1-2. Stotr 25:14 pormonnem, Jehova sangata amchi ixttagot ghott uronk zai zalear ami kitem korunk zai?

 TUMKAM kitem dista? Konnachea-i sangata ghott ixttagot korunk, kosle gunn asop gorjeche? Tumkam ghoddie disonk xokta ki eka-mekak mog ani tenko divop gorjechem. Punn bhirant pasun asonk zai mhunn tumi ghoddie kednanch chintunk na astolem. Tori astana, hea lekhachea mukhel versant sanglam toxem, Jehova sangata amchi ixttagot ghott uronk zai zalear amkam ‘tachi bhirant asonk zai.’—Stotr 25:14 vachat. b

² Ami kitlim-i vorsam thaun Jehovachi seva korum, amkam sogleank tachi bhirant asonk zai. Punn Devachi bhirant mhunnttlear kitem? Ami ti bhirant koxi vaddounk zata? Ani Obadia, Porom Iadnik Jehoiada, ani Raza Jehoasha thaun, Jehovachi bhirant dovorchea vixim ami kitem xikonk zata?

3. Thodde pavtti amkam bhirant kiteak disonk xokta, ani osli bhirant asop kiteak borem?

³ Amchea jivak dhoko asa oxem amkam dista tednam amkam bhirant dista. Zoxem dongrar choltana, ami samkim dhodder cholonant. Karonn ami poddot mhunn amkam bhirant asta. Toxench, ami eke bhirankull poristhitint asat zalear, ami thoim thaun dhanv martat. Karonn amkam kitem-i zait mhunn amkam bhirant asta. Tea bhair, ami amchea ixttank dukhoitat toslim utram uloinant vo tanchea sangata vaitt toren uloinant. Karonn amchi ixttagot moddot mhunn amkam bhirant asta. Ani osli bhirant asop borem. Karonn hea vorvim ami bore nirnnoi gheunk pavtat.

4. Soitanak kitem zai?

 ⁴ Ami Jehovak bhieun kamplolim Soitanak zai. Elifazan Jobak jem mhunnttlolem, tench chintop Soitan amchea monant ghalunk sodhta. Tem mhunnttlear, Jehova sodanch ragan bhorlolo asta, to amkam khast lavunk sodhta, ani ami taka kednanch khuxal korunk xokchim nant, oxem ami chintlolem Soitanak zai. (Job 4:18, 19) Hoi, Soitanak zai ki ami Jehovak itlim bhielolim, ki ami tachi seva somtich bond korchi. Soitanachea hea fasant poddona zaunk, Soitanak zai tosli bhirant dovorchea bodlek, ami Jehova pasot resped vaddounk zai ani taka dukhoita toslem kainch korchem nhoi.

5. Jehovachi bhirant dovrop mhunnttlear kitem?

⁵ Jehova Devachi sarki bhirant aslolo munis taka resped dita, tacho mog korta ani tachea sangata apli ixttagot moddtta toslem to kainch korina. Jezuk pasun oslich “bhirant” asli. (Heb. 5:7, NW) To Jehova Devak bhieun kamponaslo. (Iz. 11:2, 3, NW) Tachea bodlek, to kallzantlean tacho mog kortalo, ani Jehova Devan taka sanglolem tem soglem to kortalo. (Ju. 14:21, 31) Jezu bhaxen ami pasun Jehovak man ani resped ditat. Karonn to mogall, zannvaiecho, nitivont ani xoktivont asa. Ani Jehova amcho khub mog korta dekhun, ami tachem aikotat tednam to khuxal zata ani aikonant zalear dukhi zata mhunn ami zannant.—St. 78:41; Mho. 27:11.

6. Amchea bhitor Jehovachi bhirant vaddounk ek vatt khoinchi? (Mhonnʼnneo 2:5)

⁶ Ami zolmotat tednam amchea bhitor Jehovachi bhirant asona, punn ami ti vaddounk poddtta. (Mhonnʼnneo 2:5 vachat.) Ani oxem korunk ek vatt mhunnttlear, Jehovan rochlolea vostuncher dhean divop. Jehovan “rochlolea vostum thaun” taka kitli zannvai ani xokti asa, toxench to kitlo mogall tea vixim ami chintʼtat tednam, tachea pasot amcho mog ani resped anikui vaddtta. (Rom. 1:20) Hench, Adrienne nanvache eke bhoinnin onubhovlem. Ti sangta: “Jehovan rochloleo vostu polloun, taka kitli zannvai asa tea vixim hanv chintʼtam tednam, mhojea pasot kitem borem tem Jehova sogleam-von bore toren zannam mhunn hanv vollkhonk pavtam.” Oxe toren niall kelolean, ti oxem mhunnonk pavlea: “Mhaka Jivit Diupi Jehova Deva sangata mhoji ixttagot moddonk xokta, toslem kainch hanv korunk sodhina.” Tor tumi pasun hea sumanant, Jehovan rochlolea eke vostu vixim niall korunk zata kai? Oxem kelolean, tachea pasot tumcho mog ani resped anikui vaddttolo.—St. 111:2, 3.

