Hanv May 19, 1940-ant, Lebanon desachea Amioun xarant zolmolom. Thoddea disam uprant, ami Tripoli xarant ravonk gelim. Ami soglim mellon panch bhurgim. Hanv, mhozo bhav ani mhojeo tin bhoinno. Tanchea modem hanv sogleam-von dhaktto aslom. Mhojim avoi-bapui Jehovachim Sakxim aslim ani tannim mhaka Jehovacho mog korunk xikoilolo. Tim chodd poixe zoddchea poros, Bible obheas korop, mittingek vochop ani porgottnni korop hea kamank poilo zago ditalim.

Amchea sobhent zaitim obhixikt bhav-bhoinnam aslim. Tantuntlo Michel Aboud amcho sobhecho obheas ghetalo. To New York-ant astana taka sot mellʼllem. Ani uprant, tannem 1921-ant Lebanon-an porgottnnechem kam suru kelem. Amchea sobhent, Gilead Kors kelʼleo don bhoinni ailʼleo—Anne ani Gwen Beavor. Bhav Michel tankam khub man ditalo ani modot kortalo. Tim dogaim amchim borim ixttam zalim. Zaitea vorsam uprant, hanv United States-ant Anne-ak mellʼllo ani thoddea vorsamnim London Bethel-ant hanv Gwen-ak mellʼllo. Tem Wilfred Gooch-a sangata kazar zalʼlem ani London Bethel-ant seva kortalem.

Hanv tornnatto aslo tednam Lebanon-an thoddim Sakxim aslim. Tori astana, ami thoim  lokank urben porgott kortalim. Punn thodde padri amchea kamacho virodh kortale.

Ek dis hanv ani mhoji bhoinn Sana, eka building-ent porgottnni kortalim. Ami thoim porgottnni kortat mhunn konnem tori eka padrik ghoddie sanglem astolem. To padri thoim ailo ani mhojea bhoinnik vaitt utram ulounk laglo. Ani tannem taka panvddea voilean sokla dukllun uddoilem ani taka mar laglo. Hem soglem polloun konnem tori pulisank fon kelo. Pulis aile ani Sanak molom-pottʼtti korunk sanglem. Uprant te, tea padrik pulis station-ar gheun gele. Tea padri lagim pistol aslem tem polloun tannim taka vicharlem: “Tum konn? Padri vo gundda?”

Anik ek pavtti, ami ek bos korun eka pois zagear porgottunk gelim. Thoddo vell porian, ami thoim bore bhaxen porgottnni keli. Punn uprant, tea ganvcho padri thoinchea lokank gheun ailo. Tannim amkam dhomkailem ani te amcher fator marunk lagle. Tednam mhojea bapaik mar laglo. Mhojea bapaichem tondd soglem rogtan bhorlolem hanvlem polloilʼlem tem mhaka azun ugddas asa. Ami koxe-i bhaxen portun bosi lagim pavlim. Mhoji avoi mhojea bapaichem tondd pustana tinnem mhunnttlem: “Jehova, tankam bhogos. Te kitem kortat tem tankam khobor na.” Tichim him utram hanv kednanch visorchona.

Anik ek pavtt ami amchea soireank mellonk gelʼlim. Tednam hanv sov vorsancho aslo. Thoim mhojea xepaik mellonk bishop ailʼlo. Tea bishopak mhojim avoi-bapui Jehovachim Sakxim zalʼlim mhunn khobor aslem. Tor tannem mhaka aplea fuddem apoilo ani vicharlem: “Tunvem azun bautizm kiteak gheunk na? Hanvem taka sanglem, “Hanv azun lhan asa. Bautizm gheunchea poilim, hanvem Bible-a vixim chodd zannam zaunk zai ani Devacher mhozo bhavarth ghott asonk zai.” Hanvem dilʼlo zobab taka manonk na. Tannem vochon mhojea xepaik sanglem ki tujea natvak respedan ulounk kollona.

Tor soglech pavtti amkam virodh ailo oso na. Amkam zaite bore lokui mellʼlle. Te amche lagim bore bhaxen uloitale ani ami sangtat tem aikonk toiar asle. Toxench, ami thoim zaite Bible obheas pasun gheunk pavlim.

Hanv iskolant xiktalo tednam Venezuela-antlo ek bhav amchea desant mhunnchem Lebanon-ant ailʼlo. To amchea sobhent mittingek ietalo ani tednam mhoji bhoinn Wafa sangata tachi vollokh zali. Thoddea tempa uprant, tim kazar zalim ani Venezuela-nt ravonk gelim. Mhoji bhoinn mhojea bapaik chitteo boroun Venezuela-ant ravonk apounk lagli. Karonn taka amcho khub ugddas ietalo. Xevottak, ami soglim Venezuela-nt ravonk gelim.

