornography Polloita Tednam” ho lekh vachlolean modot zaunk xokta.
f Ghov-bail loingik sombond dovortat tednam kosli vagnnuk sarki ani chukichi hea vixim Bible-ant bariksannechi mahiti diunk na. Tor osle nirnnoi ghetana, ek Kristi zoddpem Jehovak man dita, eka-mekak dukhounk sodhina ani ek nitoll ontoskornn samballunk sodhta mhunn dison ieunk zai. Ani oslea vixoi-ancher ek zoddpem gheta to nirnnoi fokot tancheach modem asonk zai ani tannim tea vixim dusreank sangchem nhoi.
g CHITRACHI MAHITI: Ek bhav kamachea zagear asa, ani tachea sangata kam korpi burxea chitranchem ek masik pollounk tacher dobhav ghaltat.
