1. Jehovachea disa thaun salvar zaunk ami kitem korunk zai?

 BIBLE-ANT ‘Jehovachea disa’ vixim sanglam tednam, to ek oslo vell mhunn amkam kollon ieta, jednam Jehova aplea dusmanancho nas kortolo ani aplea lokank salvar kortolo. Jehovan adlea kallar pasun tachea thoddea dusmanancho nas kelo. (Iz. 13:1, 6; Ez. 13:5; Zef. 1:8) Amchea kallar ‘Jehovacho dis,’ Vorixtt Babilonacher akromonn zata tednam suru zata, ani Armageddonachea zhuzant sompta. Tor tea ‘disa’ thaun salvar zaunk ami atanch toiari korunk zai. Hea vixim aplea xisank sangtana, Jezun tankam ‘vhodd sonkoxtta’ pasot fokot toiari korunkuch nhoi, punn ‘toiar ravonk’ pasun sanglem.—Mt. 24:21; Luk. 12:40.

2. Tesalonikekarank boroilʼlea poilea chittintlean amkam koso faido zaunk xokta?

² Devachea preronnan apostl Paulun Tesalonikekarank poili chitt boroili tednam, Jehovachea ragachea disa pasot Kristanvamnim toiar ravonk tannem zaitim udharonnam dilim. Punn Jehovacho dis teach vellar ieuchona mhunn Pauluk khobor asli. (2 Tes. 2:1-3) Tori astana, tannem bhav-bhoinnank to dis faleanch ieta oxem chintun tea disa pasot tankam toiar ravonk sanglem. Ani tacho ho solʼlo aiz ami pasun apnnaunk zata. Tor (1) Jehovacho dis koso ietolo, (2) tantuntlean konn salvar zaunchimnant, ani (3) tantuntlean salvar zaunk ami koxi toiari korunk zai, tea vixim Paulun kitem sanglem tem ami polloum-ia.

3. Jehovacho dis chora bhaxen ietolo oxem ami kiteak mhunnonk zata? (Chitr pasun polloiat.)

³ “Chor . . . ratcho ieta, toso.” (1 Tes. 5:2) Paulun Jehovachea disa vixim sangonk uzar kelʼlea tin udharonnam modlem, hem  poilem udharonn zaun asa. Choddxe pavtti ratchea vellar lok jednam opekxa korinant tea vellar chor chori korunk ietat. Ani te aplem kam rokddench kortat. Jehovacho dis pasun oxech toren okosmat ietolo ani tem polloun zaito lok ojap zatolo. Hea vellar eka-fattlean-ek ghoddnni kitle begin ghoddta tem polloun khorim Kristanvam pasun ghoddie ojap zatolim. Punn tednam fokot noxtteancho nas zatolo ani Jehovacho lok salvar zatolo.

4. Jehovacho dis eke gorbest bailechea ballonterache dukhi bhaxen koso asa?

⁴ ‘Ballonteracheo dukhi eke gorbest bailecher okosmat ietat, toso.’ (1 Tes. 5:3) Eke gorbest bailek ballonterachem dukh kednam ietolem tem khobor asona. Punn tem dukh ietolench mhunn ti zannam. Ani ek dis tem dukh okosmat ieta, tem sosunk zaina ani tem thambounkui zaina. Teach bhaxen, Jehovacho dis kednam ani khoinchea vellar ietolo mhunn amkam khobor na. Punn to ietoloch mhunn ami zannant. To dis okosmat ietolo, ani tea disa noxttim khoinchea-i ritin salvar zaunchimnant mhunn ami zannant.

5. Vhodd sonkoxtt, disachea uzvadda bhaxen koso asa?

⁵ Disacho uzvadd zata toso. Paulun tisrea udharonnant choram vixim sanglem. Punn hantunt tannem, Jehovachea disak uzvaddak sor kelo. (1 Tes. 5:4) Ratchea vellar ietat te chor saman luttunk itle bizi astat ki dis kednam uzvaddlo tem tankam khoboruch asona. Punn okosmat dis zata ani te sampoddttat. Tea choram bhaxen aiz zaito lok pasun kallkhant asa, mhunnche Devak manvonant toslim vaitt kamam tim korit ravtat. Punn okosmat vhodd sonkoxtt ietolo tednam, tanchim kamam dison ietolim. Ami hea lokam bhaxen zaunk sodhinant. Tea pasot, ami Devak manvonant toslim kamam nakarun, toxench, “boreponn, promannikponn ani sot” apnnaun Jehovachea disa pasot toiar ravonk zata. (Ef. 5:8-12) Tea disa thaun konn salvar zaunchimnant  tem somzaunk Paulun uzar kelʼlea anik don udharonnancher ami dhean dium-ia.

