Hanv 1954-ant St. Paul, Minnesota, U.S.A.-ant zolmol’lom. Amchi famil chodd girest vo chodd gorib-ui nasli. Ami Roman Catholic aslim. Panch bhurgeam modlo hanv dusro aslo. Hanv ek Catholic iskolant voitalo ani hanv ek altar boy aslo. Tori astana, mhaka Bible-achem chodd ginean naslem. Sogleam vostunk ek Rochnnar Dev asa mhunn hanv patietalo, punn tachi bhokti korunk igorz mhaka modot kortoli oxem mhaka disonk na.

Hanv William Mitchell Law College-int xiktalo tea poilea vorsak Jehovache Sakxi mhojea ghorak bhett diunk aile. Tea vellar, hanv ghora kopdde dhutalo. Tor tea zoddpean magir ieta mhunn sanglem. Tim porot ailim tednam tankam vicharunk mhaka don prosn asle: “Borea lokank jivitant ies kiteak mellona?” ani “Munxank khori khuxalkai koxi mellonk xokta?” Hanvem tanchea thaun The Truth That Leads to Eternal Life ani panchvea rongacho New World Translation of the Holy Scriptures, ghetlo. Tanchea lagim Bible obheas gheunk pasun hanv toiar zalom, zachea udexim hanv zaiteo noveo vostu xikonk pavlom. Munxachi razvottki dukh-tras,  on’neai ani vaitt ghoddnneo kaddun uddounk xokona dekhun munxanchea sorkarak ies mellonk na mhunn mhaka kollon ailem. Tor, Devache sorkar prithumer razvottki choloitolem mhunn hanv xiklo tednam hanv khub khuxal zalo.

Hanvem 1982 hea vorsachea survatek Jehovak somorponn kelem ani uprant tea vorsak St. Paul Civic Center-ant zalolea “Kingdom Truth” odhivexonant hanvem bautizm ghetlo. Tachea fuddlea sumanak hanvem teach zagear ieun vokil zaunk porikxa dili ani Otumbrachea survatek hanv tea porikxent pass zalom mhunn mhaka kollon ailem. Tor hanv vokil mhunn kam korunk xoktalo.

Teach, “Kingdom Truth” Odhivexonant hanv Mike Richardson-ak mell’llo. To Brooklyn Bethel-ant seva kortalo. Thoim mukhel ofisant ek legal ofis suru kelam mhunn tannem mhaka sanglem. Tednam mhaka Itihas 8:36-ant sanglolea Ethiopieachea hizddeachim utram ugddasak ailim ani hanvem mhakach vicharlem: ‘Legal ofisant kam korunk mhaka kosli addkholl asa?’ Tor Bethel seva korunk hanvem fom bhorlem.

Hanv Jehovacho Sakxi zalo mhunn mhojim avoi-bapui khuxal naslim. Hanvem Bethel-ant kam kelem zalear vokil zaun kitem faido mhunn mhojea bapain mhaka vicharlem. Hanv thoim ap-khuxen vavurtolo mhunn hanvem taka somzailem. Punn mhozo khorch bhagounk mhoineak mhaka $75 mellttole mhunn hanvem taka sanglem. Tea vellar Bethel-ant seva kortoleank tancho khorch bhagounk titlech poixe mellttale.

Hanvem adim fuddench eka korttant kam kortolo mhunn utor dilolem dekhun mhaka rokddench Bethel-ant vochonk mellonk na. Tor hanvem mhoji Bethel seva Brooklyn, New York-ant 1984 hea vorsak suru keli. Mhaka Legal Ofisant kam korunk dhaddlo. Bethel-ant voichea poilim hanvem tea korttant kam kelolem dekhun mhaka faideak poddlem.

Novembr 1983-ant New Jersey-chea, Jersey Xarant aslolem Stanley Theater Jehovachea Sakxeamnim viktem ghetlem. Tor tea building-ant lightichem ani udkachem kam korunk bhavamnim porvangi magli. Tea odhikareank mellonk gel’le tednam bhavamnim tankam, Jehovache Sakxi tem Stanley Theater fuddem odhivexonachem hol mhunn uzar kortole mhunn sanglem. Hi ek oddchonn asli. Karonn tea xarachea kaidea pormonnem bhokti korunk uzar kortat teo building-o lok ravtat tea zagearuch asonk zai asleo. Punn Stanley Theater veapar cholta tea zagear aslem. Tor tea xarachea odhikareamnim bhavank porvangi diunk nakarlem. Bhavamnim tea odhikaream lagim portun porvangi magli. Punn tannim tankam ti diunk na.

