1. Jehovan amchea dor-eklea pasot kitem kelam?

JEHOVAN amkam dor ekleak aplea-xim oddun haddleant. (Ju. 6:44) Hacho orth, sonvsarbhor aslolea lakʼkhamnim lokanchim kallzam tannem topaslim tednam, ami tacho mog korunk xoktat mhunn tannem polloilem. (1 It. 28:9) Tor, Jehova amcho mog korta ani to amkam somzon gheta.

2. Jehovak dor eke xelliechi kallji asa mhunn Jezun koxem dakhoilem?

² Jehovak tuji ani sobhent aslolea dor eka bhav-bhoinnanchi khub kallji asa. Hem somzonk, Jezun amkam ek borem udharonn dilem. Tantunt tannem Jehovak eka gonvlleak sor kelo. Aplea hinddantlea 100 xelliam modli 1 xelli sanddli zalear ho gonvlli kitem kortolo? ‘99 xelliank dongrar soddun to te ek sanddlole xelliek sodhunk voitolo.’ Ani ti xelli mellʼllea uprant to ticher ragar zauncho na, punn khuxal zatolo. Tech porim Jehovak-ui dor ek xelli khub valorachi. Hea pasot Jezun mhunnttlem: “Hea dhakttuleam bhitorlo eklo-i ibaddlolo sorgar astea tumchea Bapak naka.”​—Mt. 18:12-14.

3. Hea lekhant ami kitem xiktolim?

³ Ami amchea bhav-bhoinnank nirax korunk sodhinant. Tor, ami dusreank dukhoina zaunk ami kitem korunk zata? Ani amkam dusreamnim dukhoilear ami kitem korunk zai? Hea prosnanche zobab ami hea lekhant polloitolim. Punn tachea poilim, Matev odheai 18-ant sanglolim ‘dhakttulim’ mhunntlear konn tem ami polloum-ia.

4. ‘Him dhakttulim’ mhunnttlear konn?

⁴ ‘Him dhakttulim’ mhunnttlear Jezuche xis zaun asat. Tim  veg-vegllea piraiechim aslear dekhun, tankam ‘dhakttulim bhurgim’ mhunnttleant, karonn tim Jezu koddlean xikonk toiar asat. (Mt. 18:3) Tim soglim, veg-vegllea desachim asonk xoktat ani tanchi sonskruti ani chitop veg-vegllem asum ieta. Punn tim soglim Jezucher bhavarth dovortat ani Jezu tancho mog korta.​—Mt. 18:6; Juanv 1:12.

5. Ami konnakui dukhoita vo dusro konnui amkam dukhoita zalear Jehovak koxem dista?

⁵ ‘Hea dhakttuleam’ vixim Jehova Devak koxem dista hem zannam zaunk amkam bhurgeam vixim koxem dista tem chitun polloum-ia. Eka bhurgeak konnem-i dukhoilear amkam khub dukh zata, karonn amkam tancho khub mog asa. Tankam chodd onnbhov ani takot na mhunn ami tankam rakhchi goroz asa. Tor heach bhaxen, Jehova mukhar ami-i dhaklim bhurgim zaun asat. Ani ami dusreank dukhoitat vo amkam konnui dukhoita zalear, Jehovak tem avoddna vo to ragar zata. Tor hantuntlean, Jehova ‘hea dhakttuleancho’ khub valor korta mhunn kollon ieta.​—Iz. 63:9; Marku 9:42.

6. 1 Korintkarank 1:26-29-a pormonnem, sonvsarache lok Jezuchea xisank koxe lekhtat?

⁶ Jezuche xis anik khoinche toren ‘dhakttule’ asle? Aiz sonvsarantle lok girest, famad ani odhikar aslolea lokancho valor kortat ani sadem jivit jietolea Jezuchea xisank te unnea molache vo ‘dhakttule’ koxe lekhtat. (1 Korintkarank 1:26-29 vachat.) Punn Jehovache nodren te khub valorache asat.

