1-2. Ek Kristanv eka bilddinga bhaxen koso zaun asa? (1 Korintkarank 15:58)

 1978-ANT, Japan-achea Tokyo xarant, 60 malleanchem ek vhoddlem bildding bandlolem. Punn tea xarant zaite bhuimkamp zatale. Tea pasot, tem bildding koxem ghott urtolem mhunn lok chintunk laglo. Tor tem ghott uronk engineer-amnim kitem kelʼlem? Tannim tem oxe toren design kelʼlem ki bhuimkamp ailear pasun tem thir urtolem, ani tem matxe bagovlem zalear pasun, tem moddchem na. Kristanvam pasun hea bilddinga bhaxen zaun asat. Koxim?

² Jehovache kaide pallunk ani tachea dorjeam pormonnem cholonk, eka Kristanvan sodanch ghott ani thir asonk zai. (1 Korintkarank 15:58 vachat.) To sodanch “adnea pallunk toiar” asta ani kednach ovisvaxi zaina. Punn teach borabor, goroz poddtta tednam tannem matxe bagonk, tem mhunnttlear “somjikai” dakhounk pasun toiar asonk zai. (Jak. 3:17, NW) Ek Kristanv oxe toren vagta tednam to chodduch strict ravona, nhoi mhunn kitem-i kelear cholta, oslo-i sobhav dakhoina. Tor hea lekhant, ami thir koxem ravonk zata, thir ravcho amcho nichov halounk Soitan khoincheo panch vatto uzar korta, ani ami teo koxeo nakarunk zatat tem ami polloitolim.

3. Itihas 15:28, 29-ant, Jehovachea khoinchea kaideam vixim sanglam?

³ Kaide korunk, sogleam poros chodd Jehovakuch odhikar asa. Ani tannem aplea lokank aple kaide spoxtt ritin somzaileat. (Iz. 33:22) Udharonnak, poilea xekddeantlea sonchalon monddollan, Kristanvamnim thir ravonk zai toslea Devachea tin kaideam vixim sanglolem. Te mhunnttlear, (1) murti puza nakarun fokot Jehovachich bhokti korop, (2) rogot povitr mhunn lekhop, ani (3) Bible-antle noitik dorje pallop. (Itihas 15:28, 29 vachat.) Tor aiz Kristanvamnim hea vixoi-ancher koxem thir ravonk zata?

4. Ami fokot Jehovachich bhokti kortat mhunn koxem dakhoun ditat? (Prokasovnni 4:11)

 ⁴ Ami murti puza nakarun, fokot Jehovachich bhokti kortat. Jehovan Izraelitkarank adnea dilʼli ki tannim fokot tachich bhokti korchi. (D.S. 5:6-10) Ani Soitanan Jezuk fosounk proitn kelo tednam, Jezun spoxtt ritin sanglem ki ami fokot Jehovachich bhokti korunk zai. (Mt. 4:8-10) Dekhun ami murteanchi puza korinant ani munxanchi pasun bhokti korinant. Zoxem, ami dhormik vo rajki fuddareank, famad khellpeank, film actor-ank, vo gavpeank, dev oxe lekhinant. Ami fokot Jehovakuch Dev mantat, ani fokot tachich bhokti kortat. Karonn to “sogllea vostuncho Rochnnar” zaun asa.—Prokasovnni 4:11 vachat.

5. Jehovan adnea dilʼlea pormonnem, jivit ani rogot ami povitr mhunn kiteak lekhtat?

⁵ Jehovan adnea dilʼlea pormonnem jivit ani rogot ami povitr mhunn lekhtat. Kiteak? Karonn rogtant jiv asa. Ani hem Jehovan dilʼlem moladik dennem zaun asa. (Lev. 17:14) Jehovan poile pavtti munxank zonvaranchem mas khaunk dilem tednam, tannem tankam rogot khainakat mhunn sanglolem. (Ut. 9:4) Toxench, tannem Izraelitkarank Moizesa udexim Kaide dilʼle tednam tannem tankam hich adnea dilʼli. (Lev. 17:10) Tea bhair, poilea xekddeantlea Sonchalon Monddolla vorvim tannem soglea Kristanvank, “rogta thaun . . . sodanch pois ravat” mhunn sanglem. (D.I. 15:28, 29) Tor ami koslo ilaz kortolim tea vixim nirnnoi ghetana, ami Jehovachi hich adnea pallttat ani tantunt thir ravtat. b