1953-ant ami Venezuela-nt ravonk gelim. Thoim Caracas xarant, raxttrpoti bhovan-a lagim ami ravtalim. Hanv tednam bhurgoch aslo ani raxttrpoti aple vhoddle ghaddient boson voita tem polloun mhaka moja distali. Punn mhojea avoi-bapaik novea desant ravonk sompem naslem. Tankam thoinchi novi bhas xikonk, thoinchem jevonn, sonskruti ani tea zageachi  sonvoim zata mhunnttlear vell laglo. Punn thoddea vella uprant, tea zageachi sonvoim zaunk lagloli itlean ek vaitt ghoddnni ghoddli.

Mhozo bapui oso kednanch duent poddonaslo. To sodanch boro astalo. Uprant, to duent poddonk laglo. Ami taka dotorak dakhoilo tednam taka cancer asa mhunn amkam kollon ailem. Dukhachem mhunnttlear, eka sumana uprant, to bhair poddlo.

Hem dukh sosunk amkam khub kotthin zalem, chodd korun mhojea avoik. Ani tednam hanv fokot 13 vorsancho aslo. Punn Jehovachea adaran ami hem dukh sosunk pavlim. Hanv 16 vorsancho zalo tednam, mhojea iskolachem xikop somplem ani atam hanvem mhojea familicho samball korunk zai mhunn hanvem chitlem.

Thoddea tempa uprant mhoji bhoinn Sana, Ruben Araujo lagim kazar zali. To Gilead Kors korun porot Venezuela-nt ailolo. Uprant, tim New York-ant ravonk gelim. Mhojea kuttumban, hanvem New York university-nt xikchem ani mhojea bhoinni sangata ravchem mhunn tharailem. Mhojea bhoinnin ani tichea ghovan Jehova lagim mhoji ixttagot ghott korunk mhaka zaiti modot keli. Thoim hanv Spanish sobhent voitalo ani tea sobhent zaite onnbhovi bhav asle. Tantuntlea don bhavam lagim mhoji bori ixttagot zali—Milton Henschel ani Frederick Franz. He donui bhav Brooklyn Bethel-ant seva kortale.

Hanvem Watchtower masikent, thoddea bhav-bhoinnamnim Jehovachea sevent dovorlolea dhei-am vixim lekh vachle. Toxench, amchea sobhent, pioneer bhav-bhoinnam ani Bethel-ant seva korpi bhav-bhoinnam khuxal asat tem hanvem polloilem. Mhaka pasun tanche bhaxen khuxal ravonk zai aslem. Tor, university-nt mhojem poilem voros somponk ailem tednam, hanv mhojea jivitant kitem kortolo tea vixim hanv chintunk laglo. Tor, mhaka Jehovachi seva korunk zai zalear, hanvem Jehovak mhojem jivit somorponn korun bautizm ghevop gorjechem mhunn mhaka kollon ailem. Ani hanvem 30 Mars ,1957 hea vorsak bautizm ghetlo.

Mhozo bautizm zalea uprant, mhaka pioneer seva korunk zai asli. Punn oxem korop sompem naslem. Tor pioneer seva ani university-chem xikop hanv borabor koso kortolo mhunn hanv chintunk laglo. Hea vixim, hanvem toxench mhojea familin eka-mekak zaiteo chitteo boroileo. Mhaka university-chem xikop soddun Venezuela-nt porot ieunk zai ani pioneer seva korunk zai mhunn tea chittimnim hanvem tankam sanglem.

1957-achea Jun mhoineant hanv Caracas-ant porot ailo. Mhojea kuttumbachi poristhiti titli bori nasli. Taka lagon, mhaka kam korchem poddttolem aslem. Tednanch, mhaka eke bank-ent kam mellʼllem. Punn hanv pioneer seva korunk sodhtalo ani takach lagon hanv ailʼlo. Tor hanvem donui korpachem tharailem. Zaitim vorsam poriant, hanvem bank-ent kam kelem ani  teach borabor pioneer seva keli. Hanv khub bizi astalo khorem, punn hea kamant mhaka khub khuxalkai pasun mellttali!

Mhoji khuxalkai anik vaddli jednam hanv Sylvia nanvachea bhoinnik mellʼllo. Tem aplea avoi-bapai sangata Germany thaun Venezuela-ant ravonk ailolem. Tem Jehovacho khub mog kortalem ani pollounk sobit distalem. Tor ami kazar zalim. Amkam don bhurgim zalim—Michel (Mike), ani Samira. Mhoji avoi mhojea sangata aslolean tichi kallji gheunchi zobabdari pasun mhojer asli. Tor mhojea familicho samball korunk lagon, mhaka mhoji pioneer seva soddchi poddli. Punn hanv zata titlo porgottnnechem kam korit ravtalo. Amkam sutti mellttali tednam hanv ani Sylvia sahaiok pioneer mhunn seva kortalim.

