OBHEASACHO LEKH 27
‘Jehovacher Bhorvonso Dovrat’
“Sorvesporacher visvas dovor: thir rav, kalliz ghott dhor.”—ST. 27:14.
GIT 128 Enduring to the End
KITEM XIKTOLIM *
1. (a) Jehovan amkam koslo bhorvonso dila? (b) ‘Jehovacher visvas dovrop’ mhunnttlear kitem? (“Utrachi Somzonni” polloiat.)
APLEACHO mog kortolea sogleank, Jehovan ek ekdom boro bhorvonso dovorla. To mhunnttlear, to beginuch duensam, dukh ani moronn kaddun uddoitolo. (Prok. 21:3, 4) Toxench, apleacher visvas dovortolea ‘khaltea munxank’ hi prithum ek sobit bag korunk to modot kortolo. (St. 37:9-11) Ani tednam ami tachea sangata atam poros anikui ghott ixttagot korunk pavtolim. Hem kitlem borem zaun asa nhoi! Punn Jehovan dilʼli bhas to pallttoloch mhunn amkam kiteak khatri asa? Karonn Jehova apunn sangta tem to sodanch korta. Hea pasot, ami ‘Jehovacher visvas vo bhorvonso dovrunk’ zata. * (St. 27:14) Oxem korunk, to aplem utor palltta tea mhunnosor ami pasiensan ani khuxalkaien tacher patieun ravonk zai.—Iz. 55:10, 11.
2. Jehovan amkam koslo puravo dila?
2 Apnnem dilʼli bhas apunn palltta mhunn dakhounk Jehovan amkam zaite purave dileat. Hacho ek puravo mhunnttlear, amchea disam vixim tannem Prokasovnni pustokant dilʼli bhas. Apunn dor ek raxttrachea, kullachea ani bhaxechea lokanchea eka zomeak khori bhokti korunk ektthaim kortolo mhunn Jehovan bhas dilʼli. Ani aiz hea zomeak ami ‘vhodd urponz’ mhunn vollkhotat. (Prok. 7:9, 10) Hea zomeant, sonvsarbhorche veg-veglle dadle, bailo ani bhurgim asat tem khorem. Tori astana, tim soglim ek famil koxim xantin jietat. (St. 133:1; Juanv 10:16) Itlench nhoi, tim aikonk umed dakhoitolea khoinchea-i munxak Devan fuddarak dovorlolea bhorvonxea vixim urben porgott korunk sodanch toiar astat. (Mt. 28:19, 20; Prok. 14:6, 7; 22:17) Tor tumi hea vhodd urponjicho bhag zaun asat zalear fuddarak dovorlolea hea borea vostuncho bhorvonso tumkam khub moladik asa nhoi!
3. Ami kitem chintlolem Soitanak zai?
3 Amkam fuddara pasot boro bhorvonso aslolo Soitanak naka. Toxench, Jehova amchi kallji ghena ani apnnem dilʼli bhas to pallchona oxem ami chintlolem Soitanak zai. Ami Soitanak jikhonk diun amcho bhorvonso soddun dilo zalear, ami amcho dhir sanddun ditolim ani Jehovachi seva pasun korop bond korunk xoktat. Tor Soitanan Joba sangata oxench korunk koso proitn kelo tem ami polloitolim.
4. Hea lekhant ami kitem polloitolim? (Job 1:9-12)
4 Joban Jehovachi bhokti korop soddun diunk, Soitanan kitem-kitem kelem tem ami hea lekhant polloitolim. (Job 1:9-12 vachat.) Toxench Joba thaun ami kitem xikonk zata, ani Jehova amcho mog korta ani apnnem dilʼli bhas to pallttoloch mhunn ami kiteak ugddas dovrunk zai, hem-ui ami hea lekhant polloitolim.
JOBAN BHORVONSO SODDUN DIUNK SOITANAN KHUB PROITN KELO
5-6. Okosmat Joba sovem kitem ghoddlem?