6. Aiz choddso lok eka orthan nhidla oxem ami kiteak mhunnonk zata? (1 Tesalonikekarank 5:6, 7)

⁶ “Nhidtat tim.” (1 Tesalonikekarank 5:6, 7 vachat.) Jehovachea disa thaun salvar zauchimnant tim nhidlolim asat oxem Paulun mhunnttlem. Karonn nhidtat tankam, tanchea bhonvtonnim kitem ghoddtta, vo vell koso voita tem kainch khobor asona. Tea pasot, mhotvachem kitem-i ghoddtta tednam tankam tem kolloch na, ani tim panvl pasun gheunk xokonant. Aiz zaitim munxam eka orthan nhidlolim asat. (Rom. 11:8) Tanchea bhonvtonnim jem kitem ghoddtta tem polloilear pasun, ami “nimannea disamnim” jietat vo vhodd sonkoxtt ekdom lagim pavla mhunn tankam kollon iena. Sonvsarant kosli-i vhoddli ghoddnni ghoddtta tednam thoddim zannam nhidentlean zagim zatat khorim, mhunnche, Rajeacho sondex aikonk tim umed dakhoitat astolim. Punn zagim urchea bodlek, zaitim zannam porot nhidonk voitat. Toxench, thoddim zannam chintʼtat ki zhoddttecho dis ieunk zaito vell asa. (2 Ped. 3:3, 4) Punn dor ek dis voita toso, Bible-antlo solʼlo apnnaun zagrut ravop anikui gorjechem mhunn ami vollkhon ghetat.

7. Devachea ragachea disa je lok nas zatole tankam bebdim kiteak mhunnttleant?

⁷ “Bebdikai kortat tim.” Je lok Devachea ragachea disa nas zatole, tankam Paulun bebdim mhunnttleant. Karonn bebdikai kortat tim munxam, bhonvtonnim kitem ghoddtta tem zannam zaunui, tea vixim chodd kainch korunk xokonant ani tim chukiche nirnnoi ghetat. Teach bhaxen, noxtte lok Devache xittkaunnek kan dinant. Taka lagon te nisonnttonak pavtat. Punn Kristanvamnim sarke ritin chintunk zai mhunn Bible sangta. (1 Tes. 5:6, NW) Bible-acho ek zannar sangta ki zo munis sarke ritin chintʼta “to xant asta ani abuz zaina ani taka lagon to sarke nirnnoi gheunk xokta.” Tor ami xant kiteak ravonk zai ani sarke toren kiteak chintunk zai? Karonn amkam hea sonvsarachea rajki vo somajik bangoddeamnim poddonk naka. Jehovacho dis lagim ieta toso, oslea vixoi-amnim bazu gheunk amcher ietat te dobhav vaddot voitole. Punn tea vellar ami kitem kortolim, tea vixim amkam uskeunchi goroz aschina. Karonn Devachi povitr xokti amkam xant ravonk, sarke ritin chintunk, ani bore nirnnoi gheunk modot kortoli.—Luk. 12:11, 12.

8. 1 Tesalonikekarank 5:8-antlean zagrut ravonk ani sarke toren chintunk amkam kosle gunn asonk zai tem somzaiat. (Chitr pasun polloiat.)

⁸ ‘Chhatichem kottʼttem ani helmet ghalun ravat.’ Paulun Kristanvank eka soinikak sor keleant, zo sodanch zagrut asta ani zhuzachem angtrann ghalun toiar asta. (1 Tesalonikekarank 5:8 vachat.) Eka soinikan zhuz korunk khoinchea-i vellar toiar asonk zai. Teach bhaxen, ami Jehovachea disa pasot sodanch toiar asonk zai. Oxem korunk, ami bhavarth ani mogachem chhatichem kottʼttem ani bhorvonxeachem helmet ghalunk zai. Tor he gunn amkam koxe modot korunk xoktat tem ami polloum-ia.

9. Bhavartha vorvim amchi rakhonn koxi zata?

⁹ Chhatichem kottʼttem ghatlolean eka soinikachea kallzachi rakhonn zatali. Teach bhaxen, bhavarth ani mog aslolean Soitanachea fasam thaun amchi rakhonn zaunk xokta. He gunn amkam Jehovachi seva korit ravonk toxench Jezucho pattlav korit ravonk modot kortat. Bhavarth aslolean amkam khatri melltta ki ami purnn kallzan Jehovachi seva korit ravlear to amkam inam ditolo. (Heb. 11:6) Toxench, oddchonneo ailear pasun amcho Fuddari, Jezuk visvaxi ravonk amkam modot zata. Tor jivitantlea oddchonneancho fuddo korunk ami amcho bhavarth koso ghott korunk zata? Dhumallo vo poixeanchem  unnemponn asonui aplem visvaxiponn samballʼllem, tea bhav-bhoinnanchi ami dekh gheunk zata. Toxench, aplem jivit sadem dovrun Rajeachea kamak poilo zago dilo, tanchi pasun ami dekh gheunk zata. b Oxem kelolean ami girestkaiechi as dovorchea fasant poddchimnant.