Hea lekhachea survatek hanvem jea ghoddnne vixim sanglolem tednam mhojim bhurgim lhan aslim ani iskolak voitalim. Ami sukan jietalim ani amkam kainch unnem naslem. Bank-entlea lokam modem mhojem borem nanv aslem ani lok mhaka man ditalo. Punn lokamnim mhaka Jehovacho Sakxi mhunn vollkholʼlem mhaka zai aslem. Hanv fokot heach vixim chintalo. Tor, amchem jivit sadem koxem korunk zata hea vixim hanv mhojea baile lagim uloilo. Ami dogaimnim mellon sodh kelo. Hanvem bank-echea kama thaun retirement ghetlo zalear, mhaka umkech poixe melltta asle. Ani amchem kainch rinn naslem dekhun ami sadem jivit jieunk xoktalim ani amkam zaitim vorsam poriant poixeanchi chinta korchi goroz nasli mhunn mhaka kollon ailem.

Torui pioneer seva korcho nirnnoi ghevop titlem sompem naslem. Punn mhojea bailen ani mhojea avoin mhaka khub tenko dilo. Tor hanv portun ek pavtti pioneer seva korunk pavtolo mhunn khuxal aslo. Punn okosmat ami kednanch chintunk na tosli ek khobor amkam mellʼlli.

Sylvia-k bhurgem zaunchem asa mhunn dotoran amkam sanglem tednam ami khub khuxal zalim. Oxem zatolem mhunn ami chintunk naslem. Punn atam hanv pioneer seva koso kortolo mhunn hanv chintunk laglo. Tor amchea familint anik eka bhurgeak ieukar diunk ami amchea monachi toiari keli.

Ami pioneer seva korcho dhei dovorlolo to bodolchim nant mhunn ami tharailem. Abril 1985-ant amkam put zolmolo ani tachem nanv ami Gabriel dovorlem. Uprant, hanvem  bank-entlem kam soddun Jun 1985-ant pioneer seva suru keli. Thoddea tempa uprant, mhaka Xakha Somiticho sodoxio mhunn kam korcho sueog mellʼllo. Punn xakha ofis Caracas xara thaun sumar 80 kilometr pois aslem. Ani dor sumanak don vo tin pavtti mhaka thoim vochonk poddttalem.

Xakha Ofis La Victoria-nt aslolean, ami Caracas xar soddun thoim vochonk tharailem. Punn oxem korunk, amkam zaito bodol korcho poddlo. Ani he bodol korunk mhoji famil mhaka modot korunk toiar zali. Mhoji bhoinn Baha, mhojea avoicho samball korunk toiar zali. Amcho vhoddlo put Mike kazar zalʼlo, punn Samira ani Gabriel azun amcheach sangata aslim. Tor Caracas xar soddtta tednam, tankam tanchea ixttankui soddchem poddlem. Toxench, Sylviakui ek vhodd xar soddun ek lhan xarant vochonk poddlem. Ani amkam sogleank eka lhan ghorant ravonk sonvoim korchi poddli. Punn he sogle bodol ami khuxen kele.

Uprant, amcho put Gabriel kazar zalo ani Samira vegllea zagear ravonk gelem. 2007-ant mhaka ani Sylviak Bethel-ant kam korunk apounnem mellʼllem. Ani aiz pasun ami thoim seva kortat. Amcho vhoddlo put Mike ek vhoddil zaun asa. To ani tachi bail Monica, sangata mellon pioneer seva kortat. Gabriel pasun ek vhoddil mhunn seva korta. To ani tachi bail Ambra, sangata mellon Italy-nt seva kortat. Toxench, Samira ek pioneer zaun asa ani Bethel-ant remote volunteer mhunn seva korta.

Mhojea jivitant mhaka zaite nirnnoi gheunche poddle. Ani hanvem ghetlolea nirnnoi-anchem mhaka koslench dukh na. Hech nirnnoi mhaka porot ek pavtt gheunche poddle zalear, hanv oxech nirnnoi ghetolo. Jehovachea sevent mhaka zaiteo zobabdari ani sueog mellʼlle mhunn hanv tacho khub upkari. Jehova lagim ek ghott ixttagot dovrop kitlem gorjechem tem hanv somzolo. Ani lhan vo vhodd nirnnoi gheunk Jehova Dev amkam “amchea gineana poros” vorti apli xanti dita mhunn pasun hanv somzolo. (Filp. 4:6, 7) Sylvia-n ani hanvem Jehovachi seva poilea zagear dovrunk nirnnoi ghetlolean amkam zaitim besanvam mellʼllim ani aiz pasun ami Bethel-ant seva korun khuxal asat.