OBHEASACHO LEKH 5
GIT 108 Devacho Visvaxi Mog
Jehovachea Mogak Lagon Amkam Koso Faido Zata?
“Krist Jezu patkeank salvar korunk hea sonvsarant ailo.” —1 TIM. 1:15.
MUKHEL MUD’DO
Soddvonne thaun amkam koso faido zata ani ami Jehovache upkari asat mhunn koxem dakhounk zata tem ami hea lekhant polloitolim.
1. Jehovak khuxal korunk ami kitem korunk zata?
TUMCHEA mogacheak tumi ek khas dennem ditat mhunn chintat, jem khub sobit asa ani uzar korunk pasun melltta. Tea munxan tem dennem uzar korinastana almarint bond korun dovorlear, tumi kitlim niraxi zatolim nhoi! Punn tannem tem dennem uzar kelem ani tumche upkar attoile zalear tumi khub khuxal zaunchimnant kai? Heach bhaxen, Jehova amcho mog korta dekhun tannem amkam soddvonnechem moladik dennem dilam. Tor ami tea dennea pasot ani Jehovachea moga pasot tache upkar attoitat tednam, to kitlo khuxal zatolo nhoi!—Ju. 3:16; Rom. 5:7, 8.
2. Ami hea lekhant kitem polloitolim?
2 Punn vell soron voita toso, soddvonnechea moladik dennea pasot sovkas-sovkas korun amcho valor unno zaunk xokta. Oxem zalear, eka orthan ami tem dennem almarint bond korun dovortat ani tacho ugddas pasun korinant oxem zatolem. Tor oxem zaina zaunk, ami sodanch Jehovan ani Jezun amchea pasot kitem kelam tem ugddas korit ravonk zai. Ani ho lekh amkam tench korunk modot kortolo. Tor soddvonne udexim amkam atam koso faido zata ani fuddarak koso faido zatolo tem hea lekhant polloum-ia. Toxench Jehovachea mogak lagon ami sodanch, khas korun Ugddas Disachea poilim ani uprantchea sumanamnim koxem upkariponn dakhounk zata tem-ui polloum-ia.
AMKAM ATAM KOSO FAIDO ZATA?
3. Soddvonne udexim amkam atam khoinche eke vatten faido zata?
3 Soddvonne udexim amkam aiz pasun faido zata. To koso? Soddvonne udexim Jehova amchim patkam bhogxita. Tannem toxem korunkuch zai oxem na. Tori punn apleak zai mhunn to toxem korta. Jehova aplim patkam bhogxita mhunn stotrkar tacho khub upkari aslo. Hea pasot tannem oxem mhunnttlem: “Tum Jehova boro ani bhogsunk toiar asa.”—St. 86:5, NW; 103:3, 10-13.
4. Jehovan soddvonnechem dennem konnam pasot dilem? (Lukas 5:32; 1 Timotak 1:15)
4 Amchea modlea thoddea zannank, amkam Jehovachem bhogsonnem favona oxem disot. Khorem mhunnttlear, amkam konnakuch Jehovachem bhogsonnem favona. Apostl Paulu pasun hem somzolo dekhun tannem oxem mhunnttlem: “Ek apostl mhunnonk pasun hanv purto na.” Torui, tannem uprant mhunnttlem: “Hanv zo konn asam to Devachea favo naslolea doiek lagon.” (1 Kor. 15:9, 10) Ami poschatap kortat tednam Jehova amkam bhogxita. Kiteak? Amkam bhogsonnem mellonk favo dekhun nhoi, punn to amcho mog korta dekhun. Tori astana amkam bhogsonnem favona mhunn chintun ami niraxi zatat zalear, Jehovan poripurnn munxank lagon nhoi, punn poschatap kortat tea patkeank lagon soddvonnechem dennem dilem mhunn ami ugddas dovrunk zai.—Lukas 5:32; 1 Timotak 1:15 vachat.
5. Jehovan amkam bhogsunkuch zai oxem chintop sarkem zatolem? Somzaiat.
5 Ami zaitea vorsam thaun Jehovachi seva kortat dekhun Jehovan amkam bhogsunkuch zai mhunn ami kednanch chintchem nhoi. Jehovache sevent ami jem kitem kortat tacho to valor korta. (Heb. 6:10) Punn tannem soddvonn amkam ek funkott dennem koxem dilʼlem asa, ami kortat tea vavra pasot to farik korta oxem nhoi. Ami Jehovachea sevent khub vavr kela dekhun tannem amkam bhogsunkuch zai mhunn chintlear, amkam soddvonnechi gorozuch na mhunn ami chintʼtat oxem zatolem.—Galasiekarank 2:21 sor korat.
