OBHEASACHO LEKH 3
GIT 35 Mhotvachea Kamank Dium-ia Poilo Zago
Jehovak Manvotat Tosle Nirnnoi Koxe Gheunche?
“Zannvaiecho oromb mhollear Sorvesporachi bhirant, ani bhagivontanchi zannvai [“Bhov Povitr asa tachem ginean,” NW] mhollear somjikai.”—MHO. 9:10.
MUKHEL MUD’DO
Ginean, somjikai ani chintpachi tank uzar korun bore nirnnoi koxe gheunche tem ami hea lekhant polloum-ia.
1. Amkam sogleank kitem korunk kotthin zata?
DOR disak amkam zaite nirnnoi gheunk poddttat. Thoddea vixoi-ancher nirnnoi ghevop sompem asta. Zoxem, ami breakfast-ak kitem khatolim vo kitleank nhidonk voitolim tea vixim. Punn thoddea vixoi-ancher nirnnoi gheunk amkam kotthin zata. Oslea nirnnoi-ancho amchea bholaikecher, khuxalkaiecher, familicher ani Jehova sangata amchea ixttagoticher probhav poddonk xokta. Tea pasot, ami osle nirnnoi gheunk sodhtat, jea vorvim amkam toxench amchea familik faido zatolo ani sogleam-von mhotvachem mhunnttlear Jehova khuxal zatolo.—Rom. 12:1, 2.
2. Bore nirnnoi gheunk tumkam koxi modot zatoli?
2 Tor bore nirnnoi gheunk tumkam koxi modot zatoli? (1) Tea vixoi-ak zuddloli sogli mahiti zannam zaun gheiat, (2) tea vixoi-acher Jehovachem chintop kitem asa tea vixim sodh korat, ani (3) tumi kitem vinchun kaddttolim tea vixim bariksannen chintat. Tor him panvlam tumi koxim gheunk zatat ani tumchi chintpachi tank anik bore toren koxi uzar korunk zata tem zannam zaunk ho lekh tumkam modot kortolo.—Mho. 2:11.
SOGLI MAHITI ZANNAM ZAUN GHEIAT
3. Ami nirnnoi gheunchea poilim tea vixim soglem zannam zavop kiteak mhotvachem? Ek udharonn diat.
3 Bore nirnnoi gheunk poilem panvl mhunnttlear, tea vixim asloli sogli mahiti zannam zavop. Hem kiteak mhotvachem asa? Chintat, ek munis khub duent asa ani to dotoraxim voita. Tor to dotor tea munxak topasnastana vo taka kainch vicharinastana koslo ilaz diuncho tea vixim nirnnoi ghetolo kai? Na nhoi! Tor ami pasun nirnnoi gheunchea poilim, tea vixim asloli sogli mahiti zannam zaunk zai. Oxem kelolean ami bore nirnnoi gheunk pavtolim. Tor sogli mahiti zannam zaunk ami kitem korunk zata?
4. Mhonnʼnneo 18:13 pormonnem, sogli mahiti zannam zaunk tumi kitem korunk zata? (Chitr pasun polloiat.)
4 Sogli mahiti zannam zaunk tumi prosn vicharunk zatat. Chintat, tumkam konnem tori eke parttik apoileant. Tea parttik voichem kai na, ho nirnnoi tumi koso korunk zata? Jea munxan tumkam parttik apoileant taka tumi bore toren vollkhonant vo tannem kitem manddavoll kelea ti tumkam khobor na zalear tumi taka thodde prosn vicharunk zai. Zoxem, “Ti partti kednam ani khoim astoli? Thoim kitlim zannam ietolim? Parttichi dekhrekh konn kortolo? Thoim konn-konn hajir zatolim? Parttik kitem-kitem zatolem? Thoim soro astolo kai?” Hea prosnanche zobab zannam zalʼlean ek boro nirnnoi gheunk tumkam modot zatoli.—Mhonnʼnneo 18:13 vachat.
