1. Lok dusream poros borim asat mhunn dakhounk sodhtat dekhun tim kitem kortat?

AIZ sonvsarant lok apunn dusream poros borim asat mhunn dakhounk proitn kortat. Taka lagon veapar kortat tim dusreank luksonn korun apleak faido kortat. Vo khellant bhag ghetat tim dusreank dukhoun jikonk sodhtat. Vo vhoddlea iskolamnim vo college-imnim seat mellonk, bhurgim exam-int copy martat. Him ‘patki soimbachim kamam,’ ani chukichim mhunn ami zannant. (Gal. 5:19-21) Tori astana thodde pavtti, Jehovachea sevokanchea monant pasun oslem chintop ieunk xokta. Ani hem chintop sobhecho ekvott ibaddunk xokta. Taka lagon ami hea vixim chotrai dhorunk zai.

2. Hea lekhant ami kitem polloitolim?

² Tor hea lekhant, eka munxak kosle vaitt gunn aslolean to apunn dusream poros boro asa mhunn dakhounk xokta, tea vixim ami xiktolim. Toxench, apunn dusream poros borim mhunn dakhounk proitn korunk na, toslea visvaxi dadleam ani bailanchim udharonnam ami polloitolim. Punn poilim, ho gunn amchea bhitor asa zalear koxem zannam zaunk zata tem polloum-ia.

3. Ami amkanch kosle prosn vicharunk zatat?

³ Ami dor ek vellar amchea kallzant kitem asa tem topasun kaddunk, amkanch thodde prosn vicharunk zai. Zoxe, ami dusream poros borim asat mhunn chintlearuch ami khuxal zatat kai? Sobhent ami kam kortat tednam ami tem Jehova pasot kortat vo amchea bhav-bhoinnam poros ami borim asat mhunn dakhounk kortat? Tor he prosn ami amkanch  vichartat tednam amkam koso faido zata tem ami Bible-antlean polloum-ia.

4. Galasiekarank 6:3, 4-a pormonnem, ami amkam dusream sangata kiteak sor korchem nhoi?

⁴ Ami amkam dusream sangata sor korchem nhoi mhunn Bible sangta. (Galasiekarank 6:3, 4 vachat.) Karonn ami oxem kortat zalear ami gorvixtt zaunk xoktat vo nirax zaunk xoktat. Ani hem chintop sarkem nhoi. (Rom. 12:3) Hea vixim Greece-ant ravpi Katerina, *nanvachi bhoinn mhunntta: “Mhojea poros pollounk borim distalim vo porgottnnent lokam lagim ulounk borim aslim vo zankam zaitim ixttam aslim, tanchea sangata hanv mhaka sor kortalem tednam hanv kainch faideachem na mhunn chintun nirax zatalem.” Tor Jehovan amkam, ami pollounk borim distat vo ami ulounk borim asat vo amkam zaitim ixttam asat, hea pasot nhoi, punn ami tacho mog kortat ani tachea putachem aikonk toiar asat dekhun tannem amkam aplea lagim haddleant mhunn ami ugddas dovrunk zai.—Juanv 6:44; 1 Kor. 1:26-31.

5. Bhav Hyun-achea udharonnantlean tumi kitem xikonk zata?

⁵ Amchea kallzant kitem asa tem topasun kaddunk ami amkanch anik ek prosn vicharunk zata. To mhunnttlear, ‘Dusrim mhaka, hanv xanti korpi vo xanti ibaddpi mhunn vollkhotat?’ Korea-nt ravpi bhav Hyun-achem ami ek udharonn polloum-ia. Sobhent zobabdari aslolea her bhavank to aple dusman koxe lekhtalo. To mhunntta, “Hanv hea bhavancheo khoddi kaddunk laglo. Ani choddxea pavtti, te sangonk sodhtale tem aikonk hanv toiar naslo. Hea pasot sobhechi xanti pidd’ddear zaunk lagli.” Bhav Hyun-achea thoddea ixttamnim to korta tem chukichem asa mhunn taka sanglem tednam tannem goroz te bodlav kele. Ani vhoddil zaun aiz bore bhaxen to apli seva korta. Tor, ami dusream poros borim asat oslim bhavnam amchea kallzant ietat tednam ami rokddinch tim kaddun uddounk zai ani sobhent xanti samballunk proitn korunk zai.

