1. Odruxttam pasot poilinch toiari korop kiteak borem?

 TOIARI kelolean amcho jiv vanchonk xokta. Zoxem, je lok odruxtta pasot poilinch toiari kortat, tim chodd korun odruxtt ghoddtta tednam tantuntlean vanchonk xoktat ani dusreankui modot korunk xoktat. Lokank modot korunk vavurta toslem Europe-antlem ek songotton oxem mhunntta: “Bori toiari kelolean tumcho jiv salvar zaunk xokta.”

2. Vhodd sonkoxtta pasot ami adim fuddench kiteak toiar ravonk zai? (Matev 24:44)

² “Vhodd sonkoxtt” okosmat suru zatolo. (Mt. 24:21) Ani ho sonkoxtt, her soglea sonkoxttam poros vegllo astolo. Karonn to dis ietoloch mhunn amkam adim fuddench khobor asa. Sumar 2,000 vorsam poilim, Jezun aplea pattlavdarank tea disa pasot toiar ravat mhunn sanglem. (Matev 24:44 vachat.) Tor ami tea disa pasot toiar asat zalear, tea ekdom kotthin vellar amkam thir ravonk ani dusreankui toxem korunk modot korunk sompem zatolem.—Luk. 21:36.

3. Thir ravlolean, toxench doia-maia ani mog aslolean, vhodd sonkoxtta pasot toiar ravonk amkam koxi modot zatoli?

³ Vhodd sonkoxtta pasot toiar ravonk amkam asonk zai tea tin gunnancher ami dhean dium-ia. Tea vellar, amkam zhoddttecho sondex porgottunk sanglo ani lokamnim amcho virodh kelo zalear ami kitem kortolim? (Prok. 16:21) Ami thir ravtat zalear, ami Jehovachi adnea pallttolim ani to amchi rakhonn kortolo mhunn visvas dovortolim. Toxench, tea vellar amchea bhav-bhoinnam lagim thoddeoch vostu asat vo kainch na zalear ami kitem kortolim? (Hab. 3:17, 18) Amkam tanchi doia-maia asa zalear, ami tankam gorjecheo vostu diun modot kortolim. Tea bhair, tea vellar raxttrancho zomo amcher akromonn korta tednam, amkam thoddea vella pasot amchea bhav-bhoinnam sangata ravonk poddlem zalear ami kitem kortolim? (Ez. 38:10-12) Ami kallzantlean tancho mog kortat zalear, ami tea ekdom kotthin vellacho fuddo korunk pavtolim.

4. Sodanch thir ravonk, toxench doia-maia ani mog dakhoit ravonk Bible amkam koso urba dita?

⁴ Devachem Utor amkam sodanch thir ravonk, toxench doia-maia ani mog  dakhoit ravonk urba dita. Zoxem, Lukas 21:19-ant sanglam: “Tumi thir ravlim zalear tumi tumcho jiv vachounk pavtolim.” Toxench, Koloskarank 3:12-nt mhunnttlam: ‘Doia-maia ho gunn apnnaiat.’ Ani 1 Tesalonikekarank 4:9, 10-nt boroilam: “Ekamekacho pritimog korunk Devan tumkam xikoilam. . . . Tori astana, to odik-odik vaddot vochum-di mhonn ami tumche lagim magtanv.” Him utram tea Kristanvank boroilolim, jim poilim thaunuch thir aslim ani dusreank doia-maia ani mog dakhoitalim. Tori astana, tannim he gunn vaddoit ravchi goroz asli. Ami pasun oxench korunk zai. Tor oxem korunk, poilea xekddeantlea Kristanvamnim he gunn koxe dakhoile, ami tanchi dekh koxi gheunk zata, ani oxe toren vhodd sonkoxtta pasot ami toiar asat mhunn koxem dakhounk zata tem polloum-ia.

