1. Aplea hindda thaun sanddun gel’li ek xelli portun ieta tednam Jehovak koxem bhogta?

JEHOVA apnnank eka borea gonvllea sangata sor korta zo aple dor eke xelliechi mogan kallji gheta mhunn ami fattlea lekhant xiklolim. Boro gonvlli zaun aslolo Jehova, aplea hindda thaun sanddun gel’lea xelliank sodhta mhunn pasun ami xiklolim. Apleak soddun gel’lea Israelitkarank Jehovan sanglem: “Mhoje-xim portun ieiat, ani Hanv tumche-xim portun ietolom.” Aiz pasun taka oxench bhogta mhunn ami khatri dovrunk zata. Karonn to mhunntta: “Hanv Sorvespor bodolna.” (Mal. 3:6, 7) Aplea thaun pois gelolo ek sevok pasun porot ieta tednam, Jehovak ani ainzank khub khuxalkai bhogta mhunn Jezun sanglem.—Lukas 15:10, 32.

2. Hea lekhant ami kitem bhasabhas kortolim?

² Jehova thaun pois geloleank koxi modot korunk zata hea vixim Jezun sanglolea tin vopareantlean ami kitem xikonk zata tacher atam dhean dium-ia. Osleank porot ieunk modot korunk zai zalear amkam asonk zai tea thoddea gunnancher ami bhasabhas kortolim. Ani ami osleank porot ieunk modot kortat tednam amkam zaiti khuxalkai mellttoli mhunn ami xiktolim.

3-4. Lukas 15:8-10-ant sanglolea voparentlea bailen, aplo sanddlolo rupeacho nanno itlea borea bhaxen kiteak sodhlo?

³ Jehova-xim portun ieunk sodhtoleank sodhunk ami zaiti mhenot gheunk zai. Lukasachea pustokan Jezun ek vopar sangli. Tea voparent eke baile lagim asloli moladik vost mhunnge ticho rupeacho ek nanno sanddtta. Hea voparent ti to nanno koso sodhta hacher Jezun amkam dhean diunk sanglam.—Lukas 15:8-10 vachat.

⁴ Tea bailek to nanno mell’llea uprant koxem dislem tea vixim Jezu sangta. Jezuchea disamnim thoddeo Judev avoi-o aplea dhuvank thodde pavtti kazarachea disa, rupeache dha nanne ditaleo. Sanddlolo ho nanno ghoddie hea dha nannea modlo ek aslo dekhun tea bailek to khas aslo. To nanno ghorant sanddla oxem tika dislem. Taka lagon ti ek divo pettoita ani sogleak sodhta punn tika kainch mellona. Ticho telacho divo dhakttulo rupeacho nanno sodhunk zai titlo uzvadd dina dekhun ti soglea ghorak bore bhaxen  saronn marta. Atam ti dhullant tichea diveachea uzvaddan aplo sanddlolo nanno chok-chokta tem polloita. Hem polloun tika kitlem borem dislem astolem! Ti aplea ixttank ani xezareank apoun hi bori khobor sangta.

5. Jehova thaun pois geloleank sodhun kaddop kiteak kotthin zaunk xokta?

⁵ Amchea lagim asloli ek vost sanddtta tednam ti sodhunk zaito proitn ghalcho poddtta mhunn amkam Jezuchea voparentlean kollon ieta. Teach bhaxen, ami pasun Jehova thaun pois geloleank sodhun kaddunk khub proitn korunk zai. Karonn Jehova thaun pois vochon tankam zaitim vorsam zalim. Ghoddie tim oslea zagear geleant astolim zoi konnuch sakxi tankam vollkhonant. Punn hantuntlim thoddim bhav-bhoinnam porot Jehova lagim ieunk sodhtat mhunn kainch dubhav na. Tim tanchea bhav-bhoinnam sangata porot Jehovachi seva korunk axetat. Punn oxem korunk tankam amchea modotichi goroz asa.

6. Seva bond kelolea porgottnnarank sodhunk sobhentlim soglim koxim modot korunk xoktat?

⁶ Seva bond kelolea porgottnnarank sodhunk konn modot korunk xokta? Soglim. Vhoddil, pioneer, familiche sodosio ani sobhentle porgottnnar pasun tankam sodhunk modot korunk xoktat. Tumcho ek ixtt vo ek soiro seva bond kelolo porgottnnar zaun asa kai? Tumi ghor-ghoramnim vo jahir zagear porgott’ttana oslea eka bhavak vo bhoinnik mell’lleant kai? Tor, tankam vhoddilamnim bhett diloli zai zalear tancho fon number vo pot’to sobhechea vhoddilank diunk tumi khuxal zatolim mhunn tankam sangat.

