1. “Sot” hea utracho orth kitem?

“TUKA sot koxem mell’llem?” “Tum lhanponnim thaun sotant aslo?” “Sotant aslear tuka kitlim vorsam zalim?” Osle prosn konnem-i tumkam vicharleat astole vo tumi konnank tori vicharleat astole. “Sot” hea utracho orth kitem? Sot hem utor ami kitem patietat, ami Devachi bhokti koxi kortat ani ami koxim jietat tem sangonk uzar kortat. ‘Sotant aslolim’ tim munxam Bible kitem xikoita tem zannam astat, ani Bible-antlea totvam pormonnem jietat. Ani haka lagon, tim fottkirea dhormachea xikounne thaun svotontr zatat ani Soitanachea sonvsarant jietat zalear pasun tankam khuxalkai melltta.—Juanv 8:32.

2. Juanv 13:34, 35-ant sanglolea pormonnem, survatek ek munis sot kiteak apnnaunk xokta?

² Survatek tunvem kiteak lagon sot apnnailem? Ghoddie Jehovachea lokancho sobhav vo vagnnuk tuka avoddli astoli. (1 Ped. 2:12) Vo tannim dakhoil’lo mog tuka avoddlo astolo. Poile pavtti mittingent ietat tednam, thoim kitem sanglam tachea poros chodd, zaiteak tankam dakhoilolo mog ugddasak urta. Hem novem nhoi, karonn Jezuchea xisam modem aslolea mogak lagon te tache xis mhunn kollon ietolem, oxem Jezun poilinch sanglolem. (Juanv 13:34, 35 vachat.) Punn Devachea lokam modem aslolea moga bhair, amkam ghott bhavarth zai zalear ami kitem tori korunk zai.

3. Devacher aslolo amcho bhavarth fokot bhav-bhoinnam dakhoitat tea mogacheruch adarit asa zalear kitem zaunk xokta?

³ Devachea lokam modem fokot mog aslear amcho bhavarth ghott zauncho na. Kiteak? Chintat, ek bhav vo bhoinn, vo ek vhoddil vo pioneer, ek gombhir patok adarta. Vo ek bhav vo bhoinn eke ritin tuka dukhoita, vo konnui sot soddun ami manta tem chukichem mhunn sangon dhorm broxtt korpi zata. Oxem ghoddtta tednam, tumi  niraxi zaun Jehovachi seva korchi soddun ditolim kai? Tor ami mhunnonk sodhtat tem hem: Amkam Devacher ghott bhavarth asonk zai zalear, amcho bhavarth Jehova sangata amkam aslolea vhodd ixttagoticher adarit asonk zai. Dusrim koxim vagtat tacheruch tumcho bhavarth adarit asa zalear, tumcho bhavarth ghott urcho na. Jehova vixim ani tachea lokam vixim tuka koxem bhogta tacheruch tumcho bhavarth adarlolo asa zalear, tumcho bhavarth ghott zauncho na. Bodlek, tumcho bhavarth ghott korunk zai zalear, tumi Bible obheas korunk zai, tumi xiktat tachi somzonni gheunk zai, ani sodh korun Jehova vixim xiktat tem khorem zaun asa mhunn tumi khatri korun gheunk zai.—Rom. 12:2.

4. Matev 13:3-6, 20, 21-ant sanglolea pormonnem, bhavarthachi porikxa zata tednam thoddim kitem kortat?

⁴ Thoddim sot “hurben manun” ghetolim, punn tanchea jivitant porikxa ietat tednam tancho bhavarth rokddoch haltolo mhunn Jezun sanglolem. (Matev 13:3-6, 20, 21 vachat.) Jezucho pattlav kortat tankam trasancho ani somoxiancho fuddo korcho poddtta mhunn tankam ghoddie somzonk na astolem. (Mt. 16:24) Vo eka Kristanvachea jivitant fokot besanvanch astolim ani oddchonneo ascheo na mhunn tankam dislem astolem. Punn aichea hea sonvsarant oddchonneo astoleoch. Amchea jivitant thodde bodlav zaunk xoktat, zaka lagon amcho sontos unno zaunk puro.—St. 6:6; Up. 9:11.

5. Aplea lagim sot asa mhunn choddxea bhav-bhoinnank khatri asa, oxem ami kiteak mhunnonk zata?

⁵ Aplea lagim sot asa mhunn amchea choddxea bhav-bhoinnank khatri asa. Hem ami koxem sangonk xoktat? Karonn ek bhav vo bhoinn tankam dukhoitat tednam vo chukichi vatt adartat tednam tancho bhavarth halona. (St. 119:165) Dor ek somosia ieta tednam tancho bhavarth unno nhoi punn ghott zait voita. (Jak. 1:2-4) Tumi oslo ghott bhavarth koso vaddounk xoktat?