5. Poilea xekddeantlim Kristanvam thir koxim ravlim?

⁵ Poilea xekddeantlea Kristanvank thir ravchi goroz asli. (Heb. 10:36) Tea kallar jietolea choddxea lokank asleo, tosleoch oddchonneo hea Kristanvank asleo. Punn hachea bhair, tim Kristanv aslim dekhun tankam anikui oddchonneo asleo. Zaitea zannank, fokot Judev dhormik fuddari ani Romi odhikaream thaunuch nhoi, punn tanchea svotachea famili thaunui dhumallo sosunk poddttalo. (Mt. 10:21) Tea bhair, sobhent futt ghaltolea dhorm-broxtt munxanche xikounne thaun tankam apli rakhonn korunk poddttali. (D.I. 20:29, 30) Tori astana, tim thir ravlim. (Prok. 2:3) Koxim? Thir ravlolim tea Bible-ant sanglolea munxanchea udharonnancher tannim niall kelo, zoxem Job. (Jak. 5:10, 11) Tannim ghottai mellonk Jehova lagim magnnem kelem. (D.I. 4:29-31) Ani tim thir ravlim zalear, Jehova tankam inam ditolo hacher tannim aplem dhean dovorlem.—D.I. 5:41.

6. Bhoinn Merita-n virodh sosunk jem kitem kelem tan­tuntlean tumi kitem xiktat?

⁶ Bible ani Bible-acher adarit prokaxonamnim jim munxam thir ravlim mhunn sanglam, tanchea udharonnancher ami obheas ani niall kelolean amkam pasun thir ravonk modot zatoli. Oxem kelolean, Albania-nt ravtolea Merita nanvachea bhoinnik modot zali. Tichi famil ticho virodh kortali ani tika khub boddoitali. Ti mhunntta: “Jobachea udharonnacher hanvem obheas kelo tednam tem mhojea kallzak laglem. Taka zaite tras sosunk poddle ani te tras konnak lagon aile, tem taka khobor asonk na. Tori astana, tannem oxem mhunnttlem: ‘Moro porian mhojem [“visvaxiponn,” NW] kednach soddun diuncho na.’ (Job 27:5) Jobak jem sosunk poddlem tachea mukhar mhoje tras kainch nhoi oxem hanvem chintlem. Tea bhair mhojer konnak lagon tras ietat tem mhaka khobor asli.”

7. Atam tumkam vhoddle tras naslear pasun, tumi kitem korunk xikonk zai?

⁷ Thir ravonk, ami sodanch kallzant thaun Jehovak amche sogle uske sangop gorjechem. (Filp. 4:6; 1 Tes. 5:17) Atam tumkam ghoddie vhoddle tras nasot. Punn tumi bejar astat vo kitem korchem tem tumkam somzona tednam tumi Jehova koddlean margdorxon magtat kai? Tumi zor atam, dor disak ietat tea lhan-lhan oddchonneam vixim Jehovak sodanch sangtat zalear, fuddarak vhoddleo oddchonneo ietoleo tednam tumi Jehova lagim modot magonk fattim sorchimnant. Ani tumkam kednam ani koxi modot korchi tem Jehovak khobor asa mhunn tumkam purnn khatri astoli.—St. 27:1, 3.

8. Ami aiz oddchonnechea vellar thir ravlear fuddarakui thir ravonk pavtolim mhunn bhoinn Mira-chea onubhovantlean koxem kolltta? (Jakob 1:2-4) (Chitr pasun polloiat.)

⁸ Aiz amcher oddchonneo ietat tednam ami thir ravlim zalear, ami chodd korun vhodd sonkoxttachea vellar pasun thir ravonk pavtolim. (Rom. 5:3) Oxem ami kiteak mhunnonk zata? Zaitea bhav-bhoinnank, tim dor eke oddchonne vellar thir ravlim dekhun, tachea uprant  ­ailolea ­oddchonne vellar pasun tim thir ravonk xoklim mhunn kollon ailem. Jehovachea modotin tannim oddchonneancho fuddo kelo tednam, Jehova tankam modot korunk toiar asa mhunn tancho bhavarth anik ghott zalo. Ani hea vorvim, tachea uprant ailolea oddchonneam vellar tim thir ravonk pavlim. (Jakob 1:2-4 vachat.) Hench, Albania-nt pioneer mhunn seva korpi Mira nanvache eke bhoinnin onubhovlem. Sogle tras ticheach jivitant asat, oxem bhoinnik thodde pavtti distalem mhunn ti sangta. Punn uprant Jehovan gelʼlea 20 vorsam poriant tika koxi modot keli, tem ti ugddasak haddtta ani apleakuch oxem sangta: ‘Jehovak visvaxi rav. Soddun dinaka. Tunvem atam soddun dilem zalear, Jehovache modotin itlim-i vorsam tum visvaxi ravlem tacho koslo faido?’ Tor ami pasun, Jehovan amkam adim oddchonneancho fuddo korunk koxi modot kelea tacher niall korunk zata. Ami dor ek oddchonne vellar thir ravtat tednam, Jehova dhean dita ani to amkam inam ditolo mhunn ami khatri dovrunk zata. (Mt. 5:10-12) Ami atanch thir ravonk xiklim zalear, vhodd sonkoxttachea vellar pasun thir ravonk amcho nichov ghott astolo.