7. Thomas nanvachea vhoddila koddlean amkam kitem lisanv xikonk melltta?

⁷ Jehova lagim porot ieunk sodhtat toslea seva bond kelolea porgotnnarank sodhun kaddchi mukhel zobabdari vhoddilank asa. Te hem koxe korunk xoktat? Thomas * nanvacho ek vhoddil kitem sangta tem polloiat. To Spain-ant ravta, ani tannem 40-a poros chodd bhav-bhoinnank sobhent porot ieunk modot kelea. To mhunntta: “Seva bond kelolim porgottnnaram atam khoim ravtat tem zannant kai mhunn hanv veg-vegllea bhav-bhoinnak vochon poilim vicharta. Vo mittingek ievop bond kel’lea khoinchea-i eka porgottnnarak vollkhotat kai mhunn hanv tankam vicharta. Hanv oxem vicharta tednam zaitim bhav-bhoinnam khuxalkaien modot korunk fuddem sortat. Karonn tim pasun sodhpachem kamant mellon asat oxem tankam dista. Uprant, hanv seva bond kelolea porgottnnarank melltta tednam tanchea bhurgeanchi ani soireanchi khobor gheta. Thodde seva bond kelole porgottnnar aplea bhurgeank mittingek gheun ietale ani tanchim bhurgim pasun bautizm gheunk naslolim porgottnnaram aslim. Tankam-i Jehova-xim portun ieunk modot korunk zai.”

8. Lukas 15:17-24-ant aslolea sanddlolea putachea voparent bapui poschatap kel’lea puta sangata koso vaglo?

⁸ Jehova lagim porot ieunk sodhtat tankam modot korunk amkam kosle gunn asop gorjeche? Jezun sanglolea sanddlolea putachea vopare thaun ami koslim lisanvam xikonk zata tem polloum-ia. (Lukas 15:17-24 vachat.) Tea voparent ghor soddun gel’lo to put, xevottak apli chuk vollkhon porot ghora ieta mhunn Jezu sangta. To bapui aplea putacho mog korta mhunn khatri diunk, aplo put ieta tednam to dhavon vochon taka veng marta. Tea putan ji chuk kel’li tea vixim taka khub dukh bhoglem ani apleak puta sarko lekhunk favona mhunn taka dislem. Aplea putan aplea kallzantlim bhavnam sanglim tednam tea bapain tim somzon ghetlim. Aplo put porot ghora aila dekhun apunn khorench khuxal asa mhunn bapain thoddim pavlam ghetlim. Tannem aplea mogachea putak ek sevok koso lekhunk na. To aplea putacho mog korta ani apnnem taka porot ghorant ghetla mhunn khatri diunk tannem aplea puta pasot ek vhoddlem jevonn kelem. Ani taka nhesonk boreantle bore kopdde haddun dile.

9. Seva bond kelolea porgottnnarank Jehova lagim porot ieunk modot korunk amkam kosle gunn asop gorjeche? (“ Porot Ieunk Sodhtat Tankam Ami Koxi Modot Korunk Zata?” hem boks polloiat.)

 ⁹ Jehova tea voparent saglolea bapai sarko asa. To seva bond kelolea porgottnnarancho mog korta ani te aplea lagim porot ailole taka zai. Jehovachi dekh gheun oslea amchea bhav-bhoinnank ami porot ieunk modot korunk zata. Ani hem korunk amkam pasiens, doia ani mog asop gorjecho. Tea bhair, tankam koxem bhogta tem ami amchea kallzant bhogonk zai. Ami he gunn kiteak dakhounk zai ani tem ami koxe dakhounk zata?

