1. Filipkarank 2:3-a pormonnem khaltikai aslolean dusream sangata amchi ixttagot kiteak bori astoli?

AMKAM kitem borem tem Jehova sodanch zannam dekhun ami khaltikaien tacheo adnea pallunk zai. (Ef. 4:22-24) Khaltim aslolean Jehovachi khuxi korunk amchea jivitant ami poilo zago ditolim ani dusrim amchea poros vortim mhunn somzotolim. Oxem kelolean, Jehova sangata ani sobhentlea bhav-bhoinnam sangata amchi ixttagot bori urtoli.—Filipkarank 2:3 vachat.

2. Apostle Paulun sanglolea utrancho orth kitem ani ami hea lekhant kitem bhasabhas kortolim?

² Aiz sonvsarant lok, gorvixtt ani ap-svarthi * asat. Tea pasot tanchea sobhavacho amcher porinnam zaina zaunk ami chotur ravonk zai. Poilea xekddeachea Kristavamnim osleach dhokea thaun pois ravonk zai aslem. Taka lagon Apostl Paulun Romant aslolea Kristanvank oxem boroilem: “Tumkam zonn-ekleak sangtam: favo tache poros odik tumchech vixim chintum nakat; punn . . . zonn-eklean moriadin aplem mol korchem.” (Rom. 12:3) Tor ami amche vixim chintunk zai punn ami khalti asat zalear amcheach vixim chodd chintchim na mhunn Paulu hanga sangonk sodhtalo. Hea lekhant ami tin vattamnim amchea vixim chodduch chintinastana koxem ravonk zata tem bhasabhas kortolim. Teo tin vatto mhunnttlear (1) amchea kazari jivitant, (2) amkam Devache sevent zobabdari melltta tednam, ani (3) ami social media uzar kortat tednam.

3. Kazari jivitant thodde pavtti ghov-bailanchem eka-meka sangata kiteak pottona, ani oxem zata tednam tim kitem kortat?

³ Ghov-bailamnim khuxal ravlolim Jehovak zai. Punn tim oporipurnn aslolean thoddea vixoi-ancher tanchem pottona. Khorem mhunnttlear kazari zoddpeank thoddeo somosia astoleo mhunn Paulun boroilolem. (1 Kor. 7:28) Thoddim zoddpim sodanch zhogoddttat ani taka lagon tim eka-meka lagim kazar zaunk nasli zalear borem zatlem aslem oxem tankam dista. Uprant tim sonvsarantlea lokam sarkim divors ghetlear borem ani divors ghetlearuch khuxal astolim mhunn chintat.

4. Somosia ietat tednam ami kitem korchem nhoi?

⁴ Amchea kazari jivitant oddchonneo ietat tednam amchean kazari jivitachi zobabdari samballunk zaina mhunn ami divors gheunchea vixim chintunk favona. (Mt. 5:32) Punn Devachea Utra pormonnem divors gheunk ekuch karonn mhunnttlear loingik pozoddponn mhunn ami ugddas dovrunk zai. Paulun boroiloleo teo somosia kazari jivitant ietat tednam, ami gorvixtt asat zalear osle prosn vicharunk xoktat: ‘Hea kazara udexim khorench mhojeo gorzo purnn zatat kai? Mhaka favo to mog khorench melltta kai? Dusrea sangata kazar zalear mhaka chodd khuxalkai mellttoli kai?’ Polloiat, he prosn vichartana ekleachem dhean svotacher ieta. Tujem kalliz kitem sangta vo tuka kitem borem dista tem kor anik goroz poddlear tujem kazar pasun modd mhunn hea sonvsarachi zannvai sangta. Punn Devachi zannvai “ap-aplea faideachem kitem tem polleum nakat, punn dusreak kitem faideak poddtolem tem polleiat” mhunn sangta. (Filp. 2:4) Tor Jehovak tumchem kazari jivit moddlolem naka punn tem ttikon urlolem zai. (Mt. 19:6) Svota vixim poilem chintchea poros, kitem kelear Jehova khuxal zatolo tem tumi chintlolem taka zai.