Prosn vicharun sogli mahiti zannam zaiat (Peregraf 4 polloiat) a
5. Eke poristhiti vixim soglem zannam zalea uprant, tumi kitem korunk zai?
5 Tea partti vixim soglem zannam zalea uprant, thoim poristhiti koxi astoli tea vixim bariksannen chintat. Udharonnak, te parttik ietolea lokank, Jehovachea dorjeam vixim kainch poddlolem na vo thoim soro astolo zalear konnui hispa bhair piena mhunn khatri korun gheunk konn na mhunn tumkam kolltta zalear kitem? Thoinchi poristhiti oxi asa zalear ti partti hata bhair voitoli oxem tumkam dista? (1 Ped. 4:3) Titlench nhoi, tumi tea parttik gelim zalear tumkam mitting vo porgottnni chukounk poddttoli kai? Thoinchi poristhiti koxi astoli tem bariksannen zannam zalolean tumkam ek boro nirnnoi gheunk modot zatoli. Punn hachea bhair, tumi anik kitem tori zannam zaunk zai. Thoinchea poristhiti vixim tumkam koxem bhogta tem tumi zannant. Punn tea vixim Jehovak koxem bhogtolem tem tumkam khobor asa?—Mho. 2:6.
JEHOVACHEM CHINTOP KITEM ASA TEA VIXIM SODH KORAT
6. Jakob 1:5-a pormonnem, ami Jehova lagim kiteak modot magonk zai?
6 Jehovachem chintop somzon gheunk ami tache lagim modot magonk zai. Umkoch nirnnoi ghetlear taka to avoddttolo vo na tem zannam zaunk to amkam zannvai ditolo mhunn tannem bhas dilea. Ani hi zannvai to “konnakuch unno mhunn lekhinastana, sogleank udar kallzan dita.”—Jakob 1:5 vachat.
7. Eka umkeach vixoi-acher Jehovachem chintop zannam zaunk ami kitem korunk zata? Ek udharonn diat.
7 Jehova lagim zannvai maglea uprant to kitem zobab dita tem zannam zaunk ami vavr korunk zai. Hem somzonk hea vixim chintat. Tumi khoim tori provas korunk geleant ani tumi vatt chukleant. Tor tumi tea ganvchea eka munxa lagim modot magtat. Punn to tumkam kitem sangchea poilim tumi cholonk lagtolim kai? Na nhoi! Tumi bariksannen to kitem sangta tem aikotolim. Heach bhaxen, Jehova lagim zannvai maglea uprant to kitem sangta tacher ami dhean diunk zai. Tem mhunnttlear, amchea poristhitik Bible-antle khoinche kaide ani totvam lagu zatat tea vixim ami sodh korunk zai. Udharonnak, voilea peregrafamnim polloilʼlem toxem, te parttik voichem kai na ho nirnnoi gheunchea poilim, hispa bhair mouza-mosti, vaitt sangati, ani amkam jem zai tem korchea bodlek Devachem Raj poilea zagear dovorchea vixim Bible kitem sangta tem ami zannam zaunk zata.—Mt. 6:33; Rom. 13:13; 1 Kor. 15:33.
8. Amkam zai ti mahiti sodhunk amkam kosli modot asa? (Chitr pasun polloiat.)
8 Punn thodde pavtti, amkam zai ti mahiti sodhunk amkam modotichi goroz poddot. Tednam ami onnbhov aslolea eka bhava vo bhoinni koddlean solʼle magonk zatat. Hachea bhair, ami svota zaun sodh kelear pasun amkam faido zatolo. Research Guide for Jehovah’s Witnesses ani Sodanchea Jivita Pasot Bible-antlean Modot, oslea sodh korchea sadhonamnim amkam bhorpur mahiti melltta. Tor Jehovak manvota toslo nirnnoi ghevop, ho amcho dhei zaun asa mhunn ami ugddas dovrunk zai.