9. Antiokantlea Kristanvamnim, Judeiantlea bhav-bhoinnank doia-maia koxi dakhoili?

⁹ Judeiant vhoddli bhuk poddli tednam kitem zalem tacher dhean diat. Tea vixim Sirientlea Antiok sobhek kollʼllem tednam, tankam Judeiantlea bhav-bhoinnanchi doia-maia disli mhunn kainch dubhav na. Punn tea bhair, tankam modot korunk pasun tim fuddem sorlim. Ani “Antiokantlea xisamnim Judeiant ravtolea bhavank ap-aplea tanki pormonnem modot dhaddunk tharav ghetlo.” (D.I. 11:27-30) Judeiantlim bhav-bhoinnam pois ravtalim tem khorem, punn Antiokantlim Kristanvam tankam modot korunk fattim soronk nant.—1 Ju. 3:17, 18.

10. Ami odruxttak sampoddlolea bhav-bhoinnank, khoinchea vattamnim doia-maia dakhounk zata? (Chitr pasun polloiat.)

¹⁰ Aiz ek odruxtt ghoddtta tednam, vo bhav-bhoinnank her kotthin poristhitincho fuddo korunk poddtta tednam, ami doia-maia koxi dakhounk zata? Tankam modot korunk ami rokddench fuddem soronk zata. Ami modot korunk xoktat toslem kam asa kai, mhunn ami vhoddilank vicharunk zata. Toxench, sonvsarbhorchea kamam pasot denngim diunk zatat vo odruxttak sampoddloleam pasot magnnem korunk zata. b (Mho. 17:17) Udharonnak, 2020-ant, COVID-19 pidda posorli tednam, bhav-bhoinnank modot korunk sonvsarbhor 950-am poros chodd, Odruxttak Sampoddloleank Modot Korpi Somiti toiar keleo. Tantunt kam kortolea bhav-bhoinnam pasot ami khub upkari asat. Tankam bhav-bhoinnam pasot doia-maia asa dekhun, tim tankam gorjecheo vostu pavoitat, Jehovachi seva korit ravonk modot kortat, ani thodde pavtti jea vattarant bhav-bhoinnanchim ghoram vo Raj-ghoram moddon geleant, tim porot bandtat vo novim kortat.—2 Kor. 8:1-4 sor korat.

11. Doia-maia dakhoilʼlean amchea sorginchea Bapak koxi mhoima melltta?

¹¹ Odruxtt zalea uprant ami bhav-bhoinnank doia-maia dakhoitat tem polloun dusreancher boro porinnam zata. Udharonnak, 2019-ant, Hurricane Dorian-ak lagon, Bahamas-ant, ek Raj-ghoracho nas zalo. Tor, bhav tem Raj-ghor porot bandtale tednam, tannim Sakxi naslolea eka contractor-a lagim umkench kam korunk kitlo khorch zatolo mhunn vicharlem. Tednam tannem mhunnttlem: “Kam korunk goroz aslolim sadhonam hanv tumkam funkott diunk toiar asa. Toxench, munis ani samanui diunk toiar asa. Hanv hem tumchea songottnne pasot korunk sodhtam. Tumi tumchea ixttank jea ritin modot kortat tem mhaka khub avoddlem.” Aiz sonvsarachea choddxea lokank Jehovachi vollokh na. Punn zaitim zannam, Jehovachim Sakxi kortat tea kamacher dhean ditat. Tor ami bhav-bhoinnank doia-maia dakhoitat tem polloun, her lok, “doien bhorlolo”  amcho Dev Jehovak vollkhonk pavtat mhunn zannam zaun amkam kitli khuxalkai melltta nhoi!—Ef. 2:4.

