Mhozo daddy, United Church of Canada-nt padri aslo. Tor to mhaka ani mhoje bhoinnik, dor sumana Aitara disa dotonik dhaddttalo. Ani tea uprant sokallim 11-nk, ami daddy borabor igorjent voitalim. Magir donparam, hanv ani mhoji bhoinn mummy borabor Raj-ghorant voitalim. Tor amkam donui dhormam modem koslo ontor asa, tem spoxtt dison ietalem.

Bob ani Marion Hutcheson nanvachim mummy-chim don ghott ixttam aslim. Tor mummy-n, ti Bible-antlean kitem xiktali tem tankam-i sanglem, ani tim-ui Jehovachim Sakxi zalim. 1958-ant, New York-ant, atth disam pasot, Divine Will Ontoraxttria Zomat asli. Te zomatik Bob ani Marion, aplea tin putam borabor mhaka-i gheun gelim. Tea vella vixim chintʼtana, tanchea tin putam borabor mhaka-i tanchea sangata vhorop tankam sompem naslem mhunn mhaka somzolem. Punn tea zomaticheo boreo iadi hanv kednanch visorchona.

Hanv tornnatto aslom tednam, ami eka farm-ant ravtalim ani thoim hanv veg-vegllea zonvaranchi kallji ghetalom. Oxem korunk mhaka khub borem distalem dekhun, fuddarak hanv zonvarancho dotor zatolom, ani tea pasot hanv anikui xikop kortolom mhunn hanv­em chintlem. Hi khobor mhojea mummy-n sobhentlea eka vhoddilak sangli. Tednam tea vhoddilan mhaka mogan somzailem ki ami “nimannea disamnim” jietat, ani university-nt xikonk gelear Jehova sangata mhoji ixttagot koxi astoli tea vixim mhaka chintunk sanglem. (2 Tim. 3:1) Hea vixim chintlolean hanv university-nt xikop korcho na mhunn hanvem nirnnoi ghetlo.

Tori punn, iskolachem xikop zalea uprant hanv kitem kortolom mhunn hanv chintʼtalom. Hanv dor sumanak porgottnnek voitalom tem khorem. Punn mhaka tem titlem avoddnaslem. Ani hanv pioneer seva korunk xoktam oxem-i mhaka disonaslem. Teach vellar, sotant naslolo mhozo daddy ani tacho bhav, mhaka Toronto-nt aslolea eka insurance company-nt kam korunk urba ditale. Daddy-cho bhav tea company-nt eka vhoddlea post-ar aslo dekhun, hanvui thoinch kam korunk toiar zalom.

Toronto-nt astana hanv sodanch overtime kortalom, ani mhozo choddso vell Sakxi naslolea lokam sangata sartalom. Dekhun hanv mittingek ani porgottnnent vochonk chukoitalom. Tea vellar, Sakxi naslolea mhojea ajea sangata hanv ravtalom. Punn to bhair poddlea uprant, mhaka ravonk dusro ek zago sodhunk poddlo.

Bob ani Marion, jim 1958-ant mhaka odhivexonak gheun gelʼlim, tim eka orthan mhojim avoi-bapui koxim aslim. Tannim mhaka tanchea ghorant ravonk dilem, ani Jehova sangata mhoji ixttagot ghott korunk modot keli. Uprant 1960-ant, tancho put John-a sangata hanv­em bautizm ghetlo. Magir John pioneer seva korunk laglo. Hem polloun mhoji porgottnni anikui vaddounk mhaka urba mellʼlli. Hanv Jehovachea sevent vaddavoll korta tem sobhentlea bhavamnim polloilem, ani thoddea vella uprant mhaka Theocratic Ministry School sevok mhunn nemlo. a

1966-ant, hanv Palmer Berge nanvachea ek urbevont pioneer-a lagim kazar zalom. Tem porgottnnaranchi chodd goroz asa thoim vochon seva korunk sodhtalem. Amchea sorkittachea dekhrekh korpean amcher dhean dilem ani Ontario-nt, Orillia xarachea sobhent seva korunk urba dili. Tor ami amchem saman pack korun bhair sorlim.

Orillia-nt pavlea uprant, Palmer-a borabor hanvem pasun niemit pioneer seva suru keli. Tachi urba polloun mhoji-i umed vaddli. Bore toren pioneer seva korunk hanvem vavr kelo tednam mhaka khub khuxalkai mellʼlli. Hanv lokank Bible uzar korun xikoitalo ani tankam tem somzotalem tednam, mhaka kitlo sontos bhogtalo tem hanv sangonk xokona. Thoim amkam ek zoddpem mellʼll­em, zankam ami Bible xikounk laglim. Tannim aplea jivitant bodlav kele ani tim Sakxi zalim. Hem amkam ek vhodd besanv aslem!

