1. Jehova amkam dusream sangata sor kiteak korina?

JEHOVAN munxank ani aple sogle rochnnek ek-sarkinch rochunk nant. Punn tim soglim veg-vegllim asat. Hantuntlean Jehova soglench ek bhaxenuch asonk zai mhunn opekxa korina mhunn amkam kollon ieta. To amchea kallzant kitem asa tem polloita ani dusream sangata amkam sor korina. (1 Sam. 16:7) Amkam koxe toren vaddoileant, ami kitem bore toren korunk xoktat ani amcheo oskotaio kitem, tem Jehova bore bhaxen zannam. Tea pasot, amchean korunk zaina tem to amchea lagim magona. Tor Jehova amkam jea toren lekhta, teach bhaxen ami amkam lekhunk zai. Hea toren, ami “moriadin” amchem mol korunk pavtolim. Tem mhunnttlear, ami amchech vixim, favo tache poros odik vo unnem chintchim nant.—Rom. 12:3.

2. Ami amkam dusream lagim kiteak sor korchem nhoi?

² Amche sobhent zaitim bhav-bhoinnam asat jim porgottnnent khub boro vavr kortat. (Heb. 13:7) Tor tanchi dekh gheun ami amchi porgottnni koxi sudharunk zata tem ami tanche koddlean xikonk zata. (Filp. 3:17) Punn tanche koddlean xikop ani amkam tanche kodden sor korop hantunt ontor asa. Ami amkam dusream lagim sor kelo zalear ami kainch valorachim nant mhunn chintun ami nirax zaunk xoktat vo amkam nattkai zaunk xokta. Ani ami fattlea lekhant xiklolim toxim, dusream poros ami borim asat mhunn dakhoilear Jehova sangata amchi ixttagott pidd’ddear zaunk xokta. Tea pasot Jehova amkam mogan xittkaunni dita: “Zonn-eklean ap-apli vagnnuk topasun kaddchi ani, ti bori zalear, dusream lagim sor korinastana, tachean vo tichean apnnachech khatir khuxalkai bhogum-ieta.”—Gal. 6:4.

3. Jehovache sevent kosli vaddavoll kelolean tumkam khuxalkai mell’llea?

³ Ami Jehovache sevent jem kitem korunk pavleant tem  polloun ami khuxal zalolim Jehovak zai. Udharonnak, tumi Jehovacho mog korunk laglim dekhun tumi ap-khuxen bautizm gheunk fuddem sorlim astolim. Ani tednam thaun tumi vaddavoll korun kitlim khuxal zaleant tea vixim chintat. Zoxem, Bible vachun ani tacher obheas korun, Jehova pasot tumcho mog anik vaddlo astolo. Toxench, tumi Jehova lagim kallzantlean magonk laglim astolim. (St. 141:2) Tea bhair, porgottnnechea kamant koxem ulounchem ani prokaxonam koxim uzar korchim tantunt tumi tumchi kola vaddoili astoli. Ani Jehovache modotin tumi ghoddie ek boro ghov, bori bail vo borim avoi-bapui zaunk pavlim astolim. Tor hea toren Jehovache sevent tumi keloli vaddavoll polloun tumi khuxal zaunk xoktat.

4. Hea lekhant ami kitem xiktolim?

⁴ Heach bhaxen ami amchea bhav-bhoinnank, Jehovache sevent tim kortat ti vaddavoll polloun, tannim khuxal ravonk ani dusream sangata sor korina zaunk tankam modot korunk zata. Tor hea lekhant, avoi-bapaimnim aplea bhurgeank, kazari zoddpeamnim eka-mekak, toxench vhoddilamnim ani heramnim, bhav-bhoinnank koxi modot korunk zata tem ami polloitolim. Ani toxench amchea zonn-ekleache poristhiti ani tanki pormonnem, ami melloun gheunk zatat tosle dhei dovrunk amkam Bible-antlim khoinchim thoddim totvam faideak poddttat tem pasun ami polloitolim.

5. Efezkarank 6:4-a pormonnem, avoi-bapaimnim kitem korchem nhoi?

⁵ Avoi-bapaimnim aplea bhurgeank dusream lagim kednanch sor korchem nhoi vo tanchean korunk zaina tem korunk tancher dobhav ghalcho nhoi. Karonn oxem kelolean bhurgim nirax zaunk xoktat. (Efezkarank 6:4 vachat.) Oxench Sachiko * nanvache eke bhoinnik ghoddlem. Ti mhunntta: “Iskolant astana her bhurgeam poros hanvem chodd borem korchem mhunn mhojeo ttichereo mhaka sangtaleo. Toxench hanvem iskolant full marks ghetle zalear mhojea tticherik ani bapaik hanv ek sakx diunk pavtolem mhunn mhoji mummy pasun chintali. Punn full marks gheunk mhojean kednanch zaunchem naslem. Mhojem iskolachem xikop zaun atam zaitim vorsam zalim ani atam hanv Jehovachi seva zata title bore toren korunk vavurtam. Punn  Jehova mhoji seva polloun khuxal asa kai na, hem hanv aiz pasun chint’ta.”

