1-2. Izaias 65:16, 17-nt sanglolim utram, amkam sosnikaien oddchonneancho fuddo korunk koxim modot kortat?

2017 vorsachea, “SODDUN DIUM NAKAT!” hea odhivexonant amkam somosia vo trasancho fuddo korunk poddlear pasun ami sosnikai koxi dakhounk zata tem ami xiklim. Ani ami aiz pasun veg-vegllea trasancho fuddo korun sosnikai dakhoit asat.

² Zoxem halinch, amchea familintlo konnui vo amcho ek ixtt bhair poddla zait. Vo amkam ghoddie, COVID-19 piddek lagon vo her duensak lagon tras bhogunk poddleat zait. Vo zantteponnak lagon, amkam oddchonneancho fuddo korunk poddtta zait. Vo hinvsa vo dhumallo sosunk poddla zait. Vo eka odruxttak ami sampoddleant zait. Punn heo sogleo somosia ani tras kednanch asche nant, tea disachi ami vatt polloitat. Ani tednam tancho ugddas pasun amkam ieuncho na.—Izaias 65:16, 17 vachat.

3. Atam ami kitem korchi goroz asa, ani kiteak?

³ Punn aiz pasun ami somosiancho fuddo korit asat ani fuddarak amcheo heo somosia ghoddie anik vaddttoleo. (Mt. 24:21) Taka lagon, ami sosnikai ho gunn vaddounchi goroz asa. Karonn Jezun mhunnttlem: “Thir ravat, ani oxem khorem jivit tumi zoddunk pavtoleat.” (Lukas 21:19) Heramnim tancher ailolea trasancho sosnikaien koso fuddo kela tacher niall kelolean, ami sosnikaien amchea trasancho fuddo korunk pavtolim.

4. Sogleam poros chodd sosnikai Jehovan dakhoilea mhunn ami kiteak mhunnonk zata?

⁴ Tor sogleam poros chodd sosnikai konnem dakhoilea? Jehova Devan. Hem aikon tumi ojap zaunk puro. Punn hea vixim chintat. Soitanan hea sonvsarant zaite tras haddleat. Ani Jehovak zai zalear, tem soglem eka dhopkean to kaddunk  xokta. Punn Soitanacho sonvsar nas korchea meren, Jehova sosnikaien ravla. (Rom. 9:22) Tor, Jehova khoinche nnov vixoi sosta tem ami polloum-ia.

5. Soitanan Devachea nanvacho koso opman kela, ani tumkam hea vixim koxem dista?

⁵ Soitanan Devachea nanvacho opman kela. Aplem nanv valorachem asa dekhun sogleamnim taka man dilolo Jehovak zai. (Iz. 42:8) Tori astana, sumar sov hozar vorsam thaun tachea nanvacho opman kela tem Jehova sosta. (St. 74:10, 18, 23) Eden bagent, Jehova munxank borem tem dina mhunn sangon, Devcharan (mhunnche “fott marun nanv pidd’ddear korpean”) Adanv ani Evek fottoilim ani to arop aiz meren asa. (Ut. 3:1-5) Aplea Bapaichea nanvacher ghatlolea hea aropa vixim Jezuk pasun chinta asli. Taka lagon, tannem aplea xisank oxem magnnem korunk xikoilem: “Amchea Bapa sorginchea, Tujem nanv povitr zaum.”—Mt. 6:9.

6. Jehovan munxank razvottki cholounk zaito vell dilolean kitem kollon ieta?

⁶ Zaitim zannam Devacho ani tachea razvottkecho virodh kortat. Khorem mhunnttlear, sorgar ani prithumer raj cholouncho hok’k fokot Jehovak asa, ani to sogleam poros bore toren raj cholounk xokta. (Prok. 4:11) Punn Devak to hok’k na mhunn sangon Devcharan ainzank ani lokank fottouncho proitn kela. Hem khorem nhoi mhunn dakhounk vell zai aslo. Dekhun Devan munxank raj cholounk zaito vell dila. Devachi modot nastana, munxam raj cholounk xokonant mhunn amkam atam sarkem dison ieta. (Jer. 10:23) Tor Dev aiz pasun pasiens dakhoit asa dekhun, fokot takach razvottki cholouncho hok’k asa ani tachench raj hea prithumecher xanti ani surokxa haddunk xokta mhunn sogleank kollon ietolem.