5. Efezkarank 5:33-a pormonnem, ghovan ani bailen eka-meka lagim koxem vagonk zai?

 ⁵ Ghovan ani bailen eka-meka lagim mogan ani respedan vagonk zai. (Efezkarank 5:33 vachat.) Karonn gheunchea poros diunchem borem mhunn Bible xikoita. (Itihas 20:35) Kazari zoddpeank eka-mekak mog ani resped dakhounk khoincho gunn modot kortolo? Khaltikai. Khalti aslolim ghov-bailam aplo svotacho nhoi “punn peleacho,” mhunnchem dusreacho faido polloitolim.—1 Kor. 10:24.

6. Steven ani Stephanie-chea utrantlean tumkam kitem xikonk melltta?

⁶ Khaltikai aslolean zaitea kazari zoddpeank tanchea jivitant khuxalkai melloun gheunk modot zalea. Udharonnak Steven nanvacho ek ghov mhunntta: “Tumi sangata mellon kam kortat zalear, khas korun somosia ietat tednam tumi sangata mellon teo suttaveo korunk proitn kortolim. ‘Mhaka kitem boreak poddttolem?’ oxem chintchea bodlek ‘amkam kitem boreak poddttolem?’ oxem tumi chintolim.” Tachi bail Stephanie-kui oxench dista. Ti mhunntta: “Eka zhogddekara borabor jieunk konnakuch naka. Somosia ietat tednam amchi somosia kitem ti ami sodhun kaddttat. Tea uprant ami magnnem kortat, tacher sodh kortat ani tea vixim uloitat. Ami eka-mekacheo chuki sodhun kaddchea bodlek somosia suttaveo korcho proitn kortat.” Ghov-bailam apunn eka-meka poros vortim mhunn chintinant tednam tanchem kazari jivit khuxalkaiechem asta.

7. Jehovachea songottnent eka bhavak zobabdari melltta tednam tannem ti koxi purnn korunk zai?

⁷ Jehovachi seva ami khoinchea-i toren korum, to ek sueog mhunn ami lekhtat. (St. 27:4; 84:10) Ek bhav Jehovachea songottnent chodd seva korunk sodhta zalear tem borem. Khorem mhunnttlear, Bible oxem sangta: “Zo konn sobhecho fuddari [“Dekhrekh korpi,” NW] zaunchi axa ballgita, to borea kamachi axa ballgita.” (1 Tim. 3:1) Punn taka ek zobabdari melltta tednam tannem aplea vixim dusream poros chodd chintchem nhoi. (Lukas 17:7-10) Tor dusreanchi khaltikaien seva korop ho tacho dhei asonk zai.—2 Kor. 12:15.

8. Diotrefes, Uzziah, ani Absalom hanchea udharonnantlean ami kitem xiktat?

⁸ Jea munxamnim aplea vixim chodduch chintlem, tanchim xittkaunnechim udharonnam amkam Bible-ant mellttat. Diotrefes sobhent “sogleam-von vhoddlo” zaunk sodhtalo. (3 Juanv 9, NW) Uzziah-k gorv aslo dekhun Jehovan taka nemunk na tem kam korunk to fuddem sorlo. (2 It. 26:16-21) Absalom raza zaunk sodhtalo. Tor lokancho tenko mellonk lagon, apunn tancho mog korta mhunn to tankam voilea-voir dakhoitalo. (2 Sam. 15:2-6) Apleakuch man zoddunk sodhtat toslim Jehovak avoddnant mhunn hea Bible-antlea udharonnantlean amkam kollon ieta. (Mho. 25:27) Jim konn gorvixtt asat ani zankam dusreamnim apli vakhann’nni keloli zai tim xevottak trasant sampoddttat.—Mho. 16:18.

9. Jezun koslem udharonn dovorlem?

⁹ Punn Jezu vixim chintat, to tanchea bhaxen naslo. “To Devachea rupan aslo tori astana, tannem Devachi podvi kaddun gheunchi, mhunnchem apnnem Deva bhaxen zaunchem oxem kednanch chintunk na.” (Filp. 2:6, NW) Jehova uprant fokot Jezuk chodd odhikar asa. Tori astana Jezu aplea vixim chodd chintina. Tannem aplea xisank sanglem: “Tumam-somestam modem zo konn odik lhan toch soglleam poros vhodd.” (Lukas 9:48) Jezu bhaxen khaltikai dakhoitat toslea pioneer, sobheche sevok, vhoddil, ani sorkittachi dekh-rekh korpeam sangata kam korop kitlem khuxalkaiechem! Ami khalti asat zalear ami dusreank chodd mog dakhoitolim, zo mog aplea xisam modem astolo mhunn Jezun sanglolem.—Juanv 13:35.

