1. Aiz zaito lok kitea vixim chodd chintʼta?

 TUMI polloilam astolem, aiz zaito lok heram poros aplea vixim chodd chintʼta. Udharonnak, thoddo lok social media uzar korun apleachich vhoddvik kortat ani apunn jem kitem kortat tachi boddai martat. Punn fokot thoddoch lok Jehova Devak mhoima dita. Tor hea lekhant Jehovak mhoima divop mhunnttlear kitem, ani ami taka kiteak mhoima diunk zai tem ami polloitolim. Toxench ami taka favo ti mhoima koxi diunk zata, ani beginuch Jehova aplea nanvak koso mhoima haddttolo tem-ui ami polloitolim.

JEHOVAK MHOIMA DIVOP MHUNNTTLEAR KITEM?

2. Jehovan Sinai Dongra lagim apunn ek mhoimevont Dev mhunn koxem dakhoilem? ( Chitr pasun polloiat.)

² Bible-ant sanglam ki Jehova ek mhoimevont Dev zaun asa. Tannem Izraelitkarank Ejipttantlean soddoilea uprant apunn kitlo mhoimevont tem tankam dakhoilem. Ti ghoddnni tumchea dolleam mukhar haddat. Lakʼkhamnim Izraelitkaram, Jehova tankam kitem sangonk sodhta tem aikonk Sinai Dongra lagim ektthaim zaleant. Tednam akʼkho dongor eka datt kupan bhorta, ani okosmat akʼkhea dongra bhonvtonnim dhunvor zata. Toxench ek vhoddlo bhuimkamp zata ani tachea sangata zoglam ani goddgodd marta, ani eka vhoddlea turturecho avaz ieta. (Sutt. 19:16-18; 24:17; St. 68:8) Jehovan hea toren apli mhoima dakhoili tednam Izraelitkaram kitlim ojap zalim astolim nhoi!

3. Ami Jehovak mhoima koxi diunk zata?

³ Ami pasun Jehovak mhoima diunk zata. Jehovachea ojapvont kamam vixim ani tachea sobit gunnam vixim ami dusreank  sangtat tednam ami taka mhoima ditat. Toxench, tachea modotin ami korunk pavtat tea soglea kamank lagon ami taka vakhannttat tednam pasun ami taka mhoima ditat. (Iz. 26:12) Hea vixim Raza Davidan amkam ek ekdom borem udharonn dovorlam. Akʼkhe Izrael porje mukhar tannem Jehovak mhoima dili. Tannem oxem magnnem kelem: “Sorvespora, Tuka vhoddvi ani podvi ani mhoima, Vijoi ani protap! Sorgar ani sonvsarant asa tem sogllem Tujem Sorvespora.” Ani tannem aplem magnnem sompoilea uprant “soglle sobhen, Sorvesporak . . . vakhannʼnni dili.”—1 It. 29:11, 20.

4. Jezun Jehovak koxi mhoima dili?

⁴ Jezu hea prithumer aslo tednam tannem Jehovache xokten vizmitam kelim mhunn lokank sanglem. Oxem korun tannem Jehovak mhoima dili. (Mk. 5:18-20) Toxench, to lokam sangata jea toren uloitalo ani vagtalo tea vorvim pasun tannem Jehovak mhoima dili. Eka vellar jednam to sobha-ghorant xikoitalo, tednam tachem aikotalim tanchea modem ek bail asli, jicher 18 vorsam thaun noxtto dut boslolo. Tea noxttea dutan tika khub oskot kelʼli ani tea pasot ti bhendda thaun bagovloli ani tichean nitt ubi ravonk zainaslem. Hem khub dukhachem aslem. Tichem dukh Jezu somzolo ani to tika modot korunk sodhtalo. Tor to tichea lagim vochon doiallaien ulounk laglo. Tannem tika mhunnttlem: “Tuka tujea oskotkaie thaun suttka ditam.” Uprant Jezun ticher aple hat dovorle tednam, ti rokddich nitt ubi zali ani “Devak mhoima diunk lagli.” (Luk. 13:10-13) Jehovan apleak bori keli mhunn ti khub upkari asli! Jehovak mhoima diunk tika ek borem karonn aslem toxem amkam pasun asa.

AMI JEHOVAK MHOIMA KITEAK DITAT?