7. Jehovachea add konn geleant, ani tankam to kitem kortolo?

⁷ Aplim bhurgim aplea add geleant. Jehovan ainzank toxench Adanv ani Evek poripurnn rochlim. Punn Soitanan (mhunnttlear “Dusmanan”) tankam Jehova add vochonk uksailim. Uprant, anikui ainzamnim Soitanak sangat dilo ani toxench zaitim munxam Jehovachea add gelim. (Jud 6) Itlench nhoi, Jehovan aplea nanva pasot vinchun kaddloli Israel porza pasun khottea devank bhuzonk lagli ani tannim Jehovak nakarlo. (Iz. 63:8, 10) Hem polloun, aplea bhurgeamnim apleak ghat kelo oxem Jehovak dislem. Tori astana, to hem soglem aiz pasun sosta. Punn fuddarak, aplea add geleant tancho sogleancho nas korta tednam, Jehovak ani tachea visvaxi sevokank anik sosunk poddchem na!

8-9. Jehova vixim kosleo fotti amkam aiz aikonk mellttat, ani tea vixim ami kitem korunk zata?

⁸ Devchar aplea sevokancher ani apnnacher khotte arop ghalta. Hem Jehova sosta. Soitanan, Jobacher khotto arop ghatlolo ani aiz pasun to Jehovachea soglea visvaxi sevokancher toch arop ghalta. (Job 1:8-11; 2:3-5) To mhunnttlear, munis svarthak lagon Jehovachi seva korta. (Prok. 12:10) Punn khorem mhunnttlear, ami Jehovacho mog kortat ani taka lagon amkam tras astat tednam pasun ami taka visvaxi ravtat. Hea toren, Soitanan ghatlolo arop fott mhunn ami dakhoitat. Ani Jobachea sosnikaiek lagon Jehovan tacher besanv ghatlem toxem to amcherui besanv ghaltolo.—Jak. 5:11.

⁹ Soitan khottea dhormanchea fuddareank pasun uzar korun Jehovacher khotto arop ghalta. Munxanchea trasanchem karonn Dev zaun asa ani to lokanchi porva korina mhunn dhormik fuddari xikoitat. Zoxem, lhan bhurgim mortat tednam Devak sorgar anik ainz zai asle dekhun tannem tankam  sorgar vhelim mhunn te xikoitat. Punn hi ek vhodd fott mhunn ami zannant. Ami duent poddttat tednam vo amcho mogacho konnui morta tednam taka Dev zobabdar na. Tachea bodlek, to fuddarak he sogle tras kaddttolo mhunn ami bhorvonso dovortat. Ani hea mogall Deva Jehova vixim ami dusreankui sangtat. Hea toren, apnnacher arop ghalta tea Soitanak, Jehova ek boro zobab diunk pavta.—Mho. 27:11.

10. Stotr 22:23, 24-ant, amkam Jehova vixim kitem kollon ieta?

¹⁰ Aplea sevokancher ietat te dukh-tras polloun Jehovak dukh zata. Jehova ek doiall Dev zaun asa. Tor amcher dhumallo, duens ani opurnntaiek lagon tras ietat tednam taka khub dukh bhogta. (Stotr 22:23, 24 vachat.) Jehova amchem dukh somzota, to tem kaddunk sodhta ani to tem kaddttoloch. (Suttka 3:7, 8; Izaias 63:9 sor korat.) Tor oslo vell ieuncho asa, jednam “[amchea] dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant.”—Prok. 21:4.

