OBHEASACHO LEKH 4
GIT 18 Soddvonne Pasot Upkari
Soddvonne Thaun Amkam Kitem Xikonk Melltta?
“Hachea voilean Dev amcho kitlo mog korta tem dison ieta.”—1 JUANV 4:9.
MUKHEL MUD’DO
Soddvonne udexim Jehova Devache ani Jezu Kristache khoinche gunn amkam dison ietat, tem ami hea lekhant polloitolim.
1. Ami dor vorsak Jezuchea mornnachea ugddas disak kiteak hajir zaunk zai?
SODDVONN, Jehova thaun amkam ek moladik dennem zaun asa! (2 Kor. 9:15) Jezun amchea pasot aplo jiv bolidan kelo dekhun ami Jehova sangata ek lagxilʼli ixttagot zoddunk xoktat. Toxench amkam sasnak jieuncho bhorvonso pasun melltta. Jehovan amcho itlo mog kelo dekhun tannem soddvonnechi manddavoll kelea ani taka lagon ami tache sodanch upkar attounk zai. (Rom. 5:8) Tor Jehovan ani Jezun amchea pasot jem kitem kelam tem kednanch visorna zaunk ani tanche upkar attounk, Jezun amkam dor vorsak tachea mornnacho ugddas korunk adnea dili.—Luk. 22:19, 20.
2. Hea lekhant ami kitem polloitolim?
2 Hea vorsak, Ugddas Dis Sonvar, 2025 Abrilache 12 tarker asa. Tea disa hajir zaunk ami sogleamnim atam thaunuch toiari korunk suru kelea astoli. Jehovan ani Jezun amchea pasot kitem kelam tea vixim Ugddas Disachea poilim ani uprantchea sumanamnim niall kelear a amkam faido zatolo. Soddvonne udexim amkam Jehova ani Jezu vixim kitem xikonk melltta tem ami hea lekhant polloitolim. Toxench soddvonne udexim amkam koso faido zata ani tea pasot ami Jehovacho ani Jezucho koso upkar attounk zata tem ami fuddlea lekhant polloitolim.
SODDVONNE THAUN AMKAM JEHOVA VIXIM KITEM XIKONK MELLTTA?
3. Eka munxachea mornna vorvim koroddamnim lokank patka ani mornna thaun koxi suttka mellonk xokta? (Chitr pasun polloiat.)
3 Soddvonne vorvim Jehova niticho mog korpi Dev mhunn amkam kollon ieta. (D.S. 32:4) Koxem? Hea vixim chintat. Adanvan Jehovachi adnea moddli dekhun amcher patok ani moronn ailem. (Rom. 5:12) Punn amkam patkantlean ani mornnantlean soddounk Jehovan Jezu vorvim soddvonnechi manddavoll keli. Punn eka poripurnn munxa vorvim koroddamnim lokank jivit koxem mellonk xokta? Hea vixim apostl Paulun mhunnttlem: “Zoxem eka munxan [Adanvan] adnea moddli dekhun zaite lok patki zale, toxench eka munxan [Jezun] adnea pallʼlli dekhun zaite lok nitivont zatole.” (Rom. 5:19; 1 Tim. 2:6) Dusrea utramnim sangchem zalear, eka poripurnn munxan Devachi adnea moddli dekhun patok ani moronn amcher ailem, teach bhaxen eka poripurnn munxan Devachi adnea pall’lli dekhun amkam patka ani mornna thaun suttka mellttoli.
Eka munxa udexim ami patkachim ani mornnachim gulamam zalim. Toxench eka munxa udexim amkam suttka melltta (Peregraf 3 polloiat)
4. Jehovan soddvonnechi manddavoll korinastana, Adanvachea sonsti modlim jim apleak visvaxi aslim tankam sasnak ravonk kiteak diunk na?
4 Amkam patkantlean suttka diunk Jehovan Jezuk moronk dhaddunkuch zai aslo kai? Adanvachea sonsti modlim jim Jehovak visvaxi aslim tankam tannem sasnak ravonk diunk zainaslem kai? Opurnn aslolean amkam ghoddie disot ki toxem korop sarkem zatolem aslem. Punn Jehova poripurnn toren neai korpi dekhun toxem korop sarkem zaunchem naslem. Karonn Jehovan soddvonnechi manddavoll korunk nasli zalear, Adanvan kelʼlem tem patok titlem gombhir nhoi ani tachi sonsot opurnn na oxem zatolem aslem. Punn hem khorem nhoi.