6. Poilea xekddeantlea Kristanvancho bhavarth kiteacher adarit aslo?

⁶ Poilea xekddeantlea xisamnim, Devachea Utracher adarit aslolea aplea gineana udexim ani Jezu Kristachea xikounne udexim mhunnchem ‘xubhvortomanachea sota’ udexim aplo bhavarth ghott kelo. (Gal. 2:5) Hea sotant Jezu Kristachem bolidan ani tachea punorjivontponnachi xikounn ani toxench ami Kristanv zalolean mantat ti her sogli xikounn mellon asa. Ani heo xikounneo khoreo mhunn apostl Pauluk khatri asli. Kiteak? Karonn tannem Devachem Utor uzar korun “Kristan sosunk zai aslem ani To mel’leantlo punorjivont zaunk zai aslo mhonn . . . somzonni diun dakhoilem.” (Itihas 17:2, 3) Poilea xekddeantlea Kristanvamnim teo xikounneo manun ghetleo ani teo somzonk povitr xoktechea adaracher patieun ravlim. Heo xikounneo Devachea Utracher adarit asat mhunn tannim sodh korun khatri korun ghetli. (Itihas 17:11, 12; Heb. 5:14) Tancho bhavarth, tankam koxem dista tacher, vo tanchea bhavnancher adarit naslo. Vo bhav-bhoinnam sangata mellon ieunk borem dista dekhun tannim Jehovachi seva korunk na. Bodlek tancho bhavarth Deva vixim tankam aslolea ‘purnn somjikaiecher’ adarit aslo.—Kol. 1:9, 10.

7. Bible-antlea sotancher amkam bhavarth asa zalear ami kitem kortolim?

⁷ Bible-ant aslolim sotam kednanch bodolnant. (St. 119:160) Udharonnak, eka bhavan vo bhoinnin amkam dukhoilem zalear vo tannim ek gombir patok adarlem zalear, Bible-antlim sotam bodolnant. Ani toxench amkam somosia astat tednam pasun tim bodolnant. Tor Bible-achi xikounn amkam  bore toren khobor asonk zai. Ani ti xikounn khori mhunn ami khatri korun gheunk zai. Bible kitem xikoita tacher amkam ghott bhavarth asot zalear, kotthin poristhiti ieta tednam pasun ami Jehovak visvaxi ravtolim. Tumche lagim sot asa mhunn tumkam asloli khatri tumi koxi ghott korunk zata?

8. 2 Timotak 3:14, 15-a pormonnem, apnnam lagim sot asa mhunn Timotan koxi khatri korun ghetli?

⁸ Aplea lagim sot asa mhunn Timotak khatri asli. Hem to koso zannam aslo? (2 Timotak 3:14, 15 vachat.) Taka survatek tachea mai-n ani xemai-n “Povitr Pustokam” thaun xikoil’lo. Punn tannim xikoilea uprant, obheas korunk to pasun vell gheun vavurlo mhunn dubavuch na. Oxem kelolean to xikta tem sot mhunn to ‘manun gheunk’ pavlo. Uprant, Timotan, tache mai-n ani xemai-n Jezu Kristachi xikounn apnnaili. Jezuchea pattlavdaram modem aslolo mog Timotachea kallzak laglo astolo ani to tanchea sangata vell sarunk ani tanchi kallji gheunk sodhtalo. (Filp. 2:19, 20) Tacho bhavarth lokam pasot taka aslolea mogacher nhoi punn to khorem mhunn zannam aslolea Bible-antlea xikounneacher adarit aslo. Tea xikounneank lagon Jehova sangata tachi ixttagot ghott zaunk pavli. Tumi pasun Bible obheas kortat tednam, Jehova vixim tantunt kitem sanglam tachea vixim tumi purave sodhun khatri korun gheunk zai.

9. Khoinchea tin mullavea sotam vixim tumi khatri korun gheunk zai?

⁹ Survatek tumi unnean-unnim tin mullavea sotam vixim khatri korun gheunk zai. Poilem, Jehova Dev soglea vostuncho Rochnnar mhunn tumi khatri korun gheunk zai. (Sutt. 3:14, 15; Heb. 3:4; Prok. 4:11) Dusrem, Devan prerit korun Bible-a udexim munxank sondex dila mhunn tumi khatri korun gheunk zai. (2 Tim. 3:16, 17) Ani tisrem, Kristachea margdorxona khala Jehovan ek lokancho zomo songottit kela ani to zomo Jehovachim Sakxim mhunn tumkam khatri asonk zai. (Iz. 43:10-12; Juanv 14:6; Itihas 15:14) Him Bible-antlim sotam khorim mhunn khatri korun gheunk tumi Bible-antlim soglim sotam zannam zaunchi goroz na. ‘Borea ani vaitta modem ontor vollkhunchi’ tumchi tank uzar  korun tumchea lagim sot asa mhunn khatri korun ghevop tumcho dhei asonk zai.—Heb. 5:14.

