1. Kristanvamnim eka orthan madda bhaxen koxem asonk zai? (Chitr pasun polloiat.)

 BORENCH varem marta tednam ek madd halta to tumi polloila? Amkam dista ki to madd moddon poddttolo mhunn. Punn to moddon poddona, karonn to bagvota. Teach bhaxen, kotthin poristhitint khuxalkaien Jehovachi seva korit ravonk ami pasun bagonk, tem mhunnttlear somjikai dakhounk toiar asonk zai. Ami hem koxem korunk zata? Amchi poristhiti bodolta tednam ami goroz tea pormonnem bodlav korunk zai, toxench dusreanchem chintop ani nirnnoi-ank resped diunk zai.

2. Poristhiti pormonnem bodlav korunk amkam khoinche gunn modot korunk xoktat, ani hea lekhant ami kitem polloitolim?

² Ami Jehovachim sevokam zaun asat dekhun, ami somjikaie borabor khaltikai toxench doia-maia dakhounk sodhtat. Tor hea lekhant, adlea kalla voilea Kristanvank tanchi poristhiti bodolʼli tednam, he gunn aslolean koxi modot zali tem ami polloum-ia. Toxench, amkam he gunn koxe modot korunk xoktat tem-ui ami polloum-ia. Punn tachea poilim, Jehovan ani Jezun somjikai dakhounchea vixim amkam kosli bori dekh dovorlea tacher ami dhean dium-ia.

3. Jehova somjikai dakhoita mhunn amkam koxem kolltta?

³ Jehova ghott ani thir asa dekhun, taka “Khoddop” mhunnttla. (D.S. 32:4, NW) Punn teach borabor to somjikai pasun dakhoita. Koso? Sonvsarachi poristhiti bodolta toxi, to aplo udʼdhex purnn korunk bodlav korta. Jehovan munxank aplea rupan rochleant dekhun, ami pasun poristhiti bodolta tednam bodlav korunk xoktat. Toxench tannem amkam Bible-ant totvam dilʼlim asat, jea udexim amkam kotthin poristhitint pasun bore nirnnoi gheunk modot zata. Tor Jehovachea udharonnantlean ani tannem dilʼlea totvantlean to ‘Khoddpa’ bhaxen thir, punn teach borabor to somjikaiecho asa mhunn amkam kollon ieta.

4. Jehova koso somjikai dakhoita tachem ek udharonn diat. (Levi-Xastr 5:7, 11)

 ⁴ Jehova Izraelitkaram sangata jea ritin vaglo, tantuntlean to somjikaiecho Dev mhunn kollon ieta. Udharonnak, soglim Izraelitkaram, tim girest asum vo gorib, tannim ekuch torechem bolidan diunk zai mhunn Jehovan tanchea koddlean opekxa korunk na. Punn thodde pavtti, tannim tanchea poristhiti pormonnem bolidan diunk zata mhunn sanglem. Tor hantuntlean amkam kollon ieta ki Jehova poripurnn aslear pasun, to somjikai dakhoita ani nixttur toren vagona.—Levi-Xastr 5:7, 11 vachat.

5. Jehovan khaltikai ani doia-maia koxi dakhoili tachem ek udharonn diat.

⁵ Jehova khaltikai ani doia-maia dakhoita dekhun to somjikaien vagta. Udharonnak, Jehova Sodom xaracho nas korcho aslo tednam, to Lota sangata khaltikaien vaglo. Tea xaracho nas korchea poilim tannem dutank dhaddun, Lotak ani tache familik dongrar pollon vochonk nirdexon dilem. Punn Lot thoim vochonk bhietalo. Tea pasot, tannem aple familik gheun thoim laginch aslolea Zoar xarant vochonk Jehova lagim vinoti keli. Khorem mhunnttlear, Jehova tem xar pasun nas korcho aslo. Tor tannem Lotak oxem sangonk zatalem, ‘Hanvem sanglam toxench tunvem korunk zai.’ Punn oxem korchea bodlek, Jehovan taka thoim vochonk dilo ani tea xaracho nas pasun korunk na. (Ut. 19:18-22) Xekddeamnim vorsam uprant, Jehovan Nineve xarantlea lokank doia-maia dakhoili. Apunn Nineve xar, toxench tantunt ravpi noxttea lokancho nas kortolo mhunn sangonk, Jehovan provadi Jonasak thoim dhaddlolo. Punn Ninevechea lokamnim khorench poschatap kelo tednam, Jehovak tanche churchure disle ani tannem tea xaracho nas korunk na.—Jon. 3:1, 10; 4:10, 11.

