1. Devachi bhirant mhunnche kitem, ani Jehovacho mog kortoleank hi bhirant asop kiteak gorjechem?

KRISTANVANK Devacho mog asa, punn tankam tachi bhirant pasun asa. Hem donui koxem asonk xokta mhunn thoddim ghoddie chintunk puro. Ami hanga tumkam bhivoita toslea bhirante vixim nhoi, punn eke khas torechea bhirante vixim uloitat. Osli bhirant aslolim Devak khoro resped ditat. Tim aplea sorginchea Bapa lagim asloli ixttagot moddunk sodhinant dekhun, taka manvona tem korunk sodhinant.—St. 111:10; Mho. 8:12b,13.

2. Stotr 86:11-ant aslolea David Razachea utranchea adarit, khoincheo don vostu ami bhasabhas kortolim?

² Stotr 86:11 vachat. Thoim aslolea utrancher tumi niall kortat tednam, Jehova pasot kholaiecho resped asop kitlo gorjecho tem David Razak khobor asli mhunn kolltta. Davidan aplea magnneant kitem mhunnttlem tem ami koxem apnnaunk xoktat, tea vixim atam ami bhasabhas kortolim. Poilem, Devachea nanvak ami kholaiecho resped kiteak dakhounk zai, tachi thoddim karonnam ami polloitolim. Dusrem, amchea sodanchea jivitant amkam Devachea nanvacho kholaiecho resped asa mhunn ami koxem dakhounk zata tea vixim bhasabhas kortolim.

3. Devachea nanva pasot kholaiecho resped dakhounk Moizesak khoinchea ghoddnnen modot keli astoli?

³ Moizes khoddpachea khanchint astana, Jehovachi mhoima ieun voita toslem ek dorxonn polloun taka koxem bhoglem tea vixim chintat. Jezu hea prithumer ieunchea poilim eka munxan onnbhovlolea onnbhovam modem sogleam-von hem ek  ojapachem dorxonn aslem astolem. Chodd korun, eka ainzan mhunnttlolim him utram Moizeasan aikolim: “Sorvespor, Sorvespor, doiall-movall Kallzacho Dev! To rokddoch ragar zaina, punn bhov dulob ani visvaxi; hozarank To Aplem bholeponn dakhoita; chuki, oprad ani patok bhogxita.” (Sutt. 33:17-23; 34:5-7) Moizes Devachem nanv uzar kortalo tednam taka hi ghoddnni ghoddie ugddasak ietali astoli. Taka lagon uprant Moizesan Israel lokank Jehovachea “nanvank man” diat mhunn xittkailem.—D.S. 28:58.

4. Khoinchea gunnancher ami niall kelo zalear Jehovak anik chodd resped dakhounk amkam modot zata?

⁴ Jehova, hea nanva vixim ami chintat tednam, to koslo Dev zaun asa tea vixim pasun ami niall korunk zai. Ami Jehovachi xokti, zannvai, neai ani mog hea gunnam vixim niall korunk zai. Ami hem ani her gunnam vixim niall kortat tednam tachea pasot amcho resped anik vaddounk xokta.—St. 77:11-15.

5-6. (a) Devachea nanvacho orth kitem? (b) Suttka 3:13, 14 ani Izaias 64:7-a pormonnem, Jehova khoinchea toren ek vost ghoddom-xi korta?

⁵ Devachea nanvacho orth kitem mhunn ami zannant? Zaite Bible-ache ponddit, Devachea nanvacho orth “To Zata ani Ghoddon Haddtta” mhunn sangtat. Hea nanvacho orth, Jehovak kitem korunk zai tem korunk taka kainch addaunk xokona ani tem to zaum-xem korta mhunn amchea ugddasak haddtta. Koxem?

⁶ Aplo ud’dhex purnn korunk to kitem-i zata ani ghoddon haddtta. (Suttka 3:13, 14 vachat.) Hea vixim chintunk, choddxe pavtt amchim prokaxonam amkam modot kortat. Apli seva korunk ani aplo ud’dhex purnn korunk Jehova oporipurnn munxank kitem-i zaunk pasun modot korta. (Izaias 64:7 vachat.) Hea toren, Jehova apli khuxi purnn korta. Ani aple ud’dhex purnn korunk taka kitench addaunk xokona.—Iz. 46:10, 11.