Jehovachem chintop zannam zaiat (Peregraf 8 polloiat) b
9. Ami Jehovak manvota toslo nirnnoi ghetat mhunn koxi khatri korunk pavtolim? (Efezkarank 5:17)
9 Ami Jehovak manvota toslo nirnnoi ghetat mhunn koxi khatri korunk pavtolim? Poilem mhunnttlear, ami taka bore bhaxen vollkhon gheunk zai. Hea vixim Bible sangta: “Bhagivontanchi zannvai [“Bhov Povitr asa tachem ginean,” NW] mhollear somjikai.” (Mho. 9:10) Tor Jehovache gunn, tacho udʼdhex, ani taka kitem avoddtta vo avoddna, tem zannam zalʼlean amkam sarki somzonni mellttoli. Tor tumkanch vicharat, ‘Hanv Jehovak vollkhotam tea pormonnem hanvem koslo nirnnoi ghetlear taka avoddttolo?’—Efezkarank 5:17 vachat.
10. Amchea sonskrutint jem kortat tachea poros Bible-antlim totvam pallop kiteak chodd mhotvachem?
10 Jehovak khuxal korunk thodde pavtti ami amchea ghorcheank niraxi korunk poddttolem. Udharonnak, aplea bhurgeanchem borem chintpi avoi-bapui ghoddie aplea dhuvecher oslea eka cheddea lagim kazar zaunk dobhav ghalit zo khub girest asa, punn Jehova sangata tachi ixttagot titli ghott na. Toxench thoddea sonskrutimnim, cheddeachi famil cheddvachea famili koddlean apleak zaiteo vostu mellttoleo mhunn opekxa korit. Punn Jehova sangata tea cheddvachi ixttagot titli ghott na astoli. Oslea vellar tea cheddean ani cheddvan apnnakuch ho prosn vicharunk zata, ‘Oslea munxa lagim kazar zalear, Jehova sangata mhoji ixttagot ghott vo oskot zatoli?’ Hea vixim Jehovachem chintop kitem asa? Hacho zobab amkam Matev 6:33-ant melltta. Thoim Kristanvank ‘Devachem Raj sodanch poilea zagear dovrunk’ urba dilea. Tor ami amchea ghorcheank ani herank man ditat tem khorem, punn Jehovak khuxal korop amkam sogleam-von chodd mhotvachem.
TUMI KITEM VINCHUN KADDTTOLIM TEA VIXIM BARIKSANNEN CHINTAT
11. Ek boro nirnnoi gheunk, Filipkarank 1:9, 10-nt aslolo khoincho gunn tumkam modot kortolo?
11 Tumchea poristhitik khoinchim Bible-antlim totvam lagu zatat tem zannam zalea uprant tumi kitem vinchun kaddttolim tea vixim bariksannen chintat. (Filipkarank 1:9, 10 vachat; “full discernment” hacher aslolo study note polloiat.) Karonn soglech nirnnoi gheunk sompem asona. Tor chintpachi tank uzar kelear khoincho nirnnoi ghetlear koslo porinnam zatolo tem zannam zaunk, ani kotthin poristhitint pasun bore nirnnoi gheunk tumkam modot zatoli.
12-13. Kama vixim boro nirnnoi gheunk chintpachi tank tumkam koxi modot kortoli?
12 Chintat, tumchea familichem pott bhorunk tumi ek kam sodhtat. Ani tumkam don kamam mellʼlleant. Tor kamacho timing kitem, tumkam ieunk-vochonk kitlo vell lagtolo, tem kosle torechem kam, toxench her sogli mahiti tumi zannam zaun ghetat. Ani tim donui kamam Bible-antlea totvam add nant. Tor tumi tantuntlem umkench kam vinchun kaddttolim mhunn tumi chintʼtat. Karonn thoim pagar boro melltta vo tumkam tem kam avoddtta. Punn khoinchem kam korchem ho nirnnoi gheunchea poilim tumi anikui kiteacher dhean diunk zai.
13 Udharonnak, tea donui kamam vixim tumi tumkam oxem vicharunk zata: ‘Hem kam ghetlear mhaka mittingo chukounk poddttoleo kai? Hanv mhojea familik vell diunk, tanchi kallji gheunk ani Jehova sangata tanchi ixttagot ghott korunk tankam modot korunk pavtolom kai?’ He prosn vicharlolean “chodd mhotvachem kitem” tem tumi poilea zagear dovrunk pavtole. Tem mhunnttlear, poixe zoddop nhoi, punn Jehovachi bhokti korop ani familicheo gorzo purnn korop, hacher tumi dhean ditole. Hea vorvim tumi ek boro nirnnoi korunk pavtole, zacher Jehova besanv ghaltolo.