7. Ami amchea bhav-bhoinnam lagim koxem vaglolem Jehovak zai?

⁷ Ami zaitea vorsam thaun Jehovachi seva korta asum vo sotant novinch asum, Jehova amcho sogleancho mog korta ani valor korta. Toxench, ami-i soglea ‘bhav-bhoinnancho mog’ korunk zai ani tancho valor korunk zai. (1 Ped. 2:17) Tor ami konnakui dukoilam zalear, tim rokddinch dukhovtat mhunn ami soddun diunk zaina. Karonn thoddim, apnnak fattim kitem ghoddlam taka lagon, tim apunn borim munxam nhoi oxem chintat astolim. Vo thoddim sotant novinch astat dekhun, tannim azun pasun dusreank bhogsuncho gunn vaddounk na astolo. Tor oxim konnui dukhovtat tednam, tankam zoddun gheunk ani amkam tanchi kallji asa mhunn dakhounk, ami zata titlo proitn korunk zai. Tea bhair, jim konn rokddinch ani porot-porot dukhovtat, tannim pasun aplea chintpant bodol korunk proitn korunk zai. Oxem kelolean tim khuxal astolim ani bhav-bhoinnam sangata tanchi ixttagot ghott zaunk pavtoli.

8. Jezuchea tempar lokanchem chintop koxem aslem?

⁸ Jezu ‘hea dhakttuleam’ vixim kiteak uloilo? Karonn Jezuchea xisamnim taka vicharlolem: “Sorgarajeant soglleam-von vhodd konn?” (Mt. 18:1) Ho prosn tannim vicharlo astolo karonn tea tempar ek vhodd odhikar asop vo ek vhodd podvi asop mhotvachem mhunn Judev lok mantale. Toxench, Bible-a vixim chodd mahiti diupi pustok sangta: “Dusream thaun man mellop ani famad asop, hem tea tempa voilea lokank chodd mhotvachem aslem.”

9. Jezuchea xisamnim kitem korunk zai aslem?

⁹ Jezuchea xisam modem pasun, amchea modem konn vhodd hem chintop aslem. Tanchem hem chintop sarkem korunk tankam khub vavr korchi goroz asli mhunn Jezu zannam aslo. Tea pasot, Jezun tankam oxem mhunnttlem: “Tumche modem konn vhoddlo asot to soglleam poros dhaktto zalʼle porim zauncho; ani konn odhikari asot to chakor zalʼle porim zauncho.” (Lukas 22:26) Tor, ami amkam sogleam poros dhakttim mhunn  lekhtolim tednam, ami ‘dusreank amchea poros vortim’ mhunn lekhunk pavtolim. (Filp. 2:3) Ani oxem ami chintat tednam, dusreank ami dukhounchim nant.

10. Paulun dilʼlo khoincho solʼlo ami apnnaunk zai?

¹⁰ Ami amchea bhav-bhoinnanchea borea gunnancher dhean ditat tednam, tim amchea poros vortim mhunn ami chintunk lagtolim. Paulun amkam ek boro solʼlo dilo. To mhunntta: “Heram poros tum vhodd mhonn tuka konn dhorta? Dusrea koddchem gheunk naslolem tuje kodde asa kitem? Ani tunvem tem ghetlam zalear, gheunk naslole bhaxen tuji boddai kiteak?” (1 Kor. 4:7) Tor, amchea borea gunnank lagon dusrim amkam vakʼkhannttat zalear, ami soglem dhean amcheruch dovorna zaunk chotur asonk zai. Udharonnak, ek bhav ekdom borim bhaxonnam dita zait vo ek bhoinn zaite Bible obheas suru korunk pavlea zait. Punn tim hem soglem, Jehovache modotin korunk xoktat mhunn tannim ugddas dovrunk zai.