7. Amchea sorginchea Bapa pasot amchem upkariponn vaddounk ami kitem korunk xoktat?

⁷ Amchea sorginchea Bapan amchea pasot kitem kelam, ani tachea adaran ami jem kitem korunk pavleant, tea vixim ami niall kortat tednam tachea pasot amkam aslolem upkariponn ami vaddounk xoktat. Udharonnak, ami Jehovan keleat tea soglea  rochnne vixim niall kortat tednam, tachea pasot amcho resped anik vaddtta. (St. 8:3, 4) Tachi khuxi purnn korunk tannem amkam modot kelea, hea vixim ami niall kortat tednam, tachea pasot ami kholaiecho resped vaddoitat. Jehovachem nanvuch ek ojapachem. Hea nanva voilean amcho Bapui konn, tannem kitem kelam, ani to fuddem kitem kortolo tea vixim kollon ieta.—St. 89:7, 8.

8. Dusri Somurt 32:2, 3-a pormonnem, aplea sevokamnim aplea nanva sangata kitem kelolem Jehovak zai?

⁸ Israelitkar Bhasail’lea Desant voichea poilim, Jehovan Moizesak ek git xikoilem. (D.S. 31:19) Tem git uprant Moizesan lokank xikounk zai aslem. (Dusri Somurt 32:2, 3 vachat.) Vers 2 ani 3-acher ami niall kortat tednam, aplem nanv lipoun dovorunk zai, vo aplem nanv povitr asa dekhun konnench tem uzar korchem nhoi mhunn Jehova opekxa korina. Punn sogleamnim aplem nanv zannam zalolem Jehovak zai mhunn amkam kolltta! Jehova ani tachea mhoimebhorit nanva vixim Moizesa thaun xikop, Israelitkarank ek vhodd sueog zaun aslo! Paus poddtta tednam, zoxim zhaddam vaddttat, teach toren Moizesa thaun xikon Israelitkarancho bhavarth ghott zalo ani tankam urba mell’lli. Amchi xikounn pasun tea pavsachea thembea sarki koxi zaunk xokta?

9. Ami Jehovachem nanv povitr korunk koxi modot korunk zata?

⁹ Ami ghor-ghoramnim vo jahir zagear porgottnni kortat tednam, Devachem nanv Jehova mhunn ami Bible-antlean lokank dakhounk zata. Jehovak man haddttat toslim sobit prokaxonam, ekdom bore viddeo, ani amchea websit-ir asloli mahiti, ami tankam diunk zata. Kamachea zagear, iskolant astana, vo provas kortana, amchea mogall Deva vixim ani to koslo Dev hea vixim lokank sangonk amkam sondhi mellonk puro. Jehova amchea pasot ani prithume pasot jem kitem borem kortolo tem ami lokank sangtat tednam, Jehova tancho kitlo mog korta mhunn tim ghoddie somzonk pavtolim. Hea toren ami amchea mogall Bapa vixim lokank sot sangtat tednam tachem nanv povitr korunk ami modot kortat. Toxench, tankam Deva vixim xikoilolem tem, Jehovachem nanv pid’dear korunk sangloli fott mhunn tankam kollon ietolem. Ami Bible-antlean lokank xikoitat tednam, tankam sogleam-von chodd khuxalkai melltta.—Iz. 65:13, 14.

10. Ami amchea Bible videartheank fokot Devache dorjem xikoilearuch puro nhoi. Kiteak?

¹⁰ Ami Bible obheas ghetat tednam, amchea videartheamnim Jehovachem nanv zannam zaun tem uzar korunk ami tankam modot korunk sodhtat. Tea bhair, tannim Jehovachi purnn vollokh gheunk ami tankam modot korunk sodhtat. Hem korunk Devache dorje vo kaide, ani tannim kitem korunk zai ani kitem korunk nozo, itlench ami amchea videartheank sanglear puro kai? Ek boro videarthi, Devache kaide xikta tednam taka te borem disonk puro. Punn to Devacho mog korta dekhun to te kaide pallttolo kai? Ugddas dovrat, Adanvak ani Evek Devache kaide khobor asle, punn tankam Kaido Diupi Jehovacho khoro mog naslo. (Ut. 3:1-6) Tor amchea videartheank Devachea noitik dorjeam ani kaideam vixim xikounchea bhair ami anink kitem tori korunk zai.