11. Mornnant sanddlolea aplea ixttancho Jehovak kiteak ugddas ieta astolo?

¹¹ Jehovan aplea ixttank mornnant sanddleat, hem dukh Jehova sosta. Aplea visvaxi sevokank Jehova portun pollounk axeta. (Job 14:15) Hea vixim chintat. Abrahamacho, Moizesacho, Davidacho ani her stotrkarancho, Jehovak kitlo ugddas ieta astolo. Karonn Abraham tacho ghott ixtt aslo, Moizesa lagim Jehova “tondda-tonddim” uloitalo, ani David, toxench her stotrkar, sobit gaionam gaun tachi vak’khannim kortale. (Jak. 2:23; Sutt. 33:11; St. 104:33) Aplea soglea ixttank Jehovan aiz mornnant sanddleat, punn tankam to visronk na. (Iz. 49:15) Tanchea modlea dor ekleachi, taka bariksannen khobor asa. Karonn eka orthan te ‘tache mukhar jive’ asat mhunn  Bible sangta. (Lukas 20:38) Beginuch, to tankam punorjivont kortolo tednam, te portun kallzant thaun taka magnnem kortole ani tachi bhokti kortole. Ani oxem korunk Jehova axeun ravla. Tor, amcho konnui mogacho mornnant sanddla zalear, Jehovak aplea ixttam vixim koxem bhogta tem zannam zaun amkam buzvonn melltta.

12. Jehovak kitem polloun khub dukh zata?

¹² Noxtte lok borea lokank tras kortat. Eden bagent jem vaittponn suru zal’lem tem fuddarak anikui vaddot voitolem mhunn Jehovak khobor asli. Ani hem, aiz pasun ghoddtta tem amkam dixtti poddtta. Karonn ami voita thoim noxttemponn, on’neai ani hinvsa zata ti polloitat. Ani hea soglea vaittponnacho Jehova dves korta. Punn je lok oskot asat vo zankam konnacho adar na, zoxem vidvanchi ani onathanchi taka khub kallji asa. (Zek. 7:9, 10) Toxench, aplea visvaxi sevokancher zulum zata ani tankam bondkhonnint ghaltat tem polloun Jehovak khub dukh zata. Tor jea lokank zulum soscho poddtta, tancho Jehova khub mog korta mhunn tannim khatri dovrunk zata.

13. Aiz lok koslim burxim kamam kortat, punn Jehova Dev beginuch kitem kortolo?

¹³ Lok onoitik kamam korit asat. Devan munxank aplea sarkinch rochleant, punn Soitan tankam onoitik kamam korunk uksaita. Noahchea disamnim, munxanchem khotteponn chodd vaddlam tem polloun “apnnem monxak rochlo mhonn Sorvespor dukhi zalo ani tachem kalliz khontovlem.” (Ut. 6:5, 6, 11) Tednam thaun, poristhiti chodd ani chodd vaitt zait asa. Zoxe, aiz dadle ani bailo onoitik kamam kortat ani toxench zaito lok apleach lingachea munxam koddem pozoddponn kortat. (Ef. 4:18, 19) Ani Jehovacho ek sevok oslem kam korta tednam Soitan khub khuxal zata. Jehova oslim burxim kamam korit ravtat toslea lokancho beginuch nas kortolo.

14. Munxank lagon aiz Devachea rochnnechem kitem zalam?

¹⁴ Apli rochnna munis pidd’ddear korta. Odhikar aslole munis aplea khala aslolea munxank tras ditat. Titlench nhoi, Devan diloli prithum ani tantunt aslolea zonvaranchi pasun munis kallji ghena. (Up. 8:9; Ut. 1:28) Munxachea vaitt kamank lagon, 10 lak’kham poros chodd veg-vegllea torechim zhaddam ani zonvaram thoddea vorsam bhitoruch kabar zaunk xoktat mhunn vidneanik sangtat. Hea karonnak lagon, zaitea lokank usko zata. Punn Jehova beginuch ‘sonvsar padd kortat tankanch padd vo kabar kortolo’ ani hi prithum sobit bag kortolo mhunn amkam khatri dita.—Prok. 11:18; Iz. 35:1.

15-16. Jehova bhaxen sosnikai dakhounk amkam koxi modot zata? Ek udharonn diat.