7. Amchea bhitor Jehovachi bhirant vaddounk magnnem kelolean amkam koxi modot zaunk xokta?

⁷ Amchea bhitor Jehovachi bhirant vaddounk anik ek vatt mhunnttlear, tache lagim sodanch magnnem korop. Karonn ami Jehova lagim magnnem kortat title-i pavtti, ami taka anik bore toren vollkhonk pavtat. Ami dor ek pavtt amche tras sosunk, Jehova lagim ghottai magtat tednam to kitlo xoktivont tem ami amchea ugddasak haddttat. Toxench, tannem aplea ekleach Putak amchea pasot bolidan kelo mhunn ami tache upkar attoitat tednam, to kitlo mogall tem ami ugddas kortat. Tea bhair, amchea oddchonneancho fuddo korunk ami tache lagim modot magtat tednam, to ek zannvaiecho Dev mhunn ami amchea ugddasak haddttat. Tor oslea magnneam udexim, Jehovak anikui resped diunk ani amchea bhitor tachi bhirant vaddounk amkam modot zata. Toxench, tachea sangata amchi ixttagot moddonk xokta toslem kainch korina zaunk amcho nichov ghott zata.

8. Amchea bhitor Devachi bhirant uronk kitem korunk zata?

⁸ Amchea bhitor Devachi bhirant uronk ami kitem korunk zata? Ami Bible vachun, tantunt dilʼlea borea ani vaitt lokanchea udharonnam thaun xikonk dhei dovrunk zata. Tor ami Jehovachea don visvaxi sevokanchim udharonnam polloum-ia. Ek zaun asa Obadia, zaka,  Raza Ahabachea, rajmahalachi dekhrekh korunk zobabdari dilʼli. Ani dusro Porom Iadnik Jehoiada. Toxench, ami Judacho raza Jehoash, zo poilo Jehovachi seva kortalo, punn uprant tannem seva korop bond keli tachem udharonn pasun polloum-ia.

9. Obadia Dev-bhirantin jietalo dekhun taka koxi modot zali? (1 Raza 18:3, 12)

⁹ Bible-ant poile pavtti Obadia c vixim sanglam tednam oxem mhunnttlam: “Obadia Dev-bhirantin jietalo.” (1 Raza 18:3, 12 vachat.) Tor Obadia Dev-bhirantin jietalo dekhun taka koxi modot zali? To promannik ani patieupa sarko aslo. Tea pasot razan taka aplea rajmahalachi dekhrekh korpachi zobabdari dilʼli. (Nehemias 7:2 sor korat.) Toxench, Obadia ekdom dhirvont pasun aslo. Ani hea gunnachi taka khub goroz asli. Karonn noxtto Raza Ahabachea razvottkechea kallar to jietalo. “Ahaban Sorvesporache nodre mukhar . . . aplea purvozam von odhik vaitt tem tannem kelem.” (1 Raz. 16:30) Toxench, Baalachi bhokti korpi, Ahabachi bail Jezebel, Jehovacho itlo dves kortali, ki Izraelachea dha kullantlean khori bhokti ti kabar korun uddounk sodhtali. Tinnem Jehovachea zaitea provadeank pasun jivexim marun uddoile. (1 Raz. 18:4) Khorench, Obadia ekdom kotthin vellar Jehovachi bhokti kortalo mhunn kainch dubhav na!

10. Obadia ekdom dhirvont aslo mhunn amkam koxem kollon ieta?

¹⁰ Obadia ekdom dhirvont aslo mhunn amkam koxem kollon ieta? Jezebel, Jehovachea provadeank jivexim marun uddoitali tednam, Obadian 100 provadeank “ponʼnasanche zome korun . . . dholint lipoile ani tankam jevonn ani udok dilem.” (1 Raz. 18:13, 14) Oxem kortana, Obadia sampoddlolo zalear, Jezebel taka jivexim marun uddoitoli asli. Khorench, Obadia tea vellar bhielʼlo astolo ani taka moronk naka aslem. Punn aplea poros, to Jehovacho ani tachea sevokancho chodd mog kortalo.