6. Avoi-bapaimnim, Stotr 131:1, 2-antlean kitem xikonk zata?

⁶ Avoi-bapaimnim, Stotr 131:1, 2-ant (vachat) aslolea Davidachea utrantlean ek mhotvachem lisanv xikonk zata. David khalti also dekhun tannem ‘vhodd-vhodd vostunchi axa dhorunk na.’ Ani jeo vostu apnnachean melloun gheunk zainant teo vostu melloun gheunk tannem proitn korunk na. Taka lagon, to ‘xant ani aplea lagim asa tantuntuch dhadoxi aslo’. Tor avoi-bapui khaltim astat tednam tim apleachean korunk zaina tem korunk opekxa korinant ani toxench tim aplea bhurgeam thaun-ui tosli opekxa korinant. Tachea bodlek aplea bhurgeachean kitem korunk zata tem somzon, tannim melloun gheunk zatat tosle dhei dovrunk tannim modot korunk zata. Hea vixim bhoinn Marina sangta: “Mhoje avoin mhaka mhojea bhavam sangata vo her bhurgeam sangata kednanch sor korunk na. Amkam zonn ekleak veg-veglli tank asa ani ami dor-eklim Jehovak valorachim asat mhunn tinnem amkam xikoil’lem. Tinnem amkam toxem xikoil’lem dekhun hanv mhaka dusream sangata sor korina. Hanv khorench tiche khub upkari.”

7-8. Eka ghovan aple bailek koso man dakhounk zata?

⁷ Ek Kristi ghovan aple bailek man diunk zai. (1 Ped. 3:7) To tika man dita zalear to aplo vell tika ditolo, tichi kallji ghetolo ani ti gorjechi asa mhunn zannam zaun ticho valor kortolo. Punn toxem korchea bodlek tichean korunk zaina tem tinnem korunk zai mhunn to opekxa korta zalear vo dusrea bailam sangata tika sor korta zalear kitem zatolem? Tem amkam bhoinn Rosa jicho ghov sotant na tichea udharonnantlean kollon ieta. To sodanch dusrea bailam sangata tika sor kortalo ani tichea kallzak toptat toslim utram tika uloitalo. Hea pasot bhoinn Rosak khub vaitt distalem ani aplo khorench konnui mog korta kai na mhunn ti dubhavtali. Ti mhunntta, “Jehova mhozo mog korta ani mhoji kallji gheta mhunn porot-porot konnem tori mhojea ugddasak haddunk goroz asli.” Punn Kristi ghov aple baile sangata oxe toren vagonant. Tachea bodlek te aple bailek man ditat. Karonn oxem tem korinant zalear aple baile sangata ani Jehova sangata apli ixttagott pidd’dear zatoli mhunn te vollkhun ghetat. *

⁸ Ek ghov aple bailek man dita zalear to tichea borea gunnam vixim dusreank sangtolo, ticho mog korta ani valor korta mhunn tika khatri ditolo ani tinnem kel’lea borea kamam pasot tika xabaski ditolo. (Mho. 31:28) Fattlea lekhant ami Katerina nanvachea bhoinnichem udharonn polloilolem. Apunn kainch valorachi na oxem tika distalem karonn ti lhan asli tednam tichi avoi tika her cheddvam sangata sor kortali. Hacho Katerina-cher itlo probhav poddlo ki tem sot xiklea uprant pasun apnnak dusream sangata sor korunk laglem. Punn tichem hem chukichem chintop bodlunk tichea ghovan tika modot keli. Ti mhunntta: “Mhozo ghov mhozo khub mog korta, mhojea borea kamank lagon mhoji tokhnnai korta ani mhojea pasot magnnem korta. Toxench hanv kainch valorachem na mhunn hanv chintunk lagtam tednam to mhaka Jehovachea gunnam vixim ugddas korun dita ani hea ritin to mhojem chukichem chintop bodlunk modot korta.”

9-10. Apleak dusream sangata sor korchi sonvoim aslole eke bhoinnik, vhoddilamnim koxi modot keli?

