Dusrea Vixv Zhuza vellar mhojim avoi-bapui Estonia soddun Germany-nt gelim, ani hanv thoim zolmolo. Mhojea zolma uprant, tim Canada vochonk toiari korunk laglim. Ami Canada-ntlea, Ottawa xarant, eka lhan zagear ravtalim, ani thoim kombeo pasun asleo. Ami khub gorib aslim punn amkam sokallim tantiam tori khaunk mellttalim.

Ek dis Jehovachim Sakxi mhojea mummy-k mellʼllim ani tannim tika Prokasovnni 21:3, 4 vachun dakhoilem. Tim utram tichea kallzak laglim ani tichea dolleantlean dukham ailim. Mhojea mummy-daddy-n Bible obheas suru kelo ani tannim rokddoch bautizm ghetlo.

Mhojea avoi-bapaik, Inglez bhas titli bori kollonasli. Tori astana, tim urben Jehovachi seva kortalim. Mhozo bapui Ontario-nt, Sudbury xarant aslolea eke factory-nt dhatu koddoupachem kam kortalo. Taka akʼkhi rat kam korunk poddttalem. Tori punn, dor Sonvara, to mhaka ani mhoji dhaktti bhoinn, Sylvia-k porgottnnent gheun voitalo. Toxench, ami dor sumanak famil zaun Pahrogopur-acho obheas kortalim. Mummy-n ani daddy-n mhaka kallzantlean Jehovacho mog korunk xikoilo. Tea pasot 1956-ant, 10 vorsancho astana hanvem bautizm ghetlo. Mhojim avoi-bapui, Jehovacho kitlo mog kortat tea vixim hanv chintʼta tednam Jehovachi seva korit ravonk mhaka urba melltta.

Mhojem iskol somplea uprant, Jehovache sevent mhoji urba unni zaunk lagli. Mhaka vimanant bosonk ani akʼkho sonvsar pollounk zai aslem. Punn hanv pioneer seva korunk laglom zalear, mhojem sopon purnn korunk, hanv title poixe ektthaim korunk pavchona oxem hanvem chintlem. Hanv eka radio station-ar, D.J. mhunn kam korunk laglom. Hem kam mhaka khub avoddttalem. Tem sanjechea vellar astalem. Tor hanv ekui mittingek pavonaslom. Ani Jehovacho mog korinant toslea munxam sangata hanv vell sarunk laglom. Punn uprant mhojem ontoskornn mhaka khaunk laglem ani Bible-antlean hanv jem kitem xiklolom tea pormonnem hanvem bodlav korunk zai mhunn mhaka kollon ailem.

Hanv Ontario-chea, Oshawa xarant ravonk gelom. Thoim mhaka Ray Norman, tachi bhoinn Lesli, ani her pioneer bhav-bhoinnam mellʼllim. Tannim mhojea sangata ixttagot keli. Tim kitlim khuxal asat tem polloun hanvem mhojea jivitant kitem korunk zai, tea vixim hanv chintunk laglom. Tannim mhaka pioneer seva korunk urba dili. Ani Setembr 1966-ant, hanvem pioneer seva suru keli. Hanv khuxal aslom ani soglem borem choltalem. Punn mhojea jivitant hanvem chintunk na toxem kitem tori ghoddchem aslem.

Hanv iskolant xiktalom tednam, Toronto, Canada-chea Bethel-ant vochonk hanvem fom bhorlolem.  Uprant, pioneer seva kortana, mhaka char vorsam pasot Bethel-ant seva korunk apounnem mellʼllem. Punn mhaka Lesli khub avoddttalem. Ani mhaka bhirant asli ki Bethel-achem apounnem manun ghetlear hanv taka porot kednanch mellonk pavchona. Hea pasot, hanvem Jehova lagim zaite pavtti khub vell poriant magnnem kelem. Xevottak, hanvem Bethel-ant vochonk nirnnoi ghetlo. Ani kallzacher fator dovrun Lesli-k bye mhunnttlem.