6. Jezun, Jehova bhaxen somjikai koxi dakhoili tachim udharonnam diat.

⁶ Jehova bhaxen Jezun pasun somjikai dakhoili. Jezuk hea prithumer, “Izraelachea ghorachea sanddlolea menddrank” porgottunk dhaddlolo. Tori astana, hem kam kortana to somjikaien vaglo. Ek pavtti, Izraelitkar nasloli ek bail tichea dhuvek bori kor mhunn, Jezu lagim vinoti korunk lagli. Karonn tichea dhuvecher ‘noxtto dut boslolo.’ Tea vellar Jezun tika doia-maia dakhoili ani tiche dhuvek bori keli. (Mt. 15:21-28) Tea bhair, Jezun porgottnni suru kelʼli tednam, tannem survatek oxem sanglolem: “Konnui mhaka . . . nakarta zalear, hanv-ui taka . . . nakartolom.” (Mt. 10:33) Punn Pedrun Jezuk tin pavtti nakarlea uprant pasun, Jezun taka nakarunk na. Kiteak? Karonn Pedru visvaxi aslo, ani tannem jem kelʼlem tea vixim taka ekdom khont bhogli mhunn Jezuk khobor asli. Tea pasot, jivont zalea uprant Jezu Pedruk mellʼllo, toxench tannem taka bhogxilo, ani to azunui tacho mog korta mhunn taka khatri dili.—Luk. 24:33, 34.

7. Filipkarank 4:5-ant sanglolea pormonnem, ami koslim munxam zaunk sodhtat?

⁷ Atam meren ami polloilem ki Jehova Dev ani Jezu Krist somjikai dakhoitat. Tor amche vixim kitem? Ami pasun somjikai dakhoilʼli Jehovak zai. (Filipkarank 4:5 vachat.) Ami somjikaiechim asat vo na tem zannam zaunk, ami amkanch he prosn vicharunk zatat. Zoxem, ‘Dusrim mhaka koslo munis mhunn vollkhotat? Somjikaiecho ani bodlav korunk toiar asa toslo, vo aplench khorem mhunn chintʼta ani ekdom koddok ani nixttur  toren vagta toslo? Hanv dusreanchem aikotam, ani tim sangtat tem Bible-antlea totvam add na zalear, hanv tem manun ghetam kai? Vo hanv sangtam toxench zaunk zai mhunn hanv dusreancher dobhav ghaltam?’ Tor jitlim ami dusreank somjikai dakhoitat, titlim ami Jehovachi ani Jezuchi dekh ghetat. Atam ami don vatto polloum-ia, jea udexim ami bodlav korunk toiar asat mhunn dakhounk zata. Poili vatt, amchi poristhiti bodolta tednam ani dusri, lokanchem chintop ani tim ghetat to nirnnoi amchea thaun vegllo asta tednam.

8. Poristhiti bodolta tednam somjikai dakhounk ami khoinchim char panvlam gheunk xoktat? (Futtnott pasun polloiat.)

⁸ Somjikai dakhovop mhunnttlear, amchi poristhiti bodolta tednam goroz tea pormonnem bodlav korop. Amchi poristhiti okosmat bodolta tednam, ami chintunk nant tosle tras amkam sosunk poddot. Zoxem, amkam ek gombhir duens zaunk xokta. Vo ami ravtat tea zagear, arthik poristhiti vo sorkarant okosmat bodlav zalolean, ratiam bhitor amchem jivit voir-sokol zaunk xokta. (Up. 9:11; 1 Kor. 7:31) Toxench, Jehovachea sevent amkam aslole zobabdarent bodlav zaunk xokta. Punn koslo-i bodlav zaum, ami fuddem sanglolim char panvlam ghetlim zalear, amchi novi poristhiti apnnaunk amkam modot zatoli. Tim panvlam mhunnttlear: (1) amchi poristhiti bodolʼlea mhunn manun ghevop, (2) fatti kitem ghoddlem tacher nhoi punn fuddaracher dhean divop, (3) amchea jivitant kitem borem zata tea vixim chintop, ani (4) dusreank modot korop. b Oxem kelolean, thoddea bhav-bhoinnank koxi modot zali tem polloum-ia.