6. Galasiekarank 5:26-a pormonnem, kosle gunn aslolean ek munis apunn dusream poros boro mhunn dakhoita?

⁶ Galasiekarank 5:26 vachat. Kosle gunn aslolean ek munis apunn dusream poros boro asa mhunn chintunk xokta? Gorv ani Nattkai. Zo munis boddai marta vo zo gorvixtt asa to apleach vixim chint’ta. Ani nattkai korta to munis, dusream lagim asa tem aplea lagim pasun asonk zai mhunn chint’ta. Ani jeo vostu aplea lagim nant, teo dusream lagim pasun asonk zainant mhunn chint’ta. Khorem mhunnttlear, nattkai korta to munis dusreancho dves korta. Tor gorv asop ani nattkai korop ami sarkench pois korunk zai.

7. Gorv ani nattkai asop kitlem dhokeachem tem somzonk ek udharonn diat.

⁷ Gorv ani nattkai he gunn asop kitlem dhokeachem tem somzonk ek udharonn polloum-ia. Eka viman-ant ghaltat tea petrol-ant kochro asa zalear tea viman-ak rokddench kaim zaunchem na. Punn uprant to kochro xirkon, engine bond poddonk xokta ani tem viman crash zaunk xokta. Teach bhaxen, ekleak gorv ani nattkai asa zalear to thoddea vellak lagon Jehovachi seva korunk puro. Punn tachea vaitt gunnank lagon, tacher ani dusreancher vaitt porinnam zaunk xokta. (Mho. 16:18) Ani uprant, to Jehovachi seva korop bond korunk xokta. Tor he gunn ami koxe pois korunk xoktat?

8. Gorv pois korunk ami kitem korunk zai?

⁸ Paulun Filipkarank dilolo sol’lo ami ugddas dovrunk zata. Tannem mhunnttlem: “Svarthi  axen kaich korum nakat, suki boddai korum nakat, punn khalteponnan dusrim tumche-von vortim mhonn dhorat.” (Filp. 2:3) Ho sol’lo apnnaun ami soglea amchea bhav-bhoinnank, amchea poros vortim mhunn lekhunk zai. Tor tankam amchea poros bore gunn asat zalear pasun, ami tanche poros borim asat mhunn ami dakhounk sodhchimnant. Tache bodlek, tim Jehovachi seva korunk tanche he bore gunn uzar kortat tem polloun ami khuxal zatolim. Ani teach bhaxen amchim bhav-bhoinnam pasun, Paulucho ho sol’lo apnnaitat tednam, tim pasun amche bore gunn polloun khuxal zatolim. Hea toren, sobhent xanti ani ekvott astolo.

9. Nattkai pois korunk ami kitem korunk zata?

⁹ Ami soglench ekdom bore bhaxen korunk xokonant mhunn ami vollkhon ghetlem zalear ami nattkai pois korunk xoktat. Tor eka bhavak vo eke bhoinnik amchea poros bore gunn vo bori kola asa zalear, ami tanchea von borim asat mhunn dakhounk proitn korchimnant. Tachea bodlek, ami tanche koddlean xikonk toiar astolim. Udharonnak, ek bhav ekdom borim bhaxonnam dita zalear, to toiari koxi korta tea vixim ami tache lagim vicharunk zata. Vo ek bhoinn bori randta zalear, ti koxi randta tem vicharun ami tiche koddlean xikonk zata. Vo ek bhav dusream sangata ixttagott korunk boro asa zalear, to borim ixttam koso korunk pavta tem ami vicharunk zata. Tor hea toren, ami nattkai pois korunk pavtolim ani dusream thaun xikonk-ui pavtolim.

10. Gideonak kosle eke oddchonnecho fuddo korcho poddlo?

¹⁰ Manasseh kullacho Gideon, ani Efraim kullachea dadleam modem kitem zal’lem tea vixim polloum-ia. Jehovache modotin, Gideon ani tache 300 soinik, ek vhodd zhuz jikon porot ietale tednam Efraim kullache dadle taka mellonk aile ani tachea sangata vad-vivad korunk lagle. Taka xabaski diunchea bodlek, survatek thaun tannem tankam zhuzak kiteak apounk nant mhunn te vicharunk lagle. Tor tankam aplea kullacho itlo gorv aslo ki Gideonan Jehovachem nanv ani tachea lokank  koxe rakhle tacher te dhean diunk pavonk nant.—Fudd. 8:1.

