1. Tumi Bible obheas suru kelʼlo tednam tumi kitem xiklolim?

 TUMI Bible obheas suru kelʼlo tednam tumi kitem xiklolim tem tumkam ugddas asa? Devak ek nanv asa, hem zannam zaun ghoddie tumi ojap zalim astolim. Vo Dev lokank ifernant zolloina, hem zannam zaun tumi khuxal zalim astolim. Vo amchim mogachim jim meleant, tim amkam porot mellttolim ani tanchea borabor ami sasnak sobit bagent ravonk pavtolim, hem zannam zaun tumi khuxal zalim astolim.

2. Bible-antlim sotam xiktana tumi anik koxi vaddavoll keli? (Efezkarank 5:1, 2)

² Tumi Devachem Utor xikot ravlim toxim, Jehova pasot tumcho mog vaddlo. Tea pasot tumi xiktat tem tumi apnnaunk laglim. Tem mhunnttlear, tumi Bible-antlea totvam adarit bore nirnnoi gheunk laglim. Toxench, Jehovak manvota tem korunk tumi tumchea chintpant ani vagnnukent bodol kelo. Tor ek bhurgem aplea avoi-bapaichi dekh gheta tea bhaxen, tumi tumchea sorginchea Bapachi dekh gheunk laglim.—Efezkarank 5:1, 2 vachat.

3. Ami amkanch kitem vicharunk zata?

³ Ami amkanch vicharunk zata: ‘Hanvem bautizm ghetlolo tednam, hanv Jehovacho jitlo mog kortalom, tachea poros atam hanv tacho chodd mog kortam kai? Bautizm ghetla tednam thaun, hanv Jehovachi dekh gheun mhojea bhav-bhoinnank anik mog dakhoitam kai?’ Ami ‘poilim Jehovacho mog kortalim’ to atam unno zala zalear, ami niraxi zaunchem nhoi. Karonn poilea xekddeantlea Kristanvank pasun oxench ghoddlem. Punn Jezun tankam soddun diunk na. Ani to amkam-i soddun diuncho na. (Prok. 2:4, 7) Tor ami sot xiklolim tednam aslolo mog ami porot vaddounk zata mhunn to zannam.

4. Hea lekhant ami kitem zannam zatolim?

⁴ Ami Jehova pasot ani heram pasot amcho mog koso vaddoit  ravonk zata, ani oxem kelolean amkam toxench herankui koslim besanvam mellttolim tem ami hea lekhant zannam zatolim.

5-6. Jehovachi seva kortana apostl Pauluk kosleo oddchonneo aileo, punn Jehovachi seva korit ravonk taka koxi modot zali?

⁵ Apostl Paulu khuxalkaien Jehovachi seva kortalo. Punn oxem korunk, taka zaitea oddchonneancho fuddo korunk poddlo. To choddxe pavtti lamb provas kortalo. Ani tachea disamnim provas korop sompem naslem. Taka zaite pavtti “nhoim-chea dhokeancho” ani “vhoddlea choranchea dhokeancho” fuddo korunk poddlo. Toxench, thodde pavtti tachea dusmanamnim taka mar pasun ghatlo. (2 Kor. 11:23-27) Tea bhair, to kortalo tea kamam pasot, bhav-bhoinnam zaite pavtti upkari naslim.—2 Kor. 10:10; Filp. 4:15.

⁶ Tori astana Paulu Jehovachi seva korit ravlo. Oxem korunk taka koxi modot zali? Devachea Utrantlean, toxench svotachea onubhovantlean Jehova kosle torecho Dev tem to xiklo, ani Jehova tacho khub mog korta mhunn taka khatri zali. (Rom. 8:38, 39; Ef. 2:4, 5) Tor to-ui Jehovacho anik chodd mog korunk laglo. Ho mog tannem koso dakhoilo? To ‘bhav-bhoinnanchi seva kortalo ani to toxem korit ravlo.’—Heb. 6:10, NW.

