1. Jehovan amkam magnnem korcho sueog dila mhunn amkam koxem disonk zai?

 SORG ani prithumechea Rochnnaran, amkam tache lagim ulounk ek vhodd sueog dila. Hea vixim chintat. Ami khoinchea-i vellar ani khoinche-i bhaxent tache lagim magnnem korunk zata. Toxench, ami khoinsorui asum, hospital-ant vo jail-int pasun, to amchem aikotolo mhunn ami khatri dovrunk zata. Khorench, hea moladik dennea pasot ami amchea mogall Bapak kitlim upkari asat nhoi!

2. Magnnem korcho sueog Raza Davidak moladik aslo mhunn tannem koxem dakhoun dilem?

² Raza Davidak magnnem korpacho sueog khub moladik aslo. Tea pasot, tannem gaionant Jehovak oxem mhunnttlem: “Dhumpa vori prarthon mhojem Tuje mukhar choddum-di.” (St. 141:1, 2) Davidachea disamnim, Jehovache bhokte pasot uzar kortale to povitr dhump iadnik khub kallji gheun toiar kortale. (Sutt. 30:34, 35) Teach bhaxen David, apunn magnneant Jehovak kitem sangtolo tea vixim bariksannen chintun vo tem toiar korun Jehovak magnnem korunk sodhtalo. Ami pasun Davida bhaxen Jehovak manvota toslem magnnem korunk sodhtat.

3. Ami Jehova lagim koxe toren magnnem korunk zai, ani kiteak?

³ Jehova lagim magnnem kortat tednam ami taka khub man diun magnnem korunk zai. Kiteak? Izaias, Ezekiel, Daniel, ani Juanvan polloilʼlea dorxonam vixim chintat. Izaiasan dorxonant, ‘Jehova eka unch xinvasonar boslolo asa’ to polloilo. (Iz. 6:1-3) Toxench Ezekielan, Jehova aplea rothacher boslolo asa ani tache bhonvtonnim ‘ddonddubala sarko loklok’ asa tem polloilem. (Ez. 1:26-28) Tea bhair, Danielan polloilʼlea dorxonant, dhovi nhesonn nheson aslolo “Bhov Vondivont Zannto” tannem polloilo. Ani tachea xinvasona thaun ujeache agtte  bhair sortale. (Dan. 7:9, 10) Ani Juanvan, Jehova eka xinvasonar bosla ani tachea xinvasona bhonvtonnim panchvea rongacho ek ddonddubal aslo tem polloilem. (Prok. 4:2-4) Him dorxonam veg-vegllim aslim tim khorim, punn tea dorxonamnim kitem tori ek-sarkem aslem. Tem mhunnttlear, tea soglea dorxonamnim, tannim Jehovak ek mhoimevont Raza koso polloilo. Tor Jehova itlo mhoimevont zaun pasun, tannem amkam aplea lagim magnnem korcho sueog dila. Hea vixim ami niall kortat tednam ami kitlea manan tache lagim magnnem korunk zai, tem ami zannam zaunk pavtat. Punn ami kitea vixim magnnem korunk zai?

4. Matev 6:9, 10-nt Jezun xikoilʼlea magnneant tannem sogleant poilim jem mhunnttlem tantuntlean ami kitem xiktat?

⁴ Matev 6:9, 10 vachat. Dongra Voilea Updesant, Jezun aplea xisank Devak manvota tea ritin tannim koxem magnnem korunk zata tem xikoilem. “Dekhun tumi oxem prarthon korchem,” hem mhunnttlea uprant, Jehovachea udʼdhexak zuddlole asat tea ekdom mhotvachea vixoi-am vixim Jezun sogleant poilim magnnem kelem. Tem mhunnttlear, Devachem nanv povitr zaunk, tachea dusmanancho nas kortolem tem tachem Raj ieunk, ani fuddarak Jehova prithumer haddttolo ani munxakullak ditolo tea borea vostum vixim tannem magnnem kelem. Tor oslea mhotvachea vixoi-am vixim ami magnnem kortat tednam, Jehovachi khuxi amkam kitli mhotvachi asa tem ami dakhoun ditat.

5. Ami amchea khatir magnnem korunk xoktat kai?

⁵ Magnneachea dusrea bhagant Jezun dakhoun dilem ki ami amchea khatir pasun magnnem korunk xoktat. Zoxem amkam dispottʼttem jevonn diunk, patkanchem bhogsonnem mellonk, tallnnentlean pois ravonk, ani Soitana koddlean vachounk, ami Jehova lagim magnnem korunk xoktat. (Mt. 6:11-13) Tor hea vixim ami magnnem kortat tednam amkam Jehovachea modotichi goroz asa ani amkam tachi maniotai zai mhunn ami dakhoun ditat.

