OBHEASACHO LEKH 28
GIT 123 Loyally Submitting to Theocratic Order
Sot Kitem Tem Tumi Vollkhonk Xoktat Kai?
“Tumchea bhenddak sotacho pottʼtto ghott bandun . . . thir ubim ravat.”—EF. 6:14.
MUKHEL MUDʼDO
Jehova koddlean ami jem sot xikleant ani Soitan ani amche virodhi jeo fotti posraitat, tanchea modem ontor vollkhonk ami kitem korunk zai, tem ami hea lekhant polloitolim.
1. Sota vixim tumkam koxem bhogta?
DEVACHEA Utrant aslolea sotancho ami khub mog kortat ani amcho bhavarth tancheruch adarit asa. (Rom. 10:17) Toxench, Jehovan Kristi sobha, “sotacho khambo ani buniad” koxi staplea mhunn amkam purnn khatri asa. (1 Tim. 3:15) Tea bhair, amchea modem “fuddakar ghetat” tanchem ami khaltikaien aikotat. (Heb. 13:17) Karonn te Devachea Utrantlean sot xikoitat ani Devachi khuxi korunk amkam modot zata toslem margdorxon ditat.
2. Jakob 5:19-a pormonnem ami sot apnnailea uprant pasun kitem zaunk xokta?
2 Tori astana, ami sot apnnailea uprant ani Jehovachea songottnne thaun ieta tem margdorxon pallop gorjechem mhunn vollkhon ghetlea uprant pasun, ami sotachea vatte voilean koddsoron vochonk xoktat. (Jakob 5:19 vachat.) Ani ami oxench kelʼlem Soitanak zai. Bible-acher vo Jehovachea songottnne thaun ieta tea margdorxonacher ami visvas dovrop bond kelʼlem taka zai.—Ef. 4:14.
3. Ami sotak chittkon ravop kiteak gorjechem? (Efezkarank 6:13, 14)
3 Efezkarank 6:13, 14 vachat. Beginuch, Soitan naddbudʼdeo uzar korun vo ekdom khoreo koxeo distat tosleo khotteo khobro posraun, soglea raxttrank Jehovachea add vochonk uksaitolo. (Prok. 16:13, 14) Toxench, amkam koxe-i bhaxen fosounk to poilim poros anikui chodd proitn kortolo mhunn ami zannant. (Prok. 12:9) Tea pasot, ami sot ani fotti modem ontor vollkhonk xikop ani sotak chittkon ravop ekdom gorjechem. (Rom. 6:17; 1 Ped. 1:22) Oxem kelear, ami vhodd sonkoxtta vellar salvar zaunk xoktat.
4. Ami hea lekhant kitem polloitolim?
4 Bible-antlem sot vollkhon gheunk ani Jehovachea songottnne thaun ieta tem margdorxon manun gheunk amkam khoinche don gunn modot kortole, tem ami hea lekhant polloitolim. Toxench, sotak chittkon ravonk ami khoinchim tin panvlam gheunk zai tem-ui ami polloitolim.
SOT VOLLKHON GHEUNK AMKAM KOSLE GUNN ASONK ZAI?
5. Jehovachi bhirant amkam sot vollkhon gheunk koxi modot korta?
5 Jehovachi bhirant. Amkam Jehovachi bhirant asta tednam ami tacho itlo mog kortat ki taka manvona toslem ami kainch korunk sodhinant. Hea pasot, kitem sarkem ani kitem sarkem nhoi, ani sot ani fotti modem kitem ontor asa tem ami zannam zaunk sodhtat. Karonn oxem kelolean, amkam Jehovachi maniotai mellttoli. (Mho. 2:3-6; Heb. 5:14) Tor Jehova pasot amkam aslolea moga poros amkam munxanchi chodd bhirant asonk favona. Karonn choddxe pavtt munxank jem avoddtta, tem Jehovak avoddna.
