1. Jehovachea sevokank thodde pavtt eksurponn kiteak bhogta?

AMCHEA modem zaiteank eksurponn bhogta. Thoddeank tim bhavnam thoddoch temp urta, punn herank zaito temp toxem disonk xokta. Ani thodde pavtti ami lokam modem asta tednam pasun amkam eksurponn bhogonk xokta. Udharonnak, thoddeank tim dusrea eka sobhent voitat tednam, koslea-i karonnank lagon famili thaun pois ravonk voitat tednam vo tancho kazari sangati bhair poddtta tednam eksurponn bhogta. Tea bhair, thoddim sotant ailea uprant, tanchim ixttam vo famili tankam nakartat vo tancho virodh kortat tednam tankam eksurponn bhogonk xokta.

2. Hea lekhant amkam khoinchea prosnanche zobab mellttole?

² Amkam eksurponn bhogta tednam amkam koxem dista tem Jehova zannam ani to amkam modot korunk sodhta. Tor, Jehova amkam koso modot korta? Amchem eksurponn pois korunk ami kitem korunk zai? Ani toxench, dusreank eksurponn bhogta tednam tankam ami koxi modot korunk zata? Hea tin prosnanche zobab ami hea lekhant polloitolim.

3. Elijak eksurponn bhoglem tednam Jehovan kitem kelem?

³ Aple sevok khuxal aslole Jehovak zai. Tor ami dukhi vo nirax zatat tednam to amkam modot korunk sodhta. (St. 145:18, 19) Provadi Elijak eksurponn bhoglem tednam tannem kitem kelem tem polloum-ia. Eka vellar, Elijak ani Jehovachi seva kortoleank, aplea dusmana thaun zaito virodh soscho  poddlo. (1 Raz. 19:1, 2) Ani apunn soddun anik konnunch Jehovachi seva korina mhunn Elijak dislem. (1 Raz. 19:10) Tednam Jehovan eka ainzam udexim taka rokddoch adar dilo ani tachea sangata zaitim zannam apli seva korit asat mhunn Jehovan taka khatri dili!​—1 Raz. 19:5, 18.

4. Eksurponn bhogta tankam Marku 10:29, 30-a thaun Jehova kosli khatri dita?

⁴ Tunvem sot apnnailam mhunn tujea soireamnim ani ixttamnim tuka soddlam dekhun tuka eksurponn bhogonk puro. Punn hea vixim Jehova zannam. Tuka dista toxem apostl Pedruk-ui dislem. Karonn tannem Jezuk ek pavtti mhunnttlem: “Ami sogllem sanddlam ani Tuzo pattlav kela; tor amkam kitem melltolem?” (Mt. 19:27) Punn ugddas dovor, Jezun aplea xisank te Jehovachea eka vhodd familiche bhag zatat mhunn sangon buzvonn dilʼli. (Marku 10:29, 30 vachat.) Tor, atam tum bhav-bhoinnanchea eka vhodd familicho bhag zaun asa. Tea familicho Bapui zaun aslolo Jehova, tuka modot kortolo ani eksurponn bhogonk diuncho na mhunn utor dita. (St. 9:10) Tor, Jehovachi modot tujean koxi gheunk zata tem atam ami polloum-ia.

5. Jehova tuka modot korta tacher niall kelolean tuka koso faido zata?

⁵ Sogleant poilim Jehovan tuka koxi modot kelea tacher niall kor. (St. 55:22) Oxem kortat tednam tum ekttem na mhunn tuka kollttolem. Hachea vixim ami Carol nanvachea eke bhoinnichem udharonn polloum-ia. * Ti ekttich ravtali ani tichi famil sotant nasli. Ti mhunntta: “Mhojer somosia aileo tednam Jehovan mhaka koxi modot keli tacher niall kelolean hanv ekttem asa oxem mhaka disona. Ani fuddarakui mhojer somosia ietat tednam Jehova mhaka modot kortolo mhunn mhaka khatri asa.”

