Tumi Zannam Aslim?
Adlea kallachea Babilonant je vitte mellʼllole ani jea ritin te toiar kelʼle, tantuntlean Bible-ant jem boroilam tem khorem asa mhunn koxem kollon ieta?
SODH korpeank osle lakʼkhamnim vitte mellʼlleat, je Babilon xar bandunk uzar kelole. Sodh korpi Robert Koldewey sangta, ki osle toreche vitte ujeachea bhottʼttent ghalun toiar kortale. Heo bhottʼtteo, “xarachea bhair astaleo, zoim mati bori asli ani zollounk . . . zaitim lakddam pasun mellttalim.”
Adlea kalla voilea Babilonantle odhikari, anikui eka krur kama pasot heo bhottʼtteo uzar kortale mhunn sodh korpeank puravo mellʼlla. Professor Paul-Alain Beaulieu, zo University of Toronto hantunt, adlea tempachea Assiriechea itihasacho ani bhaxecho zannar zaun asa, to oxem sangta: “Babilonant mellʼllolim zaitim boroupam dakhoun ditat ki jim munxam razachea add voitalim vo povitr vostunk resped dinaslim tankam bhottʼttent zollounk raza hukum ditalo.” Udharonnak, sodh korpeank Raza Nebukadnezzarachea tempa voilem ek formonn mellʼllem, zantunt oxem boroilʼlem: “Tancho nas kor, tankam bhottʼttent ghal, tankam zolloun uddoi, . . . bhazun uddoi . . . tancho dhunvor bhair sorom-di. Boreach pettlolea ujeant tancho gobor korun uddoi.”
Hea utrantlean, thoddea lokank ghoddie Bible-ant, Daniel odheai 3-ant boroilʼle ghoddnne vixim ugddas ieunk xokta. Thoim sanglolem ki Raza Nebukadnezzaran Babilon xarachea bhair, Dura nanvachea eka moidanar ek vhoddli bhangarachi murti dovorloli. Ani tannem lokank tika nomoskar korunk hukum dilʼlo. Punn Shadrak, Meshak ani Abednego hea tin Hebrev tornnatteamnim, tea murtek nomoskar korunk nakarlem tednam, Raza Nebukadnezzar ragan tambddo zalo. To itlo gorom zalʼlo ki tannem ti bhottʼtti, “sat pavtti odik” tapounk laili ani tankam “zolltea ujeachea khornant uddounk formailem.” Punn Jehovachea eka bollixtt dutan tankam mornantle salvar kele.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Ek bhazlolo vitto zacher Nebukadnezzarachem nanv boroilʼlem asa
Babilonant je vitte mellʼlle, tantuntlean pasun, Bible-ant sanglam tem khorem mhunn amkam puravo melltta. Thoim mellʼllolea zaitea vitteancher, razachi vakhannʼnni kortat tosleo volleo boroilʼleo asat. Ek voll oxi asa: “Hanv Babilonacho Raza Nebukadnezzar . . . Hem rajmahal hanvem, Vortea Razan bandun kaddlam . . . Mhoji sonsot sodankal thoim raz choloum.” Him utram, Bible-ant Daniel 4:27-ant jem boroilam, toslinch asat. Thoim Raza Nebukadnezzaran oxi boddai kelʼli: “Vorixtt Babilonia! Raiall nivas zaunk, mhoje vhoddle xoktin ani mhoje mhoimecho dobazo vaddounk hanvem ti bandun haddlea!”