5. Jehova sodanch sarkem tench kortolo mhunn ami kiteak khatri dovrunk zata?
5 Toxench Jehovan soddvonnechi manddavoll korinastana Adanvachea bhurgeank sasnak jieunchi sondhi dil’li zalear Jehova apleach neai-niti dorjeam add voita oxem zatolem aslem. Ani taka lagon to aple dorje sodanch pallttolo kai na ani fuddarak jem kitem to kortolo mhunn sanglam tem to kortolo kai na mhunn lokanchea monant dubhav ietolo aslo. Punn tea vixim amkam uskeunchi goroz na. Karonn neai korunk Jehovan ekdom vhoddlo teag kelo mhunn ami zannant. Tem mhunnttlear, tannem aplea ekleach opurbaiechea Putachem bolidan dilem. Ani taka lagon Jehova sodanch sarkem tench kortolo mhunn ami khatri dovrunk zata.
6. Soddvonne udexim Jehovan amkam aplo mog koso dakhoilo? (1 Juanv 4:9, 10)
6 Jezuchea bolidana udexim Jehova amcho kitlo mog korta tem pasun amkam kollon ieta. (Ju. 3:16; 1 Juanv 4:9, 10 vachat.) Soddvonne udexim amkam sasnachea jivitacho bhorvonso melltta itlench nhoi, punn ami Jehovachea familicho bhag pasun zaunk xoktat. Hea vixim chintat. Adanvan patok kelea uprant taka Jehovan aplea familintlo bhair ghatlo. Tea pasot amchea modlo konnuch Jehovachea familicho bhag zaunk xokonaslo. Punn soddvonne vorvim Jehova amchim patkam bhogxita. Ani aiz pasun ami Jehova ani amchea bhav-bhoinnam sangata bori ixttagot samballunk pavtat. Titlench nhoi, ami Jehovacheo adnea pallʼllear ani tacher bhavarth dovorlear to amkam fuddarak aplea familicho bhag kortolo. Tor hantuntlean Jehova amcho khub mog korta mhunn kolltta!—Rom. 5:10, 11.
7. Soddvonn diunk Jezun jea toren vollvolle sosle tantuntlean Jehova amcho khub mog korta mhunn koxem kolltta?
7 Jehovan aplea Putak tras sosunk dile hantuntlean Jehova amcho kitlo mog korta tem ami anik bore toren somzonk pavtat. Soitanan sanglolem ki Devachea khoincheach sevokak tras sosunk poddlear to Devak visvaxi ravcho na. Punn Soitan fottkiro mhunn dakhounk Jezuk morchea poilim tras sosunk poddle tednam Jehovan te addaunk nant. (Job 2:1-5; 1 Ped. 2:21) Jezuchea virodheamnim tachim fokannam kelim, toxench soinikamnim Jezuk chabkamnim bhorpur marlo ani uprant taka khambear khillailo tem Jehovan polloilem. Titlench nhoi, aplo opurbaiecho Put khambear vollvolle sosun melo tem pasun Jehovan polloilem. (Mt. 27:28-31, 39) Jehova xoktivont aslolean to khoinchea-i vellar hem soglem addaunk xoktalo. Udharonnak, thoddea virodheamnim, “Devak zai zalear taka vachoum di” oxem mhunnttlem tednam Jehova Jezuk vanchounk xoktalo. (Mt. 27:42, 43) Punn tannem toxem kelʼlem zalear Jezu soddvonn diunk pavcho naslo ani amkam kednanch bhorvonso mellcho naslo. Tea pasot Jehovan aplea kallzacher fator dovrun aplea mogall Putak tras sosun moronk dilo.
8. Aplo Put vollvolle sosta tem polloun Jehovak dukh zali mhunn ami kiteak mhunnonk zata? Somzaiat. (Chitr pasun polloiat.)
8 Jehova Sorvxoktivont Dev dekhun taka bhavnam nant oxem nhoi. Jehovan amkam aplea sarkim rochleant ani zoxem amkam bhavnam asat toxim taka-i bhavnam asat. Udharonnak, Jehova “dukhi” zalo ani tachem kalliz “khontovlem” mhunn Bible sangta. (Ut. 6:6) Toxench Abraham ani Izakachea udharonnacher dhean diat. Jehovan Abrahamak Izakachem bolidan diunk sanglolem. (Ut. 22:9-12; Heb. 11:17-19) Abraham Izakachem bolidan diunk toiari kortalo tednam taka kitli dukh zali astoli tea vixim chintat. Tor noxttea lokamnim aplea Putak vollvollailo ani tacho jiv kaddlo tem polloun Jehovak anikui kitli dukh zali astoli nhoi!—jw.org-acher, Tanchea Bhavarthachi Dekh Gheiat—Abraham, Bhag 2, ho video polloiat.