10. Seva bond kelolea porgottnnarank Jehova lagim porot ieunk modot korunk amkam pasiensachi kiteak goroz asa?

¹⁰ Jehova lagim porot ieunk eka munxak vell lagta. Taka lagon amkam pasiensachi goroz asa. Vhoddilamnim ani sobhentlea heramnim porot-porot bhett dilea uprantuch apunn Jehovachi seva portun korunk xoklim mhunn zaitim seva bond kelolim porgottnnaram sangtat. Dokxinn udent Azia-ntli Nancy nanvachi bhoinn boroita: “Sobhentlea eka ghott ixttan mhaka zaiti modot keli. Eke vhoddle bhoinni sarko tinnem mhaka mog dilo. Ami poilim sangata sarlolea borea vellacho tinnem mhaka ugddas korun dilo. Hanvem mhoji bhavnam tika sanglim tednam tinnem ti pasiensan aikolim ani mhaka sol’le diunk ti fattim soronk na. Khoinchea-i vellar modot korunk toiar ravon, ti mhoji khori ixtt mhunn dakhoun dilem.”

11. Dukhovlolea ekleak modot korunk tachea kallzant koxem bhogta tem amchea kallzant bhogop kiteak gorjechem?

¹¹ Konnui ekleak dukhoita tednam, dukh zaloleak tem dukh eka ghavea sarke asta. Jednam tea dukhovlolea munxachea kallzant koxem bhogta tem ami amchea kallzant bhogunk proitn kortat, tachea ghaveacher molom lailolea  sarkem zata ani taka borem disonk lagta. Thodde seva bond kelolea porgottnnarank zaitim vorsam poilim sobhent konnem tori dukhoilolem. Punn zaitea vorsam uprant pasun tim tea bhav vo bhoinnicho rag vo tannim dil’lem dukh kallzant dovortat. Hea karonnak lagon tankam Jehova lagim porot ieunk kotthin zalam. Tanchea lagim on’neai ghoddla mhunn thoddim chintit. Tanchem kan diun aikotat ani tanchi bhavnam somzotat toslea konnachi tankam goroz asonk puro. (Jak. 1:19) Udharonnak, seva bond keloli porgottnnar María mhunntta: “Mhojem kan diun aikonk, mhaka buzvonn diunk ani boro sol’lo diun modot korunk ek ghott ixttinnichi mhaka goroz asli.”

12. Jehovacho mog eka dorie sarko koso asa?

¹² Aplea lokam pasot Jehovak aslolo mog Bible-ant eka bandpasak vo eka doriek sor kela. Devacho mog eka dorie sarko koso asa? Ek udharonn polloum-ia. Eka uchamboll zal’lea doriant tumi buddonk pavleant mhunn chintat. Tednanch konn tori eka tarva thaun tumchea lagim life Jacket uddoita mhunn tumi tache upkari astat. Tea life jacket-a udexim tumi doriant buddonastana ravonk xoktat. Punn tumi chodd vell tea doriant uronk xokonant. Karonn tem udok thondd asa. Tumi tumcho jiv vachounk zai zalear, tumi tea udkantlean bhair soronk zai. Tor tea tarva thaun tumkam konnem tori ek dori uddoun tumkam udkantlean bhair soronk modot korop gorjechem. Aplea thaun pois gelolea Israelitkaram vixim Jehovan sanglolem: “Hanv tankam . . . mogachea bandpasamnim oddun vhortalom.” (Hos. 11:4) Aplea somosiamnim ani uskeamnim boddoun asloleam vixim ani Devachi seva korop bond keloleam vixim Jehovak aiz oxench dista. To tancho mog korta mhunn tannim zannam zalolem taka zai. Ani aplea-xim porot ieunk to tankam modot korunk sodhta. Tor, tanchea pasot taka aslolo mog dakhounk to tumkam uzar korunk xokta.

13. Ami mog dakhoitat tednam dusreank Jehova lagim porot ieunk modot zata mhunn Pablo-chea udharonnantlean amkam koxem kolltta?

 ¹³ Seva bond kelolea porgottnnarank Jehova tancho mog korta ani ami-i tancho mog kortat mhunn khatri divop gorjechem. Fattlea lekhant sanglolo 30 vorsam thaun seva bond kelolo porgottnnar Pablo oso mhunntta: “Ek dis sokallim hanv ghorantlean bhair sortana ek doiall zantti bhoinn mhaka mell’lli ani ti mhojea lagim mogan uloili. Tichem aikon hanv eka lhan bhurgea sarko roddonk laglo. Jehovanuch tika mhoje lagim ulounk dhaddlea oxem mhaka dislem mhunn hanvem tika sanglem. Teach vellar, hanvem Jehova lagim portun ieunk tharailem.”