5 Jobachem jivit ekdom borem aslem. To khub girest aslo, tachi ek vhodd famil asli ani tim soglim ekvottan ani khuxalkaien jietalim. Toxench, Jehova Deva sangata tachi ghott ixttagot asli. (Job 1:1-5) Punn okosmat ekuch disa bhitor, Joba lagim aslolem, chodd korun soglem nanch zalem. Poilim Joban apli girestkai hogddaili. (Job 1:13-17) Uprant, tachim soglim opurbaiechim bhurgim moron gelim. Hea vellar Jobak kitlem dukh zalem tea vixim chintat. Ek bhurgem morta tednam avoi-bapaik sosunk zaina titlem dukh zata. Ani Jobachim tor, dha-ui bhurgim ekuch borabor moron gelim. Tor tea vellar, Jobak ani tache bailek kitlo vhoddlo dhoko boslo astolo. Ani heach pasot, aplea bhurgeanchea mornnachi khobor Jobak mellʼlli tednam tannem aplim angvostram pinzlim ani zomnir poddon to dukhamnim roddonk laglo.—Job 1:18-20.
6 Uprant, Soitanan Jobak sosunk zaina tosli ek pidda dili. Ani hea pasot, Jobak khub tras ani loz pasun bhogchi poddli. (Job 2:6-8; 7:5) Poilim Jobak soglim khub man ditalim. Tankam koslo-i solʼlo zai aslo zalear tim Joba lagim ietalim. (Job 31:18, NW) Punn atam sogleamnim, tem mhunnttlear, tachea svotachea bhavamnim, tachea lagxilʼlea ixttamnim ani tachea chakramnim pasun taka pois kelʼlo!—Job 19:13, 14, 16.
Zaitea bhav-bhoinnank Joba sarkech tras sosunk poddleat dekhun taka koxem bhoglem tem tim somzonk xoktat (Peregraf 7 polloiat) *
7. (a) Apnnacher konnem odruxtt dhaddlam oxem Joban chintlem astolem, punn tannem kitem korunk na? (b) Chitrant dakhoilam toxem, eka Kristanvacher koslem odruxtt ieunk xokta?
7 Jehova apleacher ragar asa dekhun tannem apleacher hem soglem odruxtt dhaddlam, oxem Joban chintlolem Soitanak zai aslem. Tor Soitanan kitem kelem? Tannem ek vadoll dhaddun Jobachim dha-ui bhurgim jevtalim tem ghor moddun uddoilem. (Job 1:18, 19) Toxench, tannem uzo dhaddun Jobachea hinddak ani tachea rakhnneank pasun jivexim marle. (Job 1:16) Vadoll ani uzo sorgar thaun ailolean, apnnem kelʼlea chukink lagon Jehovanuch apnnak khast lailea oxem Jobak dislem astolem. Tori astana, tannem aplea sorginchea Bapacher xirap ghalunk na. Itlim-i vorsam porian Jehovan apnnak zaiteo boreo vostu dileat. Tor atam tannem dilʼlem hem vaitt-ui apnnem manun gheunk zai mhunn Joban chintlem astolem. Tea pasot, tannem mhunnttlem: “Sorvesporachem Nanv vhodd zaum!” (Job 1:20, 21; 2:10) Joban apli girestkai, aplim dha-ui bhurgim, apli bholaiki, hem soglem hogddailem. Tori astana to Jehovak visvaxi ravlo. Punn Soitan vogi ravonk na.
8. Joban bhorvonso soddun diunk Soitanan anik kitem kelem?
8 Apunn kainch valoracho nhoi mhunn chintun Joban bhorvonso soddun diunk, Soitanan tachea tin khottea ixttank dhaddle. Joban zaitim vaitt kamam kelʼlim ani heach pasot taka hem soglem sosunk poddttalem mhunn tannim taka sanglem. (Job 22:5-9) Toxench Joban, Devak manvota tem korunk kitlo-i proitn kelear pasun Devak tachi kainch porva na oxem-i tannim sanglem. (Job 4:18; 22:2, 3; 25:4) Tor Dev tacho mog korina, tachi kallji gheuncho na ani Devachi seva kelear kosloch faido na mhunn te Jobachea monant dubhav ghalunk sodhtale.