5. Ami Jehovak resped kiteak ditat?

⁵ Ami Jehovak khub resped ditat dekhun ami taka mhoima ditat. Jehovak resped diunk amkam zaitim karonnam asat. To Sorvpodvedar ani taka bhorpur xokti asa. (St. 96:4-7) Taka asa ti vorti zannvai amkam rochnnent pollounk melltta. To amchea jivitachi Zhor zaun asa ani amkam jieunk goroz asa tem soglem dita. (Prok. 4:11) To visvaxi asa. (Prok. 15:4) To korta tea soglea kamamnim taka ies melltta. Ani apnnem dilʼlem utor to sodanch samballtta. (Josh. 23:14) Tea pasot provadi Jeremiasan, Jehova vixim oxem boroilem: “Raxttrantlea sogllea zannaram modem ani tanchea sogllea rajeamnim, Tuje sarko anink konn asa?” (Jer. 10:6, 7) Khorench, amchea sorginchea Bapak resped diunk amkam zaitim karonnam asat. Jehovachea sobit gunnank lagon ami taka resped ditat itlench nhoi, punn ami tacho khub mog pasun kortat.

6. Ami Jehovacho mog kiteak kortat?

⁶ Ami Jehovacho khub mog kortat dekhun ami taka mhoima ditat. Jehovak aslolea zaitea sobit gunnank lagon ami tacho mog kortat. To kakut korpi ani doia-maia dakhoupi Dev zaun asa. (St. 103:13; Iz. 49:15) Toxench amkam dukh bhogta tednam taka-i dukh zata. (Zek. 2:12) Tea bhair apli vollokh gheunk ani aplim ixttam zaunk to amkam modot korta. (St. 25:14, NW; D.I. 17:27) Titlench nhoi, to khalti asa, mhunnche to “sorgar ani prithumecher nodor marta [“nodor marunk bagvota,” NW] Khalteak To dhulʼlintlo ubarta.” (St. 113:6, 7) Tor hea soglea karonnank lagon ami amchea vortea Devak mhoima diunk fuddem sortat.—St. 86:12.

7. Amkam koslo khas sueog asa?

⁷ Dusrim Jehova vixim zannam zalʼlim amkam zai dekhun ami Jehovak mhoima ditat. Aiz zaitea lokank Jehova vixim sot khobor na. Karonn Jehova ek ragixtt Dev, taka amchi porva na ani sonvsarant zatat tea trasancho to zobabdar, osleo fotti posraun Soitanan lokanchim monam kuddʼddim keleant. (2 Kor. 4:4)  Ani lokamnim heo fotti manun ghetleat. Punn Jehova vixim sot ami zannant. Tor Jehova khoreponnim koslo Dev zaun asa tem dusreank sangonk ani tachi vakhannʼnni korunk dusreank modot korunk amkam ek sueog asa. (Iz. 43:10) Stotr 96-ant mukhel zaun, Jehovak mhoima koxi diunk zata tem sanglam. Tor tea stotracher dhean ditana tumi khoinchea vattamnim Jehovak favo ti mhoima diunk zata tea vixim chintat.

JEHOVAK FAVO TI MHOIMA AMI KOXI DIUNK ZATA?

8. Ami Jehovak mhoima diunk zata ti ek vatt khoinchi? (Stotr 96:1-3)

⁸ Stotr 96:1-3 vachat. Ami amchea utram vorvim Jehovak mhoima diunk zata. Hea versamnim ‘Jehovak gitam gaunk,’ ‘tachea nanvachi vakhannʼnni korunk,’ ‘tannem dilʼli soddvonn disan-dis porgott korunk’ ani ‘tache mhoimechi khobor raxttram modem gazounk’ amkam urba dilea. Hea soglea vattamnim ami amchea sorginchea Bapak mhoima diunk zata. Adlea kalla voilea visvaxi Judevamnim, toxench poilea xekddeantlea Kristanvamnim pasun oxench kelem. Jehovache sobit gunn, toxench tannem tanchea pasot kelʼlea borea vostum vixim dusreank sangonk tim fatti soronk nant. (Dan. 3:16-18; D.I. 4:29) Ami tanchi dekh koxi gheunk zata?

9-10. Angelena-chea onnbhovantlean tumi kitem xiklim? (Chitr pasun polloiat.)

⁹ Hea vixim amkam Amerikentlea Angelena a nanvachea eke bhoinnicho onnbhov asa. Tem kam kortalem tea company-nt tannem dhiran Jehova vixim sanglem. Tem halinch tea company-nt join zalʼlem. Ani company-nt novim join zalʼlim tannim aplea vixim sangonk ek mitting dovorloli. Tor hea mittinge vellar ek Jehovachem Sakxi aslolean tem khuxalkaiechem jivit koxem jieta tem apunn sangtolem ani toxench thodde fottu dakhoitolem mhunn tannem tharailem. Punn tachea poilim uloilo tea munxan mhunnttlem ki tachim avoi-bapui Jehovachim Sakxi asat ani tannim taka sotant vaddoilolo. Punn to magir Jehovachea Sakxeam vixim toxench amche patienni vixim khub vaitt ulounk laglo. Hea vixim Angelena sangta: “Hanv khub bhielem. Punn to sangta tem sarkem nhoi mhunn hanv zannam aslem. Tor hanvem chintlem: ‘Hanvem vogi ravonk zaina. Jehova khoreponnim koslo Dev tem hanvem tankam sangonkuch zai.’”