7. Jehova pasot amcho mog vaddoit ravonk ek vatt khoinchi?

⁷ Ami Devachea Utracho bariksannen obheas korun, Jehova pasot amcho mog vaddoit ravonk zata. Bible vachtana, tantuntlean Jehova vixim kitem kollon ieta tem zannam zaunk proitn korat. Tumkanch vicharat: ‘Hea ghoddnnentlean Jehova mhozo mog korta mhunn koxem dison ieta? Jehovacho mog korunk hantunt mhaka koslim karonnam mellttat?’

8. Ami magnnem korun Jehova pasot amcho mog koso vaddounk zata?

⁸ Jehova pasot amcho mog vaddoit ravonk anik ek vatt mhunnttlear, tache lagim sodanch magnnem korop, ani amchea kallzant asa tem soglem taka sangop. (St. 25:4, 5) Oxem kelolean, Jehova amchea magnneancho zobab ditolo. (1 Ju. 3:21, 22) Hea vixim, Asia-nt ravpi Kayla nanvachi ek bhoinn oxem sangta: “Hanv Jehova vixim jem kitem xiklolem, fokot takach lagon hanv survatek tacho mog kortalem. Punn uprant to mhojea magnneancho koso zobab dita tem hanvem polloilem tednam, tachea pasot mhozo mog vaddlo. Dekhun taka manvota tem korunk hanv anikui vavr korunk laglem.” b

9. Bhav-bhoinnam pasot Timotacho mog vaddot gelo mhunn koxem kollon ieta?

⁹ Paulu Kristanv zaun thoddea vorsam uprant, Timot nanvachea eka tornnatteak mellʼllo. Timot, Jehovacho ani lokancho khub mog kortalo. Tache vixim Paulun Filipkarank oxem mhunnttlem: “Tachea sarkea sobhavacho mhojea lagim dusro anik konnuch na. To kallzantlean tumchi porva kortolo.” (Filp. 2:20) Dhean diat ki Paulun hanga, Timot kitli bori manddavoll kortalo vo bhaxonnam ditalo tea vixim sangonk na. Punn to bhav-bhoinnancho kitlo mog kortalo tem Pauluk dison ailem. Taka lagon, sobhentlim bhav-bhoinnam, Timot tanchea sobhek kednam bhett ditolo mhunn axeun ravtalim.—1 Kor. 4:17.

10. Bhoinn Anna ani tichea ghovan, tim bhav-bhoinnancho mog kortalim mhunn koxem dakhoilem?

¹⁰ Ami pasun amchea bhav-bhoinnank modot korunk vatto sodhtat. (Heb. 13:16) Hea vixim ami fattlea lekhant uloilʼlea bhoinn Anna-cho amkam onubhov asa. Ek vhodd vadoll zalea uprant, ti ani ticho ghov, Sakxi aslole eke familik mellonk tanchea ghora gelim. Tednam, tea ghorachem pakem vo paddos kosllon poddlolem, ani tanche sogle kopdde mhelle zalʼle mhunn tankam kollon ailem. Bhoinn Anna  sangta: “Ami tanche kopdde vhele, te dhuile, tankam fer marlo, ani bore toren ghoddi korun tankam porot haddun dile. Ami tanchea pasot kelʼlem hem lhan kam aslem. Punn hea karonnak lagon, ami aiz poriant ghott ixttam zaun asat.” Tor bhoinn Anna ani ticho ghov, bhav-bhoinnancho mog kortalim dekhun tannim tankam modot keli.—1 Ju. 3:17, 18.

11. (a) Ami dusreank mog dakhoitat tednam tankam chodd korun koxem bhogta? (b) Mhonnʼnneo 19:17 pormonnem, ami dusreank mog dakhoitat tednam Jehova kitem korta?