Hanv survatek Bethel-ant laundry-nt kam kortalom ani magir mhaka secretary mhunn kam mellʼllem. Tea mhunnosor, Lesli Quebec-achea, Gatineau xarant, khas pioneer mhunn seva korunk laglem. Lesli kitem korta astolem ani hanvem Bethel-ant ieun sarko nirnnoi ghetla kai mhunn hanv zaite pavtti chintʼtalom. Uprant hanvem chintunkuch na toxem kitem tori ghoddlem. Lesli-cho bhav Ray-ak, Bethel-ant apounnem mellʼllem. Ani to mhozo roommate aslo! Hea vorvim hanv porot Lesli lagim ulounk pavlom. Ani Bethel-ant mhojim char vorsam somptat tea nimannea disa, mhunnche Febrer 27, 1971-ant, ami kazar zalim.

Amkam Quebec-ant, French bhas uloitolea sobhent dhaddlim. Ani thoddea vorsam uprant, mhaka sorkittachem kam korunk apounnem mellʼllem. Hanv ekdom ojap zalom. Karonn tea vellar hanv 28 vorsancho aslo. Tor, hanv lhan ani tem kam korunk purto na oxem mhaka distalem. Punn Jeremias 1:7, 8-antlea utrantlean mhaka urba mellʼlli. Punn anik ek oddchonn mhunnttlear, Lesli thoddea car accident-amnim sampoddlolem ani taka rati nhid poddonasli. Tor sorkittachem kam korunk ekdom kotthin zatolem mhunn ami chintʼtalim. Punn Lesli-n mhunnttlem, “Jehovan amkam apounnem dilam zalear ami tem kiteak korchem nhoi?” Tor ami tem kam manun ghetlem ani 17 vorsam khuxalkaien sorkittachem kam kelem.

Sorkittachem kam kortana, hanv ek lisanv xiklom. Hanv tea kamant sodanch bizi astalom, ani Lesli-k titlo vell diunk pavonaslom. Tor ek Somara sokallim konnem tori bell vazoili. Bhair vochon polloit zalear thoim konn naslo. Punn thoim piknikek gheun vochpachi ek basket asli ani tantunt mezar ghalpachem ek lugott, follam, cheese, bread, wine-achi battli ani glass, toxench ek note aslo. Tacher oxem boroilʼlem: “Tujea bailek gheun piknikek voch.” Punn boroupeachem nanv tacher naslem. Tea disa borem vot aslem ani piknikek vochonk to ek boro dis aslo. Tori punn hanvem Lesli-k sanglem ki mhaka thoddim bhaxonnam toiar korunk zai ani ami piknikek vochonk xokchimnant. Tannem somzon ghetlem punn tem matxe niraxi zalem. Magir, hanv mhojim bhaxonnam toiar korunk gelom tednam, mhojem ontoskornn mhaka khaunk laglem. Mhaka Efezkarank 5:25, 28 ugddasak ailo. Tim versam vachlea uprant, mhojea bailechim bhavnam somzon gheunk, Jehova mhaka urba dita oxem mhaka dislem. Tor hanvem magnnem kelem ani Lesli-k vochon mhunnttlem, “Chol ia.” Hem aikon tem ekdom khuxal zalem. Ami nhoim-chea lagim eka sobit zagear gelim ani sangata mellon ekdom boro vell sarlo. To dis ami kednanch visorchimnant. Ani thoinchean ailea uprant hanv mhojim bhaxonnam-i toiar korunk pavlom.

Amkam British Columbia thaun Newfoundland poriant veg-vegllea zagear seva korchi sondhi mellʼlli. Ani  hea kamant ami khub khuxal aslim. Akʼkho sonvsar bhonvpachem bhurgeponna voilem mhojem sopon koxem purnn zata tem hanvem polloilem. Hanvem Gilead Korsa pasot fom bhorunk chintlolem. Punn mhaka dusrea desant vochon seva korunk naka asli. Mixinorichea kamak hanv purto na, hem fokot khas lokam khatir asa, oxem hanv chintʼtalom. Toxench, duensam ani zhuzam zatolea Afrikentlea desant amkam dhaddit mhunn mhaka bhirant asli. Hanv Canada-ntuch khuxal aslom.