11. Gideonan Efraimachea dadleank kitem sanglem?

¹¹ Punn Gideonan khaltikaien Efraimachea dadleank mhunnttlem: “Tumkam hanvem sor keli zalear, mhaka kitem mell’lam?” Uprant, Jehovan tancher koxem besanv ghatlolem tem tannem tanchea ugddasak haddlem tednam tancho “rag samkoch nivlo.” (Fudd. 8:2, 3) Hea toren, Gideonan gorvan fulchea bodlek khaltikai dakhoilolean, Devachea lokam modem to xanti samballunk pavlo.

12. (a) Efraimachea dadleam thaun ami kitem xikonk zata? (b) Gideona thaun familichea ani sobhechea vhoddilamnim kitem xikonk zata?

¹² Tor Efraimachea dadleam thaun ami kitem xikonk zata? Ami amkam man haddchea vixim dhean diunchea bodlek ami Jehovak man haddunk dhean diunk zai. Tumi familiche vo sobheche vhoddil asat zalear, Gideonachea udharonnantlean tumi kitem xikonk zata? Tumi kel’lea kamak lagon dusrim tumcher bejar zatat tednam, tumi khaltikai dakhoun tim toxem kiteak chint’tat tem zannam zaunk proitn korunk zata. Ani tanchem chintop chukichem asa zalear pasun, tannim kel’lea borea kamank lagon tumi tankam xabaski diunk zata. Tumi oxem kortat tednam, tumich sarkim asat mhunn dakhounchea bodlek, bhav-bhoinnam sangata bori ixttagott samballop chodd gorjechem mhunn tumi dakhounk pavtolim.

13. An’nak kosli oddchonn asli, ani tinnem tea oddchonnecho koso fuddo kelo?

¹³ Atam ami An’nachem udharonn polloum-ia. Ticho ghov, Elkanah Levit aslo ani taka anik ek bail asli. Tichem nanv, Penin’nah. Punn Penin’nah poros, Elkanah, An’nacho chodd mog kortalo. “Penin’nah-ak bhurgim aslim, punn An’nak naslim.” Dekhun Penin’nah ‘bogor-bogor tika chaloun sotaitali.’ Hea karonnak lagon An’na khub dukhi zatali. Ti “roddtali ani kai jei-khainasli.” (1 Sam. 1:2, 6, 7) Punn tinnem Penin’nahcho bodlo gheunk na. Tachea bodlek, An’nan apleo khonti Jehovak magnneant sangleo. Ani Jehova soglem sarkem kortolo mhunn ti tacher patieun ravli. Hachea uprant Penin’nahcho sobhav bodol’lo kai na tem amkam khobor na. Punn An’nachem dukh pois zalem ani tika monachi xanti mell’lli. Ani “tichem mukh anink kednanch khontin bhorlolem disunk na” mhunn Bible sangta.—1 Sam. 1:10, 18.

14. An’nachea udharonnantlean ami kitem xikonk zata?

¹⁴ An’nachea udharonnantlean ami kitem xikonk zata? Thoddim, tim amchea poros borim asat mhunn dakhounk sodhtat astolim vo amkam rag haddunk sodhtat astolim. Tea vellar, ami tanche poros borim asat mhunn dakhounchea bodlek vo tancho bodlo gheunchea bodlek, ami tanchea sangata xanti korunk proitn korunk zai. (Rom. 12:17-21) Ami oxem kortat tednam, tim xanti korunk toiar nant zalear pasun, amkam monachi xanti astoli.

15. Apollo ani apostl Paulu modem kitem ek-sarkem aslem?

 ¹⁵ Atam ami Apollo ani apost Paulu thaun kitem xikonk zata tem polloum-ia. Tankam Devachea Utrachem borem ginean aslem ani te dogui bore xikoupi asle. Toxench, zaite lok tankam vollkhotale. Ani tannim zaiteank Jezuche xis zaunk modot kel’li. Punn tannim kednanch eka-mekachi nattkai korunk na.

