1. Amkam kosli khatri asa, ani kiteak?

 AIZ sonvsarant poristhiti khub bigoddlea. Familim modem mog unno zala. Lok chodd ani chodd ragixtt ani apsvarthi zait asa. Odhikareancher visvas dovrunk zaiteank kotthin zata. Tor hem soglem polloun, fuddarak borem zatolem mhunn manunk tumkam ghoddie kotthin zaunk puro. Punn khorem mhunnttlear, hi poristhiti polloitana fuddarak borem zatolench mhunn amchi khatri ghott zata. Karonn aiz lok, Bible-ant ‘nimannea disam’ vixim sanglolem toxech vagtat. (2 Tim. 3:1-5) Hi bhasaunni purnn zata ti ami pollounk xoktat, ani amkam puravo melltta ki Devachea Rajeacho Raza, Jezu Kristan, apli razvottki suru kelea. Punn, hi tor fokot ekuch bhasaunni. Tor hea lekhant, halinch ghoddon ailʼleo osleo anikui bhasaunneo ami polloitolim. Ani oxem kelolean amcho bhavarth ghott zaunk pavtolo.

2. Hea lekhant ami kitem polloitolim, ani kiteak? (Masikachea fuddlea panar aslolem chitr polloun zobab diat.)

² Hea lekhant, ami thoddea bhasaunneancher dhean ditolim. (1) Devachem Raj kednam suru zalem tem zannam zaunk modot korta ti bhasaunni, (2) Jezu Devachea Rajeacho Raza zalo, hem somzonk modot kortat teo bhasaunneo, ani (3) Devachea dusmanancho koso nas zatolo, tem dakhoun ditat teo bhasaunneo. Heo sogleo bhasaunneo, eka vhoddlea chitrache veg-veglle bhag koxe zaun asat. Tem akʼkhem chitr polloilearuch, tem koslem chitr tem amkam somzota. Teach bhaxen, heo sogleo  bhasaunneo sangata mellon obheas kelearuch, khoincheo bhasaunneo poilim ghoddleo, aiz ghoddttat ani fuddarak ghoddttoleo tem amkam spoxtt kollon ieta.

3. Daniel 7:13, 14-nt sangloli bhasaunni Devachea Rajeachea Raza vixim amkam kitem khatri dita?

³ Jezu Devachea Rajeacho ek ekdom boro Raza zatolo mhunn Daniel 7:13, 14-nt sanglolea bhasaunnentlean amkam khatri melltta. Toxench, soglim raxttram khuxalkaien ‘tache sevek lagtolim’ ani to sodakal raj choloitolo mhunn thoim sanglam. Tor Jezun raj korunk kednam suru kelem tem ami zannam zaunk xoktat kai? Daniel pustokant sanglolea anikui eke bhasaunnent, Jezu sat kallanchea xevottak raj korunk suru kortolo mhunn sanglam. Tor he sat kall mhunnttlear kitem?

4. Daniel 4:7-14-ntlean, Jezu kednam raza zalo tem amkam koxem kollon ieta tem somzaiat. (Futtnott pasun polloiat.)

⁴ Daniel 4:7-14 vachat. ‘Sat vorsam vo kall’ mhunnttlear 2,520 vorsam. Ho kall 607 K.X.A.-ant, Babilonkaramnim Jerusalem-achem nisonntton kelem, ani Davidachea sonstintlea nimannea Razak kaddun uddoilo tednam suru zalem. Ani 1914 K.X.-ant, “raza zaunk hokʼk aslolo” Jezuk, Jehovan aplea Rajeacho Raza kelo tednam to kall somplo. *—Ez. 21:25-27, NW.

5. ‘Sat kallanchi’ bhasaunni zannam zalolean amkam koso faido zata?

⁵ Hea bhasaunne vixim zannam zalolean amkam koso faido zata? ‘Sat kallam’ vixim aslolea bhasaunnentlean amkam khatri melltta ki Jehova apleo bhasaunneo sarkea vellar purnn kortoloch. Zoxem, apunn eka umkeach vellar Jezuk aplea Rajeacho Raza kortolo mhunn Jehovan tharailʼlem. Ani to vell ailo tednam tannem toxench kelem. Teach bhaxen, aplea tharailʼlea vellar Jehova apleo herui bhasaunneo purnn kortolo mhunn amkam khatri melltta. Tor Jehovacho dis “chodd lambai korinastana” ietoloch.—Hab. 2:3.