Aplo put tras sosta tem polloun Jehovak khub dukh zali (Peregraf 8 polloiat)
9. Romkarank 8:32, 38, 39-antlean Jehovachea moga vixim amkam kitem kollon ieta?
9 Amchea ghorcheam vo ixttam poros Jehova amcho chodd mog korta mhunn soddvonnechea manddavolli udexim kolltta. To amcho jitlo mog korta titlo anik konnuch korina! (Romkarank 8:32, 38, 39 vachat.) Khorem mhunnttlear, amchea poros Jehova amcho chodd mog korta. Tumkam sasnak jieunk zai? Tumchea poros chodd Jehovak tumi sasnak jielʼlim zai. Tumchim patkam bhogsololim tumkam zai? Tumchea poros chodd Jehovak tumchim patkam bhogsololim zai. Jehovak fokot ami itlench kelʼlem zai—tacher bhavarth dovorlolo, soddvonne pasot tache upkar attoilʼle ani tachi adnea pallʼllolli. Soddvonn Jehova thaun khoreaninch amkam ek moladik dennem zaun asa, jea vorvim to amcho khub mog korta mhunn kolltta. Ani novea sonvsarant amkam Jehovachea moga vixim anikui zaitem xikonk mellttolem.—Up. 3:11.
SODDVONNE THAUN AMKAM JEZU VIXIM KITEM XIKONK MELLTTA?
10. (a) Jezuk aplea mornna vixim kosli dukh asli? (b) Jezun koxe toren Jehovach sarko asa mhunn dakhoun dilem? (“ Soddvonne Vorvim Jehovach Sarko Mhunn Puravo Melltta” hem boks pasun polloiat.)
10 Lok aplea Bapachea nanva vixim kitem chintʼtat tacho Jezuk usko aslo. (Ju. 14:31) Jezun Devachea nanvak opman kela ani to sorkaracho virodh korta oso tacher arop ghatlolo. Tea pasot, tannem oxem magnnem kelem: “Mhojea Bapa, zata zalear ho pelo mhojea thaun kaddun uddoi.” (Mt. 26:39) Tor tachea Bapachem nanv piddʼddear zata mhunn Jezuk khub dukh zali. Punn moro poriant Jehovak visvaxi ravon Soitanan aplea Bapachea nanvacher khotto arop ghatlolo mhunn Jezun dakhoilem.
11. Jezu lokancho kallzant thaun mog kortalo mhunn tannem koxem dakhoilem? (Juanv 13:1)
11 Soddvonne vorvim Jezu lokancho ani khas korun aplea xisancho kallzant thaun mog korta mhunn pasun kollon ieta. (Mho. 8:31; Juanv 13:1 vachat.) Udharonnak, Jezu hea prithumer ailea uprant seva korunk ani khas korun moronn sosunk sompem aschem na mhunn taka khobor asli. Tori astana, Jehovan taka korunk sanglolem mhunn nhoi, punn to khoreaninch lokancho mog kortalo mhunn tannem toxem kelem. Itlench nhoi, tannem porgottnni korun, xikoun, ani tankam modot korun, tancho mog korta mhunn dakhoun dilem. Apunn morchea adlea rati pasun Jezun aplea apostlanche paim dhuile, tankam bhuzvonn dili ani margdorxon dilem. (Ju. 13:12-15) Ani uprant to trasanchea khambear aslo tednam pasun aplea kuxik aslolea eka guneanvkarak tannem bhorvonso dilo. Toxench aplea avoichi kallji gheunk manddavoll pasun keli. (Luk. 23:42, 43; Ju. 19:26, 27) Tor Jezun aplea mornna vorvinch nhoi, punn hea prithumer jietana pasun to lokancho kallzant thaun mog kortalo mhunn dakhoun dilem.
12. Jezu amchea pasot aiz meren khoinchim kamam korit asa?
12 Krist amchea pasot “ekuch pavtti melo” tem khorem. (Rom. 6:10) Punn amkam soddvonnecho faido zaunk, aiz pasun to khub vavr korit asa. To aiz Raza, Mha-iadnik ani sobhecho mukheli zaun asa. (1 Kor. 15:25; Ef. 5:23; Heb. 2:17) Tor to makhlolea Kristanvank, toxench vhodd zomeak ektthaim korchem kam korta. Ani hem kam vhodd sonkoxtt sompchea poilim to kabar kortolo. b (Mt. 25:32; Mk. 13:27) Toxench to visvaxi ani xannea chakra udexim Jehova lagim amchi ixttagot ghott korunk amkam modot korta. (Mt. 24:45) Itlench nhoi, Ek Hozar Vorsanchea Razvottkechea vellar to amchea pasot anik zaitim kamam korcho asa. Tor Jehovan aplea Putak khoreaninch amchea pasot dilo oxem ami mhunnonk zata!