11. Ami Devache kaide ani dorje xikoitat tednam amchea videartheank Kaide Diupeacho mog koruk koxi modot kortat?

¹¹ Jehovache kaide ani dorje amkam sodanch boreak poddttat mhunn ami zannant. (St. 119:97, 111, 112) Punn Jehova amcho mog korta dekhun tannem amkam he kaide dileat mhunn amche videarthi somzonant zalear, tankam tem kollchem na. Tor ami amchea videartheank he prosn vicharunk zata: “Aplea sevokamnim kitem korunk zai, vo kitem korunk nozo, hem Dev kiteak sangta mhunn tuka dista? Ani hantuntlean to koslo  Dev mhunn amkam kolltta?” Hea toren ami amchea Bible videartheank Jehova vixim chintunk ani tachea mhoimebhorit nanva pasot khoro mog vaddounk modot kortat tednam ami xikoitat tem tanchea kallzak lagtolem. Hea toren tim fokot kaideanchoch nhoi, punn Kaido Diupeacho pasun mog korunk pavtolim. (St. 119:68) Tea bhair tancho bhavarth vaddttolo, ani ietat tea oddchonneancho fuddo korunk tankam modot zatoli.—1 Kor. 3:12-15.

12. Eka vellar David, aplea soglea kallzan Jehovacho mog korunk koso chuklo, ani tacho porinnam kitem zalo?

¹² “Sogllea kallzan” him Devan prerit kel’lim khub mhotvachim utram David Razan boroilim tim amkam Stor 86:11-ant vachunk melltta. Jehovak manvona tem korunk eka munxachem kalliz sompeponnim taka koxem voddun vhoronk xokta, tem David Razan aplea jivitant onnbhovlem. Ek dis, to aplea ghorachea mallier aslo tednam dusreachi bail nhata ti taka dixtti poddli. Tea vellar, Davidan soglea kallzan Jehovacho mog kelo kai? Taka Jehovachea hea dorjea vixim khobor asli: “Peleache bailechi . . . axa dhorum nakat.” (Sutt. 20:17) Punn David tea bailek polloit ravlo. Hoi, hea vellar David ordea kallzan Jehovacho mog kortalo, ani ordea kallzan Bathsheba-cho mog korunk laglo. Zaitim vorsam Davidan Jehovacho mog kelo ani tachea bhiranten chol’lo. Tori astana, hea vellar to aplea svarti axe pormonnem chol’lo ani thoddim vaitt kamam kelim. Tannem Jehovachea nanvacher opman haddlo. Tea bhair, aplea patkant bhagidar naslolea aplea familicher tannem khub tras haddle.—2 Sam. 11:1-5, 14-17; 12:7-12.

13. David purnn kallzan portun Jehovacho mog korunk laglo mhunn ami koxim zannant?

¹³ Jehovan David-ak xist dili, ani apli ixttagot tannem Jehova lagim portun zoddli. (2 Sam. 12:13; St. 51:2-4, 17) Punn tannem soglea kallzan Jehovacho mog korunk na tednam taka kitle tras ani dukh onnbhovche poddle tem tannem ugddask haddlem. Punn soglea kallzan Jehovachi bhokti korunk Jehovan Davidak modot keli kai? Hoi, karonn Davida vixim Jehovachem Utor uprant sangta, tannem “sogllea aplea kallzan mhozo pattlav kelo.”—1 Raz. 14:8; 15:3.

14. Ami amkanch koslo prosn vicharunk zai, ani kiteak?

¹⁴ Davidachem udharonn amkam urba dita. Punn tannem kel’lem gombhir patok, Devachea sevokank aiz ek xittkaunni zaun asa. Ami Jehovachi seva korunk halinch suru kelea astoli, vo zaitim vorsam thaun ami korit aileant astolim. Punn ami amkanch ho prosn vicharunk zai: ‘Soglea kallzan Jehovacho mog korinastana ravonk Soitan mhojer ghalta te proitn hanv nakarta kai?’

15. Amchea dolleam fuddem onoitik chintnam haddtta toslim chitram ietat tednam, Devachi bhirant amkam koxi rakhonk xokta?