6. Paulun Jehovache sevent khub vavr kiteak kelo?
6 Paulun zaitim vorsam Jehovachi seva kelʼli. Punn Jehovachem bhogsonnem mellop aplo hokʼk nhoi mhunn taka khobor asli. Tor Paulun Jehovache sevent itlo vavr kiteak kelo? Jehovan tachea pasot favo nasloli doia dakhoilea tache upkar attounk. (Ef. 3:7) Paulu bhaxen ami pasun urben Jehovachi seva korit ravtat. Kiteak? Tachi doia zoddun gheunk nhoi, punn ami tache upkari asat mhunn dakhounk.
7. Soddvonne vorvim amkam anik khoinchea vatten faido zata? (Romkarank 5:1; Jakob 2:23)
7 Soddvonne vorvim amkam anik eke vatten faido zata. Ami Jehova sangata ek lagxilʼli ixttagot zoddunk pavtat. a Ami fattlea lekhant polloilʼlem toxem, zolma thaun Deva sangata amkam koslench natem asonk na. Punn soddvonnek lagon ami tachea sangata “xantichem natem” zoddunk ani taka lagim soronk xoktat.—Romkarank 5:1; Jakob 2:23 vachat.
8. Magnnem korchea sueoga pasot ami Jehovak kiteak upkari asonk zai?
8 Jehova sangata lagxilʼli ixttagot aslolean ami khoinchea-i vellar tachea lagim magnnem korunk zata. Ami amchea bhav-bhoinnam sangata astat tednanch nhoi, punn ami ekttim astana pasun tachea lagim magnnem kortat tednam to dhean diun aikota. Magnnem kelʼlean amkam monachi xanti melltta ani Deva sangata amchi ixttagot anikui ghott zata. (St. 65:2; Jak. 4:8; 1 Ju. 5:14) Prithumer astana Jezun zaite pavtti Jehova lagim magnnem kelem. Karonn Jehova aplem aikota ani hea vorvim aplea Bapa sangata apli ixttagot ghott zata mhunn Jezuk khatri asli. (Luk. 5:16) Soddvonne vorvim ami Jehovachim ixttam zaunk xoktat, ani tache lagim magnneant ulounk xoktat mhunn ami khorench khub upkari asat nhoi!
AMKAM FUDDARAK KOSO FAIDO ZATOLO?
9. Soddvonne udexim Jehovachea visvaxi sevokank fuddarak koso faido zatolo?
9 Soddvonne udexim Jehovachea visvaxi sevokank fuddarak koso faido zatolo? Tankam sasnak jieunk mellttolem. Punn hozaramnim vorsam thaun munxam morot aileant mhunnttoch, ami sasnak jieunkuch xokonant oxem zaiteank dista. Torui, munxam sasnak jielʼlim survate thaun Jehovacho udʼdhex aslo mhunn ami ugddas dovrunk zai. Adanvan patok korunk naslem zalear, ami konnuch morchim naslim. Tor ami sasnak jieunk xoktat hem manun gheunk amkam sodʼdheak kotthin zata zalear pasun, oxem zatolench mhunn ami khatri dovrunk zai. Karonn oxem ghoddonk Jehovan sogleam-von vhoddlem mol farik kelam. Tem mhunnttlear, tannem aplea opurbaiechea Putachem bolidan dilam!—Rom. 8:32.
10. Makhlolim Kristanvam ani dusrim menddram kosli vatt polloit asat?
10 Sasnachem jivit amkam fuddarak mellttolem tem khorem. Punn ami atam pasun tea vixim chintit ravlolim Jehovak zai. Makhlolim Kristanvam sorgar vochon Jezu sangata hea prithumer raz cholounchi vatt polloit asat. (Prok. 20:6) Toxench dusrim menddram dukh ani tras nastana, fuddarak sobit bag zalʼle hea prithumer jieunchi vatt polloit asat. (Prok. 21:3, 4) Tumkam hea prithumer sasnak jieuncho bhorvonso asa kai? Toxem zalear, sorgar jieunchea bhorvonxea poros ho ek unnea molacho bhorvonso oxem chintinakat. Jehovan amkam heach pasot rochleant. Tor ami hea prithumer sasnak jietolim tednam ami kednanch zaunkuch xokona titlim khuxal astolim.
