ZAITEA vorsam thaun Israelitkar khore bhoktek tenko diunk poixe ditale. Punn Jezuchea disamnim, Judev lokank khub toreche tax farik korunk poddttale. Ani he sogle tax farik korun tanchem jivit kotthin zalʼlem.

Jezuchea disamnim farik korunk poddttalem tem ek tax, devmondiracho samball korunk aslem. Adlea tempar dor ek Judev ordo shekel vo don drachma farik kortale. Ani poilea xekddeant Herodan bandlolea devmondiracho samball korunk ani bhettounne pasot hoch ordo shekel vo don drachma uzar kortale. Jezu hem tax farik korta kai na mhunn thoddea Judevamnim Pedruk vicharlem tednam hem tax farik korop chukichem mhunn Jezun sangonk na. Karonn Jezun Pedruk ek stater vo ek chandicho nanno haddun tem tax farik korunk lailem.—Mt. 17:24-27.

Dusrem tax farik korunk zai aslem tem mhunnttlear, Devachea lokamnim aplea zomnint pikta tacho vo aplea pagaracho dhavo vantto diunk zai aslo. (Lev. 27:30-32; Lok. 18:26-28) Punn Jezuchea disamnim, dhorm-xastriamnim hea dhavea vanttea vixim koddok kaide kelʼle. Te “hortelanv, boddixep ani jirem” hea vostuncho pasun dhavo vantto diunkuch zai mhunn lokancher dobhav ghaltale. Hea pasot dhorm-xastriank ani Farizevank Jezun dhongi mhunnttle. Punn dhavo vantto farik korop chukichem mhunn hanga Jezun sangonk na.—Mt. 23:23.

Tea vellar, Judevank Romi sorkarak zaite tax diunk poddttale. Zoxem, xet-bhatt asloleamnim tax diunk poddttalem. Tannim tem poixe diun vo her vostumnim diunk zai aslem. Ani hem tax sumar 20 tem 25 tokʼke poriant diunk poddttalem. Hachea bhair, dor eka Judevak Romi sorkarak tax farik korchem poddttalem. Ani heach tax-a vixim Farizevamnim Jezuk vicharlolem. Jezun tankam zobab dilo: “Somrazachem tem Somrazak diat, ani Devachem tem Devak diat.”—Mt. 22:15-22.

Toxench, veapar-dhondo kortoleank aplo mhal ek zagear thaun dusrea zagear vhoronk tax farik korunk poddttalem. Tem tax dhokeancher, pulancher, char rosteancher, bazarant vo xarachea bhair-bhitor sortana diunk poddttalem.

Tor Romi sorkara khala aslolea lokank him soglim tax-am bhorop ek vojem koxem zalʼlem. Romi lokancho itihas boroupi Tacitus sangta ki Tiberius Somrat raj choloitalo tednam ani Jezu hea sonvsaracher aslo tednam, “Syria ani Judæa xaramnim ravpi lok, tankam farik korunk poddttalem tem tax komi kor mhunn magtale, karonn tankam tem tax farik korunk khub kotthin zatalem.”

Tea bhair, jea toren te lokam koddlean tax ektthaim kortale, taka lagon tem tax farik korunk tankam khub kotthin zatalem. Romi sorkar oslea lokank tax ektthaim korunk nemtale je ti podvi melloun gheunk sogleam poros chodd poixe diunk toiar asle. Ani uprant he nemlole munis lokam koddlean tax ektthaim korpachem kam dusrea munxank ditale. Udharonnak, ghoddie Zakevan pasun oslench kam korunk aplea hata khala munxank dovorlole. (Lukas 19:1, 2) Tor, Romi sorkaran nemlole munis ani tax ektthaim korunk nemlole munis pasun lokam thaun chodd poixe ghetale. Tor he tax ektthaim korpi hea toren lokanche poixe luttʼttale dekhun lok tancho khub dves kortalo.