⁹ Apleak dusream lagim sor kortat tankam vhoddilamnim koxi modot korunk zata? Hea vixim amkam Hanuni nanvachea bhoinnichem udharonn asa. Ti lhan asli tednam tika konnuch  xabaski dinaslim. Ti mhunntta: “Hanv khub lojetalem ani hanv kainch valorachem na mhunn chint’talem. Tor hanv her bhurgeam sangata mhaka sor korunk laglem.” Sotant ailea uprantui ti apnnak dusrea bhav-bhoinnam sangata sor korunk lagli. Ani taka lagon sobhent ti jem kitem kortali tem kainch valorachem na oxem tika disonk laglem. Punn atam ti ek pioneer zaun khub khuxal asa. Tor tichem chintop bodlunk tika koxi modot zali?

¹⁰ Hanuni sangta ki sobhentlea vhoddilamnim tichea borea udharonnak lagon tika xabaski dili ani sobhent ti valorachi asa mhunn tika khatri dili. Ti mhunntta: “Thodde pavtti sobhentle vhoddil, thoddea tornnattea bhoinnank urba diunk mhaka sangtale. Ani hanv toxem kortalem tednam te mhoje upkar attoitale. Ani te mhaka 1 Tesalonikekarank 1:2, 3 pasun vachun dakhoitale. Mhoje pasot aslolo tancho ho mog polloun hanv khub khuxal zatalem. Khorench hea vhoddilank lagon Jehovache songottnnent hanv valorachem asa mhunn mhaka dista.”

11. Izaias 57:15-a pormonnem, ‘khontibhorit ani khala poddloleank’ ami koxi urba diunk zata?

¹¹ Izaias 57:15 vachat. Jehova ‘khontibhorit ani khala poddloleancho’ khub mog korta. Tor oslea bhav-bhoinnank fokot vhoddilamnich nhoi punn ami sogleamnim urba diunk zai. Hem ami koxem korunk zata? Ek vatt mhunnttlear, amkam tanchi kallji asa mhunn ami dakhounk zai. Karonn Jehova tancho kitlo mog korta tem ami tankam dakhoilolem Jehovak zai. (Mho. 19:17) Ani toxench ami khaltim asonk zai karonn ami khaltim nant zalear dusreanchem dhean ami amcher haddttolim ani bhav-bhoinnank amchi nattkai zatoli. Tor ami amchea utramnim ani kornneamnim, bhav-bhoinnank sodanch urba diunk zai.—1 Ped. 4:10, 11.

12. Sadea lokank Jezuxim ieunk kiteak avoddttalem? (Masikachem fuddlem chitr polloiat.)

¹² Dusream lagim ami koxem vagchem tem Jezuchea udharonnantlean ami xikonk zata. Sonvsarant jietolea khoinchea-i munxa poros Jezuk sogleam von chodd zannvai asli. Tori punn to “dulob ani lhanvik kallzacho” aslo. (Mt. 11:28-30) Aplea gineanachi ani zannvaiechi tannem kednanch vhoddvik korunk na. Jezu lokank xokoitalo tednam, tannem tankam somzota toslim ani kallzak lagta toslim udharonnam uzar kelim. (Luk. 10:21) Tea tempa voile dhormik fuddari gorvixtt asle ani te lokank kainch valorache nant mhunn lekhtale, punn Jezu toso naslo. (Ju. 6:37) To sadea lokank pasun manan lekhtalo.

13. Jezu jea toren aplea xisam lagim vaglo, tantuntlean tacho mog koso dison ieta?

¹³ Jezu aplea xisam sangata jea toren vaglo tantunt pasun tacho mog dison ieta. Aplea xisanchi tank ani poristhiti veg-veglli asa mhunn Jezu zannam aslo. Tor ek xis jitlem korpak xokta titlench dusro xis korunk xokchona mhunn tannem somzon ghetlem. Punn zonn eklo apunn boreantlem borem korunk vavurta tem polloun to khuxal aslo. Jezu aplea xisank kitle bore toren vollkhotalo tem amkam tannem dil’lea talentachea voparintlean kollon ieta. Tea voparint dhonian dor-eka chakrak, ‘ap-aple kuveti vo tanki’ pormonnem kam dilem. Tantuntlea eklean, dusrea chakra poros chodd talent zoddle. Punn dhonian tea donui chakrank, “Xabas, borea ani visvaxi chakra!” mhunnon xabaski dili.—Mt. 25:14-23.

14. Ami Jezuchi dekh koxi gheunk zata?

¹⁴ Jezu amkam sogleank mog dakhoita. To amchi tank ani poristhiti somzota ani ami amchem boreantlem borem ditat tem polloun to khuxal zata. Tor Jezu bhaxen ami pasun amchea bhav-bhoinnam sangata mogan vagonk zai. Tim dusream poros borem korunk xokonant mhunn ami tankam lojek ghalchem nhoi vo tim kainch valorachim nant oxem tankam disonk diunchem nhoi, punn Jehovache sevent tim apleachean zata titlem kortat tem polloun, ami tankam xabaski diunk vatto sodhunk zai.