9. Job thir-ghott ani dhirvont kiteak ravonk pavlo?
9 Hea vixim chintat. Eke vatten Job gobrant bosla ani ekdom chodd trasant asa. (Job 2:8) Ani dusrea vatten, tache khotte ixtt tachea kallzak toptat toslim utram uloitat. Toxench, to ek boro munis nhoi ani tannem aiz porian jem kitem kelam tem kainch valorachem na oxem te taka sangtat. Jobacher ailole tras tachea mathear ek vhoddlem vojem koxem zaun asa. Ani teach borabor, aplea bhurgeanchea mornnachem dukh pasun to sosta. Tori astana, Job survatek tankam kainch mhunnona. (Job 2:13–3:1) Tor atam Job Jehovak soddun ditolo oxem te chintat zalear, tanchem chintop ekdom chukichem asa. Karonn uprant, Joban tankam oxem mhunnttlem: “Moro porian mhojem [“visvaxiponn,” NW] kednach soddun diuncho na.” (Job 27:5) Hea vellar Job ekdom niraxi aslo. Tori astana to thir-ghott ani dhirvont kiteak ravonk pavlo? Aplo mogall Bap apleak modot kortolo mhunn Joban bhorvonso soddun diunk na. Ani apunn melear pasun Jehova apleak jivont kortolo mhunn taka khatri asli.—Job 14:13-15.
AMI JOBACHI DEKH KOXI GHEUNK ZATA?
10. Jobak kitem ghoddlem tantuntlean ami kitem xiktat?
10 Jobak kitem ghoddlem tantuntlean Jehovachi bhokti korop soddun diunk Soitan amcher zobordosti korunk xokona, ani Jehovak soglea vostunchi bori khobor asa mhunn ami xiktat. Toxench, Jobachea onubhovantlean ami amcho bhorvonso soddun diunk Soitan kitem-kitem korta tem amkam kolltta. Tor atam, Joba thaun ami xikonk zatat tim thoddim lisanvam polloum-ia.
11. Ami Jehovacher visvas dovrun ravlear kitem zaunk pavtolem? (Jakob 4:7)
11 Ami Jehovacher visvas dovrun ravtat zalear ami khoinche-i oddchonnecho fuddo korunk zata, ani Soitanacho virodh korunk zata mhunn Joban dakhoun dilem. Oxem kelolean, Bible sangta tea pormonnem Soitan amchea thaun pollon voita.—Jakob 4:7 vachat.
12. Dev apleak jivont kortolo mhunn Jobak ghott bhavarth aslolean taka koxi modot zali?
12 Ami fattlea lekhant polloilʼlem toxem, ami bhorvonso soddun diun Jehovachi seva korop bond korunk, Soitan mornnachi bhirant uzar korta. Ani oxench tannem Jobak kelem. Aplo jiv salvar korunk Job kitem-i kortolo, hoi, Jehovachi seva korop pasun to soddun ditolo mhunn Soitanan tacher arop ghatlo. Punn toxem zaunk na. Karonn apunn mortolo mhunn Jobak dislem tednam pasun to Jehovak visvaxi ravlo. Jehova ekdom boro ani to soglem sarkem kortolo mhunn Jobak Devacher bhorvonso aslo. Toxench, apunn melo zalear pasun fuddarak Jehova apleak jivont kortolo mhunn Jobak bhavarth aslo. Tor Joba bhaxen, ami melear pasun Dev amkam jivont kortolo mhunn amkam ghott bhavarth asa zalear, mornnak bhieun Jehovachi seva korop ami kednanch bond korchimnant.