6. Ami fokot Jezun xikoilʼlea vixoi-am vixinch magnnem korunk zai kai? Somzaiat.

⁶ Punn Jezun uzar kelʼlim tinch utram uzar korun vo teach vixoi-am vixim tachea xisamnim magnnem kelʼlem taka naka aslem. Karonn, Jezun her vellar magnnem kelem tednam, tea vellar taka koslo usko aslo tea vixoi-am vixim tannem magnnem kelem. (Mt. 26:39, 42; Juanv 17:1-26) Teach bhaxen, ami pasun amkam  aslolea uskeam vixim Jehova lagim magonk zata. Zoxem, amkam ek mhotvacho nirnnoi gheunk poddtta tednam ami Jehova lagim zannvai ani somjikai magonk zata. (St. 119:33, 34) Toxench, amkam khoinchem-i kam korunk kotthin zata zalear tem koxem korchem tea vixim ami Jehova lagim modot magonk zata. (Mho. 2:6) Tea bhair, avoi-bapaimnim aplea bhurgeam pasot, ani bhurgeamnim aplea avoi-bapai pasot magnnem korunk zata. Itlench nhoi, ami sogleamnim amchea Bible vidʼdheartheam pasot, ani amkam porgottnnent melltta tea lokam pasot magnnem korunk zai. Punn ami Jehova lagim magnneant fokot gorjecheo vostu vo modot maglearuch puro kai?

7. Ami magnneant Jehovachi vakhannʼnni kiteak korunk zai?

⁷ Ami magnnem kortat tednam Jehova Devachi vakhannʼnni korunk pasun ami ugddas dovrunk zai. Karonn to “boro ani bhogsunk sodanch toiar.” (St. 86:5, NW) Toxench, to ‘doiall ani kakuticho Dev, tacho rag rokddoch choddona, to maiemogan bhorlolo ani bhov visvaxi.’ (St. 86:15) Tor Jehova koslo Dev ani to jem kitem kitem korta tacher ami niall kortat tednam tachi vakhannʼnni korunk amkam borim karonnam astolim. Khorench, fokot Jehova Devakuch amchi vakhannʼnni favo!

8. Ami koslea vostum pasot Jehovache upkari asonk zai? (Stotr 104:12-15, 24)

⁸ Itlench nhoi, amchea magnneamnim ami Jehovachim kitlim upkari asat tem ami taka sangonk zata. Karonn Jehovan amchea pasot ojapacheo vostu rochleat. Zoxem, veg-vegllea rongachim sobit fulam, tore-torechem ruchik jevonn ani amkam khuxal korunk mogall ixttam pasun dileant. Tea bhair, ami khuxal zaunk Jehovan anikui zaiteo vostu dileat. (Stotr 104:12-15, 24 vachat.) Ani sogleam-von mhotvachem mhunnttlear, amcho bhavarth ghott korunk Jehova amkam zaitem margdorxon dita. Toxench fuddara pasot tannem amkam ek ekdom boro bhorvonso dovorla. Hea soglea karonnank lagon, ami sodanch Jehovache khub upkari asat.

9. Jehovache upkar attounk visorna zaunk ami kitem korunk zata? (1 Tesalonikekarank 5:17, 18)

⁹ Punn thodde pavtti, ami Jehovachim kitlim upkari asat tem taka sangonk ami sompeponnim visronk xoktat. Tor oxem zaina zaunk ami kitem korunk zata? Ami Jehova lagim kitem-kitem maglam tem ami boroun dovrunk zata. Uprant, Jehovan amchea magnneancho koso zobab dila  tem ami pollounk zata, ani tea pasot magnneant tache upkar attounk zata. (1 Tesalonikekarank 5:17, 18 vachat.) Hea vixim chintat. Dusrim amche upkar attoitat tednam ami kitlim khuxal zatat nhoi! Teach bhaxen, Jehovan amchea magnneancho zobab dilo mhunn ami tache upkar attoitat tednam to pasun khub khuxal zata. (Kol. 3:15) Punn ami anik eka mhotvachea karonnak lagon Jehovache upkar attounk zai. Tem khoinchem?

10. 1 Pedru 2:21-a pormonnem, Jehovan aplea Putak dhaddlo mhunn ami tache upkar kiteak attounk zai?