6. Jehovache noitik dorje pallunk ami kitem kortat?

⁶ Jehovache noitik dorje pallunk amchean zata tem soglem ami kortat. (Heb. 13:4) Apostl Paulun amkam amche kuddiche sandhe “marun uddoiat” mhunn sanglem. Tem mhunnttlear, vaitt anvdde pois korunk amchean zata tem soglem ami korunk zai. Tor ami osli khoinchich vost pollounchimnant vo korchimnant, jea udexim ami onoitik kam korunk pavtolim. (Kol. 3:5; Job 31:1) Toxench, amche mukhar vaitt korchi tallnni ieta tednam, ami toslem chintop vo kam rokddench nakartolim. Karonn Jehova sangata amchi ixttagot piddʼddear zalʼli amkam naka.

7. Ami koslo nichov korunk zai, ani kiteak?

⁷ Ami ‘kallzantlean tacheo adnea pallʼlloleo’ Jehovak zai. (Rom. 6:17) Ami oxem kortat tednam amkanch faido zata. Punn ami khoincheo adnea pallttolim ani pallchimnant tem ami vinchun kaddunk zaina. (Iz. 48:17, 18; 1 Kor. 6:9, 10) Tachea bodlek, ami Jehovak manvota tem korunk sodhtat ani stotrkaran mhunnttlolem tea bhaxen oxem mhunnttat: “Xevott meren sodanch tuje kaide pallunk hanvem ghott nichov kela.” (St. 119:112, NW) Punn Soitan amcho nichov halounk proitn korta. Koso?

8. Soitan dhumallo uzar korun amcho nichov halounk koso proitn korta?

⁸ Dhumallo. Amche virodhi dobhav ghalun ani mar ghalun amkam dhumallo ditat. Hea toren Soitan amcho nichov halounk proitn korta. To amkam “girasunk” sodhta. Mhunnche, Jehova sangata amchi ixttagot piddʼddear korunk sodhta. (1 Ped. 5:8) Udharonnak, poilea xekddeantle Kristanvank dhomkaile, boddoile ani thoddeancho jiv pasun kaddlo. Karonn tannim Jehovachi adnea pallunk ghott nichov kelʼlo. (D.I. 5:27, 28, 40; 7:54-60) Soitan aiz pasun, Jehovachea lokancher dhumallo haddtta mhunn ami pollounk xoktat. Zoxem, Russia ani her desantlea zaitea bhav-bhoinnam sangata, virodhi krur toren vagtat vo te her vattamnim tankam dhumallo ditat.

9. Vollkhonk kotthin zatat toslea dobhavam thaun ami kiteak chotur ravonk zai? Ek udharonn diun somzaiat.

⁹ Vollkhonk kotthin zata toslo dobhav. Soitan  amcher dhumallo haddtta tem khorem. Punn teach borabor to ‘naddbudʼdheo’ uzar korun amkam trasant ghalunk proitn korta. (Ef. 6:11) Bob nanvachea eka bhavak kitem ghoddlem tacher dhean diat. Taka ek vhoddlem operation korchem aslem dekhun to hospital-ant aslo. Tannem dotorank sanglem ki to khoincheach poristhitint rogot gheunchona. Ani dotor tachem aikonk toiar zalo. Punn operation-achea ek rati poilim, bhavachi famil ghora gelʼli tednam, anik ek dotor taka mellonk ailo. Tannem bhavak sanglem ki chodd korun taka rogot ghalchi goroz poddchina. Punn te operation-a vellar rogot toiar dovortale. Karonn goroz poddlich zalear tem rokddench ghalunk mellttolem. Tea vellar, bhavachi famil thoim nasli. Tor to aplo nirnnoi bodoltolo, oxem ghoddie tea dotoran chintlem astolem. Punn bhav aple nirnnoi-acher thir ravlo. Ani poristhiti kitli-i vaitt zalear pasun, to rogot gheunchona mhunn tannem sanglem.