12. Aiz ami doia-maia dakhoilear, vhodd sonkoxtta vellar amkam koxi modot zatoli? (Prokasovnni 13:16, 17)

¹² Vhodd sonkoxttachea vellar, amkam bhav-bhoinnank doia-maia dakhounchi goroz kiteak poddttoli? Je lok sonvsarachea sorkarank tenko dinant, tankam atam toxench vhodd sonkoxttachea vellar tras sosunk poddttole mhunn Bible-ant sanglam. (Prokasovnni 13:16, 17 vachat.) Ghoddie tea vellar, amchea bhav-bhoinnank gorjecheo vostu mellonk kotthin zait. Tor ami doia-maia dakhoun tankam modot kortat zalear, Raza Jezu Krist, neai korunk ietolo tednam to amkam oxem mhunnttolo: “Rajeache daiji zaiat.”—Mt. 25:34-40.

13. Romkarank 15:7-a pormonnem, poilea xekddeantlea Kristanvamnim eka-meka pasot mog koso vaddoilo?

¹³ Poilea xekddeantlim Kristanvam eka-mekacho khub mog kortalim. Punn oxem korop tankam sompem aslem kai? Hem zannam zaunk, Romant aslolea sobhentlea bhav-bhoinnam vixim chintat. Tanchea modlim thoddim zannam Judev aslim, jim lhanponnim thaun Moizesa udexim ­dilʼle Kaide pallttalim. Toxench thoddim zannam, her raxttrantlim aslim ani tanchi sonskruti veglli asli. Tea bhair, thoddim zannam gulamam aslim, toxench thodde ghoddie patranv asle zanchea khala gulam asle. Tor tanchea modem ontor aslear pasun, tannim eka-meka pasot mog koso vaddoilo? Apostl Paulun tankam “eka-mekak apnnaiat” mhunn urba dili. (Romkarank 15:7 vachat.) Paulun sanglolea utrancho orth kitem aslo? “Eka-mekak apnnaiat” mhunn bhaxantor kelʼlea utrancho orth, dusreank mogan ieukar divop vo tancho poramos korop, zoxem tankam ghora apovop, vo tanchea sangata ixttagot korop oso zaun asa. Udharonnak, Paulun Filemonak, Onesimus nanvachea pollon ailʼlea eka chakrak koxe toren ieukar diuncho, tea vixim oxem sanglem: “Moipasan taka-i ghe.” (Fil. 17) Toxench Akuilan ani Prisilan, Apolosak ieukar dilo. Taka Kristache xikounne vixim titli chodd khobor nasli. Punn “tim taka aplea borabor gheun gelim.” (D.I. 18:26) Tor him Kristanvam eka-meka poros khub vegllim aslim. Punn hea karonnak lagon, tanche modem futt poddonk diunchea bodlek, tannim mogan eka-mekak apnnailim.

14. Bhoinn Anna ani tichea ghovan, dusreank mog koso dakhoilo?

¹⁴ Ami pasun bhav-bhoinnam sangata ixttagot korun ani tanchea sangata vell sarun, tancho mog kortat mhunn dakhounk zata. Oxem kelolean, tim-ui amcho mog korunk fuddem sortolim. (2 Kor. 6:11-13) Hea vixim amkam bhoinn Anna ani tichea ghovacho onubhov asa. Tankam Ostom Afrikent, mixinori mhunn seva korunk dhaddlim. Punn tim thoim vochon thoddeach vella uprant, COVID-19 pidda suru zali. Hea karonnak lagon tim bhav-bhoinnank Raj-ghorant mellonk xokonaslim. Tor tannim bhav-bhoinnam pasot aplo mog koso dakhoilo? Tim videoconference-a udexim tanchea lagim ulounk laglim, ani tankam anik bore toren zannam zaunk sodhtalim mhunn tankam sanglem. Tannim dakhoilʼlea mogak lagon, bhav-bhoinnam tanchim khub upkari aslim, ani tim-ui tankam zaite pavtti fon ani message korunk laglim. Tor bhoinn Anna ani ticho ghov dusreank mog dakhounk kiteak fuddem sorlim? Bhoinn sangta: “Mhaka ani mhojea familik, borea ani vaitt poristhitint bhav-bhoinnamnim zo mog dakhoilo, to hanv kednanch visorchem na. Tanchea udharonnak lagon, mhaka-i dusreank mog dakhounk urba mellʼlli.”