9. Mixinori seva korpi ek zoddpem kotthin poristhitincho fuddo koxem korunk pavlem?

⁹ Tumchi poristhiti bodolʼlea mhunn manun gheiat. Emanuele ani Francesca nanvachea eka zoddpeak, mixinori mhunn seva korunk eka dusrea desant dhaddlolim. Tannim thoinchi bhas xikonk ani bhav-bhoinnanchi vollokh korunk suru kelʼli. Titleanuch, COVID-19 pidda suru zali. Taka lagon, tim konnakuch mellonk xokonaslim. Uprant, okosmat bhoinn Francesca-chi avoi bhair poddli. Tea pasot bhoinn aple familik mellonk porot ghora vochonk sodhtali. Punn piddek lagon, tika toxem korunk mellonk na. Tor he kotthin poristhiticho fuddo korunk tika koxi modot zali? Poilem mhunnttlear, bhav Emanuele ani bhoinn Francesca-n sangata mellon, dor disacho fuddo korunk ani chodduch usko korina zaunk Jehova lagim magnneant zannvai magli. Ani songottnne thaun melltta tea margdorxona vorvim, Jehovan sarkea vellar tanchea magnneacho zobab dilo. Udharonnak eka video-nt, eka bhavan mhunnttlolea utrantlean tankam urba mellʼlli. Tea bhavan oxem mhunnttlolem: “Tumi jitle begin tumchi novi poristhiti apnnaun ghetolim, titlech begin tumchi khuxalkai tumkam porot mellttoli. Ani oxem kelolean, te nove poristhitint, Jehovachi seva tumi anik bore toren korunk pavtolim.” c Dusrem mhunnttlear, fon-a udexim porgottnni korchi tanchi kola vaddounk tannim nichov kelo. Ani oxem kelolean, tim ek Bible obheas pasun suru korunk pavlim. Tisrem mhunnttlear, thoinchim bhav-bhoinnam tankam urba diunk ani modot korunk sodhtalim tednam, tem apnnaunk hem zoddpem fattim soronk na. Zoxem, ek doiall bhoinn tankam dor disa, ek lhanxi message dhaddttali, zantunt Bible-antlem ek vers astalem. Ani tinnem voros-bhor oxem kelem. Tor ami pasun amchi novi poristhiti manun ghetat tednam, ami Jehova pasot jem kitem korunk xoktat tantunt ami khuxal astolim.

10. Christina-chea jivitant vhodd bodlav zalo tednam tinnem kitem kelem?

¹⁰ Fuddaracher dhean diat ani tumchea jivitant kitem borem zata tea vixim chintat. Christina nanvachi Romania-ntli bhoinn, Japan-ant ravtali.  Poilim ti Inglez bhas uloitolea sobhek voitali. Punn uprant ti sobha bond poddli. Tea vellar bhoinnik dukh zalem tem khorem. Punn ti tea vixim chintit ravonk na. Tachea bodlek, ti Japanese bhas uloitolea sobhent hajir zaunk lagli ani tea bhaxent porgottnni korunk tinnem apleachean zata tem soglem kelem. Bhoinn Japanese bhas anik bore toren xikonk sodhtali dekhun tinnem eke bailechi modot magli, ji poilim tichea sangata kam kortali. Bhoinnin tika, Bible ani Sasnak Khuxalkaien Jieiat! hi pustika uzar korun apnnak Japanese bhas xikonk modot kortoli kai mhunn vicharlem. Ani ti bail oxem korunk toiar zali. Oxem kelolean bhoinn Christina, Japanese bhas anik bore toren ulounk xikli. Itlench nhoi, ti bail pasun Bible xikonk umed dakhounk lagli. Hea onubhovantlean ami kitem xiklim? Ami fatti kitem ghoddlem tacher nhoi, punn amchea jivitant kitem borem zata tacher dhean dilem zalear, okosmat amchi poristhiti bodolta tednam amkam oslim besanvam mellonk xoktat, jea vixim ami kednanch chintunk na astolem.

11. Eka zoddpeak poixeanchem unnemponn zalem tednam tannim kitem kelem?

¹¹ Dusreank modot korat. Ek zoddpem oslea desant ravta, zoim amchea kamacher bondi asa. Tea desachi arthik poristhiti bigoddli tednam, tankam poixeanchem unnemponn zalem. Tor oslea poristhitint tannim kitem kelem? Sogleant poilim, tannim aplem jivit sadem korunk proitn kelo. Dusrem, tannim tanchea oddchonneancher dhean diunk na, punn porgottnni korun dusreank modot korunk tharailem. (D.I. 20:35) To ghov mhunntta: “Porgottnnechea kamant bizi ravlolean ami chodd vell Devachi khuxi korunk pavtalim, ani amchea oddchonneam vixim chintunk pavonaslim.” Hantuntlean ami kitem xiktat? Poristhiti bodolta tednam ami ugddas dovrunk zai ki dusreank modot korop khub gorjechem. Khas korun, porgottnnechem kam korun.