10. Sonvsarachea lokanchem chintop dhokeachem kiteak zaun asa? (1 Korintkarank 3:19, 20)

¹⁰ Sonvsarachea lokanchem chintop. Jehovachea kaideanchi porva korinant toslea lokanchem chintop ami apnnailem zalear, ami pasun Jehovachea kaideanchi beporva kortolim. (1 Korintkarank 3:19, 20 vachat.) “Hea sonvsarachi zannvai” amkam chodd korun Jehovachea add vochonk urba dita. Oxench, Pergamum ani Thiatira sobhentlea Kristanvank ghoddlem. Tim ravtalim tea xarantle lok onoitik kamam ani murti puza kortalim. Tor tanchea chintpacho, hea Kristanvancher probhav poddlo dekhun, sobhent choltolea onoitik kamam vixim kainch korinastana tim vogi ravlim. Dekhun Jezun tankam khor solʼlo dilo. (Prok. 2:14, 20) Aiz amche bhonvtonnim aslolo lok pasun, chukinchem chintop apnnaunk amcher dobhav ghalunk xoktat. Amchea familintlim ani amkam vollkhotat tim, ami chodduch strict asat ani amkam zai toxem ami korunk zata oxem sangonk xoktat. Udharonnak, tim ghoddie oxem mhunnot: ‘Sonvsar atam khoim pavla. Ani tum to Bible kitem gheun bosla! Tuka zai toxem tunvem korunk zata!’

11. Thir ravtolim zalear ami kitem korchem nhoi?

¹¹ Jehova koddlean amkam jem nirdexon melltta tem titlem spoxtt na, oxem thodde pavtti amkam disonk xokta. Haka lagon, ‘boroilʼlem asa tachea bhair ami vochonk xoktat.’ (1 Kor. 4:6) Jezuchea disamnim aslolea dhormik fuddareamnim hench patok kelʼlem. Moizesa udexim dilʼlea Kaideam bhair, tannim aple svotache kaide toiar kelʼle, je lokank zodd vojea sarke asle. (Mt. 23:4) Punn Jehova amkam tachem Utor ani tachea songottnne udexim spoxtt nirdexon dita. Tor tantunt anikui kaide korchi amkam goroz na. (Mho. 3:5-7) Tea pasot, ami Bible-ant boroilʼlem asa tachea bhair vochonant, vo ami dor eklean nirnnoi gheunk zai tea vixoi-ancher bhav-bhoinnam pasot kaide korinant.

12. Soitan ‘polkem xanneponn’ koso uzar korta?

¹² Fosoita tosli mahiti. Soitan ‘polki naddbudʼdhi’ ani ‘sonvsarachim totvam’ uzar korun lokank fosoita ani tanche modem futt ghalta. (Kol. 2:8) Zoxem poilea xekddeant, munxachea chintpacher adarit asloli zannvai, Devachea Utracher adarit nasloli Judevanchi xikounn, ani Kristanvamnim Moizesa udexim dilʼle Kaide pallunkuch zai, hi xikounn tantunt mellon asli. Punn hi sogli fosoita tosli mahiti asli. Karonn ti lokank khore zannvaiechi Zhor, Jehova koddlean pois vhortali. Aiz pasun, Soitan media ani social network uzar korun khotti mahiti ani rajki fuddari sangtat teo khotteo khobro posraita. COVID-19 pidde vellar osleo zaiteo khotteo khobro posortaleo. c Jea lokamnim teo aikoleo tankam khub usko zalo. Punn Jehovache songottnne thaun melltta tem margdorxon apnnailem tea Sakxeank chodd usko zaunk na.—Mt. 24:45.