13. Joban bhorvonso soddun diunk Soitanan kitem-kitem kelem tacher ami dhean divop kiteak gorjechem?
13 Joban bhorvonso soddun diunk Soitanan kitem-kitem kelem, tacher ami dhean divop khub gorjechem zaun asa. Karonn aizui Soitan toxench korta. Jobacher boglantt ghatlem tednam Soitanan oxem mhunnttlem: “Aplo jiv vattaupak monis kiteim korta.” (Job 2:5) Tor hea utrantlean, Soitan fokot Jobacheruch nhoi punn soglea munxancher boglantt ghaltalo. Ami Jehovacho mog korinant ani amcho jiv samballunk ami Jehovachi seva korop pasun soddun ditolim mhunn to sangonk sodhtalo. Toxench, Jehova pasun amcho mog korina, ani taka manvota tem korunk ami kitlo-i proitn kelear pasun taka kaim porvach na, oxem pasun Soitan mhunnonk sodhtalo. Punn Soitan heo fotti sangon kitem korunk sodhta tem amkam khobor asa dekhun ami Jehovacher bhorvonso dovrop soddun diunchimnant.
14. Amcher tras ietat tednam ami kitem zannam zaunk pavtat? Ek udharonn diun somzaiat.
14 Amcher ietat te tras, ami koslim munxam tea vixim zannam zaunk ek sondhi mhunn ami pollounk zai. Ani amkam amcheo oskotai-o kollon ietat tednam tacher ami kam korunk zai. Jobak tras sosunk poddle tednam tachea oskotai-am vixim zannam zaunk ani tacher kam korunk taka modot zali. Udharonnak, tannem anik khalto zaunchi goroz asa mhunn to xiklo. (Job 42:3) Toxench bhav Nikolay-a * sovem ghoddlem. To khub duent asonui taka bondkhonnint ghatlolo. To sangta: “Bondkhonnint asop, X-ray kaddpa sarkem zaun asa. Karonn hanv bondkhonnint aslo tednam hanvem mhoje bhitor kosle gunn vaddounk zai tem hanv xikonk pavlo.”
15. Ami konnachem aikonk zai, ani kiteak?
15 Ami amchea dusmananchem nhoi, punn Jehovachem aikonk zai. Jehova Dev Joba lagim uloilo tednam Joban tachem kan diun aikolem. Ani apnnak Jobachi kallji asa mhunn taka khatri diunk Jehovan Jobak thodde prosn vicharle. Hea vorvim, Jehovachea boreponnak lagon Joban Jehovache upkar attoile, ani khaltikaien oxem mhunnttlem: “Adim aikunuch hanv Tuka vollkhotalom; punn atam mhojeach dolleamnim hanvem Tuka pollelo.” (Job 42:5) Joban him utram mhunnttlim tednam pasun to ghoddie gobrant boson aslo, tachea akʼkhea angar fodd asle ani to aplea bhurgeanchea mornnachem dukh sostalo. Tori astana, Jehovan Jobak apunn tacho mog korta ani to apleak manvololo zaun asa mhunn khatri dili.—Job 42:7, 8.
16. Izaias 49:15, 16 pormonnem, amkam virodh ieta tednam ami kitem ugddas dovrunk zai?
16 Aiz pasun, lok amcho okman kortat ani ami kainch valorachim nhoi mhunn chintat. Toxench, tim ‘soglea jinʼsachem vaitt amcher add uloitat’ ani amchem vo songottnnechem nanv piddʼddear korunk proitn kortat. (Mt. 5:11) Punn amcher kosle-i tras ailear pasun ami Jehovak visvaxi ravtolim mhunn taka khatri asa, hem amkam Jobache ghoddnnentlean xikonk melltta. Toxench, Jehova amcho mog korta ani tacher bhorvonso dovortat tankam to kednanch sanddina. (Izaias 49:15, 16 vachat.) Tor Devachea dusmanancheo fotti aikochea bodlek, Joba bhaxen ami Jehovachem aikonk zai. Oxench, Turkey-nt ravtolea James nanvachea eka bhavan kelem. Taka ani tache familik khub virodh soscho poddlo. To mhunntta: “Devachea lokam vixim fotti aikon ami niraxi zatat mhunn amkam kollom ailem. Tor ami amchem dhean fuddarachea bhorvonxeacher dovorlem, ani ami Jehovachi seva korit ravlim. Oxem kelolean ami amchi khuxalkai samballunk pavlim.” Tor amchea dusmanamnim kitleo-i fotti sanglear pasun ami amcho bhorvonso soddun diunk zaina.