6. Bhav-bhoinnank eksurponn bhogta tednam 1 Pedru 5:9, 10 tankam koso urba dita?

⁶ Dusrem mhunnttlear, jim eksurim asat tankam Jehova Devan koxi modot kelea tea vixim niall kor. (1 Pedru 5:9, 10 vachat.) Amkam Hiroshichem ek borem udharonn  asa. To sotant ekttoch aslo. To mhunntta: “Sobhent zaitea zannank somosia astat. Tori astana, tim apleachean zata title bore bhaxen Jehovachi seva kortat. Hem polloun hanv eksuro aslear pasun Jehovachi seva korit ravonk mhaka urba melltta.”

7. Magnnem kelolean tuka koslo faido zaunk xokta?

⁷ Tisrem mhunnttlear, tuka Bible vachpachi ani mittingek vochpachi sonvoim asonk zai. Ani tuka koxem dista tem tunvem Jehovak magnneant sangonk zai. (1 Ped. 5:7) Hea vixim Massiel-achem borem udharonn asa. Tachea familintlem tem eklench sotant ailem dekhun taka eksurponn bhogtalem. Tor tem mhunntta, “Mhaka koxem dista tem hanv Jehovak dor disak ani zaite pavtti sangtalem. Taka lagon, hanv mhojem eksurponn pois korunk pavlem.”

8. Bible vachun tacher niall kelolean tuka koxi modot zaunk xokta?

⁸ Jehovacho mog dison ieta toslim versam vachun sodanch tacher niall korat. Hea vixim amkam Bianca nanvachea bhoinnichem udharonn asa. Tika tichea familintlim dukhoitat toslim utram uloitalim. Ti mhunntta: “Bible-antleo ghoddnneo vachun ani mhojeach sarki poristhiti aslolea Jehovachea Sakxeanche onnbhov vachun ani tacher niall korun mhaka modot zali.” Toxench thoddeank, Bible-antlim versam zoxim Stotr 27:10 ani Izaias 41:10 tonddpatt kelolean buzvonn mellʼllea. Ani thoddim mittingechi toiari kortana vo Bible vachtana audio recording aikotat. Ani oxem korun tim ekttim asat oxem tankam disona.

9. Mittingek gelolean tuka koso faido zaunk xokta?

⁹ Mittingek gelolean tuka zaitem xikonk mellttolem. Tuka bhav-bhoinnam sangata ixttagot korunk mellttoli. Tor urba mellonk mitting kednanch chukoinakat. (Heb. 10:24, 25) Hea vixim Massiel sangta: “Hanv khub lojetalem. Tori astana, dor eke mittingek vochonk ani ek tori zobab diunk hanvem nichov kelʼlo. Oxem kelolean mhojem eksurponn pois zalem.”

10. Sobhentlea bhav-bhoinnam sangata ixttagot korop kiteak gorjechem?

¹⁰ Chovtem mhunnttlear, tujean veg-vegllea piraiechea ani onnbhov aslolea bhav-bhoinnam sangata ixttagot korunk zata. Karonn “zanntteam lagim zannvai” asta mhunn Bible sangta. (Job 12:12) Ani zantteank pasun tornnatteam thaun zaitem xikonk melltta. Bible-ant amkam David ani Jonathanachem borem udharonn asa. David, Jonathana poros khub lhan aslo. (1 Sam. 18:1) Tanchea modem bori ixttagot asli dekhun te zaitea oddchonneancho fuddo korunk pavle. (1 Sam. 23:16-18) Irina, ji  sotant ektti asa, ti mhunntta toxem, “Amkam sobhentlea bhav-bhoinnanchi bori ixttagot asa zalear tim amchim svotachim avoi-bapui ani bhav-bhoinnam koxim zaunk xoktat. Hea toren Jehova amchem eksurponn pois korta.”