1992-ant, Jehovachim Sakxi porot tea desamnim porgottnni korunk laglim, je poilim Soviet Union-ache bhag asle. Tor ami Estonia-k vochon mixinori seva korunk toiar astolim kai mhunn bhavamnim amkam vicharlem. Hem aikon ami ekdom ojap zalim. Punn hea vixim ami magnnem kelem ani ami porot ugddasak haddlem, ‘Jehovan amkam apounnem dilam zalear, ami tem kiteak korchem nhoi?ʼ Tor ami vochonk toiar zalim. Ani hanvem chintlem, ‘Zaum, amkam Afrikent tori dhaddinant.’

Ami rokddench Estonian bhas xikonk suru kelem. Thoim vochon thoddea mhoineamnim, mhaka sorkittachem kam korunk sanglem. Ami Estonia, Latvia, Lithuania, hea desamnim, toxench Russia-ntlea Kaliningrad xarant bhett korunk zai asli. Hanga sogleo mellon 46 sobha, toxench grup asle. Tor amkam Latvian, Lithuanian, ani Russian bhas pasun xikonk poddli. Oxem korop sompem naslem. Tori astana, ami thoinchi bhas xikonk vavr kortat tem polloun bhav-bhoinnam khuxal zalim ani tannim amkam modot keli. 1999-ant, Estonia-nt, xakha ofis suru kelem. Ani mhaka, Toomas Edur, Lembit Reile, ani Tommi Kauko, hea bhavam sangata xakha somitint kam korunk nemlo.

Thoim amkam oslea zaitea bhav-bhoinnank mellonk sondhi mellʼlli, zankam adim Siberia-nt koidi kelʼlim. Tankam bondkhonnint zaite tras sosunk poddle ani tanchea famili thaun tankam pois dovorlim. Tori astana, tim rag dhorun bosonk nant. Porgottnnechea kama pasot tanchi khuxalkai ani urba tannim unni zaunk diunk na. Tanchea onubhovantlean, amkam kotthin poristhiti aslear pasun ami khuxalkaien ani thir ravon Jehovachi seva korit ravonk zata mhunn amkam kollon ailem.

Ami khub vorsam poriant zaito vavr kelo. Ani amkam suseg gheunk titlo vell mellonaslo. Tor Lesli ekdom thokonk laglem. Tem itlem thoklolem kiteak asta tem survatek amkam kollonk na. Uprant, taka fibromyalgia mhunnttlolem duens asa mhunn amkam kollʼllem. Dekhun ami porot Canada vochonk chintlem. Punn tednanch amkam Patterson, New York, U.S.A.-chea xakhent, eka korsa pasot apounnem mellʼllem. Punn amchean thoim vochonk zauchem na oxem mhaka dislem. Tori astana, ami Jehova lagim khub vinoti keli ani uprant ami thoim gelim. Ani Jehovan amchea nirnnoi-acher besanv ghatlem. Karonn tea korsa vellaruch Lesli-cho bore toren ilaz zalo. Ani hea karonnak lagon ami amchi seva chaluch dovrunk pavlim.

2008-ant, Estonia-nt astana, ek dis sanjechea vellar mhaka mukhel ofisa thaun fon ailo. Ami Congo voitolim kai, mhunn tannim vicharlem. Hem aikon mhojem kalliz gollea kodden pavlem. Karonn amkam chintunk chodd vell naslo. Hanvem dusreach disa zobab diunk zai aslo. Lesli-k sanglear, tea rati taka nhid poddchi na mhunn hanvem taka tea disa sangonk na. Tea rati tem nhidlem, punn hanv nhidonk pavonk na. Karonn Afrikent vochonk mhaka je uske asle tea vixim hanv akʼkhi rat Jehova lagim magnnem korit aslo.

