Bible-ant hacho zobab diunk na. Punn Bible-ant osli thoddi mahiti dilea jea udexim tim Bethlehemantuch kiteak ravlim tem amkam ghoddie kollonk xokta.

Eka ainzan Mariek, ti gorbest zatoli ani eka putak zolm ditoli mhunn sanglem. Tannem ho sondex dilo tednam, Juze ani Marie, Galiliechea eka xarant, tem mhunnttlear, Nazaretant ravtalim. (Luk. 1:26-31; 2:4) Magir tim Ejiptta thaun porot ailim tednam pasun, tim Nazaretant ravlim. Ani Jezu thoinch vaddlo. Tea pasot, taka Nazaretkar mhunnttale. (Mt. 2:19-23) Tor Juze, Marie ani Jezu vixim ami uloitat tednam, amkam chodd korun Nazaret xaracho ugddas ieta.

Mariek, Elizabet nanvachi ek soiri asli. Elizabet Judant ravtali. Ti iadnik Zakariasachi bail asli, ani tinnem Juanv Batistak zolm dilʼlo. (Luk. 1:5, 9, 13, 36) Marie Elizabetak mellonk Judant geli, ani ti tin mhoine thoim ravli. Uprant ti porot Nazaretant aili. (Luk. 1:39, 40, 56) Tor Juda vixim Mariek khobor asli, oxem ami mhunnonk zata.

Marie gorbest asli tednam, Romi odhikareamnim ek kaido kaddlo. Tem mhunnttlear lokamnim, tim zolmolʼlim tea xarant vochon “tanchem nanv register korchem.” Hea pasot Juze, Mariek gheun Nazareta thaun Bethlehemant gelo. Ani bhasaunni kelʼli toxi, Mesias Bethlehemantuch zolmocho aslo. (Luk. 2:3, 4; 1 Sam. 17:15; 20:6; Mik. 5:2) