Ek kazari zoddpem sodanch khuxal ravlolem ani tanchem kazari jivit ghott urlolem Jehovak zai. (Mt. 19:4-6) Tuka kazar zaunchi itsa asa zalear, tuka ek boro sangati koso mellonk xokta? Jehova amcho Rochnnar zal’lean, amkam boro sangati vinchun kaddunk modot zaunk, tannem aplea Utrant thoddim totvam dileant. Tim totvam pall’llim zalear, tumchem kazari jivit sufoll zatolem. Atam ami tantuntlim thoddim totvam polloum-ia.

Poilem totv, amkam Jeremias 17:9-ant melltta. Thoim sangta: “Kalliz soglleam-von ghatki, itlem vaitt ki taka anink ilaz na.” (Jer. 17:9) Tor ek cheddo ani cheddum, eka-mekak mellonk lagtat tednam, eka-meka pasot tanchim bhavnam vaddonk lagtat. Hea pasot, tankam bore nirnnoi gheunk kotthin zaunk puro. Tor ami fokot amchea bhavnank lagon dusrea lagim kazar zaunk toiar zalim zalear, uprant ami amchea kazari jivitant niraxi zatolim. (Mho. 28:26) Tea pasot, ami eka-mekak bore toren vollkhon ghetlea bogor, amchea kallzantlim khol bhavnam tankam sangop vo kazar zaunchem utor divop sarkem zaunchem na.

Dusrem totv, amkam Mhonn’nneo 22:3-ant vachunk melltta. Thoim mhunntta: “Xittuk monis sonkoxtt polleun asro gheta, Punn, pisatt fuddem vetat ani trasant poddtat.” Thoddim, dating apps ani veg-veglleo website-i uzar kel’lean, koxim trasant poddleant? Thoddea onvollkhi munxamnim, kazar zata mhunn sangon, dusreanchim bhavnam dukhoileant, tanche koddlean poixe luttleat, ani apunn Jehovache Sakxi mhunn sangon apli khori vollokh lipoilea.

Dating apps vo veg-veglleo website-i uzar kortana, anik ek dhoko asa. To mhunnttlear, khoincho sangati tujea pasot boro asa tem tharaunk, hanga kompiuttor program uzar kortat. Punn he kompiuttor program munxamnim keleat. Tor tancher patievop mhunnttlear dhokeachem zaun asa. Karonn, kazar ek mhotvacho nirnnoi zaun asa. Ani ek kazari sangati vinchun kaddttat tednam, Bible-achea totvancher patienastana, munxamnim kel’lea kompiuttor program-ancher patielear, kitlem pixemponn zatolem nhoi?—Mho. 1:7; 3:5-7.

Eka munxa lagim ami kazar zaunk sodhtat zalear, tea munxak ami bore toren vollkhon ghevop ekdom gorjechem. Punn dating apps vo veg-vegllea website-i m udexim, ami eka munxachi  sarki vollokh korun gheunk xoktat kai? Mhonn’nneo 14:15-ant amkam ek totv dil’lem asa. Thoim mhunntta: “Pisatt monis apnnak sagtat titleim sotmandta, Punn, xittuk monis apunn koso cholta tacher nodor dovorta.” Tor oslea website-incher eka munxa vixim melltta te sogle mahiticher ami patieunk xokonant. Karonn choddxim zannam apli sarki mahiti dinant. Osle mahiticher patieun, thoddim kazar zaunk fuddem sorlim punn uprant tea munxak tim khoreponnim mell’llim tednam tankam vhodd dhoko boslo.

Dating apps ani website-incher zaite lok fotti marun apli khori vollokh lipoitat. Punn Stotr 26:4-ant amkam ek xittkaunni melltta. Thoim sangta: “Fottkiream modem hanv bosona ani dhongiam borabor hanv bhonvona.” (St. 26:4) Tor ami amkanch thodde prosn vicharunk zatat. Dating apps ani website-incher, apunn Jehovache Sakxi mhunn sangtat tea lokamnim, khorench bautizm ghetla kai? Te sotant ghott asat kai? Deva lagim tanchi ek bori ixttagott asa kai? Tanchea sobhentlim bhav-bhoinnam tankam borem udharonn mhunn lekhtat vo ‘khotte sangati’ mhunn lekhtat? (1 Kor. 15:33; 2 Tim. 2:20, 21) Te kazar zaunk sodhtat zalear, Bible-achea totvam adarit, tem sarkem zatolem kai? Tankam ani tanchea sobhentlea bhav-bhoinnank ami vollkonant dekhun hea soglea prosnanche zobab amkam mellonk xokonant. (Mho. 15:22) Tor hea prosnam vixim chintinastana, ami kazar zaunchem pavl ghetat zalear ami onbhavarthiam kodde “favo nhoi toslo sombond” zoddunk pavtolim ani ami Jehovak visvaxi urchimnant.—2 Kor. 6:14; 1 Kor. 7:39.

Dating apps ani website-incher kitle dhoke asat tem amkam kollon ieta. Tor ek boro kazari sangati sodhunk amkam anik khoincheo vatto asat? Ami sobhentleo mitting vo sorkitt zomat vo odhivexon vo her zageancher mellttat tednam ami eka-mekachi vollokh korun gheunk zata.

Punn ami eka-mekak mellonk xokonant tednam zoxem Corona pidde vellar zalem toxem, ami her vatto uzar korunk xoktat. Udharonnak, Zoom vo videoconference korunk her sadhonam uzar korun ami mittingek hajir zatat tednam, kazar zaunk sodhtolea ankvar bhav-bhoinnanchim bhavarthachim utram tanchea bhaxonnamnim ani zobabamnim dison ietolim. (1 Tim. 6:11, 12) Toxench mitting zalea uprant, breakout room-ant mellttana vo zoom-acher get-together kortana, tim bhav-bhoinnam sangata koxim uloitat tem polloun, tanche khore gunn tumkam dison ietole. (1 Ped. 3:4) Hea toren, vell voita toso tumi eka-mekak bore toren vollkhonk pavtolim. Tednam tumche gunn ani dhei ek-sarke asat kai na ani tumi borim sangati zaunk pavtolim kai na, tem tumkam kollon ietolem.

Tor he toren, ankvar aslolim, Bible-antlim totvam apnnaun, apleak ek kazari sangati sodhtat tednam tanchea jivitant Mhonn’nneo 18:22-ant sanglolem sot khorem zatolem. Thoim mhunntta: “Zaka bori ghorkarn mellta, taka dhadosponn mellta, ani Sorvesporachi mhoima taka favo zata.”—Mho. 18:22.