1. Upodexok 7:20-ant aslolea Solomonachea utrantlean amkam kitem kollon ieta?

 RAZA Solomonan oxem mhunnttlem: “Sodanch dusreak borem korpi ekdam tori patok korunk naslolo monis sonvsarant mellcho na.” (Up. 7:20) Hem kitlem khorem zaun asa! Karonn ami soglim patki. (1 Juanv 1:8) Tor amkam Deva koddlean ani her munxam koddlean bhogsonneachi khub goroz asa.

2. Tumcho ek lagxilʼlo ixtt tumkam bhogxita tednam tumkam koxem dista?

² Tumi tumchea eka lagxilʼlea ixttak kednam-i tori dukhoila kai? Tea vellar porot tache ixtt zaunk tumi tache lagim bhogsonnem maglem astolem. Ani tannem udar kallzan tumkam bhogxilim tednam, tumkam kitlem borem dislem astolem ani tumi kitlim khuxal zalim astolim nhoi!

3. Hea lekhant ami kitem polloitolim?

³ Ami Jehova lagim ghott ixttagot korunk sodhtat astolim. Punn thodde pavtti ami taka amchea utramnim ani kornneamnim dukhoitat. Tor oxem ghoddtta tednam, Jehova amkam bhogsunk toiar asa mhunn ami kiteak khatri dovrunk zata? Jehova jea ritin amkam bhogxita ani ami jea ritin dusreank bhogxitat, tache modem kitem ontor asa? Ani Jehova konnank bhogxita? Hea prosnanche zobab ami hea lekhant polloitolim.

4. Jehova amkam bhogsunk toiar asa mhunn ami kiteak khatri dovrunk zata?

⁴ Jehova bhogsunk toiar asa mhunn tannem aplea Utrantlean amkam khatri dilea. Sinai dongrar, Moizesak aplea vixim sangonk Jehovan eka ainzak dhaddlo. Tea ainzan mhunnttlem:  “Sorvespor, Sorvespor, doiall-movall Kallzacho Dev! To rokddoch ragar zaina, punn bhov dulob ani visvaxi; hozarank To Aplem bholeponn dakhoita; chuki, oprad ani patok bhogxita.” (Sutt. 34:6, 7) Tor Jehova ek doiall ani kakuticho Dev zo poschatap kortat tankam bhogsunk sodanch toiar asa.—Ne. 9:17; St. 86:15.

5. Stotr 103:13, 14 pormonnem, Jehova amkam ekdom bore toren vollkhota dekhun to kitem korta?

⁵ Jehova amcho sogleancho Rochnnar dekhun to amche vixim ani hea prithumer jietolea dor eka munxa vixim soglem zannam. (St. 139:15-17) Tor amkam kosleo oskotai-o asat tem Jehovak khobor asa. Itlench nhoi, amcho sobhav umkech bhaxen kiteak asa ani amchea sobhavacher amchea avoi-bapaicho vo amchea jivitant ghoddlolea ghoddnneancho koso probhav poddla tem pasun to zannam. Tor Jehova amkam itle bore toren vollkhota dekhun to amchea sangata doiall toren vagta.—St. 78:39; Stotr 103:13, 14 vachat.

6. Jehova amkam bhogsunk toiar asa mhunn tannem koxem dakhoun dilem?

⁶ Adanvachea patkak lagon ami soglim patok kortat ani mortat. (Rom. 5:12) Toxench, ami dusreank ani amkam svota tantuntlean salvar korunk xokonant mhunn Jehova zannam. (St. 49:7-9) Hea pasot tannem kitem kelem? Juanv 3:16-nt sanglolea pormonnem, Jehovan aplea ekleach Putak amchea pasot moronk dhaddlo. Hea toren tannem amkam doia dakhoili ani amkam patkantlim ani mornnantlim salvar zaunk ek vatt ukti keli. (Mt. 20:28; Rom. 5:19) Jezu amchea suvater melo ani hea udexim tacher bhavarth dovortat tea sogleank soddvonn melltta. (Heb. 2:9) Tor hea vixim chintat. Aplea Putak itlem dukhachem ani lojechem moronn sosunk poddlem tem polloun Jehovak kitli dukh zali astoli. Jehova oxem kednanch zaunk diuncho naslo. Punn to amkam bhogsunk sodhtalo dekhunuch tannem oxem kelem. Hea toren Jehova amkam bhogsunk toiar asa mhunn tannem dakhoun dilem.