TUMCHO BHORVONSO TUMKAM THIR RAVONK MODOT KORTOLO
Job visvaxi ravlo dekhun Jehovan taka besanvam dilim. To ani tachi bail zaitim vorsam porian khuxalkaien jielim (Peregraf 17 polloiat) *
17. Hebrevank odheai 11-nt sanglolea Jehovachea visvaxi sevokam thaun ami kitem xiktat?
17 Oddchonneo aileo tednam dhirvont ani thir-ghott ravlim, tea Jehovachea sevokam modem Job ekloch naslo. Karonn apostl Paulun Hebrevank chitt boroili tednam tannem Jehovachea anik zaitea sevokam vixim sanglem, ani tankam ‘ek vhodd porzollit kupa vorim asloli sakxidaranchi urponz’ oxem mhunnttlem. (Heb. 12:1) Tancher zaite tras aile. Tori astana, tim jivitbhor Jehovak visvaxi ravlim. (Heb. 11:36-40) Jehovan dilʼli bhas tim jivim aslim tednam ghoddon ieunk na zalear pasun tannim Jehovacher bhorvonso dovrop soddun diunk na. Ani tim Jehovak manvololim zaleant mhunn tankam khatri asli dekhun Jehovan dilʼli bhas purnn zata tem tim polloitolim mhunn tankam bhavarth aslo. (Heb. 11:4, 5) Tor tanchea udharonnantlean Jehovacher bhorvonso dovrun ravonk amcho nichov ghott korunk amkam modot zata.
18. Tumi kitem korunk nichov kela? (Hebrevank 11:6)
18 Aiz ami jietat to sonvsar chodd ani chodd vaitt zait asa. (2 Tim. 3:13) Ani Soitan Devachea lokank tras korit asa. Tor fuddarak amkam kosleo-i oddchonneo ailear pasun Jehovachi seva korit ravonk ami nichov korum-ia. Karonn ‘ami amcho bhorvonso jivont Devacher dovorla.’ (1 Tim. 4:10) Toxench, xevottak Jehovan Jobak dilʼlea besanvantlean “Sorvespor konnvallo ani maiemogacho” mhunn amkam khatri melltta. (Jak. 5:11) Tor ami pasun Jehovak visvaxi ravum-ia ani ‘apnnak sodhtoleank to inam ditoloch’ mhunn khatri dovrum-ia.—Hebrevank 11:6 vachat.
GIT 150 Razvottki Devachi Svikar Kor
^ Zaitea oddchonneancho fuddo korun pasun Jehovak visvaxi ravlolea eka munxa vixim ami chintat tednam amkam Jobacho ugddas ieta nhoi? Ami Joba thaun kitem xikonk zata? Jehovachi bhokti korop soddun diunk Soitan amcher zobordosti korunk xokona. Toxench, amkam kitem ghoddtta tem soglem Jehovak khobor asa, ani Jehovan Jobacher ailole tras kaddun uddoile toxe, aiz amcher ietat te tras pasun to ek dis kaddun uddoitolo. Tor amchea kornneamnim amkam hea tinui mudʼdheanchi khatri asa mhunn ami dakhoun ditat zalear amkam ‘Jehovacher visvas vo bhorvonso asa’ mhunn ami dakhoitolim.
^ UTRACHI SOMZONNI: “Visvas” hea utrak uzar kelʼlea Hebrev utracho orth, axeun ravop. Toxench hea utracho orth, tuka konnacher visvas asa vo tum tacher patieta oso-i zata.—St. 25:2, 3; 62:5.
^ Thoddim nanvam bodolʼleant.