6. (a) Jezu Krist sorgar raj choloita mhunn amkam koxem kollon ieta? (b) Prokasovnni 6:2-8-ant aslolea bhasaunnentlean amkam hachi khatri koxi melltta?

⁶ Jezu morchea thoddeach disam poilim, tannem aplea xisank apunn sorgar raj cholounk laglo mhunn tankam koxem kollttolem, tea vixim sangtana thoddea ghoddnneam vixim sanglem. Zoxem, zhuzam zatolim, bhuk poddttoli ani bhuimkamp zatole mhunn tannem tankam sanglem. Toxench, ‘hanga-thoim’ duensam vo pidda posortoli oxem-i tannem sanglem. Ani halinch ghoddloli COVID-19 pidda, hachem ek udharonn zaun asa. Bible-ant hea soglea ghoddnneank nimannea disancheo “khunna” mhunnttleat. (Mt. 24:3, 7; Lukas 21:7, 10, 11) Ani Jezu moron sorgar vochon 60 vorsam uprant, tannem apostl Juanvak oxeoch ghoddnneo ghoddttoleo mhunn khatri dili. (Prokasovnni 6:2-8 vachat.) Ani 1914 thaun aiz meren teoch ghoddnneo ghoddttat tem amkam dison ieta.

7. Jezu sorgar Raza zalo tednam prithumecher poristhiti anik kiteak bigoddli?

⁷ Punn Jezu sorgar Raza zalo tednam, prithumecher poristhiti anik kiteak bigoddli? Hea vixim amkam Prokasovnni 6:2-ant kitem tori mhotvachem kollon ieta. Jezu sorgar Raza zalo tednam, sogleant poilim tannem Soitan ani tachea noxttea dutam sangata zhuz kelem. Ani tea zhuzant Soitan ani tache noxtte dut harle, ani tankam hea prithumecher xevttile mhunn Prokasovnni odheai 12-nt sanglolem  asa. Hea pasot, Soitan ragan bhoron prithumecher jietolea munxancher akromonn korta. Ani dekhunuch Bible-ant, ‘prithumechem kotta!’ oxem mhunnttlam.—Prok. 12:7-12.

8. Bible-antleo bhasaunneo purnn zatat teo ami polloitat tednam amkam koxi modot zata?

⁸ Hea bhasaunneam vixim zannam zalolean amkam koso faido zata? Ami poilim polloilʼlem toxem, aiz sonvsarachi poristhiti ani lokancho sobhav pasun khub bodolʼla. Lok disan-dis anikui svarthi zata ani ekdom krur toren vagta. Tor hem soglem polloun bejar zaunche bodlek, Bible-antleo bhasaunneo purnn zatat mhunn ami ugddas dovortat. Ani hache vorim Devachem Raj suru zalem, tem mhunnttlear, Jezu Krist sorgar Raj choloita mhunn amkam khatri melltta. (St. 37:1) Ani Armageddon lagim pavta toxem, poristhiti anikui vaitt zatoli. (Marku 13:8; 2 Tim. 3:13) Punn amchea disamnim itle dukh-tras kiteak asat tem amchea mogall sorginchea Bapan amkam adim fuddench kolloilam mhunn ami tache kitlim upkari!

9. Daniel 2:28, 31-35-ant asloli bhasaunni, sonvsarache nimanne vorixtt razvottke vixim kitem sangta, ani ti kednam raj cholounk lagli?

⁹ Daniel 2:28, 31-35 vachat. Aiz hi bhasaunni purnn zata ti ami polloitat. Jezu raza zalea uprant, “nimannea disamnim” kitem ghoddttolem tem amkam Nebukadnezzarachea sopnantlean kollon ieta. Nebukadnezzaran sopnant polloilʼlea murtiche ‘orde lokhonddache ani orde matieche paim’ sonvsarantlea nimannea vorixtt razvottkek suchit kortat. Hi razvottki Jezuchea dusmanam modli ek zaun asa, ji Poilea Vixv Zhuza vellar suru zali, jednam Britain ani United States him raxttram, Anglo-America mhunn sangata mellon kam korunk laglim. Punn Nebukadnezzaran  polloilʼlea murtintlean amkam hea nimannea razvottke vixim don vostu kollon ietat jeo adim raj choloilʼlea razvottkem poros veglleo asat.