10. Jehova ani lokam pasot mog aslolean ami kitem korop bond korinant?

¹⁰ Zagrut ravonk ani sarkem tem korunk amkam mog pasun asop gorjecho. (Mt. 22:37-39) Porgottnnechea kamant tras sosunk poddlear pasun, Jehova pasot mog aslolean ami tem soddun dinant. (2 Tim. 1:7, 8) Toxench, Jehovachi seva korinant tea lokancho pasun ami mog kortat dekhun, amchea vattarant aslolea lokank ami porgottit ravtat. Ami fona udexim ani chitti boroun pasun tankam porgottʼttat. Ani tim ek-na-ek dis aplem jivit bodlun sarkem tem korunk fuddem sortolim mhunn ami bhorvonso soddinant.—Ez. 18:27, 28.

11. Amkam bhav-bhoinnancho mog asa dekhun ami kitem kortat? (1 Tesalonikekarank 5:11)

¹¹ Ami amchea bhav-bhoinnancho pasun mog kortat. Tea pasot, ami ‘eka-mekak dhir diunk ani eka-mekacho bhavarth ghott korunk vavurtat.’ (1 Tesalonikekarank 5:11 vachat.) Sangata mellon zhuztat tea soinikam bhaxen, amchea bhav-bhoinnam sangata mellon Jehovachi seva kortana ami eka-mekak dhir ditat. Punn zhuz kortana eka soinikak tachea sangatea koddlean mar lagonk xokta. Tori punn, tache sangatean toxem mudʼdom korunk na mhunn tea soinikak khobor asta. Teach bhaxen, ami mudʼdom zaun amchea bhav-bhoinnank kednanch dukhoinant. Vo tannim amkam dukhoilam zalear ami tancho bodlo gheunk sodhinant. (1 Tes. 5:13, 15) Sobhentlea vhoddilank pasun resped diun, ami tancho mog kortat mhunn dakhoitat. (1 Tes. 5:12) Paulun Tesalonikekarank poili chitt boroili tednam, ti sobha suru zaun ek voros poriant zaunk naslem. Tor tea sobhentlea vhoddilank titlo onubhov naslo, ani tannim chukeo pasun kelʼleo astoleo. Tori astana tankam resped favo aslo. Vhodd sonkoxtt lagim ieta toso, margdorxon mellonk ami amchea sobhentlea vhoddilancher atam poros ghoddie anikui chodd patieun ravonk poddttolem. Tea vellar amkam ghoddie  mukhel ofis vo xakha ofisak sompork korunk mellchem na. Tor ami atanch thaun sobhentlea vhoddilancho mog korop ani tankam resped divop gorjechem. Tor fuddarak kitem-i zaum, ami amchem chintop sarkem dovrum-ia. Vhoddilanchea chukincher dhean diunchea bodlek, Jehova, Jezu Krista vorvim, hea visvaxi munxank margdorxon dita hacher ami dhean dium-ia.

12. Amcho bhorvonso amchea chintpachi koxi rakhonn korta?

¹² Zoxem helmet eka soinikachea toklechi rakhonn korta, toxench, amcho bhorvonso amchea chintpachi rakhonn korta. Amcho bhorvonso ghott asa dekhun ho sonvsar amkam dita tem soglem polkem zaun asa mhunn ami vollkhon ghetat. (Filp. 3:8) Tor amcho bhorvonso amkam xant ravonk ani amchem chintop sarkem dovrunk modot korta. Hea vixim, Afrikent aslolea eka Bethel-ant seva korpi, Wallace ani Laurinda-chem, ek udharonn asa. Tin sumanam bhitor Laurinda-chi avoi ani Wallace-acho bapui, bhair poddlim. Punn sonvsarbhor COVID-19 pidda posorloli dekhun, tankam tanchea ghora vochonk mellonk na. Bhav Wallace mhunntta: “Jivontponnachea bhorvonxeak lagon, tim morchea poilim khoinchea poristhitint aslim tem nhoi, punn novea sonvsarant khoinchea poristhitint astolim tem chintunk mhaka modot zata. Ani hanv dukhi astam vo tancho mhaka ugddas ieta tednam, ho bhorvonso mhaka xant ravonk modot korta.”