¹⁰ Hea munxan aplem ulovop sompoilea  uprant Angelena-n bhitorlea bhitor ek lhanxem magnnem kelem ani taka doiall toren mhunnttlem: “Hanv-ui tujeach bhaxen Sakxi mhunn vaddlam, ani aiz poriant hanv ek Jehovachem Sakxi asam.” Angelena-k usko zalʼlo khoro, tori astana tem xant ravlem ani Jehovachi seva kelolean taka, toxench tachea ixttank khuxalkai koxi mellttali tea vixim tannem tankam fottu dakhoile ani respedan aplea patienni vixim sanglem. (1 Ped. 3:15) Hacho porinnam kitem zalo? Angelena-n aplem ulovop sompoilem tea meren tea munxacho sobhav matso bodolʼlo. Titlench nhoi, punn to lhanponnim eka Jehovachea Sakxeachea ghorabeant vaddttalo tednancheo boreo iadi pasun tannem ugddasak haddleo. Angelena sangta: “Jehova vixim dusreank sot kollonk zai ani tachea nanva vixim dusreank sangonk amkam ek vhodd sueog mellʼlla.” Tor dusrim Jehovacho opman kortat zalear pasun ami taka vakhannunk zata ani ho amkam ek vhodd man zaun asa.

11. Adlea kallar thaun Jehovachea visvaxi sevokamnim Stotr 96:8-antlem totv koxem apnnailem?

¹¹ Stotr 96:8 vachat. Amche lagim asat teo vostu uzar korun ami Jehovak mhoima diunk zata. Adlea tempar pasun Jehovachea visvaxi sevokamnim aplea lagim asloleo vostu uzar korun taka mhoima dili. (Mho. 3:9) Udharonnak, Izraelitkaramnim Devmondir bandunk ani tacho samball korunk aplea lagim aslole poixe ani moladik vostu dileo. (2 Raz. 12:4, 5; 1 It. 29:3-9) Toxench Jezuchea thoddea xisamnim “aple poixe moddun” Jezuchi ani tachea apostlanchi seva keli. (Luk. 8:1-3) Tea bhair poilea xekddeant bhuk poddloli tednam, dusrea zagea voilea Kristanvamnim bhav-bhoinnank modot korunk poixe dhaddle. (D.I. 11:27-29) Aiz ami pasun amchea lagim asloleo vostu uzar korun Jehovak mhoima diunk zata.

12. Amchea denngeam vorvim Jehovak mhoima koxi melltta? (Chitr pasun polloiat.)

¹² Amchea denngeam vorvim Jehovak koxi mhoima melltta tea vixim ek onnbhov polloum-ia. 2020-ant, Zimbabwe-nt khub temp poriant dukoll poddlolo. Hea karonnak lagon lakʼkhamnim lokank jevonn naslem ani tancho jiv dhokeant aslo. Torui tea kotthin poristhiti vellar, thoim ravpi bhoinn Prisca dor Budvarak ani Sukrarak, chukonastana porgottnni kortali. Ani xet kospachea vellar pasun ti porgottnnent voitali. Tor ti xetant kam korinastana porgottnnek voita dekhun, tichim xezarim ticheo moskoreo korun oxem mhunnttalim: “Tum upaxinch mortolema.” Punn bhoinn tankam dhiran oxem sangtali: “Jehova aplea sevokank kednanch sanddina.” Uprant,  bhoinnik songottnne thaun jevonn ani gorjecheo vostu mellʼlleo. Ami ditat tea denngeank lagon tika hem mellonk pavlem. Hem polloun bhoinnichim xezarim ekdom ojap zalim ani tannim mhunnttlem: “Dev tuka sodanch modot korta. Tor tea Deva vixim ami zannam zaunk sodhtat.” Uprant tichea xezaream modlim sat zannam mittingek hajir zaunk laglim.