10. (a) Danielache bhasaunne pormonnem, aiz Anglo-America-che razvottke vixim amkam kitem dison ieta? (b) Ami kitea vixim chotrai dovrunk zai? (“ Matie Vixim Chotrai Dovrat!” hem boks polloiat.)

¹⁰ Poilem mhunnttlear, adim raj choloilʼleo razvottkeo fokot ekuch dhatucheo asleo, zoxem bhangar vo rupem. Punn Anglo-America, hi sonvsarachi vorixtt razvottki ekuch dhatuchi na. Ti ordi lokhonddachi ani ordi matiechi asa. Hi mati lokank suchit korta. (Dan. 2:43) Ani aiz ami pollounk xoktat toxem, lok aplo odhikar melloun gheunk sorkarachea add voitat, ektthaim ieun morcha kaddttat, kamdar veg-veglle songotton ghoddoun haddttat ani aplo hokʼk melloun gheunk sorkara add zhuztat. Toxench sorkar vinchun kaddunk lokancho khub probhav asta. Hea karonnank lagon, sonvsarachea hea vorixtt razvottkechea odhikareank apleak zai tem korunk kotthin zata.

11. Aiz Anglo-America-chi Sonvsarachi Vorixtt Razvottki raj korta tem polloun, ami nimannea disamnim jietat mhunn amcho bhavarth kiteak ghott zata?

¹¹ Dusrem mhunnttlear, amkam Bible-antlean kollon ieta ki Anglo-America, hi sonvsarachi nimanni vorixtt razvottki zaun asa. Karonn ti murtechea paim-ak suchit korta. Ani hea razvottke uprant khoinchoch munxacho sorkar raj cholouncho na. Karonn beginuch Armageddonachea vellar, Devachem Raj, Anglo-America-cho ani her munxanchea sorkarancho nas kortolem. *—Prok. 16:13, 14, 16; 19:19, 20.

12. Danielan vhoddle murti vixim kelʼlea bhasaunnentlean amkam koso faido zata?

¹² Hea bhasaunne vixim zannam zalolean amkam koso faido zata? Danielachea bhasaunnentlean ami nimannea disamnim jietat mhunn amkam khatrecho puravo melltta. Karonn 2,500 poros chodd vorsam poilim, Danielache bhasaunnent sanglolem ki Babilona uprant sonvsaracheo char vorixtt razvottkeo Devachea lokancher raj choloitoleo, ani Anglo-America tantuntli nimanni vorixtt razvottki zaun astoli. Tor Devachem Raj beginuch munxanchea soglea sorkarancho nas kortolem ani hea akʼkhea prithumecher raj choloitolem mhunn amkam kollon ieta. Hem zannam zalolean amkam khorench bhuzvonn ani bhorvonso melltta nhoi!—Dan. 2:44.

13. Prokasovnni 17:9-12-nt sanglolo “atthvo patxai” ani “dha patxai” konnank suchit kortat, ani hi bhasaunni koxi ghoddon aili?

¹³ Prokasovnni 17:9-12 vachat. Poilea Vixv Zhuza vellar, zaitem nisonntton zalem. Ani hea pasot, uprant kitem tori ghoddlem, jea vorvim nimannea disam vixim Bible-antli anik ek bhasaunni ghoddon aili. Sonvsarache fuddari akʼkhe prithumecher xanti haddunk sodhtale. Tea pasot Janer 1920-ant, tannim League of Nations, hem songotton ghoddoun haddlem. Punn uprant, Otumbr 1945-ant hea songottnne bodlek, sonvsarachea fuddareamnim, United Nations, hem songotton ghoddoun haddlem. Ani hea songottnnek, Bible-ant “atthvo patxai” mhunnttla. Punn hem songotton sonvsarachi vorixtt razvottki nhoi. Karonn taka apli podvi, taka tenko ditolea sorkaram thaun melltta. Ani tea sorkarank, Bible-ant “dha patxai” mhunnttleat.

14-15. (a) Prokasovnni 17:3-5-antlean ‘Vorixtt Babilona’ vixim amkam kitem kollon ieta? (b) Khottea dhormank tenko diupi lok unno zait asa mhunn amkam koxem dison ieta?

