1-2. Aiz amchi poristhiti Lot-a sarki koxi asa?

 SONVSARACHE dorje disan-dis khala poddttat tem polloun, amkam Lot-a bhaxen disonk xokta. ‘Noxttea munxanchem pozddem jivit taka kanttallo haddttalem.’ Karonn amchea sorginchea Bapak oslea kamanchi vitt ietali mhunn taka khobor asli. (2 Ped. 2:7, 8) Taka Devachi bhirant asli ani mog aslo dekhun, tachea bhonvtonnim aslolea lokanchea dorjeam pormonnem jieunk tannem nakarlem. Aiz amchea bhonvtonnim pasun osle lok jietat, zankam Jehovachea noitik dorjeam vixim kainch poddon vochonk na. Tori astana, ami Jehovachi bhirant dovortat ani tachea pasot amcho mog vaddoitat tednam, amkam noitik ritin nitoll ravonk modot zata.—Mho. 14:2.

² Mhonnʼnneo pustokant dilʼlea solʼleantlean Jehova amkam oxem korunk urba dita. Tor ami lhan vo vhodd asum, soglea Kristanvank hea pustokant sanglolea utrantlean faido zaunk xokta.

3. Mhonnʼnneo 17:3-a pormonnem, amchea kallzachi rakhonn korunk ek karonn kitem? (Chitr pasun polloiat.)

³ Amchea kallzachi rakhonn korunk ek mhotvachem karonn mhunnttlear, Jehova amchem kalliz parkita. Tem mhunnttlear, ami umkech torechim munxam oxem dusreank disot. Punn ami khoreponnim koslim munxam, tem Jehova bore bhaxen zannam. (Mhonnʼnneo 17:3 vachat.) Tachea thaun melltta ti zannvai ami apnnaitat zalear, to amcho mog kortolo. (Ju. 4:14) Ani oxem kelolean, Soitan ani hea sonvsarantle noxtte lok sangtat teo fotti, toxench tanche khala poddlole dorje, je vika bhaxen asat, te ami nakartolim. (1 Ju. 5:18, 19) Ami Jehovak lagim sortat toxim, tachea pasot amcho mog ani resped anikui vaddttolo. Ani ami taka dukhounk sodhinant dekhun, ami vaitt chintnam amchea monant pasun haddchimnant. Khorem mhunnttlear, amchea mukhar kosli-i tallnni ieta tednam ami oxem mhunnttolim: ‘Mhozo  itlo mog korta, Taka hanv mudʼdom zaun koso dukhounk xoktam?’—1 Ju. 4:9, 10.

4. Jehovachi bhirant aslolean eke bhoinnichi koxi rakhonn zali?

⁴ Croatia-nt ravpi bhoinn Marta-k onoitik kam korchi tallnni aili. b Ti sangta: “Mhojem chintop sarkem dovrunk, ani thoddea vellachi khuxalkai dita toslem patok korchi tallnni nakarunk khub kotthin aslem. Punn Jehovachi bhirant aslolean, mhoji rakhonn zali.” Koxi? Onoitik kam kelolean kosle vaitt porinnam bhogunk poddttole, tea vixim tinnem chintlem. Tor ami pasun vaitt kamam kelim zalear, kosle porinnam bhogunk poddttole tea vixim chintunk zata. Ani sogleam-von vaitt porinnam mhunnttlear, ami Jehovak dukhoitolim ani kednanch tachi bhokti korunk pavchimnant.—Ut. 6:5, 6.

5. Bhav Leo-chea onubhovantlean ami kitem xikonk zata?

⁵ Ami Jehovachi bhirant dovortat zalear, ami oslea sangateam lagim ixttagot korchimnant jim vaitt kamam kortat. Hea vixim Congo-nt ravpi Leo nanvachea bhavak, chuk kelea uprant kollon ailem. Bautizm gheun char vorsam uprant, tannem oslea sangateam lagim ixttagot keli je vaitt kamam kortale. Taka distalem ki jea mhunnosor to tanchea bhaxen vaitt kamam korina, to Jehovachea add patok korina. Punn khorem mhunnttlear, tachea vaitt sangateank lagon to bebdikai ani onoitik kamam korunk pavlo. Punn uprant tachea Kristi avoi-bapain taka kitem xikoilʼlem ani to Jehovachi seva kortalo tednam kitlo khuxal aslo tea vixim to chintunk laglo. Tor to kitem korunk pavlo? Tannem aplem chintop bodolʼlem. Tannem vhoddilanchi modot ghetli ani to porot Jehovachi seva korunk laglo. Ani aiz to ek vhoddil ani khas pioneer mhunn khuxalkaien seva korta.