Dusrea disa hanvem Lesli-k hea vixim sanglem ani ami dogaim boson uloilim. Ami chintlem: “Jehova amkam  Afrikent vochonk apounnem dita. Tor thoim gelea bogor ami thoim khuxal aschimnant vo amchea lagim tem kam zaunchem na, hem koxem mhunnonk zata?” Tor 16 vorsam Estonia-nt seva kelea uprant, ami Congo-chea Kinshasa xarant gelim. Tea xakha ofisa bhair ek ekdom sobit garden aslem ani to zago xant aslo. Ami amchea rumant gelea uprant Lesli-n sogleant poilim mezar ek kardd dovorlem. Ami Canada soddun ailʼlim tednam thaun hem kardd tachea lagim aslem. Tacher oxem boroilʼlem: “Tum khoinsorui asum, sodanch khuxal rav.” Afrikechea bhav-bhoinnank mellʼllea uprant, Bible obheas kelea uprant, ani mixinori kamant amkam kitli khuxalkai melltta tem onubhovlea uprant, Jehovache sevent amchi khuxalkai anik vaddli. Uprant, amkam Afrikechea sumar anikui 13 desanchea xakhenk bhett korunk sondhi mellʼlli. Hea vorvim ami veg-vegllea sonskrutaiechea bhav-bhoinnank mellonk pavlim. Tor hanv Afrikent aslo mhunn mhaka anik usko zainaslo. Punn amkam thoim dhaddlim mhunn ami Jehovache upkar attoitalim.

Congo-chea bhav-bhoinnamnim, amkam veg-veglle torechem jevonn dilem. Tim jevnnant kidde pasun khatalim. Hanvem chintlem ki amchean tem khaunkuch zaunchem na. Punn tim te kidde kitle ruchin khatat tem polloun, ami pasun te khaun polloum-ia, oxem ami chintlem. Ani amkam te bore lagle.

Tea disamnim, udente vatten ravtolea bhav-bhoinnank ami urba diunk ani thoddeo gorjecheo vostu diunk pavlim. Tea zageacher sorkaracho virodh korpi zome, ganvant ieun akromonn kortale ani bail-bhurgeank tras ditale. Thoinchim choddxim bhav-bhoinnam gorib aslim. Tori astana, jivontponnacher tancho bhorvonso ghott aslo ani tim Jehovacho khub mog kortalim. Toxench, Jehovachea songottnnek tim visvaxi aslim. Tanchi hi khatri polloun, ami Jehovachi kiteak seva kortat tem chintunk, ani Jehovacher amcho bhavarth ghott korunk amkam modot zali. Thoddea bhav-bhoinnanchim ghoram ani xetam nas zalʼlim. Hem polloun amchea lagim asa tem rokddench nas zaunk xokta ani Jehova sangata amchi ixttagot ghott korop kiteak itlem mhotvachem asa tem amchea ugddasak ailem. Itle dukh-tras sosunui tim gunngunnunk nant. Tanchea onubhovam thaun amchea duensancho ani oddchonneancho dhiran fuddo korunk amkam urba mellʼlli.

Ami opekxa korunk na toslem ek apounnem amkam mellʼllem. Amkam Hong Kong-achea xakhent vochonk sanglem. Ami Asia-nt ravtolim mhunn kednanch chintunk naslem. Thoim kosli poristhiti astoli tem amkam khobor naslem. Punn itlim-i vorsam, ami gelʼlea soglea zagear  Jehovan koxi amchi kallji ghetli ani amkam modot keli tem ami polloilem. Tor ami Hong Kong vochonk toiar zalim. 2013-nt itlem sobit Afrika ani thoinchea mogall ixttank soddun voitana amchea dolleant dukham ailim.