11-12. Novea sonvsarant ami koslea-koslea besanvanchi vatt polloit asat? (Chitram pasun polloiat.)
11 Fuddarak Sobit Bag zalʼle hea prithumer amchem jivit koxem astolem tea vixim chintat. Ami duent poddttolim ani mortolim mhunn amkam kednanch uskeunk poddchem na. (Iz. 25:8; 33:24) Jehovache khuxe pormonnem asloli amchi dor ek itsa to purnn kortolo. Tumkam suknneam vixim ani zonvaram vixim anik xikonk zai? Vo songitachim sadhonam vazounk vo chitram kaddunk xikonk zai? Sobit bagent, ghoram design kortat ani bandtat toslea munxanchi goroz astoli. Toxench follanchim zhaddam ani bhaji roitat, randtat, veg-veglle torechim sadhonam toiar kortat, gardening kortat ani tacho samball kortat toslea munxanchi pasun goroz astoli. (Iz. 35:1; 65:21) Ami sasnak jietolim dekhun, heo sogleo toxench anikui zaiteo noveo kola xikonk amkam bhorpur vell astolo.
12 Novea sonvsarant jivont zalʼlea lokank ieukar diunk amkam khub khuxalkai bhogtoli nhoi! (D.I. 24:15) Toxench Jehovan rochlolea anikui zaitea rochnne vixim xikon amkam khub sontos bhogtolo. (St. 104:24; Iz. 11:9) Tea bhair, ami kednanch patok korchimnant dekhun Jehova koddlean amkam kednanch bhogsonnem magchi goroz poddchina. Ami sodanch ek nitoll ontoskornnan tachi seva kortolim. Hachea poros vortem besanv anik kainch na. Tor ‘thoddeach disam pasot patkanchem sukh bhogunk’ ami him soglim besanvam soddun ditolim kai? (Heb. 11:25) Kednanch na! Novea sonvsarant amkam jim besanvam mellttolim tachea mukhar, hea sonvsarant ami je teag kortat te kainch nhoi. Ugddas dovrat, amkam sobit bagent jieunchi vatt polloit ravonk poddchina. Karonn beginuch ami thoim jietolim. Jehovan amcho itlo mog kelo ki amchea pasot tannem aplea ekleach opurbaiechea Putak moronk dilo, dekhun hem soglem zaunk pavtolem!
Sobit Bag zalʼle prithumer tumi koslea besanvanchi axeun vatt polloitat? (Peregraf 11-12 polloiat)
JEHOVAK AMI UPKARIPONN KOXEM DAKHOUNK ZATA?
13. Jehovache favo naslole doiek lagon ami upkari asat mhunn koxem dakhounk zata? (2 Korintkarank 6:1)
13 Soddvonne pasot ami Jehovache upkari asat mhunn koxem dakhounk zata? Devache sevek amchea jivitant poilo zago diun. (Mt. 6:33) Ani khorem mhunnttlear, “jim jivim asat tannim atam thaun fokot apnnam pasotuch jieunchem nhoi, punn zo tanchea pasot mela ani jivont kela tachea pasot jieunchem,” hea karonnak lagon Jezu melo. (2 Kor. 5:15) Jehova amkam doia dakhoita ani bhogxita. Tor tachea sevent ami zata tem kortat tednam tache favo naslole doiek ami kitlim upkari asat tem ami dakhoitat.—2 Korintkarank 6:1 vachat.
14. Jehovachea nirdexonacher amkam visvas asa mhunn ami koxem dakhounk zata?
14 Toxench, Jehova dita tea nirdexonacher ami visvas dovortat ani tem pallttat tednam ami soddvonne pasot upkari asat mhunn dakhoitat. Ami kitlem xikxonn ghetolim vo kosle torechem kam kortolim, osle mhotvache nirnnoi gheunche astat tednam ami kitem kelʼlem Jehovak zai tea vixim ami chintop gorjechem. (1 Kor. 10:31; 2 Kor. 5:7) Tor amche nirnnoi amchea bhavarthachea adarit astat tednam, Jehovacher amcho bhavarth toxench tachea sangata amchi ixttagot anikui ghott zatoli. Itlench nhoi, sasnak jieuncho bhorvonso amkam anikui khoro zatolo.—Rom. 5:3-5; Jak. 2:21, 22.