13. Povitr xokti mellonk ami kitem korunk zata?

¹³ ‘Povitr xoktecho uzo palvonk dium nakat.’ (1 Tes. 5:19) Povitr xokti amchea bhitor jem kam korta taka Paulun ujea sangata sor kelam. Jehovachi povitr xokti amcher asta tednam, sarkem tem korunk ami umedin astat ani Jehovachi seva korunk ami nettan fuddem sortat. (Rom. 12:11) Tor hi povitr xokti mellonk ami kitem korunk zata? Ami Jehova lagim magnneant ti magonk zata, Devachea Utracho obheas korunk zata ani tachea songottnnecho bhag zaunk zata. Oxem kelolean, ‘povitr xokteche gunn’ apnnaunk amkam modot zatoli.—Gal. 5:22, 23.

14. Jehovachi povitr xokti amkam mellot ravonk zai zalear ami kitem korchem nhoi? (Chitr pasun polloiat.)

¹⁴ Devan amkam apli povitr xokti dilea uprant ‘amche bhitor aslolo to uzo ami palvonk diunk  zaina.’ Amchem chintop ani vagnnuk nitoll asa zalearuch, Dev amkam apli povitr xokti ditolo. Punn ami vaitt chintit ravlear ani tacher kam korunk fuddem sortat zalear, to amkam apli povitr xokti divop bond kortolo. (1 Tes. 4:7, 8) Jehovachi povitr xokti amkam mellot ravonk zai zalear, ami ‘provadeanchea sondexachi beporva korchi nhoi.’ (1 Tes. 5:20) Hea versant ‘sondex’ mhunnttlear, Jehovan aplea povitr xokte udexim dilʼle sondex, zoxem Jehovacho dis, ani to dis kitlo lagim pavla tea vixim. Tor Jehovacho dis vo Armageddon amchea disamnim ieunchem na, oxem ami chintchimnant. Tachea bodlek, dor disa ‘bhoktivont kamam’ korun ani amchi vagnnuk nitoll dovrun, to dis ekdom lagim pavla mhunn ami monant dovortat.—2 Ped. 3:11, 12.

15. Noxttea dutanchea khotte xikounnent fosona zaunk ami kitem korunk zai? (1 Tesalonikekarank 5:21)

¹⁵ Beginuch Devache virodhi eke toren oxem mhunnttole: “Sogllem xant asa, koslich bhirant na!” (1 Tes. 5:3) Ani noxttea dutanchea preronnan sangloli hi khobor akʼkhea sonvsarant posortoli. Ani zaitim zannam ti aikon fostolim. (Prok. 16:13, 14) Amchea vixim kitem? Ami soglem ‘topasun kaddttat’ zalear ami tantunt foschimnant. (1 Tesalonikekarank 5:21 vachat.) ‘Topasun kaddop’ hea utrak uzar kelʼlem Grik utor, lok jea ritin veg-veglle dhatu, zoxem bhangar ani chandi khorem asa kai na tachi topasnni kortat, taka sor kelam. Ami pasun, ami jem kitem aikotat ani vachtat tem sarkem asa kai na tem topasun kaddunk zai. Tesalonikekaramnim oxem korop gorjechem aslem. Ani vhodd sonkoxtt lagim pavta toso, ami oxem korop anikui gorjechem astolem. Tor dusrim sangtat tem soglem dolle dhampun sot mhunn manun gheunchea bodlek, ami jem kitem aikotat vo vachtat, tem Bible-a pormonnem ani Jehovache songottnne pormonnem sarkem asa kai na tem zannam zaunk, ami amchi chintpachi tank uzar korunk zai. Oxem kelear, noxttea dutanchea khotte xikounnent ami foschimnant.—Mho. 14:15; 1 Tim. 4:1.

16. Ami kosli khatri dovrunk zata, ani ami kitem korunk nichov korum-ia?

¹⁶ Jehovachea lokancho zomo vhodd sonkoxttantlean salvar zatolo. Punn amchea dor ekleachem faleam kitem zatolem tem ami nokllo. (Jak. 4:14) Ami vhodd sonkoxtta thaun salvar zaunk xoktat, vo tachea poilim amcher moronn ieunk xokta. Punn Jehovak visvaxi ravlear amkam sasnachem jivit mellttolem mhunn ami khatri dovrunk zata. Makhlolim Kristanvam Jezu sangata sorgar astolim, ani dusrim menddram sobit bag zalʼlea hea prithumer astolim. Tor amkam sorgar vo hea prithumer jieuncho bhorvonso asum, hea bhorvonxeacher dhean diunk ani Jehovachea disa pasot toiar ravonk, ami soglim ghott nichov korum-ia.