Hong Kong ek oslem xar asa, zoim sonvsarbhorcho veg-vegllo lok ravta. Thoinchi Chinese bhas xikop khub kotthin aslem. Amkam hem soglem novem aslem, punn thoinchea bhav-bhoinnamnim amkam mog dakhoilo, ani thoinchem jevonn-khann pasun amkam khub avoddlem. Xakha ofisachem kam vaddot gelem dekhun thoim anik zageachi goroz poddli. Punn zomnnichem mol vaddot voitalem dekhun, Sonchalon Monddollan thoincho choddso zago vikun thoinchem thoddem kam dusrea eka zagear korunk nirnnoi ghetlo. Uprant 2015-nt amkam Dokxinn Korea-nt dhaddlim, zoim ami aiz poriant seva kortat. Hanga uloitat ti Korean bhas xikop amkam khub kotthin asa. Tori astana, ami hi bhas ulounk boro vavr kortat mhunn sangon bhav-bhoinnam amkam urba ditat.

Novim ixttam korop sodanch sompem asona. Punn dusreancho poramos korunk ami poilem panvl ghetat tednam ami tankam anikui begin ani bore toren zannam zaunk pavtat. Bhav-bhoinnanchi sonskruti, bhas, veg-veglli aslear pasun, tanchea ani amchea modem zaitem kitem ek-sarkem asa mhunn ami polloilem. Ani Jehovan amkam itle sobit toren rochleant ki ami zaitim ixttam korunk ani tankam kallzantlean mog dakhounk xoktat mhunn ami zannam zalim.—2 Kor. 6:11.

Dusreank Jehovachea nodren pollovop, toxench to amkam koxe toren mog dakhoita ani margdorxon dita tacher dhean divop kitlem mhotvachem tem ami xiklim. Ami niraxi zatalim vo ami bhav-bhoinnank avoddttolim kai mhunn amkam usko zatalo tednam, amchea ixttamnim amkam poilim dhaddloleo chitti ani karddam ami vachtalim, jea udexim amkam urba mellttali. Jehovan khorench amchea magnneancho zobab dilo, to amcho mog korta mhunn khatri dili, ani tachea sevent vavr korit ravonk ghottai dili.

Vorsam gelim toxim, Lesli ani hanv xiklim ki ami kitlim-i bizi aslear pasun, eka-mekak vell divop khub gorjechem asa. Toxench, kitem-i novem kortana, zoxem ek novi bhas xiktana, kitem-i chuk zali zalear chodd uskeunchea bodlek tea vixim hansop kitlem mhotvachem tem ami xiklim. Ani ami dor eke ratik, oslea eka vixoi-acher vo vostucher chintunk proitn kortat jea pasot ami Jehovache upkar attounk xoktat.

Khorem mhunnttlear, hanv mixinori zatolom, vo dusrea desamnim vochon seva kortolom mhunn hanvem kednanch chintunk naslem. Punn Jehovachea modotin kitem-i zaunk xokta mhunn hanv xiklom. Hea vixim chintʼtana mhaka provadi Jeremiasacho ugddas ieta. Tannem mhunnttlolem: “Tunvem mhaka fottoilo, Jehova!” (Jer. 20:7, NW) Jehovachea sevent hanvem opekxa korunk nant tosleo zaiteo boreo vostu hanvem onubhovleo. Ani Jehovan mhaka hanvem chintunk na titlim besanvam dilim. Vimanant bhonvpachem mhojem sopon pasun tannem purnn kelem. Hanv bhurgeponnar axetalom tachea poros chodd desamnim hanv bhonvlom. Karonn ami zaitea desantlea xakhenk bhett dili. Ani hea soglea vorsamnim Lesli-n mhaka khub tenko dilo mhunn hanv tacho chodd upkari.

Ami hem soglem Jehovachea moga pasot kortat, mhunn ami sodanch amchea ugddasak haddttat. Ami aiz onubhovtat tim besanvam dakhoun ditat ki fuddarak sasnachem jivit kitlem borem astolem. Karonn tea vellar Jehova ‘hat ugddun soglea rochnnank dhadoxi kortolo.’—St. 145:16.