14. Lukas 15:4, 5-ant sanglolea vopare pormonnem, tea gonvlleak sanddloli xelli melltta tednam to kitem korta?

¹⁴ Seva bond kelolea porgottnnarank ami modot korit ravonk zai. Tim, Jezuchea voparent sanglolea sanddlolea puta sarkim khub dukhovleant astolim ani tem dukh pekonk tankam zaito temp lagonk xokta. Ani tim Soitanachea sonvsarant asat dekhun Jehova lagim tankam poilim asloli ghott ixttagot atam na. Jehovacher tancho bhavarth porot ghott korunk ami tankam modot korunk zai. Jezun sanddlolea xelliechea voparent, ek gonvlli xelliek aplea khandear gheun porot aplea hinddant koso haddtta tea vixim sanglam. Gonvllean sanddlolea xelliek sodhunk zaito vell ani xokti uzar kelea. Punn tea xelliek aplea hinddant porot ieunk titli xokti na dekhun taka uklun vhorchem poddttolem mhunn gonvlli somzota.—Lukas 15:4, 5 vachat.

15. Jehova lagim porot ieunk sodhtat tanchea somosiank tondd diunk ami koxim adar diunk xoktat? (“ Ek Moladik Sadhon” hem boks polloiat.)

¹⁵ Ghoddie eka somosiak lagon seva bond kelolea porgottnnarank Jehovachi seva porot korunk kotthin zaunk puro. Tor tea vellar tankam modot korunk amkam zaito vell ani  xokti ghalchi poddot. Punn, Jehovachi povitr xokti, tachem Utor ani tache songottnne thaun melltta tea prokaxonam udexim, Jehova sangata tanchi ixttagot ghott korunk ami tankam modot korunk xoktat. (Rom. 15:1) Hem ami koxem korunk zata? Ek onnbhovi vhoddil oso mhunntta, “Jehovachi seva porot korunk sodhtat toslea choddxea seva bond kelolea porgottnnarank eka Bible obheasachi goroz asta.” * Tor tumkam eka seva bond kelolea porgottnnara sangata Bible obheas gheunk sangtat zalear khuxalkaien manun gheiat. To vhoddil fuddem sangta, “Tanchea sangata Bible obheas gheta to porgottnnar tancho oslo ek ixtt zaunk zai zacher tim patieunk xoktat, ani kallzant asa tem ukteponnim ulounk xoktat.”

16. Amkam ainz modot kortole mhunn ami koxim zannant?

¹⁶ Jehova lagim porot ieunk sodhtolea zaitea seva bond kelolea porgottnnarank modot korunk, ainz amkam adar kortat mhunn dakhounk zaitim udharonnam asat. (Prok. 14:6) Udharonnak, Ecuador-antlo seva bond kelolo porgottnnar Silvio-n konnak tori apnnak modot korunk dhadd mhunn Jehova lagim magnnem kelem. To magnnem kortalo tednanch don vhoddil tachea ghora pavle. Ani tea bhette udexim taka goroz ti modot diunk te khuxal zale.

17. Seva bond kelolea porgottnnarank ami modot kortat zalear amkam koxem distolem?

¹⁷ Jehova sangata titli ghott ixttagot nasloleank, tachea lagim porot ieunk ami modot kortat tednam amkam khub khuxalkai melltta. Salvador nanvacho ek pioneer, khas korun seva bond kelolea porgottnnarank modot korunk proitn korta. To oso mhunntta: “Thodde pavtti mhojea dolleant khuxiechim dukam ietat tim hanv thambounk xokona. Soitanachea sonvsara thaun eka mogall xelliek Jehovan vachoila mhunn chinta tednam hanv khub khuxal zata. Ani tachea hea kamant taka adar diunk tannem mhaka uzar kela tea sueoga pasot hanv khub khuxal.”—Itihas 20:35.

18. Tumi seva bond kelolim porgottnnar asat zalear, tumi kitem khatri dovrunk zata?

¹⁸ Tumi Jehovachea lokam sangata mellon ieunk bond kelam zalearui to aiz pasun tumcho mog korta mhunn tumi khatri dovrunk zata. Tumi porot tachea lagim ailolim taka zai. Ani toxem korunk tumkam thoddim pavlam gheunchim poddttolim. Tor, Jezuche voparentlea bapai sarko Jehova tumi porot ietolim mhunn vatt polloita ani to khuxalkaien tumkam aplea ghorant ieukar ditolo.