15. Ugddas Disachea poilim ani uprantchea sumanamnim ami soddvonnechea dennea pasot upkari asat mhunn koxem dakhounk zata?
15 Tea bhair, soddvonnechea dennea pasot upkari asat mhunn dakhounk ami Ugddas Disachea poilim ani uprantchea sumanamnim amcho vell bore toren uzar korunk zata. Oxem korunk, ami Ugddas Disak hajir zaunk manddavoll korunk zai. Titlench nhoi, ami dusreank pasun apounnem diunk zai. (1 Tim. 2:4) Ami apoitat tankam tea kariavollik kitem zatolem tem ami somzaunk zata. Oxem korunk, jw.org-acher aslole Jezu Kiteak Melo? ani Jezuchea Mornnacho Ugddas, he video ami tankam dakhounk zatat. Toxench vhoddilamnim khas korun seva bond kelolea porgottnnarank hea kariavollik apounk zai. Jehovachi seva korop bond kelʼlo ek munis porot tachi seva korunk suru korta tednam sorgar ani prithumer pasun kitli khuxalkai astoli tem chintat. (Luk. 15:4-7) Tor Ugddas Disak ami amchea bhav-bhoinnank zap kortolim tem khorem. Punn ami khas korun poilech pavtt vo khub tempa uprant hajir zatat tankam zap korunk fuddem sorom-ia, ani ami tancho kitlo mog kortat tem tankam dakhoum-ia!—Rom. 12:13.
16. Ugddas Disachea poilim ani uprantchea sumanamnim ami amchi porgottnni vaddovop kiteak borem?
16 Tumchea poristhiti pormonnem, Ugddas Disachea poilim ani uprantchea sumanamnim tumi tumchi porgottnni anikui vaddounk zata kai? Oxem kelʼlean, Jehovan ani Jezun tumchea pasot jem kitem kelam, tea pasot tanche upkar attounk tumkam ek bori sondhi mellttoli. Tumi Jehovache sevent jitlim chodd kortolim titlo Jehova tumkam modot korta mhunn tumi polloitolim ani tacher tumcho visvas anikui vaddttolo. (1 Kor. 3:9) Toxench tumi, Dispottʼttem Devachea Utra Thaun Xikom-ia hantuntlem, vo mittingechea pustikent dilʼlem chartt uzar korun, Ugddas Disachea sombondit aslolem Bible vachop korunk visorchem nhoi. Tumkam zai zalear, tim versam uzar korun tumi svotacho obheas pasun korunk zata.
17. Jehova kednam khub khuxal zata? (“ Jehovachea Moga Pasot Upkariponn Dakhoiat,” hem boks pasun polloiat.)
17 Tumchea poristhitik lagon hea lekhant sanglolem soglench tumchean korunk zaunchem na zait. Punn ugddas dovrat, Jehova amchem kalliz polloita. Ani to kednanch amkam dusream sovem sor korina. Tor ami soddvonnechea moladik dennea pasot kallzant thaun upkariponn dakhoitat tednam, Jehova khub khuxal zata.—1 Sam. 16:7; Mk. 12:41-44.
18. Ami Jehovak ani Jezuk kiteak upkari asat?
18 Fokot soddvonnek lagon amkam patkanchem bhogsonnem melltta, ami Jehova sangata ixttagot zoddunk xoktat, ani amkam sasnak jieuncho bhorvonso melltta. Jehova amcho mog korta dekhun tannem amkam him besanvam favo kelim. (1 Ju. 4:19) Tor tachea moga pasot ami sodanch tache upkar attoum-ia. Toxench, ami Jezu Kristache pasun upkar attoum-ia. Karonn to amcho mog korta dekhun tannem ap-khuxen amchea pasot aplo jiv bolidan kelo!—Ju. 15:13.
GIT 154 Sompchona Toslo Mog
a Jezun soddvonnechem mol farik korchea poilim, Jehovan aplea adlea visvaxi sevokanchim patkam bhogxilim. Jehova oxem korunk xoklo, karonn aplo Put moro poriant apleak visvaxi ravtolo mhunn taka purnn bhorvonso aslo. Tor Jehovache nodren soddvonnechem mol Jezu morchea khub poilim thaun farik kelʼlea sarkem zaun aslem.—Rom. 3:25.