11. Raza ani chakrachea udharonnantlean, Jezu aplea xisank kitem xikounk sodhtalo?

¹¹ Dusreank dukhoum nakat mhunn sanglea uprant, Jezun aplea xisank ek udharonn dilem. Ek chakor eka razak, ek vhodd rinn farik korcho aslo. Tea chakrachean tem rinn farik korunk zaunchench naslem. Punn tea razan tachem rinn bhogxilem. Punn teach chakran apleak rinn farik korcho aslo taka bhogsunk na mhunn razak kollʼllem tednam, tannem taka bondkhonnint ghatlo. Tor, hantuntlean ami kitem xikonk xoktat? Jezun sanglolem: “Tumi zonn-eklo tumchea peleak kallzant thaun bhogxina zaxat tor, Mhozo sorgincho Bapui tumkam-i bhogxicho na.”​—Mt. 18:21-35.

12. Ami dusreank bhogxinant zalear kitem zaunk xokta?

¹² Tea chakran aplea vangddi chakrak doia dakhounk na ani “aplem rinn farik korisor tannem tea vangddia-chakrak bondkhonnint ghalo. Hem ghoddlolem polleun, tache her vangddi chakor bhov dukhovle.” Tor, tea chakrachea vagnnukek lagon, tachea vangddi chakracher ani her chakrancher probhav poddlo. Teach bhaxen, ami dusreank bhogxinant zalear, ami tankam amchea thaun pois kortolim ani oxem korun ami tankam dukhoitolim. Ani sobhentlim her bhav-bhoinnam amchi hi vagnnuk polloitat tednam, tankam pasun khub dukh zatolem.

13. Eka pioneer bhoinnichea udharonnantlean tumi kitem xiktat?

¹³ Ami amchea bhav-bhoinnank bhogxitat tednam tim-ui khuxal zatat ani ami-i khuxal zatat. Hem somzonk ami Crystal nanvache eke pioneer bhoinnichem udharonn polloum-ia. Tika sobhentle eke bhoinnin dukhoiloli. Ti mhunntta: “Tichim utram mhojea kallzak bhalo toplolea bhaxen toptalim. Mhaka tiche borabor porgottnnent pasun vochonk naka oxem distalem. Ani haka lagon porgottnnent mhoji umed unni zali.” Hantunt apli koslich chuk na oxem tika dislem. Punn tori astana ti monant rag dhorun ravonk na. Tor tinnem, The Watchtower, Otumbr 15, 1999 hantunt aslolo, “Forgive From Your Heart” ho lekh vachlo. Ho lekh vachun tinnem te bhoinnik bhogxili. Tor ti mhunntta: “Ami dor disak chuki kortat ani sudhronk proitn kortat ani Jehova tea vellar amkam bhogxita. Tor, ami pasun teach bhaxen dusreank bhogsunk zai. Ani hanvem te bhoinnik bhogxilem tednam mhoje tokle-voilo vhoddlo bhar unno zalo oxem mhaka dislem ani hanv porot khuxalkaien Jehova Devachi seva korunk xoklem.”

14. Matev 18:21, 22-a pormonnem, apostl Pedruk kitem korunk kotthin zalem, ani dusreank bhogsunk amkam kotthin zata tednam ami kitem korunk zai?

¹⁴ Ami sogleamnim eka-mekak bhogsunk zai. Punn thodde pavtti amkam bhogsunk kotthin  zata. Fokot amkanch nhoi, punn ghoddie apostl Pedruk-ui kotthin zalem astolem. (Matev 18:21, 22 vachat.) Tor, amkam dusreank bhogsunk koxi modot zaunk xokta? Poilem, Jehovan amkam kitlem bhogxilam tacher niall korat. (Mt. 18:32, 33) Amkam Jehovachem bhogsonnem favona. Tori astana, to amkam udar kallzan bhogxita. (St. 103:8-10) Zor Dev amcho itlo mog korta zalear “ami-i eka-mekacho mog korunk zai.” Tor, amkam zai zalearuch ami amchea bhav-bhoinnank bhogxitolim oxem ami kednanch chintchem nhoi, punn ami tankam bhogsunkuch zai. (1 Juanv 4:11) Dusrem, amkam dukhoilam tea munxak bhogxilolean, kitlo boro porinnam zaunk xokta tacher niall korat. Tea munxak bhogxilolean, tache lagim amchi ixttagot ghott zatoli, sobhent xanti astoli, Jehova lagim amcho sombond ghott urtolo, ani toxench amchem mon xant urtolem. (2 Kor. 2:7; Kol. 3:14) Ani tisrem, bhav-bhoinnam sangata xanti samballunk ami Jehova lagim magnnem korunk zai. Karonn bhav-bhoinnam sangata amchi ixttagot piddʼddear zaloli Soitanak zai. (Ef. 4:26, 27) Tor, ami tachea hea fasant poddona zaunk, amkam khorench Jehovachea modotichi goroz asa.