7. Jehovan udar kallzan bhogxilim toslim Bible-antlim thoddim udharonnam khoinchim?

⁷ Jehova bhogsunk toiar asa mhunn tannem anik koxem dakhoun dilam? Jehovan bhogxilim toslea zaitea zannanchim udharonnam amkam Bible-ant mellttat. (Ef. 4:32) Tumkam ghoddie Raza Manassecho ugddas ieunk puro. Tannem kuddʼddea devanchi bhokti keli ani dusreankui toxench korunk urba dili.  Tannem aplea bhurgeank khottea devank bolidan kelim. Itlench nhoi, tannem Jehovachea mondirant eke khotte devichi murti haddun bosoili. Tor Raza Manassen Jehovachea add itlim vhoddlim-vhoddlim patkam kelim ki tachea vixim Bible-ant oxem sanglam: “Tannem Sorvesporachea dolleam mukhar khub vaitt tem kelem ani Sorvesporacho rag choddo-so kelo.” (2 It. 33:2-7) Tori astana, Manassen khorench poschatap kelo tednam Jehovan taka bhogxilo ani taka porot raza zaunk pasun sondhi dili. (2 It. 33:12, 13) Tumkam ghoddie Raza Davidacho pasun ugddas ailo astolo. Tannem Jehova add zaitim gombhir patkam kelim. Udharonnak, tannem pordvar kelo ani dusreacho jiv kaddlo. Punn uprant, tannem apli chuk vollkhon ghetli ani khorench poschatap kelo tednam Jehovan taka pasun bhogxilo. (2 Sam. 12:9, 10, 13, 14) Punn Jehova amkam jea toren bhogxita ani ami dusreank jea toren bhogxitat, hache modem koslo ontor asa tem ami fuddem polloum-ia.

8. Jehova sogleam poros boro Neai Korpi kiteak zaun asa?

⁸ Jehova “akʼkhe prithumecho Monʼsubidar” zaun asa. (Ut. 18:25) Eka borea monsubidarak vo neai korpeak kaideam vixim bori vollokh asop ekdom gorjechem. Ani Jehova sogle kaide ekdom bore bhaxen zannam. Karonn tannench amkam kaide dileat. (Iz. 33:22) Itlench nhoi, kitem sarkem ani kitem chukichem tem pasun to ekdom bore bhaxen zannam. Toxench, eka borea neai korpeak nirnnoi gheunche poilim, eke poristhiti vixim sogli mahiti asonk zai. Ani Jehova tor soglem zannam. Tea pasot to ekdom boro Neai Korpi zaun asa.

9. Eka munxak bhogsuncho kai na ho nirnnoi gheta tednam Jehovak kitem soglem khobor asta?

⁹ Jehova munxam bhaxen neai korina. Munxam fokot tannim kitem polloilam vo aikolam tachech adarit neai kortat. Punn Jehovak eke poristhiti vixim vo eka munxam vixim sodanch sogli khobor asta. (Ut. 18:20, 21; St. 90:8) Tor ek munis kosle poristhitint vaddla, tachea avoi-bapaiche kosle gunn vo sonvoim-o taka asat, tachim bhavnam ani chintop koxem asa, tem Jehova bore bhaxen zannam. Toxench, eka munxachea kallzant kitem asa, tem mhunnttlear to umkech toren kiteak vagta, taka kosleo itsa asat, hem soglem Jehovak khobor asa. Ani tache nodre thaun kainch lipon urona. (Heb. 4:13) Tor eka munxa vixim hem soglem Jehovak khobor asta dekhunuch taka bhogsuncho kai na, ho nirnnoi to gheunk xokta.

10. Jehovache nirnnoi sodanch sarke astat mhunn ami kiteak mhunnonk zata? (Dusri Somurt 32:4)

¹⁰ Jehovache nirnnoi sodanch sarke astat. Karonn to bhedbhav korina. Ek munis pollounk ekdom boro dista, to khub girest asa, taka ek vhoddlem nanv asa vo zaiti tank asa dekhun Jehova taka bhogxita oxem nhoi. (1 Sam. 16:7; Jak. 2:1-4) Toxench, Jehovak konnem-i lonch diunk zaina vo tacher dobhav ghalunk zaina. (2 It. 19:7) Tea bhair, bejar vo ragar zaun ani bhavnancher adarit to nirnnoi ghena. (Sutt. 34:7) Punn amche vixim ani amche poristhiti vixim to soglem somzon gheta ani uprant nirnnoi gheta. Ani hea pasot, to sogleam poros boro Neai Korpi zaun asa.—Dusri Somurt 32:4 vachat.