Ek pavtt ami Toronto-nt gelʼlim tednam, ami bhav Arnold MacNamara-k mellʼllim, zo Bethel-ant seva kortalo. Tannem amkam, ami khas pioneer mhunn seva kortolim kai mhunn vicharlem. Hanvem taka rokddoch oso zobab dilo: “Hoi! Amkam khoinsorui dhadd, punn Quebec-ant nhoi!” Tea vellar, Quebec-ant French bhas uloupi lok sorkara add voitale, ani Quebec Canada thaun vegllem zalʼlem tankam zai aslem. Heach pasot, Canada-ntlea Inglez bhas uloupi lokank, Quebec-antle French bhas uloupi lok avoddnasle. Tor hanv-ui Inglez bhas uloupi lokam bhaxen chintʼtalom dekhun, hanv Quebec-ant vochonk sodhinaslom.

Arnold-an sanglem: “Sodʼdheak xakha ofis, khas pioneer-ank fokot Quebec-antuch dhaddtta.” Tor hanv thoim vochonk rokddoch toiar zalom. Palmer pasun thoim seva korunk sodhtalem mhunn mhaka khobor asli. Ani uprant, amcho ho nirnnoi ekdom sarko aslo mhunn mhaka kollon ailem!

Ami panch sumanam poriant French bhas xiklim. Ani uprant amkam anik ek zoddpea borabor Rimouski xarant dhaddlim, jem Montreal-a thaun 540 kilometr pois aslem. Ek pavtti sobhent hanv thoddeo kollounneo vachtalom. Ieunchea odhivexonant “Austria” thaun zaitim bhav-bhoinnam ietolim, oxem hanvem sangonk zai aslem. Punn toxem sangchea bodlek, hanvem zaite “ostrich” ietole mhunnttlem. Tednam amkam kollon ailem ki ami French bhas xikonk azunui zaito vavr korunk zai.

Rimouski-nt ami char zannam, ani anik char ankvar bhoinno sangata aslim. Heo bhoinno urben Jehovachi seva kortaleo. Hache bhair, bhav ani bhoinn Huberdeaus ani tancheo don dhuvo pasun amchea sangata seva kortalim. Bhav ani bhoinn Huberdeaus, ek vhoddlea bhaddeachea ghorant ravtalim, zantunt sat bedroom asle. Ani tannim thoim pioneer-ank pasun ravonk dilʼlem. Tor ami soglim thoim ravtalim ani tea ghorachem bhaddem farik kortalim. Tem ghor fuddlean akʼkhem dhovem aslem ani tache khambe pasun dhove asle dekhun, ami taka White House mhunn nanv dilem. Ami choddxim soglim mellon, 12 tem 14 zannam ravtalim. Hanv ani Palmer khas pioneer aslim dekhun ami sokallim, donparam ani sanjer porgottnnent voitalim. Thoim ekdom chodd thonddai astali. Punn amchea borabor porgottnnent vochonk sodanch konn-na-konn toiar astalo. Ani hea pasot ami tanche khub upkari aslim.

Tea pioneer bhav-bhoinnam sangata amchi ixttagot itli ghott zali ki tim amchi ek famil koxi zalim. Thodde pavtti ami thonddaiek lagon, ujea lagim boson xektalim. Vo soglim sangata mellon randtalim. Amchea modem, borem songit vazoupi ek bhav aslo. Tor ami choddxe pavtti Sonvara rati gitam gaitalim ani nachtalim.

Rimouski xarant zaitea zannamnim Bible xikonk umed dakhoili. Panch vorsam bhitor, amchea zaitea Bible vidʼdheartheamnim vaddavoll korun bautizm ghetlo tem polloun, ami khub khuxal zalim. Ani thoinchea sobhent sumar 35 porgottnnaram zalim.

Raj porgottnnaram aslolean, Quebec-ant amkam borem proxikxonn mellʼllem. Jehovan amkam porgottnnechea kamant koxi modot keli ani amcheo gorzo koxeo purnn keleo tem ami pollounk xoklim. Titlench nhoi, atam amkam French bhas uloupi lok, tanchi bhas, ani tanchi sonskruti avoddonk lagli. Hea karonnak lagon, fuddem ami dusrea sonskrutichea ani bhaxechea lokancho pasun mog korunk pavlim.—2 Kor. 6:13.