12. Porgottnnechea kamant poristhiti pormonnem bodlav korchea vixim apostl Paulu thaun ami kitem xiktat?

¹² Porgottnni kortana amkam zaite toreche lok mellttat. Te veg-vegllea zagea voile astat, tanchi sonskruti veglli asta ani Deva vixim tanchem chintop pasun vegllem asta. Hea pasot, ami porgottnnent goroz tea pormonnem bodlav korunk zai. Hea vixim, apostl Paulun amkam ekdom borem udharonn dovorlem. Jezun, Pauluk ‘apostl mhunn videxi raxttrantlea lokam lagim dhaddlolo.’ (Rom. 11:13) Tor Paulun Judevank, Grik lokank, xikloleank, ganvant ravpi lokank, sorkari odhikareank ani razank pasun porgottnni keli. Hea veg-vegllea torechea lokanchea kallzant sotachem bim vompunk, to ‘soglea torechea lokam pasot soglem zalo.’ (1 Kor. 9:19-23) Hacho orth, taka mellttale te lok khoim thaun aileat, tanchi sonskruti ani patienni kitem tea vixim tannim bariksannen chintlem. Uprant, tankam Deva vixim kitem aikonk avoddttolem, tea pormonnem tannem tachea uloupant bodlav kelo. Tor ami pasun amkam porgottnnent melltta tea dor eka munxa vixim bariksannen chintʼtat, ani tanchea poristhiti pormonnem amchea uloupant bodlav kortat tednam, ami anik bore toren sakx diunk pavtolim.

13. Ami dusreanchem chintop ani nirnnoi-ank resped ditat zalear 1 Korintkarank 8:9-a pormonnem, ami kitem korchimnant?

¹³ Ami dusreanchem chintop ani nirnnoi-ank resped ditat tednam ami somjikai dakhoitat. Udharonnak, thoddea bhoinnank makeup korunk avoddtta, punn thoddeank avoddna. Toxench, thoddim Kristanvam thoddo soro pietat, punn dusrim taka hat pasun lainant. Tea bhair, amkam sogleank bori bholaiki zai. Punn ami koslim vokhdam ghetolim tea vixim amchem chintop veg-vegllem asa. Tor ami sangtat tench sarkem, ani heramnim pasun oxench korunk zai mhunn ami chintlem zalear, dusreank addkholl zaunk xokta ani sobhent futt poddonk xokta. Ani oxem zalʼlem amkam kednanch naka! (1 Korintkarank 8:9 vachat; 10:23, 24.) Tor atam ami don udharonnam polloum-ia, ani Bible-antlim totvam apnnailʼlean ami bore nirnnoi koxim gheunk xoktat, ani sobhent xanti koxi samballunk xoktat tem zannam zaum-ia.

14. Nhesop ani dispa vixim nirnnoi ghetana ami Bible-antlim khoinchim totvam ugddas dovrunk zai?

 ¹⁴ Amchem nhesop ani disop. Ami kitem nhesonk zai tea vixim Jehovan amkam kaide diunk nant, punn totvam dileant. Hea vorvim nhespa vixim sarke nirnnoi gheunk amkam modot zata. Amchem nhesop Devachea lokank sobta toslem asonk zai. Tem mhunnttlear, ami ‘sarkem chintop dovrun,’ moriadin ani mannsugen nhesonk zai. (1 Tim. 2:9, 10; 1 Ped. 3:3) Na zalear gorje bhair ami dusreanchem dhean amcher oddun haddttolim. Jehovan Bible-ant totvam dileant dekhun, vhoddil nhespa vixim ani kensanchi style korpa vixim apleak zai tosle kaide korinant. Eka sobhentlea vhoddilamnim kitem kelem tacher dhean diat. Tea sobhentlea thoddea tornnattea bhavamnim osli hairstyle apnnailoli, ji tea vellar fashion asli. Tem mhunnttlear, tanche kens barik asle te khorem, punn te pollounk bore disonasle. Tor vhoddil kosloch kaido korinastana tea tornnatteank koxe modot korunk pavle? Sorkittachea dekhrekh korpean tankam ek boro solʼlo dilo. Tannim tornnatteank oxem sangonk zata mhunn tannem sanglem: “Tumi machier asat ani bhav-bhoinnam tumi sangtat tacher dhean diunchea bodlek, tumi koxe distat tacher chodd dhean ditat zalear, kitem tori goddbodd asa.” Oxem sanglolean te vhoddil kosloch kaido korinastana tea tornnatteank modot korunk pavle. d