11. Munxam poros Jehovachem bhogsonnem vegllem koxem zaun asa?

¹¹ Jehova Devachem bhogsonnem sogleam poros vegllem mhunn Hebrev bhaxen boroilʼlea pustokanchea boroupeamnim vollkhon ghetlem. Tea pasot, Jehovachea bhogsonnea vixim sangtana tannim ek khas utor uzar kelem. Hea utra vixim eka pustokant sanglam ki, “hem utor ek munis dusrea munxak bhogxita hea vixim sangonk uzar korinasle. Punn  fokot Dev munxank bhogxita teach vixim sangonk uzar kortale.” Ek munis dusrea munxak purnn toren bhogsunk xokona. Punn fokot Jehova Devakuch poschatap korta taka purnn toren bhogsunk odhikar asa. Tor Jehova eka munxak bhogxita tednam kitem zaunk pavta?

12-13. (a) Jehova amkam bhogxita tednam ami kitem onubhovunk pavtat? (b) Jehova amkam koso bhogxita?

¹² Ami Jehovachem bhogsonnem manun ghetat tednam “xanti-somadhanacho kall” ami onubhovunk pavtat. Zoxem, amkam monachi xanti ani ek nitoll ontoskornn asta. Ani ‘Jehova koddlean’ amkam bhogsonnem melltta tednanch ami tim bhavnam onubhovunk pavtat. (Itihas 3:19) Karonn Jehova amkam oxe toren bhogxita, zoxem ami tem patok kednanch korunkuch naslem. Ani to porot amkam tache ixtt zaunk sondhi dita.

¹³ Jehovan amkam bhogxilea uprant, teach patkak lagon to amkam porot kednanch khast laina vo tacho ugddas pasun korina. (Iz. 43:25; Jer. 31:34) Punn “Udent ani Ostomt jitleo ekameka thaun pois-pois asat” titlim pois to amchim patkam kaddun uddoita. * (St. 103:12) Ani Jehova hea toren amkam bhogxita tacher ami niall kortat tednam ami ojap zatat, ani tachea pasot amchem upkariponn vaddtta. (St. 130:4) Punn Jehova konnank bhogxita?

14. Atam porian, Jehova amkam bhogxitolo kai na ho nirnnoi kiteacher adarit asa mhunn ami xiklim?

¹⁴ Atam porian ami polloilem ki Jehova amkam bhogxitolo kai na, tem amchem patok kitlem vhoddlem vo lhan asa tacher adarit na. Toxench Jehova amcho Rochnnar, Neai Korpi ani Kaido Diupi aslolean, amche vixim jem kitem taka khobor asa tachea adarit to nirnnoi gheta. Punn amkam bhogxitolo kai na tem tharaunchea poilim Jehova kiteacher dhean dita?

15. Lukas 12:47, 48-a pormonnem, Jehova kiteacher dhean dita?

¹⁵ Poilem mhunnttlear, apunn korta tem chukichem asa mhunn patok korta taka khobor asa kai na, hacher Jehova dhean dita. Ani heach vixim Jezun Lukas 12:47, 48-ant sanglolem. (Vachat.) Tor apunn korta tem ekdom vaitt ani tem Jehovak manvona mhunn ek munis zannam, tori astana to tem korta zalear, to ek gombhir patok adarta. Ani hea karonnak lagon Jehova ghoddie  taka bhogsuncho na. (Marku 3:29; Juanv 9:41) Thodde pavtti, ami pasun zannam zaun chukichem tem kelam astolem. Tor hacho orth Jehova amkam bhogsuncho na kai? Hacho zobab zannam zaunk Jehova anik kiteacher dhean dita tem polloum-ia.