15. Koloskarank 3:13 pormonnem, amchea eka bhavan vo bhoinnin amkam dukhoilam zalear ami kitem kortolim?

¹⁵ Amchea eka bhavan vo bhoinnin amkam dukhoilam zalear ami kitem kortolim? Tanchea sangata xanti samballunk zata titlo proitn korat. Tumkam koxem bhogta tem Jehovak magnneant sangat. Toxench, tumkam dukhoilam tea bhava vo bhoinni pasot-ui magat. Tea bhair, Jehovak avoddttat te tanche bore gunn amkam-i pollounk modot kor mhunn ami Jehova lagim magonk zata. (Lukas 6:28) Tannim kelʼli chuk visronk amkam kotthin zata zalear, ami vochon tanche  lagim ulounk zai. To bhav vo bhoinn mudʼdom zaun amkam dukhounchim nant mhunn ami chintlear, tankam bhogsunk amkam sompem zatolem. (Mt. 5:23, 24; 1 Kor. 13:7) Punn, tim amche lagim ulounk toiar nant zalear ami kitem kortolim? Bible sangta tea pormonnem, “ami ekamekak sosunk zai.” Ani oxem korop ami soddun diunchem nhoi. (Koloskarank 3:13 vachat.) Chodd mhotvachem mhunnttlear, ami rag dhorun ravcho nhoi, kiteak oxem ami kortat tednam Jehova sangata amchi ixttagot piddʼddear zata. Tor ami tankam bhogxitat tednam, sogleam poros chodd ami Jehovacho mog kortat mhunn dakhoitolim.​—St. 119:165.

16. Amkam dor ekleak kosli zobabdari asa?

¹⁶ Ami soglim bhav-bhoinnam “ekuch hind” zaun, “ekuch gonvlli” mhunnche Jezu Krista khala, Jehovachi seva ekvottan kortat mhunn ami khub khuxal asat! (Juanv 10:16) Organized to Do Jehovah’s Will, hea pustokant, 165-panacher oxem mhunnttlam: “Bhav-bhoinnanchea ekvottkaie thaun amkam faido zaunk zai zalear, ti ekvottkai samballunk ami pasun mhenot gheunk zai.” Hacho orth, “Jehova amchea bhav-bhoinnank jea nodren polloita, teach nodren ami-i pollounk zai.” Jehova ‘dhakttuleank’ mhunnche dor eka bhavak ani bhoinnik moladik mhunn lekhta. Tor, ami-i tankam moladik mhunn lekhunk zai. Ani ami amchea bhav-bhoinnank modot korunk ani tanchi kallji gheunk jem kitem kortat, tem Jehova polloita ani tacho valor korta.​—Mt. 10:42.

17. Ami kitem korcho nichov korum-ia?

¹⁷ Ami dor eka bhav-bhoinnancho khub mog kortat dekhun, ami tankam ‘khoicheach vatten addkoll zaunchem nhoi vo tankam dukhounchem nhoi.’ (Rom. 14:13) Hem ami koxem korunk zata? Poilim mhunnttlear, ami amchea bhav-bhoinnank amchea poros vortim mhunn lekhunk zai. Dusrem mhunnttlear, ami tankam kallzantlean bhogsunk zai. Ani tisrem, amkam konnem-i dukhoilem zalear, ami to rag amchea kallzant gheun boscho nhoi. Tachea bodlek, ami “xanti vosounk ani ekamekak dhir diunk pavoita te vatten” cholot ravonk zai.​—Rom. 14:19.