Hea “nimannea disamnim” Jehova aplea lokank sarki vatt dakhoita ani apleak lagim ieunk zai tem soglem dita mhunn ami zannant. (2 Tim. 3:1) Punn ami sogleamnim Jehovachea utrak pallo diunk zai. Hem ami kortolim vo na tem amcher asa. Amchi hi poristhiti ami oronn’nneant aslolea Israelitkaram sangata sor korunk zata. Korneticho vo trompeticho avaz aikotat tednam tannim kitem-tori korunk zai aslem.

‘Moidanar porjek ekttaunk, tech porim, tombu ukholcho vell pavlo mhonn porjek kollit korunk’ Jehovan Moizesak rupeacheo don trompeti kor mhunn sanglem. (Lok. 10:2) Iadnikan teo trompeti veg-vegllea toren vazounk zai asleo. Oxem kelolean lokank apnnem kitem korchem tem kollttalem. (Lok. 10:3-8) Aiz Jehovachea lokank veg-vegllea vattamnim margdorxon melltta. Tantuntleo tin vatto mhunnttlear: (1) Ami vhoddlea zomatimnim ektthaim ietat tednam, (2) Vhoddilank proxikxonn melltta tednam ani (3) Sobhechea koslea-i manddavollint bodol zata tednam. Tor atam ami hea vattamnim ani Israelitkaranchea trompetichea avazan kitem ek-sarkem aslem tem polloum-ia.

“Soglle porjen” Devachea tombuchea udente vatten ekttovloli Jehovak zai asli tednam iadnikamnim donui trompeti vazounk zai asleo. (Lok. 10:3) Israelitkaranchim soglim kullam tombu bhonvtim char bhagamnim ravtalim ani trompeticho avaz aikonk xoktalim. Jim tombunt bhitor sorchea vatte lagim ravtalim tim trompeticho avaz aikon thoddeach minttamnim pavtalim. Punn jim pois ravtalim tankam thoim pavonk chodd vell ani mhenot gheunchi poddttali. Tim lagim ravum vo pois ravum, tannim sogleamnim ektthaim ieun faido melloun ghetolo Jehovak zai aslo.

Aiz ami Devachea tombu mukhar hajir zainant. Punn ami Devachea lokam sangata mellon ieunk zai mhunn amkam sanglam. Ami pradexik odhivexonank ani her khas kariavollink mellon ietat tednam, amkam gorjechi mahiti ani suchounneo mellttat. Sonvsarbhor, soglea Jehovachea lokank ekuch kariavoll aikonk melltta. Hea zomatint ieunk amontronn manun ghetat tim, eka vhodd ani khuxal zomeacho bhag zaun asat. Thoim ieunk thoddeank heram poros chodd provas korcho poddtta. Punn hem amontronn manun gheun ailoleanchi mhenot fukott vochona.

Thoddeanchim ghoram odhivexon zata tea zagear thaun khub pois astat. Taka lagon odhivexonachea zagear ieunk tankam kotthin zata. Oslea vellar tim kitem kortat? Technology-chea modotin tim ravtat tea zagearuch ravon teo kariavolli pollounk xoktat. Udharonnak, mukhel ofisacho protinidhi Benin xakhent bhett diunk ailo. Tea vellar zaloli ti kariavoll, Niger-ant aslolea Arlit nanvachea ganvant zo Sahara registanant asa thoim dakhoili. Thoim ti kariavoll pollounk ekvis bhav-bhoinnam ani umed dakhoilolim ektthaim zalim. Tim pois aslear pasun tankam apunn 44,131 lokam sangata asa koxem dislem. Eka bhavan  boroilem: “Viddeo udexim kariavoll dakhoilolea pasot ami tumche sogleanche kallzant thaun upkari asat. Tumi amcho kitlo mog kortat tem amkam anik ek pavtt onnbhovunk mell’llem.”

Israelitkaranchea iadnikamnim ekuch trompet vazoilea uprant “fokot kullanche mukheli” mhunnchem hozaranchea mukheleamnim tombu mukhar hajir zaunk zai aslem. (Lok. 10:4) Tankam thoim Moizesa koddlean suchounneo ani proxikxonn mellttalem. Hea toren te aplea kullachi bore toren kallji gheunk xoktale. Tumi thoinchea eka mukheleachea suvater aslolim zalear thoim hajir zaun faido zoddunk tumi tumchean zata tem soglem korchim naslim kai?

