OBHEASACHO LEKH 30
Eke Mhotvache Bhasaunnentlean Tumkam Koso Faido Zata?
“Tuje ani baile modem . . . dusmanʼkai ghaltolom.”—UT. 3:15.
GIT 15 Praise Jehovah’s Firstborn!
KITEM XIKTOLIM *
1. Adanv ani Even patok kelea uprant Jehovan rokddench kitem kelem? (Utpoti 3:15)
ADANV ani Even patok kelea uprant Jehovan rokddich ek mhotvachi bhasaunni keli, jea udexim tanchea sonstik bhorvonso mellʼllo. Ti bhasaunni amkam Utpoti 3:15-nt vachunk melltta.—Vachat.
2. Utpoti 3:15-nt asloli bhasaunni ekdom mhotvachi kiteak zaun asa?
2 Hi bhasaunni Bible-antlea poilea pustokant asa tem khorem. Punn Bible-ant aslolem dor ek pustok hea bhasaunnek zuddlolem asa. Zoxem eka motianchea harak aslolea soglea motiank ek sut zoddun dovorta, teach bhaxen Utpoti 3:15-nt asloli hi bhasaunni akʼkhea Bible-ant sanglolo sondex zoddun dovorta. Tem mhunnttlear, Soitan ani tachea noxttea dutancho nas korunk, Dev ek Soddvonndar dhaddttolo. * Ani hem khorench Jehovacho mog kortat tankam ek vhoddlem besanv astolem!
3. Hea lekhant ami kitem polloitolim?
3 Tor hea lekhant, Utpoti 3:15-nt sanglole bhasaunne vixim ami tin prosnanche zobab polloitolim: Hea bhasaunnent konnam vixim sanglam? Hi bhasaunni koxi purnn zata? Ani hea bhasaunnentlean amkam koso faido zata?
HEA BHASAUNNENT KONNAM VIXIM SANGLAM?
4. ‘Sorop’ konn zaun asa, ani hem ami koxim zannant?
4 Utpoti 3:14, 15-nt, char zannam vixim sanglolem asa. Tem mhunnttlear ‘sorop,’ ‘sorpachi sonsot,’ ‘bail,’ ani ‘bailechi sonsot.’ Ani him charui zannam konn tem somzonk Bible amkam modot korta. * Tor poilim ami ‘sorpa’ vixim polloum-ia. Ek sorop ulounk xokona ani taka ginean asona. Tor Jehova Dev Eden bagent eka sorpa lagim uloilo tednam to konna lagim uloilo? Hacho zobab amkam Prokasovnni 12:9-ant melltta. Thoim Soitanak “adlo sorop” mhunnttlolo asa. Toxem zalear, hea sorpachi sonsot konn zaun asa?
SOROP
Soitan, zaka Prokasovnni 12:9-ant “adlo sorop” mhunnttla (Peregraf 4 polloiat)
5. Sorpachi sonsot konn zaun asa?
5 Thodde pavtti, konnui dusrea konn eklea bhaxen vagta ani taka tacheach sarke gunn asat zalear, Bible-ant taka tachi sonsot oxem mhunnttlolem asa. Tor sorpachi sonsot mhunnttlear, Jehova add voitat ani tachea lokancho virodh kortat te ovisvaxi ainz ani munis. Hantunt, Noahchea disamnim sorg soddun prithumer ailole te ainz, toxench Soitana bhaxen vagtat te noxtte munis pasun mellon asat.—Ut. 6:1, 2; Juanv 8:44; 1 Juanv 5:19; Judas 6.
SORPACHI SONSOT
Devachea add voitat ani tachea lokancho virodh kortat te noxtte dut ani munis (Peregraf 5 polloiat)
6. Utpoti 3:15-nt sangloli ‘bail’ Eve kiteak zaunk xokona?
6 Atam ami ‘bail’ konn ti zannam zaum-ia. Utpoti 3:15-nt aslole bhasaunnent sanglolem ki bailechi sonsot, sorpachem mostok “maddoitoli.” Ani ami poilim polloilem toxem, Soitan ek noxtto ainz. Tor hi bail Eve zaunk xokona. Oxem mhunnonk ek karonn mhunnttlear, Eveche sonstint soglim opurnn munxam asat ani tankam Soitanacho nas korunk tank na. Tor Soitanacho nas koso zatolo? Ani ti bail konn?