6. Munxanchi bhirant aslolean Izraelache dha bhedi sot vollkhonk koxe chukle?
6 Jehova poros chodd amkam munxanchi bhirant asta tednam, ami sota thaun koddsoron vochonk xoktat. Hea vixim, Bhasailʼlo Des pollounk je 12 bhedi gelʼle tanchea sovem kitem ghoddlem tacher dhean diat. Tanchea modlea dha bhediank Jehovachea moga poros chodd Kananitkaranchi bhirant asli. Tea pasot tannim her Izraelitkarank oxem sanglem: “Tea loka kodde zhuzunk amche kodde ghoddchem na, kiteak te amche-von bollixtt.” (Lok. 13:27-31) Tor munxache nodren, Kananitkar Izraelitkaram poros bollixtt asle tem khorem. Punn Izraelitkar Kananitkaram add zhuzonk pavchenant, hem mhunnop chukichem aslem. Karonn oxem kelear, tannim Jehova vixim chintunk na mhunn amkam kollon ieta. Izraelitkaramnim kitem kelʼlem Jehovak zai aslem, tacher hea dha bhediamnim dhean diunk zai aslem. Toxench, Jehovan adim tanchea pasot kitem kelʼlem tacher tannim niall korunk zai aslem. Oxem kelolean, Sorvpodvedar Jehovachea bollak sor kelear Kananitkaranchem boll kainch nhoi mhunn tankam kollttolem aslem. Punn Joshua ani Kaleb, hea bhavarth naslolea bhediam sarke nasle. Te Jehovachi maniotai melloun gheunk sodhtale. Tea pasot tannim lokank mhunnttlem: “Ami Sorvesporak mandleanv zalear to amkam thoim vhortolo, ani . . . [to] ganv amkam ditolo.”—Lok. 14:6-9.
7. Ami Jehova pasot amchi bhirant koxi vaddounk zata? (Chitr pasun polloiat.)
7 Dor ek nirnnoi ghetana, Jehovak kitem manvota tem ami chintunk zai. (St. 16:8) Oxem kelʼlean, Jehova pasot amchi bhirant ami vaddounk pavtolim. Tumi Bible vachtana tumkanch vicharat: ‘Hanv tea poristhitint aslom zalear, hanv kitem kortolom aslom?ʼ Udharonnak, tea dha bhediamnim Izrael lokank, te Kananitkaram add zoit vhoronk pavchenant mhunn sanglem tednam tumi kitem kortolim aslim? Tanchem aikon, munxachea bhirantik lagon tumi fattim sortolim aslim kai? Vo tumi Jehovacho mog kortat dekhun taka manvota tem tumi kortolim aslim? Joshua ani Kaleb sangtale tem sot mhunn Izraelache akʼkhe pillgen manun gheunk na. Ani taka lagon, tannim Bhasailʼlea Desant vochpachi sondhi hogddaili.—Lok. 14:10, 22, 23.
Tumi konnanchem aikotolim aslim? (Peregraf 7 polloiat)
8. Ami koslo gunn vaddounk vavr korunk zai, ani kiteak?
8 Khaltikai. Jehova khalteank sot kolloita. (Mt. 11:25) Ani ami khaltim aslim dekhunuch, sot xikonk ami dusream koddlean modot ghetli. (D.I. 8:30, 31) Tori astana, gorvixtt zaina zaunk ami chotrai dovrunk zai. Karonn ami gorvixtt zalim zalear, Bible-antlim totvam ani Jehovache songottnne thaun ieta tem margdorxon jitlem mhotvachem asa, titlench amchem chintop pasun mhotvachem asa mhunn amkam distolem.
9. Sodanch khaltim ravonk ami kitem korunk zai?
9 Sodanch khaltim ravonk, Jehova mukhar ami kainch nhoi mhunn ami ugddas dovrunk zai. (St. 8:3, 4) Toxench, khaltikai ho gunn vaddounk ani Jehova koddlean xikonk amchi itsa vaddounk, ami tachea lagim magonk zai. Oxem kelear, aplem Utor ani aplea songottnne udexim Jehova jem kitem xikoita, tem amchea chintnam poros chodd mhotvachem mhunn ugddasak haddunk to amkam modot kortolo. Ami Bible vachtana osle purave sodhunk zai, jea vorvim Jehova khalteancho mog korta ani gorvixttancho dves korta mhunn kollon ieta. Ani khas korun, amkam thoddo odhikar melltta ani dusreanchem dhean amcher ieta tosli kosli-i zobabdari amkam melltta tednam, ami khaltim ravonk anikui vavr korop khub gorjechem asa.
SOTAK CHITTKON RAVONK AMI KITEM KORUNK ZAI?