11. Obadia bhaxen Jehovachim sevokam aiz dhir koxim dakhoitat? (Chitr pasun polloiat.)

¹¹ Aiz amchim zaitim bhav-bhoinnam oslea zagear ravtat, zoim amchea kamacher bondi asa. Tim sorkari odhikareank man ani resped ditat tem khorem. Punn Obadia bhaxen, Jehova  Devachi bhokti korop tim soddun dinant. (Mt. 22:21) Tankam Devachi bhirant asa dekhun, tim munxanchi nhoi punn Devachi adnea pallttat. (D.I. 5:29) Tea pasot, tim porgottnni korit ravtat ani lipon mittingenk voitat. (Mt. 10:16, 28) Jehova sangata ixttagot ghott korunk tanchea bhav-bhoinnam lagim goroz tim Bible adarit prokaxonam asat kai na mhunn tim khatri korun ghetat. Hea vixim Afrikent ravtolea, Henri nanvachea eka bhavachem udharonn asa. Thoddea vella pasot, amchea kamacher thoim bondi asli. Dekhun, amchea bhav-bhoinnank Bible adarit prokaxonam diunk, bhav Henri fuddem sorlo. Tannem boroilem: “Hanv ek dhirvont munis oxem hanv chintinam. Punn hanv Jehovak resped ditam dekhun hem kam hanv dhiran korunk pavlom.” Tor ami Jehovak resped ditat ani tachi bhirant dovortat zalear, bhav Henri bhaxen ami pasun dhirvont zatolim.

12. Porom Iadnik Jehoiada ani tache bailen, Jehovak visvaxiponn koxem dakhoilem?

¹² Porom Iadnik Jehoiada, Dev-bhiranticho munis aslo. Taka Jehovachi bhirant asli dekhun tannem visvaxiponn dakhoilem, ani dusreankui Jehovachi bhokti korunk urba dili. Hem ami koxem mhunnonk zata? Jezebelachi dhuv, Athalia, kaidea add vochon apunnuch svota zaun ranni zali. Ti ekdom krur asli ani ranni zaunk tika itli as asli ki tinnem aplea svotachea natvank pasun jivexim marunk proitn kelo. (2 It. 22:10, 11) Punn ticho ek natu Jehoash, tichea hatantlean vanchlo. Karonn Jehoiadachi bail, Jehosheban taka salvar kelo. Tinnem ani tichea ghovan taka lipoun dovorlo ani tachi kallji ghetli. Hea toren tannim Davidachea vonxavollintlea ekleak tori salvar kelo. Tor Jehoiada Athaliak bhieunk na, punn Jehovak visvaxi ravlo.—Mho. 29:25.

13. Jehoash sat vorsancho aslo tednam, Jehoiadan anik ek pavtti Jehovak visvaxiponn koxem dakhoilem?

¹³ Jehoash sat vorsancho aslo tednam, Jehoiadan anik ek pavtti Jehova Devak visvaxiponn dakhoilem. Tannem ek ievzonn kaddli. Tea ievzonne pormonnem ghoddlem zalear, Jehoash raza zata aslo, zo Davidachea vonxavollintlo aslo. Punn toxem zaunk na zalear, Jehoiadacho jiv vochonk xoktalo. Jehovachea besanvan, tannem ievjilʼlem toxench zalem. Jehoiadan mukheleanchea ani Levitanchea adaran, Jehoashak raza kelo ani Athaliak jivexim marli. (2 It. 23:1-5, 11, 12, 15; 24:1) Uprant, “Jehoiadan Sorvespora ani raza ani porje modem ek korar kelo. Hea korara vorvim apunn Sorvesporachi porza mhonn porjen mandun gheunk zai aslem.” (2 Raz. 11:17) Ani “Sorvesporachea ghorant kitench mellem bhitor sorona zaunk, tannem Tachea darvontteam-xim rakhonndar dovorlole.”—2 It. 23:19.

14. Jehoiadan Jehovak man dilo dekhun, taka koso man favo zalo?

¹⁴ Jehovan adim sanglolem, “Mhaka man ditat tankam hanv-ui man ditolom.” (1 Sam. 2:30) Ani khoreponnim, Jehovan Jehoiadak inam dilo. Zoxem, ami tachi dekh gheunk, tachea borea kamam vixim Bible-ant boroun dovorlam. (Rom. 15:4) Toxench, to melo tednam taka ek khas man favo zalo. Tem mhunnttlear, “tannem Israelant, Deva ani tachea mondira thaim borem kelem dekhun, taka Davidachea xarant razam sangatim nikhipilo.”—2 It. 24:15, 16.