¹⁰ 1 Pedru 2:21 vachat. Amkam xikounk, Jehovan aplea mogall Putak dhaddlo mhunn ami tache upkar attounk zai. Karonn ami Jezu vixim xiktat tednam Jehova vixim ami zaitem xikonk pavtat. Toxench, taka manvota tea toren ami koxem jieunk zai tem pasun amkam kollon ieta. Tea bhair, ami Jezuchea bolidanacher bhavarth dovorlo zalear ami Jehova Devachim ixttam zaunk pavtat ani tache lagim xanti samballunk pavtat.—Rom. 5:1.

11. Ami Jehova lagim Jezuchea nanvan magnnem korop kiteak gorjechem?

¹¹ Toxench, Jehovan amkam aplea Puta udexim, aplea lagim magnnem korcho sueog dila mhunn ami tache upkar attoitat. Ami Jezuchea nanvan Jehova lagim magnnem kortat tednam, Jehova amkam kan dita ani amchea magnneancho zobab diunk to Jezuk uzar korta. Hea pasot, Jezun oxem mhunnttlem: “Tumi Mhojea nanvan magxat titlem-i Hanv kortolom, ani oxi Puta sovem Bapak mhoima melltoli.”—Juanv 14:13, 14.

12. Ami Jezu pasot Jehovak upkar attounk anik ek karonn khoinchem?

¹² Punn ami opurnn aslolean, amchim magnnim Jehova Deva lagim pavonk zai zalear, Jezun dilʼlem bolidan ekdom gorjechem! Karonn Jezuchea bolidana udexim, Jehova amchim patkam bhogxita. Oxem ami kiteak mhunnonk zata? Bible-ant Jezuk ‘bhov vortea Devachea xinvasonachea uzveak boson aslolo Porom Iadnik’ mhunnttla. (Heb. 8:1) Jezu Deva mukhar “amche khatir vinoti korta.” (Rom. 8:34) Ani to ‘Devak manvota toslo xaroti vo modot korpi,’ ani amcheo oskotaio somzon gheta toslo Porom Iadnik zaun asa mhunn ami Jehovache kitlim upkari! (1 Juanv 2:1; Heb. 4:15) Khorench, Jehovan amche pasot aplea Putachem moladik dennem dilam mhunn ami tache upkar attoit ravum-ia.

13. Jezu aplea xisancho khub mog kortalo mhunn tannem koxem dakhoun dilem?

¹³ Jezu aplea xisancho khub mog kortalo mhunn tannem koxem dakhoun dilem? Jezu morchea poilim tannem aplea xisam pasot khub vell porian magnnem kelem. Tannem magnneant oxem mhunnttlem: “Noxtteachea hatantle tankam rakh mhonn magtam.” (Juanv 17:15) Apnnak rokddoch khub trasancho fuddo korcho poddttolo mhunn Jezu zannam aslo. Tori astana, taka aplea poros chodd aplea xisancho usko aslo.

14. Ami amchea bhav-bhoinnancho mog kortat mhunn koxem dakhounk zata?

¹⁴ Jezu bhaxen, ami pasun dusreanchea gorzancher dhean diunk zai. Oxem korunk, ami amchea bhav-bhoinnam pasot sodanch magnnem korunk zai. Ami oxem kortat tednam Jezun eka-mekacho mog korunk dilʼli adnea ami pallttat mhunn dakhoitat. Toxench, ami amchea bhav-bhoinnancho kitlo mog kortat tem Jehovak pasun kollon ieta. (Juanv 13:34) Tea bhair, ami amchea bhav-bhoinnam pasot magnnem kortat tednam tankam modot zata. Karonn Devachea Utrant oxem mhunnttlolem asa: “Devak manovlolea monxachea khotkhotit magnneak khub boll asa.”—Jak. 5:16.

15. Amchea bhav-bhoinnank amchea magnneanchi goroz kiteak asa?

¹⁵ Amchea bhav-bhoinnank zaitea oddchonneancho fuddo korunk poddtta. Zoxem, thoddim zannam duent asat, thoddeank dhumallo  sosunk poddtta, thoddim ravtat thoim odruxttam ani zhuzam zatat ani thoddea zannank her kotthin poristhitincho fuddo korunk poddtta. Toxench, zaitim bhav-bhoinnam odruxttank sampoddloleank modot korunk khub vavr kortat. Tor hea soglea bhav-bhoinnank amchea magnneanchi goroz asa. Ami oslea bhav-bhoinnank vollkhotat zalear ami tanchem nanv gheun, tankam modot kor mhunn Jehova lagim magnnem korunk zata. Ami oxem kortat tednam ami khorench tancho khub mog kortat mhunn dakhoun ditat.