10. Sot zannam zaunchea bhair ami anik kitem korunk zai?

¹⁰ Deva vixim, Bible-a vixim ani Devachea lokam vixim aslolim him tin mullavim sotam tumi khatri korun ghetlea uprant Bible uzar korun dusreank khatri diunk modot korop gorjechem. Kiteak? Karonn ami Jezuche xis zalolean amchem aikotat tankam sot xikounchi zobabdari amkam asa. * (1 Tim. 4:16) Ani dusreank Bible-antlea sotachi khatri korun gheunk ami modot kortat tednam tea sotancher amcho pasun bhavarth anik vaddttolo.

11. Paulun lokank koxem xikoilem tantuntlean ami kitem xikonk zata?

¹¹ Apostl Paulu lokank xikoitalo tednam “Moizesache Somurtint ani provadianchea pustokancher jem Jezu vixim boroil’lem asa, tachi . . . tankam khatri diunk proitn korit” ravlo. (Itihas 28:23) Dusreank sot xikoitana ami apostl Pauluchi dekh koxi gheunk zata? Ami tankam fokot Bible kitem xikoita tem sangchea bodlek tim xiktat tea Bible-antlea sotancher obheas korunk ani bariksannen chintunk modot korunk zai. Tannim sot amkam lagon apnnaun ghetlolem amkam naka. Punn, amchea mogall Deva vixim tim jem kitem xikleant tacher khatri dovrun, sot manun ghetlolem amkam zai.

12-13. Avoi-bapaimnim aplea bhurgeank sotant ghott ravonk koxi modot korunk zata?

¹² Avoi-bapaimno, tumchim bhurgim sodanch sotant ravlolim tumkam zai. Tor tankam sobhent borim ixttam asat zalear tancho bhavarth ghott zatolo oxem tumkam disot. Punn, Bible sangta tem sot mhunn tumchea bhurgeamnim khatri korun gheunk zai zalear fokot borim ixttam aslear pavona. Jehova sangata tanchi ghott ixttagot asonk zai. Ani Bible xikoita tem sot mhunn tankam khatri asonk zai.

¹³ Avoi-bapaimnim aplea bhurgeank Deva vixim xikounk zai zalear tannim Bible-ache bore videarthi zaun, aplea bhurgeank bori dekh dovrunk zai. Tim apunn jem kitem xiktat tacher niall korunk vell kaddunk zai. Tednanch, tim aplea bhurgeank toxem korunk xikounk pavtolim. Bible-acher sodh korunk aslolim sadhonam koxim uzar korchim tea vixim tim jea toren aplea Bible videartheank xikoitat teach toren tannim aplea bhurgeank xikounk zai. Tannim oxem kelem zalear tim aplea bhurgeank Jehovacho mog korunk ani Bible somzaunk to “visvaxi ani xannea chakrak” uzar korta mhunn bhorvonso dovrunk modot korunk pavtolim. (Mt. 24:45-47) Avoi-bapaimno, tumi tumchea bhurgeank  fokot Bible-antlim mullavim sotam diun vogi ravonakat. Tancho bhavarth ghott korunk tankam modot korat. Haka lagon tanchi tank ani pirai monant dovrun tankam ‘Devachea kholaiecheo vostu’ xikoiat.—1 Kor. 2:10, Povitr Pustok – Novo Korar.

14. Bible-antlea bhasaunnea vixim ami kiteak obheas korunk zai? (“ Heo Bhasaunneo Tumi Somzaunk Xoktat Kai?” hem boks pasun polloiat)

¹⁴ Jehovacher amcho bhavarth ghott korunk Bible-antleo bhasaunneo amkam khub modot kortat. Khoinchea bhasaunnea udexim tumcho bhavarth ghott zala? Tumi ghoddie ‘nimannea disam’ vixim aslolea bhasaunneank lagon tumkam modot zalea mhunn sangonk puro. (2 Tim. 3:1-5; Mt. 24:3, 7) Punn anik khoincheo purnn zal’leo bhasaunneo tumcho bhavarth ghott korunk xoktat? Udharonnak, Daniel odheai 2 vo Daniel odheai 11-ant asloleo bhasaunneo koxeo purnn zaleat ani zait asat hem tumi somzaunk xoktat kai? * Tumcho bhavarth Bible-acher adarit asa zalear to kednanch halcho na. Udharonnak, Sonvsarachea Dusrea Zhuza vellar Germany-nt amchea bhavamnim soslolea khor dhumallea vixim chintat. Nimannea disam vixim Bible-ant sanglolea bhasaunneanchi tankam purnn somzonni nasli. Tori astana, tankam Devachea Utracher ghott bhavarth aslo.