13. Amchem dhean haloitat toslea vostum vixim ami kiteak chotur asonk zai?

 ¹³ Dhean haloitat tosleo vostu. Ami “chodd mhotvachem kitem” tacher dhean diunk zai. (Filp. 1:9, 10) Karonn ami oxem korinant zalear, chodd mhotvachim nant toslea kamamnim ami amcho vell ani takot ibadd kortolim. Sodanchim kamam, zoxem khavop, pievop, monoronjon ani kam, hacher ami chodduch dhean ditat zalear, chodd mhotvachea kamam thaun amchem dhean halonk xokta. (Luk. 21:34, 35) Tea bhair, amkam dor disak somajik ani rajki vixoi-ancher zaiteo khobro aikonk ani vachunk mellttat. Punn hea khobrank lagon ami amchem dhean halonk diunchem nhoi. Na zalear, ami amchea kallzant ani monant, konnachi-i bazu gheunk lagtolim. Atam poriant ami polloileo teo sogleo vatto uzar korun, Soitan amchem dhean halounk proitn korta. Punn tantunt fosona zaunk ani ghott ravonk, ami kitem korunk zata tem polloum-ia.

14. Sodanch Jehovachi bazu gheunk tumi kitem korunk zai?

¹⁴ Tumi somorponn korun bautizm kiteak ghetlo tacher niall korat. Tumi Jehovachi bazu gheunk sodhtalim dekhun tumi oxem kelem. Tor tumi xiktalim tem sot mhunn tumkam kiteak khatri zali tem ugddas korat. Tumi Jehovachi vollokh ghetli, to amcho mogall sorgincho Bapui mhunn xiklim, ani tachea pasot tumcho mog ani resped vaddlo. Tumi bhavarth vaddoilo ani poschatap kelo. Tumi vaitt vostu soddun dileo ani Jehovak manvota tem korunk laglim. Jehovan tumkam bhogxileant hem zannam zaun tumkam bhuzvonn mellʼlli. (St. 32:1, 2) Tumi mittingek vochonk laglim, ani tumi jem xiklolim tem dusreank sangonk laglim. Uprant tumi somorponn kelem ani bautizm ghetlo. Atam tumi jivitachea vatter choltat, ani tacher sodanch cholot ravonk tumi ghott nichov kela.—Mt. 7:13, 14.

15. Devachea Utracho obheas ani niall korop kiteak gorjechem?

¹⁵ Devachea Utracho obheas korat ani tacher niall korat. Eka zhaddachim mullam ghott asat zalearuch, tem thir uronk xokta. Teach bhaxen, Devachea Utracher amcho bhavarth ghott asa zalearuch, ami thir ravonk xoktat. Ek zhadd vaddot voita toxem, tachim mullam zomnint  rigtat ani tim vaddot voitat. Toxench, ami Devachea Utracher obheas ani niall kortat tednam, amcho bhavarth anik ghott zata, ani Dev jem kitem sangta tem sarkem mhunn amchi khatri vaddtta. (Kol. 2:6, 7) Tor Jehovan adlea kallar aplea sevokank koxe toren nirdexon ani margdorxon dilem, toxench tanchi rakhonn koxi keli tacher ami niall korunk zai. Udharonnak, Ezekielan eka dorxonant ek devdut Devmondirachem zokh ghetalo tem polloilem. Tea vellar, tannem bariksannen tacher dhean dilem. Tea dorxona vorvim Ezekielacho bhavarth ghott zalo. Ani tea dorxonantlean, khore bhokte vixim aslole Devache dorje ami koxe pallunk zatat, tea vixim amkam pasun lisanvam xikonk mellttat. d (Ez. 40:1-4; 43:10-12) Tor Devachea Utrant aslolea khol vixoi-ancher obheas ani niall korunk ami vell kaddttat tednam, amkam pasun faido zata.