16. Apollo koslo munis aslo?

¹⁶ Apollo “zolman Aleksandriecho” aslo. Tea tempar, zaito lok xikxonn gheunk hea xarant ietale, taka lagon hem xar famad aslem. Apollo uloupant huxar aslo ani taka ‘Povitr Pustokachi bori vollokh asli.’ (Itihas 18:24) Ani to Korint sobhent aslo tednam thoinchim thoddim bhav-bhoinnam, to her bhav ani Paulu poros pasun boro asa mhunn mantalim. Hem chintop bhav-bhoinnam modem futt ghalunk xoktalem. (1 Kor. 1:12, 13) Punn Apollok oslem chintop naslem mhunn amkam kollta. Karonn oslem chintop aslem zalear Paulu taka porot Korintant ieun seva korunk sangcho naslo. (1 Kor. 16:12) Tor Apollon apleak asloli tank ani kola, bori khobor porgottunk ani bhav-bhoinnank urba diunk uzar keli mhunn kollon ieta. Tea bhair, Apollo khalti aslo mhunn pasun amkam kollta, karonn Akuilan ani Prisilan, “somiache vattechi taka odik barik somzonni dili” tednam tannem ragar zainastana tem manun ghetlem.—Itihas 18:24-28.

17. Paulu koslo munis aslo mhunn amkam kollon ieta?

¹⁷ Apollon kel’lea borea kamam vixim Pauluk khobor asli. Punn bhav-bhoinnam to aplea poros boro asa mhunn somzonk xoktat tem chintun taka usko zaunk na. Toxench, thoddim  bhav-bhoinnam, “hanv Paulucho” oxem mhunnttalim tem pasun taka borem disonk na, karonn to khalti aslo ani taka aplea vixim sarkem chintop aslem. Hem amkam tannem Korintkarank boroil’le chitintlean kollon ieta, zoim tannem sogli vakhann’nni Jehovak ani Jezu Kristak dili.—1 Kor. 3:3-6.

18. 1 Korintkarank 4:6, 7-a pormonnem, Apollo ani apostl Pauluchea udharonnantlean ami kitem xiktat?

¹⁸ Tor ami Apollo ani apostl Pauluchea udharonnantlean koslem lisanv xikonk zata? Poilem, ami Jehovache sevent zaito vavr korunk puro vo ami zaitea zannank sotant haddleant asonk puro. Punn ami hem soglem fokot Jehovache modotin korunk xoktat mhunn ami ugddas dovrunk zai. Dusrem lisanv mhunnttlear, sobhent bhavank jitli chodd zobabdari asta, titli sobhent xanti samballunk tannim anikui chodd vavrunk zai. Vhoddilamnim ani sobhechea sevokamnim, bhav-bhoinnank sol’lo ditana to Bible-achea adarit diunk zai. Ani tannim bhav-bhoinnanchem dhean apnnacher nhoi, punn Jezucher dovrunk tankam modot korunk zai. Hea toren te sobhent xanti samballunk proitn kortat dekhun ami tanche khorench upkari!—1 Korintkarank 4:6, 7 vachat.

19. Ami sogleamnim kitem korunk proitn korunk zata? (“ Dusream Poros Borim Asat Mhunn Dakhouncho Sobhav Vaddoinakat,” hem boks pasun polloiat.)

¹⁹ Amkam zonn-ekleak Devan dil’li kosli-na-kosli kola vo tank asonk puro. Ani amkam asloli hi tank vo kola ami ‘eka-mekachi chakri korunk’ uzar korunk zata. (1 Ped. 4:10) Thodde pavtti ami kortat tem titlem mhotvachem nhoi oxem amkam disonk puro. Punn jea toren, lhan-lhan pont mellon ek boro vistid toiar zaunk pavta, teach bhaxen amchea lhan-lhan kamam vorvim, sobhent xanti ani ekvott uronk pavta mhunn ami ugddas dovrunk zai. Tor dusream poros ami borim asat hem chintop kaddun udounk ani sobhent xanti ani ekvott samballunk ami zata titlo proitn korum-ia.—Ef. 4:3.