¹¹ Ami dusream sangata doiall toren ani mogan vagtat tednam, ami Jehovachi dekh gheunk proitn kortat mhunn tankam kollon ieta. Ani ami tanchea pasot jem kitem kortat, taka lagon tim kitlim upkari asat tem amkam ghoddie khobor pasun asona zait. Ami poilim uloilʼlim ti bhoinn Kayla, tika modot kelʼli tancho ugddas korun oxem sangta: “Mhaka porgottnnent vhortalim tea mogall bhoinnam pasot hanv khub upkari! Tim mhaka vhoronk ietalim, chaiek ani jevnnak gheun voitalim, ani surokxit toren porot ghora pavoitalim. Hem soglem korunk tankam kitlo vavr korunk poddttalo tem mhaka atam kollon ieta. Ani tim hem soglem mogan kortalim.” Hem khorem ki ami zankam modot kortat tantuntlea dor ekleak amkam upkariponn dakhounk sondhi mellchina. Zoxem, apnnak modot kelʼli tanchea vixim bhoinn fuddem mhunntta: “Tannim mhojea pasot doiall kamam kelʼlim dekhun, hanv-ui tanchea pasot doiall kamam korunk sodhtalem. Punn atam tim soglim khoim ravtat tem mhaka khobor na. Tori astana, Jehovak khobor asa ani mhojea vatten tannem tankam farik korchem mhunn hanv magtam.” Bhoinnichim utram kitlim khorim zaun asat. Ami kortat tem dor ek doiall kam, tem kitlem-i lhan asum, Jehova tacher dhean dita, ani tem ek moladik bolidan mhunn lekhta. Toxench, tem kam apleak dilʼlem ek rinn koxem to lekhta, jem to farik kortolo.—Mhonnʼnneo 19:17 vachat.

12. Bhavamnim, sobhentlea bhav-bhoinnam pasot tancho mog koso vaddoit ravonk zata? (Chitram pasun polloiat.)

 ¹² Bhavamno, bhav-bhoinnam pasot mog vaddoit ravonk, ani tankam anik modot korunk tumi kitem korunk zata? Hea vixim amkam Jordan nanvachea eka tornnatteacho onubhov asa. Bhav-bhoinnank modot korunk anik kitem korunk zai, mhunn tannem eka vhoddilak vicharlem. Tednam vhoddilan taka, to jem kitem kortalo tea pasot xabaski dili, ani uprant tannem anik kitem korunk zata tem sanglem. Zoxem, Raj-ghorant begin ieunk, dusreank zap korunk, mittingent zobab diunk, tachea porgottnni grupa sangata sodanch porgottnnek vochonk, ani to dusreank anik koxe toren modot korunk xokta tea vixim chintunk tannem taka urba dili. Oxem kelolean, Jordan fokot noveo kolach xikonk pavonk na, punn bhav-bhoinnam pasot aplo mog vaddoit ravonk pavlo. Taka kollon ailem ki ek bhav sobhecho sevok zalea uprant dusreank modot korunk suru korina, punn tachea poilinch thaun toxem korunk suru korta.—1 Tim. 3:8-10, 13.

13. Bhav Christian-an dakhoilʼlea mogak lagon to porot vhoddil koso zaunk pavlo?

¹³ Tumi poilim ghoddie ek vhoddil vo sobhecho sevok mhunn seva kortale zait. Tea vellar tumi Jehova ani bhav-bhoinnanchea mogak lagon jem kitem kelem tem Jehova visronk na. (1 Kor. 15:58) Ani aiz pasun tumi tea mogak lagon jem kitem kortat tacher Jehova dhean dita. Hea vixim amkam Christian nanvachea eka bhavacho onubhov asa. Vhoddil mhunn seva korchi tachi zobabdari geli tednam, to ekdom niraxi zalo. Tori astana, to mhunntta: “Hanv vhoddil asum vo nasum, mogak lagon Jehovachi seva korunk hanv mhojean zata tem soglem kortolom mhunn hanvem tharailem.” Thoddea tempa uprant, taka porot vhoddil mhunn nemlo. To sangta: “Hanv hi zobabdari gheunk fatti-fuddem zatalom. Punn Jehova mhaka doia dakhoun porot vhoddil  mhunn seva korunk sondhi dita zalear, tachea ani bhav-bhoinnanchea moga pasot hanv ti zobabdari samballttolom mhunn hanvem tharailem.”