¹⁴ Prokasovnni 17:3-5 vachat. Apostl Juanvan eka dorxonant eke xindoll bailek polloili. Ani hea bailechea koplar ‘Podvedar Babilonia vo Vorixtt Babilon’ hem nanv  boroilʼlem aslem. Vorixtt Babilon, sonvsarantlea soglea khottea dhormank suchit korta. Apostl Juanvan polloilʼlea hea dorxonantlean amkam kitem kollon ieta? Zaitea tempa thaun sonvsarantle sogle khotte dhorm sonvsarachea sorkaram sangata mellon kam kortat ani tankam tenko ditat. Punn beginuch, Jehova sonvsarantlea sorkaranchea ‘monant aplo hetu vo udʼdhex ghaltolo.’ Tednam kitem zatolem? He “dha patxai,” tem mhunnttlear sonvsarache sorkar, soglea khottea dhormancher akromonn korun tancho nas korun uddoitole.—Prok.17:1, 2, 16, 17.

¹⁵ Tor khottea dhormancho beginuch nas zauncho asa mhunn ami kiteak mhunnonk zata? Hem zannam zaunk ami ugddas korunk zata ki adlea kallar Babilon xara bhair Eufrates Nodi vhanvtali. Ani hea nodik lagon tea xarachi rakhonn zatali. Teach bhaxen, aiz Vorixtt Babilonak tenko diupi hozaramnim lokank, Prokasovnni pustokant “udkam” oxem mhunnttlolem asa. (Prok. 17:15) Punn uprant hem udok ‘suktolem’ oxem thoim sanglam. Hacho orth, zaito lok khottea dhormank tenko divop soddun ditole. (Prok. 16:12) Hi bhasaunni aiz purnn zata tem ami polloitat. Karonn,  aiz zaitea lokamnim aplo dhorm soddun dila ani tancheo oddchonneo suttaveo korunk tim her kodden modot sodhtat.

16. United Nations kednam suru zalem ani Vorixtt Babilonacho kednam nas zatolo, tea vixim asloleo Bible-antleo bhasaunneo zannam zalolean amkam koso faido zata?

¹⁶ Hea bhasaunneam vixim zannam zalolean amkam koso faido zata? Ami nimannea disamnim ravtat mhunn amkam don ghoddnnentlean kollon ieta. Ek mhunnttlear, United Nations hem songotton ghoddoun haddlam. Ani dusrem mhunnttlear, khottea dhormank tenko diupi lok unno zait asa. Punn khottea dhormank tenko diupi lok unno zait voitolo ani heach toren tacho nas zatolo oxem nhoi. Karonn ami poilim polloilʼlem toxem, Jehova “dha patxai,” tem mhunnttlear, United Nations-ak tenko diupi sorkaranchea ‘monant aplo hetu vo udʼdhex ghaltolo.’ Te sorkar okosmat khottea dhormancho nas kortole. Ani tea vellar sogle lok ojap zatole. * (Prok. 18:8-10) Tednam lokank khub tras zaunk puro. Punn Devacho lok don karonnank lagon khuxal zatolo. Poilem mhunnttlear, khotto dhorm, zo zaitea tempa thaun Jehovacho dusman zaun asa tacho nas zatolo. Ani dusrem mhunnttlear, Devacho lok rokddoch hea vaitt sonvsara thaun salvar zatolo.—Lukas 21:28.

17-18. (a) Ami amcho bhavarth koso ghott korit ravonk zai? (b) Fuddlea lekhant ami kitem zannam zatolim?

¹⁷ “Xevottachea kallar khorem ginean vaddttolem” mhunn Danielan sanglolem. (Dan. 12:4, NW) Ani hem kitlem khorem zaun asa! Karonn amchea disam vixim asloleo bhasaunneo ami somzonk pavleant. (Dan. 12:9, 10) Ani heo bhasaunneo Jehovan sangloleo toxeoch ghoddon ietat tem polloun, Jehova pasot ani tachea Utra pasot amcho resped vaddtta. (Iz. 46:10; 55:11) Tor Devachea Utracho bariksannen obheas korun ani dusreank Jehova sangata ixttagot zoddunk modot korun, ami amcho bhavarth ghott korit ravum-ia. Karonn apnnacher purnn toren patietat tanchi Jehova rakhonn kortolo ani tankam ‘purnn xanti’ ditolo.—Iz. 26:3.

¹⁸ Fuddlea lekhant, ami Kristi sobhe vixim asloleo bhasaunneo polloitolim, ani heo bhasaunneo ami nimannea disamnim jietat mhunn amkam koxi khatri ditat tem ami zannam zatolim. Toxench, amcho Raza Jezu Krist Devachea lokank koso margdorxon dita tem-ui ami zannam zatolim.