7. Utpoti 3:15-nt sangloli bail konn tem amkam Prokasovnni 12:1, 2, 5, 10-ntlean koxem kolltta?
7 Utpoti 3:15-nt sangloli bail konn ti amkam Bible-antlea nimannea pustokantlean kollon ieta. (Prokasovnni 12:1, 2, 5, 10 vachat.) Hi prithumer asloli ek bail nhoi! Karonn tichea paim-a tolla chondrim asa ani tichea mathear 12 noketrancho mukutt asa. Hi bail eka veglleach torechea bhurgeak zolm dita. Tem mhunnttlear, Devachem Raj. Ani Devachem Raj sorgar asa. Tor ti bail pasun sorgar asonk zai. Hantuntlean, ti bail Jehovachea sorginchea songottnnek suchit korta mhunn amkam kollon ieta. Ani visvaxi ainz hea songottnnecho bhag zaun asat.—Gal. 4:26.
BAIL
Jehovachem sorginchem songotton zantunt tache visvaxi ainz mellon asat (Peregraf 7 polloiat)
8. Bailechea sonsticho mukhel bhag konn zaun asa, ani to kednam mukhel bhag zalo? (Utpoti 22:15-18)
8 Atam ami bailechi sonsot konn tem zannam zaum-ia. Hea sonsticho mukhel bhag konn aslo tem zannam zaunk Bible amkam modot korta. To Abrahamache sonstintlean ietolo mhunn sanglolem. (Utpoti 22:15-18 vachat.) Ani bhasaunni kelʼli toxich, Jezu Abrahamachea sonstintlean ailo. (Lukas 3:23, 34) Punn Soitanacho nas korunk, taka munxam poros chodd xokti asonk zai asli. Sumar 30 vorsanche piraier, Jezun bautizm ghetlo tednam Jehovan aple povitr xokte udexim taka makhlo. Tea vellar Jezu tea baileche sonsticho mukhel bhag zalo. (Gal. 3:16) Ani Jezu moron jivont zalea uprant, Jehovan taka “mhoimecho ani manacho mukutt” dilo ani ‘sorgar ani sonvsarar soglo odhikar dilo.’ Hantunt ‘Soitanachea kortubancho bhosm korpacho’ odhikar pasun mellon asa.—Heb. 2:7; Mt. 28:18; 1 Juanv 3:8.
BAILECHI SONSOT
Jezu Krist ani tachea sangata raj choloupi 1,44,000 makhlolim Kristanvam (Peregraf 8-9 polloiat)
9-10. (a) Bailechea sonsticho bhag anik konn zaun asat, ani tim hea sonsticho bhag kednam zaunk pavtat? (b) Atam ami kitem polloitolim?
9 Punn Jezu bhair, bailechea sonstik anik ek bhag asa. Hantunt konn asa, tem amkam apostl Paulun Judev ani Judev naslolea makhlolea Kristanvank kitem sanglem tantuntlean kollon ieta. Tannem mhunnttlem: “Ani zor tumi Kristachim, tor Abrahamachi sonsot tumi, ani bhasavnne pormannem daiji tumi.” (Gal. 3:28, 29) Tor Jehova eka Kristanvak povitr xokten makhta tednam to bailechea sonsticho bhag zata. Hache voilean, Jezu ani tachea sangata raj choloitolim 1,44,000 zannam bailechi sonsot zaun asat mhunn ami zannam zatat. (Prok. 14:1) Ani him soglim, Jehova tanchea Bapa bhaxen chintunk ani vagonk proitn kortat.
10 Atam porian, Utpoti 3:15-nt konnam vixim sanglam tem ami polloilem. Tor atam, hi bhasaunni purnn korunk Jehovan atam meren kitem kelam ani tacho amkam koso faido zata tem polloum-ia.
HI BHASAUNNI KOXI PURNN ZATA?
11. Baileche sonstichea “khonttek” chabtolo, him bhasaunnentlim utram koxim ghoddon ailim?
11 Utpoti 3:15-nt, sorop baileche sonstichea “khonttek” chabtolo oxem sanglolem. Hem kednam purnn zalem? Soitanan Judevank ani Romi lokank uzar korun, Jezu Kristak jivexim marlo tednam bhasaunnecho ho bhag ghoddon ailo. (Lukas 23:13, 20-24) Amche khonttek mar lagta tednam ami thodde dis vo thoddo vell porian sarkim cholonk-bhonvonk xokonant vo kainch korunk xokonant. Teach bhaxen, Jezu melea uprant to somadhint aslo tednam thoddo vell porian to kainch korunk xoklo na.—Mt. 16:21.