14. Dusreank addkholl zaina zaunk chintpachi tank ani dusream pasot mog amkam koso modot kortolo?
14 Chintpachi tank aslolean amchea nirnnoi-acho dusreancher kitem porinnam zaunk xokta tea vixim pasun ami chintʼtolim ani ami “dusreank addkholl zaunchimnant.” (Filp. 1:10) Ami svota ghetat te nirnnoi, zoxem nhespa-dispa vixim nirnnoi ghetana, oxem korop gorjechem. Udharonnak, amkam umkench nhesop vo umkeach bhaxen kens ugounk avoddtta astolem. Punn toxem kelolean amchea bhav-bhoinnank vo Sakxi nhoi tea lokank addkholl zatoli kai? Chintpachi tank aslolean ami tanchea bhavnank man ditolim. Ani amkam mog aslear ami “dusreachea” faidea vixim chintʼtolim ani mannsugen nhestolim. (1 Kor. 10:23, 24, 32; 1 Tim. 2:9, 10) Hea udexim ami dusreank mog dakhoitat ani man ditat toslo nirnnoi korunk pavtolim.
15. Ek khub mhotvacho nirnnoi gheunchea poilim ami kitem korunk zai?
15 Ek khub mhotvacho nirnnoi gheunchea poilim ami kitem korunk zai? Jezun amkam xikoilem ki ami kitem-i korchea poilim tacho ‘odmas kaddunk’ zai. (Luk. 14:28) Tor ami ghetlolea nirnnoi-a pormonnem zatolem zalear tantunt amcho kitlo vell, takot ani poiso lagtolo tem ami zannam zaunk zai. Thoddea babtint amchea nirnnoi-ak tenko diunk familintlea dor eklean kitem korunk poddttolem tea vixim tanche lagim ulounk poddot. Kiteak? Oxem kelolean, tumi ghetlolea nirnnoi-ant thoddo bodlav korunk poddot vo tumi chintlolea poros anik boro upai asa oxem tumkam kollon ieit. Ani tumi gheunchim asat tea nirnnoi-a vixim tumchea ghorcheam lagim uloitat ani tanchem aikotat tednam tim tumkam anik bore toren modot korunk pavtolim, jea vorvim tumkam ies mellttolo.—Mho. 15:22.
TUMKAM IES MELLTTOLO TOSLO NIRNNOI GHEIAT
16. Boro nirnnoi gheunk ami koslim panvlam gheunk zai? (“ Bore Nirnnoi Koxe Korche,” hem boks pasun polloiat.)
16 Hea lekhant sanglolim soglim panvlam apnnailear tumi ek boro nirnnoi korunk pavtolim. Tem mhunnttlear, eka vixoi-acher tumi sogli mahiti ghetlea ani Bible-achea totvancher pasun niall kela. Oxe toren tumi Jehovak manvota toslo nirnnoi korunk pavtolim. Tor atam tumi tumchea nirnnoi-acher Jehovachem besanv magonk zata.
17. Bore nirnnoi gheunk kitem chodd gorjechem mhunn ami ugddas dovrunk zai?
17 Ami adim zaite bore nirnnoi ghetleat astole. Punn ami ugddas dovrunk zai ki svotachea onnbhovancher vo zannvaiecher patieun ravchea bodlek ami Jehovache zannvaiecher patieun ravop ekdom gorjechem. Karonn fokot Jehova amkam khorem ginean, somjikai ani chintpachi tank diunk xokta. Ani he gunn zannvaiek zuddlole mhotvache bhag zaun asat. (Mho. 2:1-5) Tor Jehovak manvotat tosle nirnnoi gheunk fokot toch amkam modot korunk xokta.—St. 23:2, 3.
GIT 28 Jehovachi Ixttagot Zhoddat!