10. Tumchea sobhent somosia astat tednam tachea vixim vhoddil kainch korinant mhunn tumkam dista zalear, tumi kitem korunk zai?

 ¹⁰ Tumchea sobhent somosia asat ani tanche vixim vhoddil kainch korinant oxem tumkam dista zalear, tumi kitem korunk zai? Tanchea add gunngunnchea bodlek fuddakar ghetoleank tumi tenko ditat tednam tumi khaltikai dakhoitat. (Heb. 13:17) Oxem korunk tumi tumkanch vicharat: ‘Mhaka dixtti poddtta teo somosia suttaveo korop khoreanich titlem gorjechem asa kai? Teo somosia suttaveo korcho ho sarko vell zaun asa kai? Teo suttaveo korchi zobabdari mhoji kai? Khorem mhunnttlear, hanv sobhecho ekvott bandhun haddunk sodhtam, vo hanv mhakach chodd mhotv diunk sodhtam?’

11. Efezkarank 4:2, 3-ant sanglolea pormonnem ami Jehovachi seva khaltikaien kortat tednam kitem zata?

¹¹ Amchea tanke poros Jehova amchi khaltikai chodd valorachi mhunn lekhta. Ani ami kitlea borea toren kam kortat tachea poros ami ekvottkai samballunk kitem kortat, tacho to chodd valor korta. Taka lagon Jehovachi seva khaltikaien korunk tumchean zata titlem korat ani oxem kelolean tumi sobhent ekvottkai bandhun haddunk modot kortolim. (Efezkarank 4:2, 3 vachat.) Porgottnnent tumchean zata titlem korat. Borim kamam korun dusreanchi seva korunk vatto sodhat. Sobhent zankam zobabdari na, tosleancho pasun poramos korat. (Mt. 6:1-4; Lukas 14:12-14) Tumi tumchea bhav-bhoinnam sangata khaltikaien kam kortat tednam, tim fokot tumchi kola nhoi, punn tumchi khaltikai pasun polloitolim.

12. Ixttam korunk Bible amkam urba dita kai? Somzaiat.

¹² Amche ixtt ani famili sangata ami khuxalkaien vell sarlolo Jehovak zai. (St.  133:1) Jezuk borim ixttam aslim. (Juanv 15:15) Khorim ixttam aslolean kitem faide asat tea vixim Bible sangta. (Mho. 17:17; 18:24) Ani ami dusream sangata mellon vell sarinastana ravop borem nhoi mhunn pasun Bible sangta. (Mho. 18:1) Zaitim ixttam korunk ani eksurponn pois korunk social media ek bori vatt mhunn zaiteank dista. Punn social media uzar korchea vixim ami chotur ravonk zai.

13. Social media uzar kortat tim thoddim, eksurim ani niraxi kiteak astat?

¹³ Social media-cher dusreamnim ghatlolim utram ami chitram polloit ravtat tankam eksurponn ani niraxponn bhogta mhunn sodh korpi sangtat. Kiteak? Ek karonn mhunnttlear, lok social media-cher chodd korun aplea jivitant ghoddlolea borea ghoddnneanchech zoxem, aple ani aplea ixttanche ani bhovunk gel’lea zageanchem fottu ghaltat. Ek munis dusreamnim ghatlole hem fottu polloit ravta tednam to teo ghoddnneo aplea jivita sangata sor korunk lagta. Ani tednam aplea jivitant kai khas na mhunn taka disonk lagta. 19 vorsanchi ek Kristi bhoinn oxi mhunntta: “Sonvara-aitara sutti asta tednam lok moza kortat ani hanv ghora asa tem polloun mhaka nattkai zata ani hanv bejear zata.”