12. Bailechi sonsot sorpachem mostok kednam ani koxi maddoitoli?
12 Punn Utpoti 3:15-nt sangloli bhasaunni dakhoita toxi, bailechi sonsot sorpachem mostok maddoitoli. Tor hi bhasaunni purnn zatoli zalear, Jezuk melʼleantlo jivont zaunk poddttolo aslo. Ani toxench zalem! Karonn Jezu moron tisrea disa jivont zalo ani Jehova Devan taka sorgar omor jivit dilem. Ani Devacho vell ietolo tednam Jezu Soitanacho nas kortolo. (Heb. 2:14) Toxench Jezu ani tache sangata raj choloupi, Devachea soglea dusmanancho, mhunnttlear sorpachea sonsticho nas kortolim.—Prok. 17:14; 20:4, 10. *
HEA BHASAUNNENTLEAN AMKAM KOSO FAIDO ZATA?
13. Utpoti 3:15-nt sanglolea bhasaunnentlean amkam aiz koso faido zata?
13 Jezu hea prithumer ailo tednam tannem purnn toren aplea Bapache gunn dakhoun dile. (Juanv 14:9) Ani Jezu vorvim ami Jehovak vollkhonk ani tacho mog korunk pavlim. Toxench, Jezuchea xikounnentlean ani to aiz Kristi sobhek koxem margdorxon dita tantuntlean amkam faido zata. Karonn Jehovak manvota tea toren ami koxem jieunk zai, tem ami zannam zaunk pavtat. Tea bhair, amkam Jezuchea mornna udexim pasun faido zata. Hem koxem? Jezu ek poripurnn jivit jielo. Tor to melo tednam Jehovan tachem bolidan manun ghetlem ani hea rogta udexim ‘soglea patkantlim ami xudʼdh-nirmoll zatat.’ (1 Juanv 1:7) Khorench, ami Jehovache sevok zaun asat zalear, aiz amkam hea bhasaunnentlean faido zata.
14. Eden bagent Jehovan kelʼli bhasaunni rokddich purnn zaunchi nasli mhunn amkam koxem kolltta? Somzaiat.
14 Punn Jehova Devan Eden bagent kelʼli bhasaunni rokddich purnn zaunk na. Karonn bailechi sonsot ieunk, Soitanan aple pattlavdar ektthaim korunk, ani baileche sonsti modem ani sorpache sonsti modem dusmankai zaunk vell lagtolo aslo. Punn hi bhasaunni zannam zalolean amkam faido zata. Karonn Soitanachea tabeant aslolo ho sonvsar, Jehovachea sevokancho dves kortolo mhunn amkam kolltta. Ani heach vixim Jezun pasun uprant aplea xisank xittkaunni dilʼli. (Marku 13:13; Juanv 17:14) Tea bhair, khas korun fattlea 100 vorsam thaun hi bhasaunni khorench ghoddon ieta ti ami polloitat. Koxi?
15. Soitanacho sonvsar Devachea lokancho poilim poros atam anikui chodd dves kiteak korta, punn ami Soitanak kiteak bhieupachi goroz na?
15 1914-nt Jezu Krist sorgar Raza zalea uprant, tannem Soitanak hea prithumer xevttilo. Tednam thaun Soitan ekdom ragixtt asa. Karonn apleak thoddoch vell asa mhunn to zannam. (Prok. 12:9, 12) Punn apnnak prithumer xevttila mhunn to vogich boson ravonk na. To Devachea lokank anik chodd tras korta. Ani hea pasot, Soitanacho sonvsar Devachea lokancho poilim poros atam anikui chodd dves korta. (Prok. 12:13, 17) Punn amkam Soitanak ani tachea pattlavdarank bhieupachi goroz na. Karonn amkam apostl Paulu bhaxen hi khatri asa. Tannem mhunnttlolem: “Dev zor amche vatten asa, amcher add konn asot?” (Rom. 8:31) Tor Jehova Devan Utpoti 3:15-nt aslole bhasaunnecho poilo bhag purnn kela toso, tacho urlolo bhag pasun to purnn kortoloch mhunn amkam purnn khatri asa.