15. Bholaike vixim nirnnoi kortana amkam Bible-antle khoinche kaide ani totvam modot korunk xoktat? (Romkarank 14:5)

¹⁵ Amchi bholaiki. Amchi bholaiki bori uronk ami kitem kortolim, to nirnnoi ami dor eklean gheunk zai. (Gal. 6:5) Bholaike vixim nirnnoi kortana amkam Bible-ant thodde kaide dileat te khorem. Zoxem ami rogot gheunchem nhoi ani ghaddiponna thaun pois ravchem. (D.I. 15:20; Gal. 5:19, 20) Punn hachea bhair, thoddea vixoi-ancher ami svota zaun nirnnoi gheunk zai. Udharonnak, thoddim zannam apli bholaiki samballunk dotoranchi modot ghetat. Punn thoddim zannam ilaz korunk her vatto sodhtat. Amkam ghoddie ek umkech torecho ilaz korop ekdom  borem vo to boro nhoi, oxem disot. Punn ami ghetat to nirnnoi heramnim pasun gheunk zai mhunn ami tancher dobhav ghalchimnant. Tachea bodlek, bholaike vixim zonn ekleak tancho svotacho nirnnoi gheunk hokʼk asa mhunn ami ugddas dovortolim, ani dusreanchea nirnnoi-ank ami resped ditolim. Hea vixim, ami fuddem sanglole char mudʼde ugddas dovrop ekdom mhotvachem. Te mhunnttlear: (1) Amchi bholaiki fokot Devacheach Rajeant purnn toren ani sasnak bori uronk xokta. (Iz. 33:24) (2) Bholaike vixim nirnnoi kortana aplea pasot kitem borem tea vixim dor eka Kristanvank “purnn khatri” asonk zai. (Romkarank 14:5 vachat.) (3) Ami dusreanchi nit korinant ani tankam addkholl zaunk xokta toslem kainch ami korinant. (Rom. 14:13) (4) Ami bhav-bhoinnancho mog kortat, ani amkam jem sarkem dista tache poros sobhent xanti samballop chodd mhotvachem mhunn ami vollkhon ghetat. (Rom. 14:15, 19, 20) Tor ami he charui mudʼde ugddas dovorle zalear, ami bhav-bhoinnam sangata ghott ixttagot samballunk pavtolim ani sobhent xanti urtoli.

16. Eka vhoddilan dusrea vhoddilam sangata vagtana somjikai koxi dakhounk zata? (Chitram pasun polloiat.)

¹⁶ Somjikai dakhounche vixim vhoddilamnim bori dekh dovrunk zai. (1 Tim. 3:2, 3) Udharonnak, apunn her vhoddilam poros piraien vhodd asa dekhun, tannim sodanch apunn sangta tench manun gheunk zai oxem eka vhoddilan chintchem nhoi. Punn tannem ugddas dovrunk zai ki Jehova apli povitr xokti uzar korun khoinchea-i vhoddilak fuddem kaddunk xokta, jea vorvim tankam sarko nirnnoi gheunk modot zatoli. Ani choddxea vhoddilank eka vixoi-acher umkoch nirnnoi ghetlear borem zatolem oxem dista zalear, ani to nirnnoi Bible-antlea totvam add vochona zalear, somjikai dakhoupi vhoddil, tea vhoddilanchea nirnnoi-ank tenko ditolo. Magir, tachem chintop tanchea poros vegllem aslear pasun.

17. Ami somjikai dakhoitat tednam amkam koslim besanvam mellttat?

¹⁷ Ami somjikai dakhoitat tednam, amkam zaitim besanvam mellttat. Bhav-bhoinnam sangata amcho sombond boro urta. Toxench, sobhent xanti asta. Ekvottan Jehovachi bhokti korpi veg-vegllea sonskrutaiechea ani sobhavachea bhav-bhoinnank mellon ami khuxal zatat. Ani sogleam-von mhotvachem mhunnttlear, amcho somjikaiecho Dev Jehovachi ami dekh ghetat, hem zannam zaun amkam dhadosponn melltta.