¹⁵ Hozaramnim vorsam thaun Jehovan kitem soglem soslam tea vixim chintat. (“ Jehova Aiz Meren Kitem Sosta,” hem boks polloiat.) Jehovak zai zalear to kednai hea vaittponnacho nas korunk xokta. Punn to pasiens dakhoita dekhun amkam faido zata. Hem somzonk ami ek udharonn polloum-ia. Eka avoi-bapaik, ek bhurgem zolmochem asa mhunn chintat. Punn tem duent zolmotolem, taka tras bhogche poddttole ani tem chodd temp urchem na mhunn dotor tankam sangta. Tori astana, tea bhurgeak zolmak haddunk, tim avoi-bapui khub khuxal zatat. Ani taka vaddounk apleak tras poddlear pasun, tim tachi khub kallji ghetat. Karonn tim tacho khub mog kortat.

¹⁶ Tech porim, Adanv ani Evechim soglim bhurgim tea duent bhurgea bhaxen zaun asat. Torui, Jehova amcho mog korta ani amchi  kallji gheta. (1 Juanv 4:19) Tea bhurgeachim avoi-bapui taka borim korunk xokonant. Punn Jehova, amche sogleanche tras pois korunk xokta. Ani hem korunk tannem ek dis tharaila. (Mt. 24:36) Apnnem tharail’lo to dis ieum porian Jehova sosnikai dakhoita. Karonn to amcho khub mog korta. Ani tacho ho mog ani sosnikai polloun, he sogle tras to kaddun uddoisor amkam-i sosunk modot zata.

17. Hebrevank 12:2, 3-ant, Jezu vixim kitem sanglam ani tantuntlean amkam koso dhir melltta?

¹⁷ Jehovan zaitem soslam ani Jezun aplea Bapaichi bori dekh gheun, sonvsarant astana amchea khatir khub tras ani dukh soslem. Zoxem, taka vaitt utram aikonk poddlim, loz bhogchi poddli ani khambear moronn soschem poddlem. (Hebrevank 12:2, 3 vachat.) Jehovachi sosnikai polloun Jezuk dhir mell’llo toso amkam-i dhir mellonk xokta.

18. 2 Pedru 3:9-a pormonnem, Jehovan pasiens dakhoilolean kitem zaunk pavlam?

¹⁸ 2 Pedru 3:9 vachat. Ho noxtto sonvsar nas korcho sarko vell khoincho to Jehova zannam. Punn tednam meren tannem pasiens dakhoilam. Ani tannem pasiens dakhoilolean zaitea lokank Jehova vixim xikonk, tacho mog korunk ani aplem jivit taka somorpit korunk vell mell’lla. Ani hoch lok, aiz ek vhodd zomo zaun Jehovachi bhokti korunk pavleant, zankam fuddarak Jehova ho noxtto sonvsar nas korta tednam salvar kortolo. Khorench, Jehovan pasiens dakhoilolean, hem soglem zaunk pavlem!

19. Ami kitem korcho nichov korunk zai, ani oxem kelear amkam kitem mellttolem?

¹⁹ Soitanan hea sonvsarant itlem vaittponn haddlam tori astana, Jehovan apli khuxalkai hogddaunk na. Jehova ek ‘khuxal Dev’ zaun asa. (1 Tim. 1:11, NW) Tor amcher dukh-tras ietat tednam ami te khuxalkaien sosunk zatat. Beginuch, Jehova aplea nanvacher haddlolo opman, sonvsarant zata tem vaittponn ani ami sostat te dukh-tras kaddun uddoitolo. Ani tea vellar, takach razvottki cholouncho hok’k asa mhunn sogleank kollttolem. Punn tednam meren ami hem soglem khuxalkaien sonxit ravcho nichov korum-ia. Ani ami oxem kelear, amchea vixim him utram khorim zatolim: “Koxttam-dogdam modem thir ravtat tim subhagi: osle porikxent iesesvi zaun, Sorvesporan Aplo mog kortoleank bhasail’lo jivitacho mukutt tim ghetolim.”—Jak. 1:12.