10. Aplea lokank margdorxon diunk Jehovan konnank uzar kele?
10 Jehovachea songottnne thaun melltta tea margdorxonacher sodanch visvas dovrat. Adlea kallar Izraelitkarank margdorxon diunk, Jehovan Moizesak uzar kelo ani tachea uprant Joshuak uzar kelo. (Josh. 1:16, 17) Hea munxank Jehovan nemleat mhunn Izraelitkaram manun ghetalim tednam, tankam besanvam mellttalim. Xemboramnim vorsam uprant, Kristi sobha stapon zali tednam, aplea lokank margdorxon diunk Jehovan 12 apostlank uzar kele. (D.I. 8:14, 15) Ani hea zomeant, uprant Jeruzalemantle vhoddilui mellon asle. Tanchea koddlean mellttalem tem margdorxon apnnailʼlean “sobhencho bhavarth ghott zait gelo ani disan-dis xisancho ankddo vaddot gelo.” (D.I. 16:4, 5) Aiz ami pasun Jehovachea songottnne thaun melltta tem margdorxon apnnaitat tednam, Jehova amkam besanvam dita. Punn fuddakar gheupi bhavank Jehovan odhikar dila mhunn ami manun ghenant zalear, Jehovak koxem distolem? Hacho zobab zannam zaunk, Izraelitkaram Bhasailʼlea Desant voitalim tednam kitem ghoddlem tacher dhean dium-ia.
11. Jehovan Moizesak dilʼlea odhikaracho virodh kelo tanchem kitem zalem? (Chitr pasun polloiat.)
11 Tea vellar, Izraelantle nanv-voste munis, Jehovan Moizesak odhikar dila mhunn manun gheunk toiar nasle. Tannim mhunnttlem: “Porjentle soglle Sorvesporache [“povitr,” NW] zaun asat, ani Sorvespor amchea sangatak asa.” (Lok. 16:1-3) Hem khorem aslem ki “porjentle soglle” Devachea nodren povitr asle. Punn tanchea modem fuddakar gheunk Jehovan Moizesak vinchun kaddlolo. (Lok. 16:28) Tor he munis Moizesacho virodh kortale tednam, khorem mhunnttlear, te Jehovacho virodh kortale. Tannim Jehovak kitem zai tacher nhoi, punn apleak kitem zai, tem mhunnttlear, podvi ani vhoddlem nanv tacher dhean dilem. Tea pasot, Jehovan tankam ani tankam sangat ditolea hozaramnim lokank jivexim marlim. (Lok. 16:30-35, 41, 49) Tor aiz pasun, Jehovache songottnne thaun ieta tem margdorxon manun gheunk toiar nant, tim Jehovak manvonant mhunn ami ugddas dovrunk zai.
Tumi konnank tenko ditolim aslim? (Peregraf 11 polloiat)
12. Jehovache songottnnecher ami kiteak visvas dovrunk zata?
12 Jehovache songottnnecher ami kiteak visvas dovrunk zata? Bible-antlea eka umkeach sota vixim ami amchea chintpant bodol korunk zai, vo ami jea toren Jehovachi seva kortalim tantunt ami bodol korunk zai mhunn Sonchalon Monddollak kolltta tednam, te rokddech bodlav kortat. (Mho. 4:18) Karonn her kitea-i poros, te Jehovak jem manvota tem korunk sodhtat. Toxench, tancho dor ek nirnnoi Devachea Utracher, mhunnche soglea Jehovachea sevokamnim pallunk zai tea xikounnechea adarit asonk, te apleachean zata tem soglem kortat.
13. “Boreo xikounneo” mhunnttlear kitem, ani ami kitem korunk zai?
13 ‘Borea xikounnek ghott dhorun ravat.’ (2 Tim. 1:13) “Boreo xikounneo” mhunnttlear, Bible-ant asloli Kristi xikounn. (Ju. 17:17) Ani amchi patienni, hea xikounnechea adarit asa. Jehovache songottnnen amkam hea xikounnek chittkon ravonk xikoilam. Tor ami oxem kortat tea meren amkam besanvam mellttolim.