14. Bhoinn Elena-chea utrantlean tumkam kitem xikonk mellʼllem?

¹⁴ Jehovachim sevokam tanchea xezareancho pasun mog kortat. (Mt. 22:37-39) Udharonnak, Georgia-nt ravpi bhoinn Elena oxem sangta: “Poilim, hanv fokot Jehovachea mogak lagon porgottnnent voitalem. Punn Jehova pasot mhozo mog vaddot gelo toso, lokam pasotui mhozo mog vaddlo. Tor tankam koslea oddchonneancho fuddo korunk poddtta ani khoincho vixoi tanchea kallzak lagtolo tea vixim hanv chintʼtalem. Jitlem chodd hanv tea vixim chintʼtalem, titlench chodd hanv tankam modot korunk sodhtalem.”—Rom. 10:13-15.

15-16. Chitramnim dakhoilam toxem, dusreank mog dakhoilʼlean koslim besanvam mellttat?

¹⁵ Ami bhav-bhoinnank mog dakhoitat tednam, tankanch nhoi, punn herank pasun faido zata. Hea vixim amkam bhav Paolo ani tache bailecho onubhov asa. COVID-19 pidda suru zali tednam, bhavan ani tache bailen zaitea zannttea bhoinnank porgottnni korunk tanchi electronic sadhonam koxim uzar korchim tem xikoilem. Survatek eke bhoinnik, tem koxem uzar korchem tem xikonk kotthin zalem. Punn uprant ti xikli. Oxem korun tinnem aplea soireank Ugddas Disa pasot apounnem dilem. Ani videoconference-a udexim satth zannam hajir zalim! Tor bhav Paolo ani tachea bailechea vavrak lagon, bhoinnik toxench tichea soireank  pasun faido zalo. Uprant te bhoinnin, bhavak oxem boroilem: “Amkam zanntteank xikoilʼlea pasot tuje khub upkar. Jehova amchi kitli kallji gheta ani tunvem amkam kitli modot keli tem hanv kednanch visorchina.”

¹⁶ Hea ani oslea her onubhovantlean, bhav Paolo ek mhotvachem lisanv xiklo. Tem mhunnttlear, amkam asloli tank vo gineana poros, dusreank mog dakhovop chodd mhotvachem. Bhav sangta: “Hanv poilim sorkittachi dekhrekh korpi mhunn seva kortalom. Tea vellar hanvem dilʼlim bhaxonnam bhav-bhoinnam ghoddie visorlim astolim. Punn hanvem tankam ji modot kelʼli, tem tankam azun poriant ugddas asa mhunn atam mhaka kollon ailem.”

17. Ami mog dakhoitat tednam anik konnak faido zata?

¹⁷ Ami dusreank mog dakhoitat tednam, amkam svota pasun, ami chintunk xokonant tea toren faido zaunk xokta. Oxench, New Zealand-ant ravpi bhav Jonathan-ak ghoddlem. Eka Sonvarak donparchea vellar, ek pioneer bhav koddok votant rosteachea kuxik ravon porgottnni korta tem tannem polloilem. Tor fuddlea Sonvara thaun, apunnui tachea sangata porgottnni kortolo mhunn tannem tharailem. Punn oxem kelolean, taka svota kitlo faido zatolo, tem taka tea vellar khobor nasli. Jonathan sangta: “Mhaka porgottnni korunk titli umed nasli. Punn to bhav dusream lagim koxe toren uloita, ani taka hea kamant kitlo boro porinnam melltta tem polloun, porgottnnechea kamam pasot mhozo-i mog vaddlo. Toxench, ami ghott ixtt zale. Tea bhair, tannem mhaka Jehovache sevent vaddavoll korunk, porgottnnechea kamant khuxalkai melloun gheunk, ani Jehovak anik lagim soronk modot keli.”

18. Ami kitem kelʼlem Jehovak zai?

¹⁸ Jehovak zai ami tachea pasot ani bhav-bhoinnam pasot mog vaddoilolo. Tor hea lekhant xiklim toxim, Jehova pasot mog vaddounk ami Bible vachunk zai, tacher niall korunk zai, ani sodanch tache lagim magnnem korunk zai. Toxench bhav-bhoinnam pasot mog vaddounk, ami tankam veg-vegllea vattamnim modot korunk zai. Hea toren Jehova ani bhav-bhoinnam pasot amcho mog vaddtta toso, ami Jehovak anikui lagim sortolim, ani amchi ixttagot sodankal ghott urtoli.