15. Bhoinn Vanessa-chea udharonnantlean, soglea torechea bhav-bhoinnancho mog korchea vixim tumi kitem xiklim? (Chitr pasun polloiat.)

¹⁵ Amchea modlim zaitim zannam osle sobhent voitat, zoim veg-vegllea sonskrutaiechim ani sobhavachim bhav-bhoinnam asat. Tor bhav-bhoinnanchea borea gunnancher dhean diun, ami tanchea pasot amcho mog vaddounk zata. New Zealand-ant seva korpi, Vanessa nanvache eke bhoinnik, tichea sobhentlea thoddea bhav-bhoinnam sangata boro sombond dovrunk kotth­in  zatalem. Tor jea bhav-bhoinnancho sobhav tika rag haddttalo, tanchea thaun ti pois ravchi na, punn tanchea sangata anik vell sartoli mhunn tinnem tharailem. Oxem kelolean, Jehovak tanche vixim kitem avoddtta tem ti zannam zaunk pavli. Ti sangta: “Mhozo ghov sorkittacho dekhrekh korpi zalo tednam thaun, ami veg-vegllea sobhavachea anikui zaitea bhav-bhoinnank mellttat. Ani tanchea sangata ixttagot korunk mhaka sompem zata. Atam mhaka veg-vegllea bhav-bhoinnank mellonk khub avoddtta. Ani Jehovak pasun veg-vegllea torecho lok avoddtta dekhun, tannem tankam apli bhokti korunk oddun haddleant.” Tor ami dusreank Jehovache nodren pollounk proitn kortat tednam, ami tancho mog kortat mhunn dakhoun ditat.—2 Kor. 8:24.

16. Vhodd sonkoxttachea vellar, bhav-bhoinnancho mog korop kiteak gorjechem astolem? (Chitr pasun polloiat.)

¹⁶ Vhodd sonkoxttachea vellar, bhav-bhoinnancho mog korop gorjechem astolem. To sonkoxtt suru zatolo tednam Jehova amkam koso rakhtolo? Adlea kallar Babilonacher akromonn zalem tednam, Jehovan aplea lokank kitem nirdexon dilʼlem tacher dhean diat. Tannem mhunnttlolem: “Cholat, porje mhoje, tumchea ap-aplea kuddamnim vochat, tumche pattlean tumchim daram dhampat. Krodhacho zhopatto vocho porian ilo vogot lipun ravat.” (Iz. 26:20) Vhodd sonkoxttachea vellar, amkam pasun oslench nirdexon mellonk xokta. Versant sanglolea “kuddamnim” hacho orth, ghoddie amcheo sobha zaunk xoktat. Tor bhav-bhoinnam sangata ami ekvottan Jehovachi seva korit ravlim zalear, vhodd sonkoxttachea vellar, Jehova amkam rakhtolo mhunn bhas dita. Tea pasot ami amchea bhav-bhoinnank fokot sosun gheunkuch nhoi, punn tancho mog korunk pasun atam vavr korit ravonk zai. Oxem kelolean, ami salvar zaunk xoktat!

17. Atanch toiari kelear, vhodd sonkoxttachea vellar ami kitem korunk pavtolim?

¹⁷ “Sorvesporacho Vhoddlo Dis,” soglea munxam pasot khub kotthin vell astolo. (Zef. 1:14, 15) Jehovachea lokank pasun trasancho fuddo korunk poddttolo. Tor atanch toiari kelear, ami tea vellar xant ravonk ani dusreank modot korunk pavtolim. Amchea mukhar kitle-i vhodd tras ailearui ami thir ravtolim. Amchim bhav-bhoinnam trasant astolim tednam, doia-maia dakhoun ani gorjecheo vostu diun, tankam modot korunk amchean zata tem soglem ami kortolim. Ani aiz zor ami amchea bhav-bhoinnancho mog kortat zalear, fuddarak pasun ami tancho mog kortolim. Oxem kelolean, Jehova amkam sasnachea jivitacho inam ditolo, zoim amkam odruxtt ani trasancho ugddas pasun ieuncho na.—Iz. 65:17.