Punn okosmat xakha ofisan, amkam New Brunswick-achea udenti deger aslolea Tracadie xarant vochonk sanglem. Oxem korop amkam kotthin aslem. Karonn tea vellar, hanvem ek flat bhaddeak gheunk paper sign kelʼle. Toxench sumanantlea thoddea voram pasot, eka iskolant tticher mhunn kam korunk hanvem contract sign kelʼlo. Tea bhair, amchim thoddim Bible vidʼdhearthi novinch porgottnnaram zalʼlim. Toxench, amchem Raj-ghor bandpachem kam chalu aslem.

Fuddle don dis poriant, ami Tracadie xarant voichea vixim Jehova lagim magnnem korit aslim. Uprant ami tem xar pollounk gelim ani tem Rimouski thaun kitlem  vegllem asa tem polloilem. Punn ami thoim gelʼlim Jehovak zai zalear, ami thoim voitolim mhunn ami ghott nichov kelo. Ami soglem Jehovachea hatant soddun dilem ani Jehovan ek-ek korun amcheo sogleo oddchonneo koxeo suttaveo keleo tem polloilem. (Mal. 3:10) Jehova sangata Palmer-achi ixttagot ghott asli. Toxench, tem teag korunk toiar aslem ani sodanch dusreank hansoitalem dekhun amkam Tracadie-nt vochonk sompem zalem.

Amchea nove sobhent Robert Ross nanvacho fokot ekuch vhoddil aslo. To tachi bail Linda sangata pioneer seva kortalo. Punn uprant tankam ek put zolmolo dekhun tannim thoinch ravonk nirnnoi kelo. Tim aplea lhan bhurgeachi kallji ghetalim. Tori astana, tim amcho poramos kortalim ani sevent urben bhag ghetalim tem polloun amkam khub urba mellʼlli.

Tracadie-nt don vorsam poriant pioneer seva kelea uprant, amkam porot chintunk naslolo sueog mellʼllo. To mhunnttlear, amkam sorkittachem kam korunk apounnem mellʼllem. Ami sat vorsam poriant Inglez bhas uloupi sorkittant seva keli. Ani magir amkam porot, Quebec-ant French bhas uloupi sorkittant dhaddlim. Amcho district-acho dekhrekh korpi bhav, Leonce Crepeault mhojea bhaxonnam pasot sodanch mhaka xabaski ditalo. Punn uprant to mhaka oxem vichartalo: “Tujim bhaxonnam dusreank anik bore toren somzonk tunvem anik kitem korunk zata?” b Hea toren tannem mhojer dhean dilʼlean hanv mhoji xikoupachi kola vaddounk pavlom, ani dusreank anik bore toren somzotat ani faideak poddttat toslim bhaxonnam diunk pavlom.

1978-ant, mhaka ek osli zobabdari mellʼlli, ji hanv kednach visorchona. Tea vorsa, Montreal-ant “Victorious Faith” Ontoraxttria Odhivexon aslem. Ani mhaka her bhav-bhoinnam borabor jevnnachi manddavoll korchem kam dilʼlem. Thoim sumar 80,000 zannam astolim mhunn amkam sanglolem. Ani poilim poros tea vorsa, jevnnachi manddavoll veglli asli. Soglem novem aslem, zoxem novim aidonam, novo menu, ani jevonn koxem randchem tem pasun ami tharaunk zai aslem. Amche lagim sumar 20 vhoddleo fridge asleo. Punn thodde pavtti teo bond poddttaleo. Odhivexonachea adlea disa tea stadium-ant game asli dekhun, modian rat zaum porian amkam thoim bhitor vochonk mellonk na. Nasto toiar korunk amkam fatoder utthon oven-am chalu korunk poddlim. Ami ekdom thoklolim, punn bhav-bhoinnam koxtti vavr kortalim, tankam bore gunn asle, ani tankam fokannam korcho sobhav aslo. Tor tanchea koddlean hanv zaitem xiklom, ani ami aiz poriant ghott ixttam asat. Quebec-ant 1940 tem 1960 poriant, bhav-bhoinnank khub dhumallo sosunk poddlolo. Tor thoim aslolea hea mhotvachea odhivexonak hajir zaun,  hanv kitlo khuxal zalom tem mhojean utramnim sangonk zaina.

Montreal-ant zatolea vhoddlea odhivexonamnim, dusrea dekhrekh korpeam thaun mhaka zaitem xikonk mellʼllem. Eka vorsa, bhav David Splane zo atam Sonchalon Monddollacho vangddi zaun asa, to odhivexonachi dekhrekh korpi aslo. Thoddea tempa uprant eka odhivexonant mhaka ti zobabdari mellʼlli tednam, bhav David-an mhaka purnn toren tenko dilo.