6. Mhonnʼnneo odheai 9-antlean ami khoinchea don bailam vixim zannam zatolim?

⁶ Atam ami Mhonnʼnneo odheai 9-ant sanglolea don bailam vixim zannam zaum-ia. Eke bailek  zannvaiek sor kelea ani dusre bailek, murkhponnak. c Oxem kortana ami ugddas dovrum-ia ki Soitanacho sonvsar onoitik kamam korunk ani pornography pollounk piso zala. (Ef. 4:19) Dekhun ami amche bhitor Jehovachi bhirant vaddovop, ani vaitta thaun pois ravop gorjechem. (Mho. 16:6) Oxem korunk ami Mhonnʼnneo odheai 9-acher dhean dium-ia. Karonn tantuntlean amkam sogleank faido zaunk xokta. Thoim sangloli dor ek bail ‘somjikai nasloleank’ apounnem dita mhunnttlam. Tim dogaim eka orthan oxem sangtat: ‘Mhojea ghorant ieo ani jev.’ (Mho. 9:1, 5, 6, 13, 16, 17) Punn eklo khoinchea bailechem aikota tea pormonnem taka boro vo vaitt porinnam bhogcho poddtta.

7. Mhonnʼnneo 9:13-18-nt sanglolea pormonnem, murkh ostorechem apounnem manun ghetat tanchem kitem zata? (Chitr pasun polloiat.)

⁷ “Murkh ostori” koslem apounnem dita? (Mhonnʼnneo 9:13-18 vachat.) Loz nastana, ti somjikai naslolea munxak oxem mhunntta, “Oso ie!” ani mhojea sangata khaun khuxal zav. Punn tichem aikotat tanchem kitem zata? Tim soglim ‘mornnak’ pavtat. Mhonnʼnneo pustokant, osleach torechea anikui don ostoream vixim sanglam mhunn tumi ugddas korunk zata. Thoim amkam “suvadik Utramnim bhulovpi” ani “onvollki” [“pordvari,” NW] ostore vixim xittkaunni dilea. Bible-ant sanglam: “Tichem ghor mornnache vatten bagovta.” (Mho. 2:11-19) Toxench, Mhonnʼnneo 5:3-10-nt anik eke ‘pordvari ostore’ vixim sanglam ani “tiche paim mornnak pavoitat” mhunnttlam.

8. Amkam koslo nirnnoi gheunk poddot?

⁸ Jim ‘murkh ostorechem’ apounnem aikotat tankam ek nirnnoi korcho poddtta. Tem mhunnttlear, tim tem apounnem manun ghetolim vo na. Aiz amkam pasun osloch ek nirnnoi gheunk poddot. Amkam konnui onoitik kamam korunk apounnem dita tednam, vo media ani Internet-acher amkam burxim chitram ani video dixtti poddttat tednam, eka orthan ti murkh ostori amkam apounnem dita oxem ami mhunnonk zata. Tor tea vellar ami kitem kortolim to nirnnoi amkam gheunk poddtta.

9-10. Ami koslea karonnank lagon onoitik kamam thaun pois ravonk zai?

⁹ Onoitik kamam thaun pois ravonk amkam ekdom borim karonnam asat. Mhonnʼnneo pustokant sangloli “murkh ostori” oxem sangta mhunnttlam: “Chorlolim udkam . . . ruchik lagta.” Tor “Chorlolim udkam” mhunnttlear kitem? Ghov ani baile modem aslolo kuddicho sombond, Bible-ant, dhadoxi korta toslea udkak sor kelam. (Mho. 5:15-18) Kaidea pormonnem kazar zalʼlea dadlean ani bailen, eka-meka sangata kuddicho sombond dovrun khuxal zaunk zata.  Punn “Chorlolim udkam” ghoddie, kaidea add aslolea kuddichea sombondank vo onoitik kamank lagu zatat. Ek chor lipon kam korta tea bhaxen, onoitik kamam kortat tim munxam, chodd korun dusream thaun tim lipounk proitn kortat. Hea munxank, “Chorlolim udkam” ruchik lagtat. Karonn tim kortat tim kamam konnakuch kollon ieunchimnant oxem tankam dista. Punn khorem mhunnttlear, tim apnnakuch fosoitat. Karonn Jehova Dev soglem polloita. Ani Jehovachi maniotai hogddavop, hachea poros vaitt anik kainch na. Oxem zavop “ruchik” nhoi, punn ekdom koddu. (1 Kor. 6:9, 10) Onoitik kamam kelʼlean anikui kosle vaitt porinnam zatat?