11. Tunvem bori ixttagot zoddunk kitem korunk zai?

¹¹ Tum lojeta zalear, tuka novim ixttam korop kotthin zaunk xokta. Hea vixim amkam Ratna nanvachea bhoinnichem udharonn asa. Tika virodh aslo. Tori astana, ti sot xikli. “Hanvem mhojea bhav-bhoinnanchi modot gheunk zai mhunn mhaka kollʼllem.” Tuka koxem dista tem herank sangop sompem nhoi. Tori punn, tunvem sanglem zalear, tuka borim ixttam mellttolim ani tannim tuka koxi modot korunk zata tem tim somzonk pavtolim.

12. Porgottnnent gelolean tuka borim ixttam koxim mellonk xoktat?

¹² Tuka bori ixttam zai zalear sogleant poilim, tunvem sobhentlea bhav-bhoinnam borabor porgottnnent vochonk zai. Carol nanvachea bhoinnin pasun oxench kelem. Tem sangta: “Hanv veg-vegllea bhoinnam sangata porgottnnent voitalem ani toxench Jehovachea sevent her kamam pasun kortalem. Ani haka lagon hanv tanchea sangata bori ixttagot korunk pavlem. Jehovan mhaka hea ixttam udexim zaiti modot kelea.” Tor, oslea bhav-bhoinnam sangata tum ixttagot korta tednam Jehova tujim eksurponnachim bhavnam pois korunk modot kortolo.​—Mho. 17:17.

13. Sobhentlea dor eklean kitem korunk zai?

¹³ Amkam sobhent konnakuch eksurponn bhoglolem naka zalear, ami dor eklean amchea utramnim ani korneamnim sogleank mog dakhounk zai. (Juanv 13:35) Osloch mog onnbhovloli ek bhoinn mhunntta: “Hanv sot xiklem tednam sobhentlim bhav-bhoinnam mhoji famil koxi zali. Tannim mhaka modot korunk nasli zalear, hanv Jehovachem Sakxi zaunk pavchem naslem.” Tor, sotant eklinch asat tannim eksurponn bhoglolem amkam naka zalear ami kitem korunk zata?

14. Sot xikta tanchea sangata ixttagot korunk ami kitem korunk zai?

¹⁴ Ami tanchea sangata ixttagot korunk zata. Tim sobhent ietat tednam ami tankam zap korunk zata vo hoddkunk zata. (Rom. 15:7) Punn, ami tanchim ixtt zatolim zalear, ami tanchea lagim ulounk zai. Tor ami tankam thodde prosn vicharunk zata. Zoxe, tankam sot koxem mellʼllem? Vo tankam koslea oddchonneancho fuddo korcho poddtta? Uprant, tim uloitat tednam ami tanchem pasiesan kan diun aikonk zata. Thoddim sotant novim astat tednam ulounk fattim sortat, tor ami tankam lojent ghalta tosle prosn vicharche nhoi vo zobab diunk tancher dobhav ghalcho nhoi. Hea toren ami tankam mog dakhoun tanchea sangata ixttagot korunk pavtolim.

15. Sotant ghott asloleamnim herank koxi modot korunk zata?

¹⁵ Sotant ghott asloleamnim ani khas korun vhoddilamnim tanchea sangata ixttagot keli zalear, tim pasun sotant ghott zaunk xoktat. Melissa nanvachea bhoinnik tichea avoin sot xikoilolem. Tem khub upkariponnan oxem mhunntta: “Mhojem konnem-i kan diun aikonk zai oxem mhaka distalem tednam sobhentle vhoddil mhojem kan diun aikotale. Hea toren te mhojea bapai sarke asle.” Atam ami bhav Mauricio vixim polloum-ia. Taka jea bhavan Bible xikoilolo to sot soddun gelo. Takach lagon Mauricio-k eksurponn bhogonk laglem. To mhunntta: “Mhojea sobhentlea vhoddilamnim mhoji khub kallji ghetli. Te  mhoje lagim uloitale, mhojea sangata porgottnnent ietale ani tankam svotachea Bible obheasant mellʼllole bore mudhe te mhaka sangtale. Te mhojea sangata khellonk pasun ietale.” Sotant ghott asloleamnim mog dakhoilolean aiz tim purnn vellachi seva kortat.