14. Thoddim Kristanvam ‘borea xikounne’ thaun koxim koddsoron gelim?
14 ‘Borea xikounne’ thaun ami koddsorlim zalear kitem zaunk xokta? Hea vixim ek udharonn polloum-ia. Poilea xekddeantlim thoddim Kristanvam, Jehovacho dis ailo mhunn khotti khobor posraunk laglim. Hea vixim tankam ghoddie chitt pasun ailʼli astoli, ji apostl Paulun boroilʼli mhunn tannim chintlem. Punn tea vixim purave sodhunk vell ghenastana, Tesalonikentlea thoddea Kristanvamnim ti khobor manun ghetli ani tim dusreankui ti sangonk laglim. Punn Paulu tanchea borabor aslo tednam tannem tankam kitem xikoilʼlem tacho tannim ugddas kelʼlo zalear, tim foschim naslim. (2 Tes. 2:1-5) Paulun tankam tim aikotat tem soglem manun ghena zaunk solʼlo dilʼlo. Ani fuddarak tim anik fosona zaunk, tannem Tesalonikekarank boroilʼli dusri chitt hea utramnim sompoili: “Hanv Paulu, mhojea hatamnim tumkam nomoskar boroitam. Chitt boroilea to hanvuch mhunn tumkam kollonk hanv sodanch mhojea soglea chittimnim oxem boroitam.”—2 Tes. 3:17.
15. Khoreo koxeo distat toslea fottimnim fosona zaunk ami kitem korunk zai? Ek udharonn diat. (Chitram pasun polloiat.)
15 Paulun Tesalonikekarank jem boroilem tantuntlean ami kitem xiktat? Bible-achea add voita toslem kitem-i ami aikotat tednam vo ekdom ojapachi khobor ami aikotat tednam, ami zannvai uzar korunk zai. Kiteak? Soviet Union-achea vellar amchea dusmanamnim Sakxeank ek chitt dhaddloli. Tea chittint, thoddea bhavank Jehovachea songottnne thaun kuxin soron, tanchem ek vegllem songotton korunk sanglolem. Ti chitt khorench Sonchalon Monddollan dhaddloli oxem distalem. Punn Jehovachea songottnnek visvaxi aslole bhav, ti chitt vachun fosonk nant. Karonn tantunt jem boroilʼlem, ani te jem xiklole, tem ek-sarkem na mhunn tankam kollʼllem. Aiz amche dusman, internet ani social media uzar korun amkam ghuspaunk ani amchea modem futt ghalunk proitn kortat. Punn ami ‘amchim monam ghusponk diunk zainant.ʼ Oxem korunk, ami jem kitem aikotat vo vachtat tem ami Bible-antlean xikleant tea sotam pormonnem asa kai na tem ami zannam zaun gheunk zai.—2 Tes. 2:2; 1 Ju. 4:1.
Khoreo koxeo distat tosleo fotti aikon fosonakat (Peregraf 15 polloiat) a
16. Thoddim khotteo khobro posraitat zalear, Romkarank 16:17, 18 pormonnem ami kitem korunk zai?
16 Jehovachea visvaxi sevokam sangata ekvottant ravat. Ami amchea bhav-bhoinnam sangata ekvottan apli seva kelʼli Jehovak zai. Ani ami sotak chittkon ravtat tea meren, amchea modem ekvott astolo. Punn jim konn khotteo khobro posraitat, tim sobhent futt ghaltat. Ani Dev amkam “tanchea thaun pois ravat” mhunn sangta. Na zalear, tancheo khotteo khobro aikon, ami pasun Jehova thaun koddsoron voitolim.—Romkarank 16:17, 18 vachat.
17. Ami sot kitem tem zannam zaun taka chittkon ravtat tednam amkam koso faido zata?
17 Ami sot kitem tem zannam zatat ani taka chittkon ravtat tednam, ami Jehovak lagim sortolim ani amcho bhavarth ghott urtolo. (Ef. 4:15, 16) Toxench, Soitanachea khottea xikounnent ani khobramnim ami foschimnant. Ani vhodd sonkoxttachea vellar Jehova amchi rakhonn kortolo. Tor sot kitem tem zannam zaun taka chittkon ravat, “ani xanticho Dev tumchea sangata astolo.”—Filp. 4:8, 9.
GIT 122 Be Steadfast, Immovable!
a CHITRACHI MAHITI: Zaitea vorsam poilim Soviet Union-ant aslolea amchea bhavank ek chitt dhaddloli, ji mukhel ofisa thaun ailoli oxem tankam dislem. Punn khorem mhunnttlear, ti amchea dusmanamnim dhaddloli. Hea fottvant, tea ghoddnnecho dekhavo dakhoila. Aiz amche dusman Internet uzar korun Jehovachea songottnne vixim khotteo khobro posraitat.