¹⁰ Onoitik kamam kortat tankam apnnachich loz dista ani tim kainch valorachim nhoi oxem tankam dista. Tea bhair bhurgim naka astana tim gorbest zatat. Toxench familint futti poddttat. Tor khorench, murkh ostorechem apounnem nakarop, hantuntuch xannemponn asa. Itlench nhoi, onoitik kamam kortat tanchi Jehova sangata ixttagot piddʼddear zata. Toxench zaitea zannank, tancho jiv vochonk xokta toslim duensam zaunk xoktat. (Mho. 7:23, 26) Tea pasot Mhonnʼnneo 9:18-nt (NW) oxem sanglam: “Murkh ostorechea ghora aileant tim fonddant poddlolim asat.” Tori astana, zaitim zannam tichea ghora kiteak voitat?—Mho. 9:13-18.

11. Pornography pollovop ekdom vaitt kiteak zaun asa?

¹¹ Ek karonn mhunnttlear, aiz zaitim zannam pornography-chea fasant poddttat. Thoddim chintʼtat ki pornography polloilear kainch vaitt zaunchem na. Punn khorem mhunnttlear, pornography polloitat tancher khub vaitt porinnam zata, svota pasot ani dusream pasot tim resped hogddaitat, ani ti vaitt sonvoim soddunk tankam ekdom kotthin zata. Burxim chitram polloitat tankam tem visronk khub kotthin zata. Itlench nhoi, pornography amche vaitt anvdde marun uddounchea bodlek te anikui vaddoita. (Kol. 3:5; Jak. 1:14, 15) Tea pasot pornography polloitat tim choddxe pavtti onoitik kamam kortat.

12. Amchea monant vaitt anvdde haddttat toslim chitram amchea mukhar ietat tednam ami kitem korunk zai?

¹² Thodde pavtti electronic sadhonam uzar kortana, tancher okosmat burxim chitram ailim zalear ami kitem korunk zai? Ami rokddench tem bond korunk zai. Jehova sangata amchi ixttagot ekdom moladik mhunn ami ugddas dovortat zalear, oxem korunk amkam sompem zatolem. Punn khorem mhunnttlear, burxim asonant toslim chitram pasun amchea monant vaitt anvdde haddunk xoktat. Tor oslim chitram ami kiteak pollounchim nhoi? Karonn ami amchea kallzant pasun pordvar korunk sodhinant. (Mt. 5:28, 29) Hea vixim Thailand-ant ravpi, David nanvacho ek vhoddil oxem sangta: “Hanv mhakach vichartam, ‘Tim chitram burxim nhoi tem khorem. Tori astana, hanv tim polloiot ravlom zalear, Jehovak hem avoddttolem kai?’ Oxem kelolean mhaka sarko nirnnoi gheunk modot zata.”

13. Zannvaien vagonk amkam kitem modot korunk xokta?

¹³ Jehovak dukhoita toslem kitem-i ami korit mhunn amkam bhirant asta tednam, ami zannvaien vagtat. Karonn Bible-ant sanglam: “Zannvaiecho oromb mhollear Sorvesporachi bhirant.” (Mho. 9:10) Ani hem amkam Mhonnʼnneo odheai 9-achea survatechea utrantlean kollon ieta. Thoim eke baile vixim sanglam ani tika khore ‘zannvaiek’ sor kelea.

14. Mhonnʼnneo 9:1-6-ant amkam anik koslem apounnem asa?

¹⁴ Mhonnʼnneo 9:1-6 vachat. Hea versamnim amkam anik ek apounnem asa. Hem apounnem Jehova koddlean asa, zo amcho Rochnnar ani khore zannvaiecho Zhor zaun asa. (Mho. 2:6; Rom. 16:27) Hea versamnim sat khambeancher aslolea eka vhoddlea ghora vixim sanglam. Hem dakhoita ki Jehova udar kallzacho asa. Ani to sogleank tache koddlean xikon zannvai gheunk apounnem dita.

15. Jehova amkam kitem korunk apounnem dita?

 ¹⁵ Mhonnʼnneo odheai 9-ant khore ‘zannvaiek’ sor kelea tea bailechea udharonna thaun, Jehova udar kallzacho Dev ani to amkam zaiteo boreo vostu dita mhunn ami xiktat. Tea versamnim ti bail mas randta, aplo soro toiar korta ani mez ghalta mhunn sanglam. (Mho. 9:2) Toxench vers 4 ani 5-ant, ti somjikai naslolea munxak oxem mhunntta mhunn sanglam: “Ie ani mhozo unddo kha.” Tor ami tichem apounnem kiteak manun gheunk zai? Ami trasant poddlea uprant dekh xikchea bodlek, ami zannvaien vaglolim ani surokxit aslolim Jehovak zai. Tea pasot, “To Aplo adar [“apli zannvai,” NW] promannik monʼxak dovorta.” (Mho. 2:7) Tor amkam Jehovachi sarke torechi bhirant asta tednam, ami taka manvota tem kortolim. Ani tacho zannvaiecho solʼlo apnnaun amkam khuxalkai mellttoli.—Jak. 1:25.