 Hanv Bethel-ant gelea uprant poilea sumanatuch songottnnen porvangi mellonk na mhunn federal district korttant kes ghatli. Hanvem tednanch St. Paul, Minnesota-ant aslolea federal district korttant don vorsam kam kel’lem dekhun oslea kesim vixim mhaka khobor asli. Stanley Theater veg-vegllea somarombam pasot uzar kortale, zoxem movie dakhounk vo songit somaromba pasot. Toxem zalear, eka dhormik somarombak lagon kiteak uzar korunk zaina mhunn amchea eka vokilan vicharlem. Federal district korttan hea vixim bhasabhas keli ani Jersey Xarache odhikari amchea dhormik svotontrtaie add geleat mhunn nirnnoi ghetlo. Korttan tea odhikareank, amkam zai asli ti porvangi diunk sanglem. Songottnnen Jehovachem kam fuddem vhoronk korttachi modot ghetli ani Jehovan tacher koxem besanv ghatlem tem hanvem polloilem. Tantunt mhaka ek lhan bhag asa mhunn hanv khub khuxal zalom.

Bhavamnim, Jersey City Assembly Hall sudharnni korpachem ek vhodd kam suru kelem. Kam suru korun ekach vorsa bhitor 8 Setembr, 1985-ant teach holant 79-vem Gilead graduation zalem. Jehovak hea kamant modot korunk hanv khub khuxal zalo. Bethel-ant ieunchea poilim hanv vokil mhunn jem kam kortalom, tachea poros chodd khuxalkai mhaka mell’lli. Jehova mhaka anik zaiteo kesi zhuzonk uzar kortolo mhunn hanvem tednam chintunk pasun naslem.

1980 ani tachea uprant thoddim vorsam porian, hospital-antle dotor ottra vorsam poros chodd pirai aslolea Sakxeank rogot nastana vokhod gheunchea tanchea hok’kak man dinasle. Gorbest bailank anik tras zatale karonn rogot dina zalear bhurgim zolmolea uprant tim melim zalear tankam avoi aschi na oxem neai korpeank distalem. Tor oslea bailank rogot nakarunk hok’k dinasle.

Dezembr 29, 1988-ant, Bhoinn Denise Nicoleau-n aplea cheddeak zolm dilea uprant tichem khub rogot gelem. Tichem hemoglobin 5.0 poros unnem zalem. Tor tichea jivak dok’kho aslo dekhun dotoran tika rogot gheunk sanglem. Punn Bhoinn Nicoleau-n nakarlem. Dusrea disa sokallim hospittol-achea odhikareamnim eka neai korpeachi porvangi gheun tika forsan rogot diunk ievzonn keli. Bhoinn Nicoleau vo ticho ghov kitem sangta tem kainch aikonastana ani tankam kainch sangonastana tea neai korpean Bhoinn Nicoleau-k rogot diunk hospittol-ak porvangi dili.

Bhoinn Nicoleau-k, tichea ghovan ani tanchea familichea her sodoxiamnim rogot diunk nakarlem. Tori astana, Dezembr 30 tarker Sukrara, hospittol-achea dotoramnim tika rogot choddoilem. Tika rogot choddoitana tichea familiche zaite sodox ani don vhoddil tichea bed-a bhonvtonni ube ravle dekhun tea disa sanjer tankam pulisamnim dhorun vhele. Dusrea disa New York Xarant ani tachea  bhonvtonnchea xaramnim, newspaper, T.V ani radio station-acher he ghoddnne vixim khobro aileo.

Somara sokallim hanv mukhel Neai Korpi Milton Mollen-a kodden vochon uloilom. Hanvem taka tea kesint kitem ghoddlem tem sanglem. Dusrea neai korpean ti kes korttan ghenastana, rogot diunk porvangi dili mhunn hanvem taka sanglem. Tea disa donparam tea kesi vixim ani taka lagu zata tea kaideam vixim bhasabhas korunk neai korpi Mollen-an mhaka aplea ofisant apoilo. Philip Brumley, jea bhava sangata hanv Bethel-ant kam kortalo to mhojea sangata Neai Korpi Mollen-achea ofisant tea sanjer ailo. Neai korpean hospittol-achea vokilak pasun thoim apoilo. Amchea modem borench pettlem. Tor tea vellar Bhav Brumley-n “matxea xantponni uloi” mhunn mhaka paper-ar boroun dakhoilem. Tannem dil’lo ho sol’lo khub boro aslo, karonn to vokil sangta tem chukichem mhunn dakhoitana hanv khub ragar zatalo.

Sumar ek vora uprant, Neai Korpi Mollen-an dusrea disa sokallim sogleant poilim apunn hi kes ghetolo mhunn sanglem. Neai Korpi Mollen-achea ofisa thaun ami bhair sortana, “faleam tea hospittolachea vokilak sompem zaunchem na” oxem tannem mhunnttlem. Bhoinn Nicoleau-ak rogot divop sarkem mhunn dakhoun diunk tea hospittol-achea vokilak kotthin zatolem mhunn to sangonk sodhtalo. Tachea hea utramnim ami hi kes jikonk xokta mhunn Jehova khatri diunk sodhtalo mhunn mhaka dislem. Apli khuxi purnn korunk Jehova amkam koso uzar kortalo tem polloun hanv khub khuxal zalo.