15-16. Eke bhoinnin apli tank ani poristhiti pormonnem dhei dovorlolean tika koso faido zalo?

¹⁵ Jehovache sevent ami dhei dovortat tednam amchea jivitak ek orth melltta. Punn ami te dhei, dusream sangata sor korinastana amchi tank ani poristhiti pormonnem dovortat zalear ami nirax zaunchimnant. (Lukas 14:28) Hem somzonk Midori nanvachea eke pioneer bhoinnichem udharonn polloum-ia.

¹⁶ Midori lhan astana, ticho bapui zo sotant na, tika sodanch tichea bhav-bhoinnam sangata ani iskolantlea bhurgeam sangata sor kortalo. Taka lagon Midorik apunn kaim valorachem na oxem distalem. Tor tinnem kitem kelem tem ti sangta. “Hanv dor disak Bible vachunk laglem ani tantuntlean mhaka monachi xanti mell’lli ani Jehova mhozo kitlo mog korta tem mhaka kollon ailem.” Tea bhair, Midorin apli tank ani poristhiti pormonnem dhei dovorle ani te dhei melloun gheunk Jehovachi modot magli. Haka lagon atam Midorik apunn valorachem na oxem disona ani Jehovache sevent ti kitem korunk pavlea tem polloun ti khuxal asa.

17. Ami amchea ‘kallzachi ani monachi sarki novsornni’ korit ravonk kitem korunk zai, ani oxem kelear kitem zatolem?

¹⁷ Amkam dusream sangata sor korchi sonvoim asa zalear ti rokddich voichina. Tea pasot Jehova amkam sangta: ‘Tumchea kallzachi ani monachi sarki novsornni korit ravat.’ (Ef. 4:23, 24) Hem ami koxem korunk zata? Ami magnnem korunk zai, Devachea Utracho obheas korun tacher niall korunk zai ani tachi povitr xokti magonk zai. Ani tednam to aple povitr xokte udexim amchem chintop sarkem korunk  ani toxench amche bhitor gorv ani nattkai osle vaitt gunn asat zalear topasunk ani te kaddun uddounk amkam modot kortolo.

18. 2 Itihas 6:29, 30-ant sanglolim utram amkam koxim buzvonn ditat?

¹⁸ 2 Itihas 6:29, 30 vachat. Jehova amchea kallzant kitem asa tem pollounk xokta. Tor sonvsarachem chintop pois korunk ani taka manta tem korunk ami vavr kortat tem polloun to amcho anik mog korunk pavta.

19. Jehova amcho kitlo mog korta tem dakhounk tannem amkam koslem udharonn dilam?

¹⁹ Jehova amcho kitlo mog korta tem dakhoun diunk to amkam ek udharonn dita. To, eke avoi ani bhurgea modem aslolea natea vixim sangta. (Iz. 49:15) Rachel nanvachi ek avoi sangta: “Mhoji dhuv Stephanie nnov mhoineam poilinch zolmol’lem. Tem zolmol’lem tednam khub lhan ani oskot aslem. Ani hea karonnak lagon taka hospital-antuch dovorchem poddlem. Punn dotor dor disak thoddea vella pasot taka mhoje vengent gheunk ditalo. Tor hea vellar mhojea bhurgea lagim mhojem natem anik ghott zaunk pavlem. Atam tem sov vorsanchem asa. Punn aplea piraiechea her bhurgeam poros tem lhan asa. Tori punn tem jieunk itlem zhuzlem tem polloun hanv tacho khub mog kortam ani tannem mhojea jivitant khub khuxalkai haddlea!” Tor ami pasun Jehovache sevent amchem boreantlem borem diunk vavurtat tednam, amche pasot aslolo tacho mog anikui vaddtta ani hem zannam zaun ami khub khuxal zatat.

20. Jehovache familint asat tim kiteak khuxal astat?

²⁰ Jehovache familint ami soglim eka-meka poros khub vegllim asat. Tori astana Jehova amchea dor-ekleacho valor korta. Ami dusrea lokam poros borim aslim dekhun Jehovan amkam apleaxim oddun haddunk nant, punn ami khaltim aslim ani amchem jivit bodlunk toiar aslim dekhun tannem amkam apleaxim oddun haddlim. (St. 25:9) Tor ami sosnikaien ani visvaxiponnan amchean zata tem soglem Jehovache sevent kortat tednam to tem khub valor korta ani hantuntlean amchem ‘kalliz borem ani udar’ asa mhunn kollon ieta. (Lukas 8:15) Tor ami Jehovak amchea boreantlem borem ditat tednam ami ‘amchech khatir khuxalkai bhogunk pavtolim.’