2011-ant amkam sorkittachi seva korun 36 vorsam zalʼlim. Uprant mhaka Sobhechea Vhoddilank Kors han­tunt bhavank proxikxonn diunk apoilo. Fuddlim don vorsam poriant, mhaka ani Palmer-ak, 75 veg-vegllea bed-ancher nhidonk poddlem. Oxem korunk amkam thodde tras zale tem khorem, punn bhavank tea korsantlean zo faido zalo tachea mukhar amche he tras kainch nhoi asle. Dor sumanachea xevottak, vhoddil khub upkari astale. Karonn Sonchalon Monddollantle bhav tanchi Jehova lagim ixttagot ghott korunk modot kortale ani tanchi kallji ghetale.

Uprant, mhaka Raj Porgottnnarank Kors hantunt vidʼdh­eartheank proxikxonn diunchi sondhi mellʼlli. Hanv polloitalom ki choddxe pavtti vidʼdhearthi usketalim ani khub thoktalim. Karonn, tankam dor disa sat voram tea korsak bosonk poddttalem. Toxench dor sanjer, tin voram tankam homework korcho poddttalo ani dor sumanak tankam 4 tem 5 bhag korche poddttale. Tor hem soglem tim aplea bollan nhoi, punn Jehovachea modotin korunk pavtolim mhunn hanv ani mhojea borabor aslolo dusro xikoupi bhav tankam somzaitale. Jehovacher patielolean vidʼdhearthi tanchean korunk zata oxem dista, tachea poros chodd korunk pavtalim. Oxem ghoddttalem tednam tim kitlim ojap zatalim tem mhaka ugddas ieta.

Mummy dusreancher dhean ditali dekhun tichim ­Bible vidʼdhearthi sotant vaddavoll korunk pavlim. Toxench, daddy pasun sot xikonk umed dakhounk laglo. Mummy moron tin disam uprant, daddy jahir bhaxonn aikonk Raj-ghorant ailo. Hem polloun ami soglim ojap zalim. Fuddlea 26 vorsam poriant, tannem ekui mitting chukounk na. Daddy-n bautizm gheunk na tem khorem, punn vhoddilamnim mhaka sanglem ki to sodanch sogleant poilo mittingek ietalo.

Mummy-n amkam soglea bhurgeank ek bori dekh dovorli. Mhojeo tin bhoinno ani tanche ghov visvaxiponnan Jehovachi seva korit asat. Ek bhoinn Portugal-ant ani dusri Haiti-nt aslolea xakha ofisant seva korta.

Atam hanv ani Palmer Ontario-nt, Hamilton xarant khas pioneer mhunn seva kortat. Ami sorkittachea kamant aslim tednam, ami dusream bhav-bhoinnam sangata tancheo porot bhetto ani Bible obheas korunk voitalim. Punn atam amchim Bible vidʼdhearthi sotant vaddavoll kortat tem polloun amkam anikui khuxalkai bhogta. Ami jea sobhent asat tea bhav-bhoinnam sangata ami ixttagot kortat, ani tanchea borea ani vaitt vellar Jehova tancho koso samball korta tem ami polloitat tednam, amkam khub urba melltta.

Fattlea vorsancho ugddas kortana, zaitea bhav-bhoinnamnim amcher dhean dilem mhunn ami tanche upkari asat. Taka lagon, ami pasun amchea bhav-bhoinnanchi “kallji” gheunk sodhtat. (2 Kor. 7:6, 7) Tannim Jehovachi seva apleachean zata title bore toren korunk ami tankam urba ditat. Udharonnak, ami ek osle familik mellʼllim zoim bhavachi bail, put ani dhuv purnn vellachi seva kortalim. Hanvem tea bhavak, tannem kednam-i purnn vellachi seva korunk chintlam kai mhunn vicharlem. Tannem sanglem ki to tache familik pioneer seva korunk modot korta. Tednam hanvem taka vicharlem, “Tum tujea familik Jehova poros bore toren modot korunk xokta?” Tor tachi famil ­onubhovta tich khuxalkai takai onubhovunk mellttoli mhunn hanv­em taka urba dili. Ani sov mhoineam bhitor to bhav pioneer seva korunk laglo.

Hanv ani Palmer sodanch “fuddlea pinddkek” Jehovan kelʼlea “ojapachea kamam” vixim sangot ravtolim. Toxench Jehovache sevent ami ji khuxalkai onubhovlea toslich khuxalkai dusreamnim onubhovloli amkam zai.—St. 71:17, 18, NW.