16. Poschatap korop mhunnttlear kitem, ani hem korop kiteak gorjechem?

¹⁶ Jehova dhean dita to dusro vixoi mhunnttlear, ami khorench poschatap kela kai na tem to polloita. Tor poschatap korop mhunnttlear kitem? Poschatap korop mhunnche “ek munis aplea chintpant ani sobhavant bodol korta.” Tannem kelʼlea patka vixim taka vaitt dista. Tea bhair, khoinchea karonnak lagon tea patkant poddon Jehova sangata tannem apli ixttagot hogddaili, tea vixim chintun to dukhi zata. Hea vixim amkam Raza Manasse ani Raza Davidachem udharonn asa. Tannim dogaimnim gombhir patkam kelʼlim. Punn tannim khoro poschatap kelo dekhun Jehovan tankam bhogxile. (1 Raz. 14:8) Tor ami khorench poschatap kela mhunn Jehova polloita tednam to amkam bhogxita. Punn ami kelʼlea patkak lagon fokot vaitt dislearuch puro kai? Na. Ami khorench poschatap kela mhunn ami amchea kornneamnim dakhounk zai. * Tor atam, Jehova anik khoinchea vixoi-acher dhean dita tea vixim ami polloum-ia.

17. Jivit bodlop mhunnttlear kitem, ani hem korop kiteak gorjechem? (Izaias 55:7)

¹⁷ Jehova dhean dita to tisro vixoi mhunnttlear, eka munxan aplem jivit bodolʼlam kai na tem to polloita. Jivit bodlop mhunnttlear, apli vaitt vatt soddun divop ani Jehovak manvota tea pormonnem jievop. (Izaias 55:7 vachat.) Tor ek munis aplem jivit bodolta tednam to Jehova chintʼta tea toren chintunk proitn korta. (Rom. 12:2; Ef. 4:23) Toxench, aplem vaitt chintop ani vagnnuk soddun diunk to nichov korta. (Kol. 3:7-10) Hem khorem, ki Jezuchea bolidanacher bhavarth dovorlolean, Jehova amkam amchea patkanchem bhogsonnem diunk toiar asa. Punn ami amchem jivit bodlunk khorench proitn kortat mhunn to polloita tednanch to amkam bhogxita.—1 Juanv 1:7.

18. Jehovachea bhogsonnea vixim atam meren ami kitem polloilem?

¹⁸ Atam meren ami polloilem toxem, Jehova sogleam poros vorto bhogsupi zaun asa. Hem ami tin karonnank lagon mhunnonk xoktat. Poilem, to amkam bhogsunk sodanch toiar asa. Dusrem, to amche vixim soglem zannam ani hea pasot ami khorench poschatap kela kai na tem to vollkhonk xokta. Ani tisrem, Jehova amkam oxe toren bhogxita zoxem ami poilim kednanch patok adarunkuch naslem. Oxem kelolean amkam ek nitoll ontoskornn ani Jehovachi maniotai melltta.

19. Ami opurnn, ani patok korit ravtat, tori astana ami khuxal kiteak ravonk xoktat?

¹⁹ Ami opurnn munxam dekhun ami patok korit ravtolim. Punn Insight on the Scriptures, Volume 2, pan 771-acher sanglolea utrantlean amkam bhuzvonn mellonk xokta. Thoim sanglam: “Jehova ek doiall Dev ani aplea sevokank oskotai-o asat mhunn to zannam. Tor ami opurnn ani chuki kortat, heach vixim porot-porot chintun ami niraxi zaunk favona. (St. 103:8-14; 130:3) Karonn ami Jehovak manvota tem korunk amchean zata tem soglem kortat tednam ami khuxal ravonk xoktat. (Filp. 4:4-6; 1Ju. 3:19-22).” Khorench, him utram amkam kitli urba ditat nhoi!

20. Ami fuddlea lekhant kitem polloitolim?

²⁰ Ami kelʼlea patkank lagon ami khoreanich poschatap kortat tednam Jehova amkam bhogsunk toiar asta mhunn ami tache kitlim upkari asat. Tor ami Jehovachi dekh gheun dusreank koxem bhogsunk zata? Ami jea toren dusreank bhogxitat ani Jehova jea toren amkam bhogxita, hantunt kitem ek-sarkem asa ani kitem ontor asa? Ani ho ontor vollkhop kiteak gorjecho? Tor hea prosnanche zobab ami fuddlea lekhant polloum-ia.