13. Stotr 96:9-a pormonnem, Jehovak mhoima diunk ami kitem korunk zata?

¹³ Stotr 96:9 vachat. Amchea sobhava udexim ami Jehovak mhoima diunk zata. Jehovachea tombunt ani uprant mondirant seva kortolea iadnikamnim nitoll asonk zai aslem. (Sutt. 40:30-32) Punn ami fokot kuddin nitoll aslearuch puro nhoi. (St. 24:3, 4; 1 Ped. 1:15, 16) Jehova Devak jem avoddna tem ami pois korunk zai. Bible sangta ki amchi “porni vagnnuk” ami kaddun uddounk zai ani “novi vagnnuk” ghalunk zai. (Kol. 3:9, 10) Hacho orth jem Jehovak avoddna, tem mhunnttlear, vaitt chintnam ani vaitt vagnnuk ami pois korunk zai. Tachea bodlek, ami hea toren chintunk ani vagonk zai, jea vorvim ami Jehovachi ani tachea sobit gunnanchi dekh ghetat mhunn dison ieta. Jehovache modotin zannim khub vaitt kamam keleant tim pasun bodlonk xoktat ani ek novi vagnnuk ghalunk xoktat.

14. Jack-achea onnbhovantlean tumi kitem xiklim? (Chitr pasun polloiat.)

¹⁴ Hea vixim amkam Jack nanvachea eka koideacho onnbhov asa. To khub krur ani bhirankull munis aslo. Hea pasot taka ‘Devchar’ mhunnttale. Tannem kelʼlea opradank lagon tacher mornnachem formonn marlolem. Punn taka jivexim marcho dis ieunchea poilim, bondkhonnint bhett diupi eka bhavan to Bible xikonk toiar asa kai mhunn vicharlem, ani Jack-an Bible obheas korunk suru kelo. Tannem aplea jivitant ekdom vaitt kamam kelʼlim tem khorem, punn to bodolʼlo. Ani vell soron gelo toso, tannem bautizm ghetlo. To itlo bodolʼlolo ki taka jivexim marchea disak bondkhonnichea thoddea rakhonndaranchea dolleamnim dukham aslim. Bondkhonnint kam korpi eka soinikan tache vixim oxem mhunnttlem: “Hea bondkhonnint Jack-a poros paxtt anik konn naslo. Ani atam tachea poros boro anik konn na.” Jack-ak jivexim marun eka sumana uprant, bhav sumanachi mitting korunk bondkhonnint aile tednam, ek koidi poilech pavtt hajir zala mhunn tannim polloilem. To koidi kiteak hajir zalʼlo? Jack-acho sobhav itlo  bodolʼlo tem polloun to ojap zalo ani tannem-i Jehovachi bhokti korunk kitem korunk zai tem to zannam zaunk sodhtalo. Khorench, amche vagnnuke vorvim amchea sorginchea Bapak mhoima melltta nhoi!—1 Ped. 2:12.

BEGINUCH JEHOVA APLEA NANVAK KOSO MHOIMA HADDTTOLO?

15. Jehova beginuch purnn toren aplea nanvak mhoima koso haddttolo? (Stotr 96:10-13)

¹⁵ Stotr 96:10-13 vachat. Hea versamnim, Jehova ek Raza toxench ek Neai Korpi zaun asa mhunn sanglam, zo sarke toren neai korta. Tor Jehova beginuch aplea nanvak mhoima koso haddttolo? To beginuch sonvsarantlea soglea khottea dhormancho nas kortolo, zannim khub vaitt kamam keleant ani tache vixim fotti posraileat. (Prok. 17:5, 16; 19:1, 2) Oxem zata tednam, thoddim zannam ghoddie Jehovachi bhokti korunk fuddem sorot. Toxench Armageddonachea zhuzant, to Soitanachea noxttea sonvsarak, tem mhunnttlear, aplo virodh kortat ani aplem nanv piddʼddear kortat tankam kabar korun uddoitolo. Punn aplo mog kortat, adnea pallttat, ani apleak mhoima diunk fuddem sortat tankam sogleank to salvar kortolo. (Mk. 8:38; 2 Tes. 1:6-10) Tea bhair, Kristachea Ek Hozar Vorsanchea Razvottkechea xevottak zatolea nimanne porikxe uprant, Jehova purnn toren aplea nanvak mhoima haddttolo. (Prok. 20:7-10) Tea vellar, “jitlo somdir udkan bhorlolo asa, titlo Sorvesporache mhoimeche vollkhin sogllo des upott bhoron ietolo.”—Hab. 2:14.

16. Tumi kitem korunk nichov kela? (Chitr pasun polloiat.)

¹⁶ To vell kitlo boro astolo nhoi jednam prithumer aslolim soglim Jehovachea nanvak favo ti mhoima ditolim! Punn to dis ieta mhunnosor Jehovak mhoima melltta tea toren ulounk ani vagonk amchean zata tem soglem korum-ia. Ani heach mhotvachea mudʼdea vixim sangonk Sonchalon Monddollan Stotr 96:8 (NW) 2025-achem vorsachem vers mhunn vinchun kaddlam. Thoim mhunnttlam: “Jehovachea nanvak favo ti mhoima diat.”