16. Bob-achem kalliz thir-ghott aslolean tachi rakhonn koxi zali? (Stotr 112:7)

¹⁶ Tumchem kalliz thir-ghott korat. Davidan eka stotrant oxem mhunnttlem: “Mhojem kalliz thir-ghott asa, Deva.” (St. 57:7, NW) Hea utrantlean, Jehova pasot aplo mog kednanch unno zauncho na, oxem David sangonk sodhtalo. Tor ami pasun amchem kalliz thir-ghott dovrunk zata ani Jehovacher purnn toren patieunk zata. (Stotr 112:7 vachat.) Ami portun Bob-achea udharonnacher dhean diunk zata. Operation-a vellar rogtachi goroz poddli zalear, tachea pasot poilinch toiari korun dovortole mhunn dotoramnim Bob-ak sanglem. Tednam Bob-an rokddench sanglem ki te toxem kortat zalear, to tea hospital-ant operation korun gheuncho na. Hea vixim Bob-an uprant oxem mhunnttlem: “Hanv kitem kortolom tea vixim mhaka matui dubhav naslo ani mhaka kitem ghoddttolem tea vixim mhaka usko naslo.”

17. Bob-achea onubhovantlean ami kitem xiktat? (Chitr pasun polloiat.)

¹⁷ Hospital-ant voichea poilinch ghott nichov kelolean, Bob thir ravonk pavlo. Tor to ghott nichov kiteak korunk pavlo? Poilem mhunnttlear, to Jehovak khuxal korunk sodhtalo. Dusrem, tannem Bible ani Bible-acher adarit prokaxonancher bariksannen obheas kelo. Oxem kelolean, jivit ani rogot kitlem povitr tem to  somzonk pavlo. Tisrem, taka khatri asli ki Jehovachi adnea pallʼllolean, fokot aizuch nhoi, punn fuddarak pasun taka besanvam mellttolim. Tor amche mukhar kosleo-i oddchonneo ieum, ami amchem kalliz thir dovrunk xoktat.

18. Barakachea udharonnantlean, Jehovacher visvas dovorchea vixim ami kitem xiktat? (Masikachem fuddlem chitr polloiat.)

¹⁸ Jehovacher visvas dovrat. Jehovan dilʼlea nirdexonacher Barakan visvas dovorlo dekhun, Jehovan taka koxem zoit dilem tacher dhean diat. Tea vellar, Izraelitkaram zhuza pasot toiar naslim ani tanchea lagim hotʼtearam pasun naslim. Tori astana Jehovan Barakak, Sisera nanvacho Kananit sordar ani tachea fouje add zhuz korunk sanglem. (Fudd. 5:8) Itlench nhoi, provadin Deboran, Barakak dongrachea sokol denvon eka uktea mollar, Sisera ani tachea 900 ghoddesvaram add zhuzonk sanglem. Sisera ani tache foujek hea zagear zhuzonk ekdom sompem zatolem, punn Izraelitkarank ekdom kotthin zatolem mhunn Barak zannam aslo. Tori astana, tannem Jehovan dilʼlem nirdexon pallʼllem. To ani tachi soin, Tabor Dongrachea sokol denvtale tednam, Jehovan ghogeamnim paus dhaddlo. Haka lagon, Siserachea ghoddesvaranchim rotham matient rombon urlim. Ani Jehovan Barakak zoit dilem. (Fudd. 4:1-7, 10, 13-16) Tor ami pasun, Jehova ani tache songottnne udexim melltta tea nirdexonacher visvas dovorlo zalear, amkam-i zoit mellttolem.—D.S. 31:6.

19. Tumi thir ravonk kiteak ghott nichov kela?

¹⁹ Ami hea noxttea sonvsarant aso poriant, thir ravonk amkam zhuzot ravonk poddttolem. (1 Tim. 6:11, 12; 2 Ped. 3:17) Dekhun amcher dhumallo, sonvsarachea lokanchem chintop, fosoita tosli mahiti, dhean haloitat tosleo vostu, ani vollkhonk kotthin zatat tosle dobhav ailear pasun ami thir ravonk ghott nichov korum-ia. (Ef. 4:14) Tea bhair, ami ghott ravom-ia, sodanch Jehovacho mog korum-ia, ani tacheo adnea pallum-ia. Punn heach borabor, ami somjikai pasun dakhounk zai. Tor fuddlea lekhant, Jehovan ani Jezun somjikai dakhounchea vixim kitlem borem udharonn dovorlam tea vixim polloum-ia.