Aiz sobhentle vhoddil, “mukheli” koxe nant ani tanchea adhin aslolea Devachea hinddancher te zobordosten odhikar choloinant. (1 Ped. 5: 1-3) Punn te aplea hinddanchi ekdom bore toren kallji ghetat. Tor anink proxikxonn gheunk tankam sondhi melltta tednam zoxem, tankam Raj Seva Korsak amontronn melltta tednam te thoim rokddench hajir zatat. Sobhecheo zobabdareo anink bore toren koxeo sambhallunk zata tea vixim vhoddilank oslea korsamnim proxikxonn melltta. Hea udexim sobhentlim soglim Jehovachea anink lagim soronk xoktat. Tumkam oslea eka korsant azun poriant vochonk amontronn mellonk na zalear pasun oslea korsak hajir zal’leam thaun tumkam zaitem xikonk melltta.

Thodde pavtt iadnik lhan-mottea avazant trompet vazoitale. Hea avazacho orth, Israelitkaramnim aple tthikann eka zagear thaun dusrea zagear vhoronk zai aslem. (Lok. 10:5, 6) Hem khub manddavollin zatalem. Punn tantunt khub koxtti vavr mellon aslo. Thodde Israelitkar dusrea zagear vochonk ghoddie fattim-fuddem sortale. Kiteak?

Dusrea zagear vochonk suchounneo chodduch pavtti ietaleo ani apunn toiar na tednam teo ietaleo mhunn thoddeak ghoddie distalem astolem. “Kedna-i tem[kup] sanz thaun sokalluch porian astalem.” Ani her vellar ‘don dis, vo ek mhoino, vo odik vell’ pasun ekach zagear astalem. (Lok. 9:21, 22) Ani Israelitkarank aplem tthikann kitle pavtt bodolchem poddlem? Lokgonnti odheai 33-ant sanglolea porim tankam sumar 40 zagear tthikann ghalchem poddlem.

Thodde pavtti thoddea Israelitkarank tthikann kel’lea zagear bori savlli mell’lli astoli. ‘Orixtt-bhirankull oronneant’ tankam oslo zago mell’llear khub borem distalem astolem. (D.S. 1:19) Tor oslea vellar savlli na toslea zagear vochonastana tankam thoinch ravum koxem distalem astolem.

Israelitkar tanche tthikann bodoltale tednam, thoddim kullam vocho porian her kullank ravchem poddttalem. Lhan-mottean vazoilolo trompeticho avaz sogleank aikonk ietalo. Punn sogleank sangata vochonk mellonaslem. To lhan-motto trompeticho avaz, poile pavtti aikotat tednam udente vatten tthikann kelolim kullam, mhunnche Juda, Issakar, ani Zebulun thoim thaun vochonk zai aslim. (Lok. 2:3-7; 10:5, 6) Tim bhair sorlea uprant, iadnik dusrea pavtti lhan-mottea avazant trumpet vazoitale. Tea vellar dokxinne vatten, tthikann kelolim tim kullam bhair sortalim. Hea toren kullam tin-tin korun bhair sortalim. Oxem, poschim ani ut’tore vatten pasun kullam tin-tin korun bhair soro porian iadnik trompet vazoitale.

Tumkam ghoddie kednam tori songottnnent zal’le thodde bodlav manun gheunk kotthin zale astole. Vo songottnnent ghoddie chodduch bodlav zaleat mhunn tumkam kednam dislem astolem. Vo poilim asloleo manddavolleo tumkam boreo lagleo astoleo ani atam bodlunk tumkam itsa na. Bodlav zata tednam pasiens dakhounk tumkam kotthin zalem astolem ani to bodlav apnnaunk tumkam vell laglo astolo. Punn te bodlav ami apnnaitat zalear, te amkam boreak poddttat, ani Jehova khuxal zata mhunn ghoddie amkam kollon ietolem.

Moizesachesa disamnim Jehovan lak’khamnim dadleank, bailank ani bhurgeank oronn’nneantlean vatt dakoili. Tannem tankam vatt dakhounk nasli zalear ani tanchi kallji gheunk nasli zalear tim jivim ravonk xokonaslim. Aiz hea bhirankull xevottachea disamnim Jehova amkam vatt dakhoita. Ami tachea lagim ravonk ani amcho bhavarth ghott korunk to amkam modot korta. Tor trompetichea avazak pallo dil’lea visvaxi Israelitkaram sarkim ami pasun Devachea utrak pallo diunk amchean zata titlem korum-ia.