16-17. Eksurponn bhogta tankam modot korunk ami anik kitem korunk zata?

¹⁶ Eksurponn bhogta tankam modot korat. (Gal. 6:10) Bhav Leo aplea famili thaun pois aslolea eka zagear mixinori mhunn seva korta. To mhunntta: “Thodde pavtt dusreamnim kelolem ek lhan kam pasun amkam khuxal korta. Hem mhaka mhozo accident zalʼlo tednam somzolem. Tea disa eka zoddpean mhaka jevnnak apoilo. Tea disa tannim jevnnak kitem randlolem tem mhaka ugddas na, punn tannim mhojem bore bhaxen aikolʼlem tem hanv aiz pasun visronk na. Tannim oxem kelolean mhoji sogli chinta pois zali!”

¹⁷ Amkam sogleank zomatimnim ani odhivexonamnim mellon ieunk borem dista, karonn thoim amkam amchea bhav-bhoinnam sangata vell sarunk melltta. Punn thoddeank thoim eksurponn bhogonk puro karonn tankam tim eka familicho bhag na koxem dista vo halinch tancho konn mogacho bhair poddla zait. Carol-ak pasun oxench dista. Tem mhunntta, “Odhivexonamnim ani zomatimnim zaitim bhav-bhoinnam amchea bhonvtonnim astat. Punn tim ap-aplea famili sangata astat. Tor, khas korun hea vellar mhaka eksurponn bhogta. Ani mhaka thoim ravonk borem disona.” Tumi oslea bhav-bhoinnank vollkhotat, zankam Carol-a sarkem dista? Toxem zalear fuddlea odhivexonam vellar vo zomati vellar tankam tumchea famili sangata vhorat.

18. 2 Korintkarank 6:11-13-ant sanglolim utram ami koxim apnnaunk zatat?

¹⁸ Eka-meka sangata vell sarat. Veg-vegllea bhav-bhoinnam sangata, khas korun jim eksurim asat tanchea sangata vell sarat. Karonn oslea eksurea bhav-bhoinnank ami ‘[amchim] kallzam sarkim uktim korunk’ zai mhunn Bible sangta. (2 Korintkarank 6:11-13 vachat.) Melissa jichea vixim  ami poilim uloilolim ti mhunntta: “Amchim bhav-bhoinnam amkam tanchea ghora apoitalim tednam vo tanchea sangata khoim-i vochonk apoitalim tednam ami khuxal zatalim.” Tor, tumchea sobhent eksurim aslolea khoinchea bhav-bhoinnam sangata tumi vell sarunk sodhtat?

19. Eksurponn bhogta tea bhav-bhoinnam sangata khas korun kednam vell sarlear borem zatolem?

¹⁹ Udharonnak, tumchea sobhent oslim bhav-bhoinnam asonk xoktat jim sotant eksurim asat. Tor festam-porbam vellar tanchea famili sangata tim bhag ghenant dekhun tankam eksurponn bhogonk xokta. Vo thoddim bhav-bhoinnam zanchim mogachim bhair poddleant, tankam vorsachea thoddea disank khub eksurponn bhogonk puro. Zoxem tanchim mogachim meleant tea disak. Tor, oslea vellar ami tanchea sangata vell sartat tednam ami “khorea monan” tanchi kallji ghetat mhunn dakhoitolim.​—Filp. 2:20.

20. Amkam eksurponn bhogta tednam, Matev 12:48-50-ant aslolea Jezuchea utrantlean amkam koxi urba melltta?

²⁰ Amkam ghoddie zaitea karonnank lagon eksurponn bhogonk puro. Punn Jehova amchim bhavnam somzota ani bhav-bhoinnam udexim modot korta. (Matev 12:48-50 vachat.) Toxench, eksurponn bhogta tea bhav-bhoinnank ami tenko dilolean tankam Jehova amchea udexim modot korunk xokta. Tor, amkam kitlem-i eksurponn bhogom, Jehova amchea sangata sodanch asa mhunn ami kednanch visorchem nhoi!