15-17. Bible obheas kelolean amchea bhavank Nazi thaun ailolea dhumalleak tondd diunk koxi modot zali?

¹⁵ Germany-int Nazichea hukuma khala amchea hozaramnim bhav-bhoinnank bondkhonnint ghatlolim. Hitler ani ek mukhel odhikari Heinrich Himmler Jehovachea Sakxeancho dves kortale. Bondkhonnint aslolea amchea bhoinnichea zomeak Himmler-an ek pavtti oxem mhunnttlem mhunn eke bhoinnin sanglem: “Tumcho Jehova ghoddie sorgar raj choloita astolo, punn hanga hea prithumer ami raj choloitat. Chodd vell konn togtole tem polloum-ia, tumi vo ami!” Jehovachea lokank visvaxi ravonk koxi modot zali?

¹⁶ 1914-ant Devachem Raj suru zalem mhunn Bible Videartheank khobor asli. Tankam khub  dhumallo soscho poddlo mhunn tim ojap zaunk nant. Punn Devacho ud’dhex purnn zaunk khoinchoch munxacho sorkar addaunk xokona mhunn Jehovachea lokank khatri asli. Khori bhokti kabar korunk vo Devachea Rajea poros xoktivont aslolo ek sorkar ghoddoun haddunk Hitler-achean zaunk na. Hitler-achi razvottki ek dis kabar zatolich mhunn amchea bhavank khatri asli.

¹⁷ Hi tanchi khatri chukichi nasli. Thoddea vorsam uprant, Nazi sorkar poddlem ani “hanga hea prithumer ami raz choloitat,” oxem mhunnttlolo to Heinrich Himmler aplo jiv salvar korunk pollon gelo. To pollon voitana adim bondkhonnint aslolo Bhav Lübke taka mell’llo. To taka vollkholo ani samko nirax zaun taka vicharlem: “Bible Videarthea, atam kitem zatolem?” Nazi sorkar ek dis poddttolem ani Jehovachea Sakxeank suttka mellttoli mhunn amkam poili thaunuch khobor asli mhunn Bhav Lübke-n Himmler-ak sanglem. Jehovachea Sakxeam add itlem vaitt uloil’lo Himmler-achem tondd atam bond poddlem. Ani thoddeach tempa uprant tannem aplo jiv kaddlo. Ami kitem xiktat? Ami Bible ani tantuntlea bhasaunnea vixim obheas kortat tednam Devacher halona toslo bhavarth dovrunk ani dhumallo ieta tednam ghott ravonk pavtat.—2 Ped. 1:19-21.

18. Paulun “sotachi odik unch vollokh ani odik khol onnbhov” hea vixim boroilem. Hem amkam gorjechem mhunn Juanv 6:67, 68 koso dakhoita?

¹⁸ Ami khorim Kristanv mhunn dison ietolem zalear dor eklean eka-mekacho mog korunk zai. Toxench amkam “sotachi odik unch vollokh ani odik khol onnbhov” zai. (Filp. 1:9) Na zalear dhorm broxtt korpeanchea ‘vareachea funkin ami halunk-dholunk xoktat.’ (Ef. 4:14) Poilea xekddeant, Jezuchea choddxea xisamnim tacho pattlav korcho bond kelo. Punn tea vellar, apostl Pedrun Jezu lagim ‘sasnik jivitachim utram’ asat mhunn sangon apleak tacher khatri asa mhunn dakhoili. (Juanv 6:67, 68 vachat.) Tea vellar Pedruk tachea utranchi sogli somzonni nasli. Tori astana, to Jezu Kristak visvaxi ravlo, karonn to Krista vixim sot somzolo. Bible jem kitem xikoita tacher tumi pasun tumcho bhavarth ghott korunk xoktat. Tumi oxem kortat zalear, kosle-i tras ieum, tumcho bhavarth ghott urtolo ani dusreancho bhavarth ghott korunk tumi modot kortolim.—2 Juanv 1, 2.