16. Jehovachi bhirant dovorlolean bhav Alain-ak zannvaien nirnnoi gheunk koxi modot zali, ani tacho porinnam kitem zalo?

¹⁶ Jehovachi bhirant dovorlolean bhav Alain-ak zannvaien nirnnoi gheunk koxi modot zali tem polloum-ia. To ek vhoddil, ani iskolant xikoita. To sangta, “Amchea iskolantle zaite xikxok, pornography, sex-a vixim xikonk ek vatt zaun asa oxem chintʼtat.” Punn tanchem aikon bhav fosonk na. To fuddem sangta: “Hanv Jehovacho mog kortam ani taka resped ditam dekhun, hanvem burxim pichʼcheram pollounk saf nakarlem. Ani hanv tim kiteak polloina, tachem karonn pasun hanvem tankam sanglem.” Oxem korunk bhav Alain-ak koxi modot zali? To khori ‘zannvai’ apnnaun, ‘tichea rosteamnim cholot’ ravlo. (Mho. 9:6) Bhavacho ho ghott nirnnoi polloun thoddea xikxokank itlem borem dislem ki te atam Bible xiktat ani mittingek pasun ietat.

17-18. Khore ‘zannvaiechem’ apounnem manun ghetat tankam koslim besanvam mellttat, ani tancho fuddar koso astolo? (Chitr pasun polloiat.)

¹⁷ Jehova amkam, khuxalkaien bhorlolo fuddar melloun gheunk ami kitem korunk zai tem xikoita. Heach pasot, murkponnak ani zannvaiek sor kelʼlea don bailanchim udharonnam tannem uzar keleant. Vhoddlean ulo martolea ‘murkh ostorechem’ apounnem manun ghetat, tim onoitik kamam korun thoddeach vellachi khuxalkai bhogtat. Punn tacho porinnam kitem zatolo tea vixim tim chintinant. Tanchim kamam tankam xevottak mornnak pavoitat.—Mho. 9:13, 17, 18.

¹⁸ Punn dusrea vatten, khore ‘zannaviek’ sor kelʼlea bailechem apounnem manun ghetat, tancho fuddar ekdom vegllo asa. Tim veg-veglle torechem ruchik ani ekdom borem jevonn jevtat. Ani tim khuxal asat, karonn Jehovak lagim soronk goroz tem soglem tankam melltta. (Iz. 65:13) Hea vixim Jehovan Izaias provadea udexim oxi bhasaunni kelʼli: “Chotraien  Mhojem aikat ani boreo-boreo vostu tumi khatoleat, rosvont-ruchik jevnnam korun tumi dhadoxi zatoleat.” (Iz. 55:1, 2) Tor Jehovachi zannvai apnnaun, ami Jehova mog korta tacho mog korunk, ani to dves korta tacho dves korunk xiktat. (St. 97:10) Itlench nhoi, ami dusreank pasun hi zannvai apnnaunk ieukar ditat. Eka orthan, ami ‘xarachea unch dongrar thaun oso ulo kortat: “Sadho [“somjikai naslolo,” NW] to monis he vatten ieuncho.”’ Ani hem apounnem manun ghetat tankam atanch nhoi, punn fuddarak pasun besanvam mellttolim. ‘Zannvaiechea rostean cholot ravlolean’ tankam sasnachem jivit mellttolem.—Mho. 9:3, 4, 6.

19. Upodexok 12:13, 14 pormonnem, ami kitem ghott nichov korum-ia? (“ Devachi Bhirant Dovorlolean Amkam Kosle Faide Mellttat? hem boks polloiat.)

¹⁹ Upodexok 12:13, 14 vachat. Devachi bhirant dovrunk ami ghott nichov korum-ia. Oxem kelolean, hea nimannea disamnim ami amchea kallzachi rakhonn korunk pavtolim, noitik ritin nitoll ravonk pavtolim ani Jehova sangata amchi ixttagot ghott korunk pavtolim. Toxench Jehovachi bhirant aslolean, ami zata titlea lokank khori ‘zannvai’ apnnaunk ieukar di-it ravtolim, jea udexim tankam faido zatolo.