16. Sobhent fuddakar gheupi bhavam khatir ami kiteak magnnem korunk zai?

¹⁶ Sobhent fuddakar ghetat tea bhavam khatir pasun ami magnnem korunk zai. Ami amchea magnneant tancho ugddas kortat mhunn te khub upkari astat. Ani amchea magnneam udexim tankam khub modot zata. Apostl Paulu pasun, apnnak bhav-bhoinnanchea magnneanchi goroz asa mhunn zannam aslo. Tea pasot, tannem tankam oxem mhunnttlem: “Mhoje-i pasot magat: mhojem tondd ugddun favo toslea utramnim ani kalljidarponnan Xubhvortomanacho gutt hanvem porgott korcho mhonn magat.” (Ef. 6:19) Aiz pasun amchea modem fuddakar gheupi zaite bhav asat, je khub vavr kortat. Tanchea vavracher besanv ghal mhunn ami Jehova lagim magtat tednam ami tancho khub mog kortat mhunn dakhoun ditat.

17-18. Amkam dusream mukhar magnnem korchi sondhi kednam mellonk xoktat, ani tea vellar ami kitem ugddas dovrunk zai?

¹⁷ Thodde pavtti, amkam dusrea mukhar magnnem korchi sondhi mellonk puro. Udharonnak, ek bhoinn aplea Bible obheasak, dusre eke bhoinnik apoita mhunn chintat. Ani Bible obheas gheta ti bhoinn, aplea sangata ailolea bhoinnik magnnem korunk sangta. Punn ti bhoinn ghoddie Bible vidʼdheartheak title bore toren vollkhona dekhun, apunn xevottachem magnnem kortoli mhunn ti sangonk puro. Oxem kelolean, vidʼdheartheachea gorzam pormonnem magnnem korunk tika modot zata.

¹⁸ Vo eka bhavak, porgottnni mittingek vo sobheche mittingek magnnem korchi sondhi melltta mhunn chintat. Tor magnnem korchea poilim, tea bhavan, te mittingecho udʼdhex kitem vo ti mitting kitea pasot dovorlea tem ugddas dovrop gorjechem. Tannem magnnem korchi sondhi, sobhek solʼlo diunk vo sobhek  kollounneo sangonk uzar korchi nhoi. Toxench, bhavamnim ugddas dovrunk zai ki choddxea mittingenk git ani magnnem fokot panch minttanchem asta. Tor magnnem korta tednam, ani khas korun mittingeche survatek magnnem korta tednam, tannem ‘utrancho boddbodd korcho nhoi vo zaitim utram uzar korchim nhoi.’—Mt. 6:7.

19. Jehovachea disa pasot toiar ravonk amkam koxi modot zatoli?

¹⁹ Jehovacho neai korpacho dis lagim pavta toso, ami magnneak amchea jivitant sogleam-von chodd mhotvacho zago diunk zai. Hea vixim, Jezun pasun oxem mhunnttlem: “Ieuncheo asat tea ghoddnniam modlean surokxitponnim fuddem vochunk . . . tumkam ghottai mellche khatir, sogllea vellar magnnem korun zagrut ravat.” (Lukas 21:36) Khorench, magnnem korit ravlear amcho bhavarth ghott zaunk pavtolo ani ami Jehovachea disa pasot toiar astolim.

20. Amchim magnnim pormollit dhumpa sarkim kednam zaunk pavtolim?

²⁰ Tor hea lekhant ami kitem xiklim? Magnnem korchea sueogacho ami khub valor korunk zai. Magnnem kortana, Jehovachea udʼdhexak zuddlole asat tea mhotvachea vixoi-am vixim ami poilim magonk zai. Jezu pasot ani tachea Rajea pasot ami Devache upkar attounk zai. Toxench, ami amchea bhav-bhoinnam pasot magnnem korunk zai. Tea bhair, ami amchea sodanchea gorzam pasot ani amcho bhavarth ghott korunk modot kor mhunn Jehovachi modot magonk zata. Tor ami kitea vixim magnnem kortolim tem ami adim fuddench chintʼtat tednam ami magnnem korchea sueogacho kitlo valor kortat tem dakhoun ditat. Ani oxem kelear, amchim magnnim pormollit dhumpa sarkim, Jehovak ‘mogachim’ zatolim.—Mho. 15:8.