16-18. Utpoti 3:15-nt sangloli bhasaunni somzon ghetlolean, Curtis, Ursula, ani Jessica-k koso faido zalo?
16 Utpoti 3:15-nt Jehovan kelʼli bhasaunni, amcher ietat tea trasancho fuddo korunk amkam modot korta. Curtis, zo Guam-ant ek mixinori mhunn seva korta, to sangta: “Mhojea jivitant ghoddlolea ghoddnneank lagon, thodde pavtti Jehovak visvaxi ravonk mhaka kotthin zalem. Punn Utpoti 3:15-nt dilʼlea bhasaunnecher niall kelolean mhojea sorginchea Bapacher visvas dovrunk mhaka modot zali.” Tor Jehova sogle tras kaddttolo tea disachi Curtis vatt polloita.
17 Bavaria-nt ravpi bhoinn Ursula sangta ki, Utpoti 3:15-nt sangloli bhasaunni somzon ghetlolean Bible khorench Devachea preronnan boroila mhunn tika khatri zali. Bible-antleo her sogleo bhasaunneo, hea bhasaunnek koxeo zuddloleo asat tem tika kollʼllem tednam ti ojap zali. Ti oxem-i mhunntta: “Munxakullak bhorvonso diunk Jehovan rokddench pavl ghetlem hem hanv xikli tednam Jehova pasot mhozo mog anik vaddlo.”
18 Toxench, Micronesia-ntlim bhoinn Jessica sangta: “Hanv poilech pavtti sot xikli tednam mhaka koxem bhoglem tem mhaka aiz pasun ugddas asa. Utpoti 3:15-nt sangloli bhasaunni purnn zata hem zannam zalolean, amkam aiz sosunk poddttat te tras ami soslole Jehovak naka aslem mhunn ugddas dovrunk mhaka modot zali. Toxench hea bhasaunnentlean, Jehovachi seva kelolean amkam atam ani fuddarak pasun boreantlem-borem jivit mellonk xokta mhunn mhoji khatri ghott zali.”
19. Utpoti 3:15-nt sanglolea bhasaunnecho urlolo bhag pasun purnn zatoloch mhunn ami kiteak visvas dovrunk zata?
19 Tor hea lekhant, ami Utpoti 3:15-nt dilʼli bhasaunni aiz koxi purnn zait asa tem polloilem. Bailechi sonsot ani sorpachi sonsot konn tem ami zannam zalim. Toxench Jezu, zo bailechea sonsticho mukhel bhag zaun asa, to melʼleantlo jivont zalo, taka Jehova Devan ek omor jivit dilem ani to aiz ek xoktivont Raza zaun asa mhunn ami xiklim. Tea bhair, bailechea sonstichea dusrea bhagak, tem mhunnttlear, Jezu sangata raj choloitoleank vinchun kaddpachem Jehovachem kam, aiz sompot ailam mhunn amkam kollon ailem. Tor Utpoti 3:15-nt sanglole bhasaunnecho poilo bhag purnn zala. Hache voilean hea bhasaunnecho urlolo bhag pasun purnn zatoloch, tem mhunnttlear, bailechi sonsot sorpachem mostok maddoitolich mhunn ami visvas dovrunk zata. Ani toxem zata tednam Devacho lok ekdom khuxal zatole. Punn tea mhunnosor, ami Jehova Devacher amcho bhavarth soddun diuncho nhoi. Karonn bailechea sonsti udexim, ‘prithumechea sorv raxttrank’ Jehova Dev zaitim besanvam ditolo mhunn ami tacher patieunk zata.—Ut. 22:18.
GIT 23 Jehovah Begins His Rule
^ Utpoti 3:15-nt sangloli bhasaunni ami somzon ghevop gorjechem. Karonn oxem kelearuch, Bible-ant kitem sanglam tem ami somzonk pavtolim. Tor hea bhasaunne vixim xiklolean Jehovacher amcho bhavarth ghott zatolo ani tannem kelʼleo her bhasaunneo to purnn kortoloch mhunn amchi khatri vaddttoli.
^ New World Translation Bible-ant, Appendix B1, “The Message of the Bible” polloiat.
^ “Utpoti 3:14, 15-nt Konnam Vixim Sanglam?” hem boks polloiat.