15. Jehoiadachea ghoddnnentlean ami sogleamnim kitem xikonk zata? (Chitr pasun polloiat.)

¹⁵ Jehoiadachea ghoddnnentlean, ami sogleamnim Jehovachi bhirant vaddounk ani taka visvaxiponn dakhounk xikonk zata. Vhoddilamnim Jehoiadachi dekh gheun, sobhechi rakhonn korunk sodanch vatto sodhunk zatat. (D.I. 20:28) Toxench, zannttea bhav-bhoinnamnim, Jehoiada koddlean kitem xikonk zata? Tannim Jehovachi bhirant dovorlear ani tim taka visvaxi ravlim zalear, to tankam sanddchona, punn apli khuxi purnn korunk uzar kortolo mhunn tannim ugddas  dovrunk zata. Tea bhair tornnatteamnim, Jehoiada sangata Jehova koso vaglo tacher dhean diunk zata. Toxench tannim Jehovachi dekh gheun, zannttea bhav-bhoinnank, khas korun khub vorsam thaun visvaxiponnan Jehovachi seva kortat, tankam man ani resped diunk zata. (Mho. 16:31) Xevottak ami sogleamnim, Jehoiadak tenko dilo tea mukheleam ani Levitam koddlean xikonk zata. Tanchea bhaxen, ami ‘vhoddilanchem vo fuddakar ghetat tanchem’ aikon, visvaxiponnan tankam tenko diunk zata.—Heb. 13:17.

16. Raza Jehoash, Jehovache sevent oskot aslo oxem ami kiteak mhunnonk zata?

¹⁶ Jehoiadan, Jehoashak ek boro munis zaunk modot keli. (2 Raz. 12:2) Taka lagon, Jehoash lhan astanach Jehovak manvota tem kortalo. Punn Jehoiada melea uprant, to Judachea kunvranchem aikonk laglo, je Jehovache bhokti korinasle. Hacho porinnam kitem zalo? To ani tachi porza, “Ashera deviche murtinchi ani kudʼdea devanchi puza korunk lagle.” (2 It. 24:4, 17, 18) Hem polloun, Jehova khub dukhi zalo. “Tankam Apnna-xim portun haddunk Sorvesporan tanche-xim provadiank dhaddle . . . punn tannim tanchem aikunk na.” Itlench nhoi, tannim Jehoiadacho put, Zakarias, zo Jehovacho provadi ani iadnikuch nhoi, punn Jehoashacho cousin aslo, tachem pasun aikonk na. Khorem mhunnttlear, aplo jiv salvar kelʼlea pasot Jehoashan, Zakariasachea familicho upkari asonk zai aslo. Punn oxem korchea bodlek, tannem Zakariasak jivexim marlo.—2 It. 22:11; 24:19-22.

17. Jehoashacho porinnam kitem zalo?

 ¹⁷ Jehoashan, Jehovachi bhirant dovrunk na dekhun taka tacho vaitt porinnam bhogunk poddlo. Jehovan sanglolem: “Jim konn Mhaka unnak lekhtat, tancho okman korunk Hanv fattim sorchona.” (1 Sam. 2:30) Ani him utram ghoddon ailim. Sirieche eke lhan foujen, Jehoashachea “eke vhodd foujek” haroili ani taka ‘ekdom zokhmi’ kelo. Ani Siriekar gelea uprant, Jehoashacheach don sevokamnim, Zakariasachea rogtacho bodlo gheunk taka jivexim marlo. Itlench nhoi, lokamnim Jehoash itlo noxtto mhunn chintlem ki tannim taka “razanche somadhint” purunk na.—2 It. 24:23-25; Matev 23:35-acho “son of Barachiah” ho study note polloiat.

18. Jeremias 17:7, 8-a pormonnem, Jehoasha bhaxen zaina zaunk ami kitem korunk zai?

¹⁸ Tor Jehoashachea udharonna thaun ami kitem xiktat? Jehoash eka oslea zhadda sarko aslo, zachim pallam ghott naslim. Ani taka nitt ravonk adarachi goroz asli. Ho adar taka Jehoiada ditalo. Punn Jehoiada melea uprant, tem zhadd umtton gelem. Mhunnche, Jehovachi seva korinant tanchem aikon, Jehoash Jehovak ovisvaxi zalo. Hem udharonn amkam dakhoita ki ami Jehovachi seva fokot amchi famil ani sobhentlim bhav-bhoinnam kortat dekhunuch korchi nhoi. Jehova sangata amchi ixttagot ghott uronk, ami svota zaun tache pasot amcho mog ani resped vaddounk zai. Oxem korunk ami sodanch tachea Utracho obheas korunk zai, tacher niall korunk zai ani magnnem korunk zai.—Jeremias 17:7, 8 vachat; Kol. 2:6, 7.

19. Ami kitem kelʼlem Jehovak zai?

¹⁹ Jehova amchea koddlean chodd kaim opekxa korina. Ami kitem kelʼlem taka zai, tem Upodexok 12:13-nt sanglam. Thoim mhunnttlam: “Devachi bhirant dhor ani tache updes pall. Kiteak, tem zonn ekleachi zobabdari. Teach khatir, Devan monʼxak rochla.” Ami Jehovachi bhirant dovorlear, fuddarak kitem-i zalear pasun ami Obadia and Jehoiada bhaxen Jehovak visvaxi ravonk pavtolim. Toxench, Jehova ani amchea modem ami kitench vo konnakuch ieunk diunchimnant.