Fuddlea disa sokallim ami kitem sangche asat tem toiar korunk ami ratik khub vell porian kam kelem. Brooklyn Bethel-a thaun kortt khub laginch aslo. Tor Legal Ofisantle ami sumar bara zann thoim cholonuch gele. Amchi kes char neai korpeamnim aikolea uprant, forsan rogot divop chukichem aslem mhunn tannim tharailem. High korttan Bhoinn Nicoleau-k zoit dilem ani ek duent kitem sangta tem aikonastana taka koslem vokhod diunk zai tachi porvangi korttan divop, hem eka nagrikachea mullavea hok’ka add voita mhunn nirnnoi ghetlo.

Hachea thoddeach tempa uprant, Bhoinn Nicoleau-k rogot nakarunk hok’k asa mhunn New York-achea soglea-von vhoddlea korttan nirnnoi ghetlo. United States-achea korttamnim, rogta sombondit char kesimnim nirnnoi ghetlo. Tantunt modot korunk mhaka sondhi mell’lli. Ani hi tantuntli poili kes asli. (“ United  States-achea Supreme Korttamnim Mell’llolem Zoit” hem boks polloiat.) Tea bhair, Bethel-antlea vokilamnim her kesimnim kam kortana hanvem tanchea sangata kam kelem, zoxem bhurgeank konnam lagim dovorchem, divors, zomin ani buildingo uzar korchea vixim asloleo kesi. Hankam sombondit kesincher pasun hanvem kam kelem.

Poilech pavtti hanv Dawn-ak mell’llo tednam ti divors zaloli tin bhurgeanchi avoi asli. Ti kamak voitali ani pioneer seva kortali. Tika jivitant zaite tras asle, tori astana Jehovachi seva korcho ticho nichov polloun hanv khub ojap zalom. 1992-ant New York xarant zalolea “Light Bearers” Zil’la Odhivexonak hanv taka porot mell’llom. Tednam, kazar zauncho dhei dovrun eka-mekachi anink chodd vollokh korun gheum-ia mhunn hanvem tika vicharlem. Jehovachi seva aplea jivitant poilea zagear dovorta tosli ani mogall sobhavachi bail asop Jehova thaun ek vhodd dennem zaun asa. Amchea kazari jivitant Dawn-an ani hanvem sangata khub boro vell sarlo.—Mho. 31:12.

Ami kazar zalim tednam bhurgim 11, 13, ani 16 vorsanchim aslim. Hanv tancho ek boro bapui zaunk sodhtalo. Hanv tancho khoro bapui nhoi zalear pasun amchea prokaxonamnim oslea poristhitint hanvem kitem korunk zai hea vixim boro sodh korun hanvem tem apnnailem. Vorsam gelim toxim, oddchonneo aileo. Punn bhurgim mhaka, patiepa sarko ixtt ani ek mogall bapui mhunn manun ghetat dekhun hanv khuxal zalo. Amchea bhurgeanchea ixttank amchem ghor sodanch uktem aslem, ani he tornnatte amchea ghora ietale tednam ami khub khuxal zatalim.

2013-ant Dawn ani hanv amchea zanttea avoi-bapaichi kallji gheunk Wisconsin-ant ravonk gelim. Ojapachem mhunnttlear, tea vellar mhoji Bethel seva bondh zaunk na. Ek temporary volunteer mhunn mhaka amchea songottnnek kaidea vatten modot korit ravonk sondhi mell’lli.

Setembr 2018-ant, mhojea golleant sodanch thonddi bhorta ti hanvem polloili. Laginchea eka dotoran mhaka topaslo, punn ti kiteak lagon zata tem taka kollonk na. Uprant anik eka dotoran mhaka nervanchea dotorak mellonk sanglem. Janer 2019-ant anik eka dotoran mhaka khub thoddeach lokank zata toslem ek duens zalam mhunn sanglem. Tea duensak lagon mukhar mhojea ak’khea kuddicher probhav poddcho aslo.

Tin disam uprant, hanv ice-skating kortana poddlo. Mhojea uzvea hatachea monkottak fracture mell’llo. Hanv sodanch ice-skating kortalom ani tantunt hanv borom aslom. Punn mhojea muscles-ancher mhaka aslolo tabo atam unno zata tem mhaka kollon ailem. Mhojea hea duensak lagon mhaka rokddench ulounk, bhovonk ani gillonk kotthin zaunk laglem.

Ek vokil mhunn Jehovachea songottnnek adar diunk mhaka sondhi mell’lli mhunn hanv khub khuxal. Dotor, vokil ani neai korpi vachtat toslea masikamnim zaite lekh borounk mhaka sondhi mell’llea mhunn hanv khuxal asa. Jehovachea lokancher rogot nastana opresanv korunk ani tankam zai tim vokhdam vinchun kaddche hok’k samballunk hanvem sonvsarbhor bhaxonnam dileant. Tori astana, Lukas 17:10-ant sanglam toxem mhaka dista: “Chalto-bextto chakor hanv, hanvem korunk zai aslem tench hanvem kelem.” (Povitr Pustok - Novo Korar)