NOVEO VOSTU XIKOT RAVAT
13. Jehova ani Jezu amcho kitlo mog kortat tea vixim ami koxem xikot ravonk zata?
13 Jehovan ani Jezun tumchea pasot jem kitem kelam tea vixim bariksannen niall kelear te tumcho kitlo mog kortat tem tumi xikot ravonk pavtolim. Oxem korunk tumi hea vorsachea Ugddas Disachea poilim ani uprantchea sumanamnim, Matev tem Juanv pustokam modlim khoinchim-i ek vo don pustokam bariksannen vachunk zatat. Punn oxem kortana, zaite odheai ekuch pavtti vachinakat. Tachea bodlek, thodde-thodde vachun ami Jehovacho ani Jezucho kiteak mog korunk zai tachim anik karonnam sodhat, ani tumkam jem kitem xikonk mellʼllem tem dusreank pasun sangat.
14. Stotr 119:97-a pormonnem soddvonne ani dusrea vostum vixim sodh korit ravlolean tumkam koso faido zatolo? (Chitr pasun polloiat.)
14 Bautizm gheun tumkam zaitim vorsam zaleant zalear, Devachea neai-a vixim, tachea moga vixim, ani soddvonne vixim anik xikonk kainch uronk na, oxem tumkam disot. Punn khorem mhunnttlear, hea vixoi-ancher xikop kednanch kabar zaunchem na. Tor tumi kitem korunk zata? Tumi oslea vixoi-ancher aslolim prokaxonam vachun obheas korunk zata. Oxem kortana, tumkam kitem-i kotthin lagta zalear tumi sodh korunk zata. Ani tea uprant tumkam Jehova vixim, Jezu vixim, ani tanchea moga vixim ji mahiti mellʼllea, tacher akʼkho dis niall korunk zata.—Stotr 119:97 vachat.
Ami zaitea vorsam thaun sotant aslear pasun ami soddvonne pasot amchem upkariponn vaddoit ravonk zata (Peregraf 14 polloiat)
15. Ami Bible-antleo noveo vostu kiteak xikot ravonk zai?
15 Dor ek pavtti tumi Bible vachtat vo sodh kortat tednam, tumkam novem kitem mellonk na zalear niraxi zainakat. Eka bhangar sodhpea vixim chintat. Zaite pavtti bhangar sodhunk taka zaitim voram vo dis lagot. Punn ilʼlem-xem pasun bhangar mellʼllear taka tem khub moladik asa! Tea pasot bhangar sodhop to soddun dina. Amkam tor Bible-antlim sotam bhangara poros chodd moladik asat. (St. 119:127; Mho. 8:10) Tor tumi pasun tea bhangar sodhpea bhaxen Bible vachop chaluch dovrat ani tantunt noveo vostu sodhit ravat.—St. 1:2.
16. Ami Jehovachi ani Jezuchi dekh koxi gheunk zata?
16 Tumi Bible-ant jem xiktat tem apnnauncho proitn korat. Udharonnak, Jehova ek neai korpi Dev mhunn tumi xiklim. Tor tachi dekh gheun dusream sangata ami bhedbhav korcho nhoi. Toxench tras sosunk poddlear pasun Jezun Jehovacho mog kelo toso, amkam kotthin zalear pasun Jehovachea nanvam pasot tras sosunk ami toiar asonk zai. Ani Jezu bhaxen ami pasun dusreank mog dakhoun modot korunk zai. Toxench, dusreank pasun soddvonnecho faido zaunk sondhi mellonk, ami Jezu bhaxen tankam porgott korit ravonk zai.
17. Fuddlea lekhant ami kitem polloitolim?
17 Soddvonne vixim ami jitlim chodd xiktolim, titlo Jehova ani Jezu pasot amcho mog anikui vaddttolo. Ani tanchea pasot amcho mog vaddttolo toso, te pasun amcho anikui mog kortole. (Ju. 14:21; Jak. 4:8) Tor Bible ani Bible adarit prokaxonam uzar korun ami soddvonne vixim xikot ravom-ia. Soddvonne vorvim amkam kosle faide asat ani taka lagon ami Jehovache koxe upkar attounk zata tem ami fuddlea lekhant polloum-ia.
GIT 107 Devachea Mogachi Vatt
a UTRACHI SOMZONNI: “Niall korop” mhunnttlear, eka vixoi-acher dhean divop ani tache vixim bariksannen chintop.
b Efezkarank 1:10-nt, apostl Paulun ‘sorga voileo sogleo vostu’ ektthaim korpa vixim sanglem. Hem Matev 24:31 ani Marku 13:27-ant Jezun “vinchun kaddloleank” ektthaim korpa vixim jem sanglem tachea thaun vegllem asa. Paulu tea vella vixim uloitalo, jednam Jehova visvaxi lokank povitr xokte udexim makhun Jezu sangata razvottki cholounk vinchun kaddtta. Ani Jezu tea vella vixim uloitalo, jednam prithumer aslolea urlolea makhloleank vhodd sonkoxttachea vellar ektthaim korun sorgar vhortole.