 ¹⁵ Udharonnak, TV-cher vo internet-acher onoitik chintnam haddtta toslem chitr tumkam dixtti poddtta zalear tumi kitem kortolim? Tem chitr vo pich’cher khoreamnim pozddem nhoi mhunn tumi chintunk puro. Ami soglea kallzan Jehovacho mog korinastana ravonk Soitan hem uzar korunk xokta kai? (2 Kor. 2:11) Tem chitr eka pachareak sor korunk zata. Pacharem mhunnttlear, eka vhodd lankhddak doxim korunk uzar kortat tea lokhnnacho dhar aslolo lhan kuddko. Ek lankudd foddpi munis tem pacharem eka lankhddacher dovrun dhaddoita. Ani tea lankhddacher ek lhan ver ieta. Punn tem pacharem tea lankhddache bhitor voita toxem tem lankudd xevottak ordem zata. Onoitik chintnam haddtta toslim chitram pasun, tea pacharea sarkim asonk xoktat. Survatek, ietat te vere sarkim tim dhokeachim nhoi mhunn disonk puro. Punn uprant, tim eka munxachem kalliz doxim korun, Jehova add patkam korunk pavounk xoktat. Tor tumchea kallzant koslench vaitt chintop ieunk dium nakat! Soglea kallzan Jehovacho mog korat ani tachea bhiranten cholat!

16. Vaitt vatten cholonk amkam tallnni ieta tednam, ami amkanch khoinche prosn vicharunk zai?

¹⁶ Onoitik chintnam haddtta toslea chitram bhair, amkam tallneant ghalunk Soitan zaiteo her vostu uzar korunk xokta. Tednam ami kitem kortolim? Heo vostu titleo vaitt nhoi mhunn amkam thodde pavtti disonk puro. Udharonnak, ami oxim chintunk xoktat. ‘Hanvem hem kelear mhaka sobhe bhair tor ghalche nant, tor hem titlem gombhir aschem na.’ Toslem chintop ekdom chukichem zaun asa. Ami amkanch he prosn vicharop bore: ‘Heo vostu uzar korun, hanvem Jehovacho mog soglea kallzant thaun korinastana ravonk Soitan proitn korit asa kai? Tea chukichea vatten hanv cholta zalear, Jehovachea nanvak hanv opman haddunk xokta kai? Hem kelear,  hanv Jehovachea lagim sortolo, vo tachea thaun pois?’ Hea prosnancher niall korat. Promannikponnant hea prosnanche zobab diunk, zannvaiek lagon magat. (Jak. 1:5) Oxem kelear, tumi tumkam khorench rakhtolim. Tea bhair, tallnneo ietat tednam, Jezu bhaxen teo tumi bollan nakarunk pavtolim. Tannem mhunnttlem: “Pois sor, Soitana!”—Mt. 4:10.

17. Ami soglea kallzan Jehovacho mog korinant zalear, tem kiteak faideachem nhoi? Ek udharonn diat.

¹⁷ Ami soglea kallzan Jehovacho mog korinant zalear, tem faideachem nhoi. Eka khellant aslole ttimiche sodosia eka-meka sangata kednanch mellon khellona mhunn chintat. Thoddeank, soglich vakhann’nni apnnankuch mell’lloli zai. Ani thodde khellant aslolea kaideam pormonnem khellonant. Ani thodde coach-ak resped dinant. Osli ek ttim khell jiktoli mhunn amkam disona. Punn zor tor ek ttim ekvottan asot zalear, ti chodd korun jikonk xokta. Teach bhaxen, tumchem kalliz tea ttimi sarkem asa zalear, tumchim chintnam, itsa ani bhavnam Jehovachi seva korunk astoli. Ami soglea kallzant Jehovachi seva korinastana ravlolim Soitanak zai mhunn ugddas dovrat. Tumchea chukichea vonddovnnek lagon Jehovak zai tem korunk tumkam kotthin zaunk zai mhunn to axeta. (Mt. 22:36-38) Tor Soitanak tumi jikhonk dium nakat. Punn soglea kallzan Jehovachi seva korit ravat!

18. Mika 4:5-ant sanglolea pormonnem, tumi kitem korcho nichov kela?

¹⁸ Davida bhaxen Jehova lagim oxem magat: “Sogllea kallzan tuji bhokti korunk tunch mhaka xikoi.” Hea magnnea pormonnem jieunk, tumi tumchea jivitant purnn proitn korat. Amkam Jehovachi bhirant asa, ani tachea nanvak ami resped ditat mhunn tumi dor disa ghetat tea lhan-vhodd nirnnoi-antlean dakhounk nichov korat. Ami oxem kortat tednam, amkam dilolea Jehovache Sakxi, hea nanvak resped ditat. (Mho. 27:11) Ani provadi Mika bhaxen ami soglim oxem mhunnonk xoktat: “Devachea nanvan fuddem cholun vetoleanv sasnnachea sasnnak.”—Mik. 4:5.