14. Social media uzar korchea vixim 1 Pedru 3:8-ant aslolo sol’lo amkam koso modot korta?

¹⁴ Ami social media amchea famili ani ixttam sangata ulounk uzar kortat tednam ami tacho boro upeog kortat. Punn thoddim, social media-cher aplim utram, fottu ani viddeo ghalun dusreanchem dhean apnnacher voddun gheunk proitn kortat tem tumi polloilam? Tim eke toren sogleank “mhaka polloiat” mhunn sangonk sodhtat. Thoddim social media-cher ghatlolea aplea fottu-am vixim vo heramnim ghatlolea fottu-am vixim vaitt vo burxim utram ghaltat. Punn Kristanvank khalti ravonk ani dusreanchem sukh-dukh aplem korunk urba dilea. Tor tim social media hea toren uzar korchimnant.—1 Pedru 3:8 vachat.

15. Ami amkanch chodd mhotvachim mhunn lekhina zaunk Bible amkam koso modot korta?

¹⁵ Tumi social media uzar kortat zalear tumi tumkanch vicharat: ‘Social media-cher hanv ghaltam tim utram, fottu ani viddeo-ntlean hanv mhoji boddai kortam oxem dista kai? Oxem korun hanv dusreanchea kallzant nosai vaddoitam kai?’ Bible sangta: “Sonvsarant mellta tem itlench: kuddichi moriadi-bhaili vondovnni, dolleanchi lobhi axa ani girestkaiechi boddai. Hem sogllem  Bapa-sun nhoi punn sonvsarantlem upzota.” (1 Juanv 2:16) Eka Bible bhaxantorant, “girestkaiechi boddai” hea utrank “dusream poros apunn mhotvacho mhunn dakhovop” oxem bhaxantor kelam. Kristanvam dusream poros apunn chodd mhotvachim mhunn chintinant. Tim Bible-antlo ho sol’lo pallttat: “Ami amchich boddai korum noie, ekamekak challoum noie, ekamekachi nattkai dhorum noie.” (Gal. 5:26) Sonvsarantli munxam gorvixtt asat. Ani tim, apunn dusream poros mhotvachim mhunn chintat. Punn ami khalti asat zalear ami tanchea bhaxen zaunchimnant.

16. Ami gorvixtt kiteak zaunchim nhoi?

¹⁶ Gorvixtt lok “moriadin aplem mol” korinant dekhun ami khaltikai vaddounchi goroz asa. (Rom. 12:3) Gorvixtt lok, zhogddekar ani dusream poros apunn chodd mhotvache mhunn somzotat. Tanchim chintnam ani korneo choddxe pavtt tankam ani toxench dusreank dukhoitat. Tim aplim chintnam bodolnant zalear, Soitan tanchim monam kudd’ddim ani broxtt korit ravtolo. (2 Kor. 4:4; 11:3) Punn ek khalto munis moriadin aplem mol kortolo, mhunnche to apleak sarke toren lekhtolo. Zaitea vattamnim dusrim aplea-von vortim asat mhunn to manun ghetolo. (Filp. 2:3) “Dev gorvixttank virodh korta ani vinomr kallzacheank Aplem bholeponn dakhoita” mhunn to ugddas dovorta. (1 Ped. 5:5) Apleak sarke toren lekhta to munis Jehovak aplo dusman korun ghena.

17. Sodanch khalti ravonk ami kitem korunk zai?

¹⁷ Sodanch khalti ravonk Bible-antlo ho sol’lo ami apnnaunk zai: “Pornnem patki soimb ani tacheo chali soddun, [ami] novea monxacho akar” gheum-ia. Hem korunk amkam khub vavurchem poddttolem. Jezu vixim xikon, zata titli ami tachi dekh gheunk proitn korunk zai. (Kol. 3:9, 10; 1 Ped. 2:21) Oxem kelear tumcho vavr nirfoll zauncho na. Ami khaltikai ho gunn utpon kelear amchi famil khuxal astoli. Sobhent ekvottkai bandhun haddunk ami modot kortolim. Ani social media udexim ami amchi boddai korchimnant. Ani sogleam-von mhotvachem mhunnttlear, amkam Jehovachem besanv ani maniotai astoli.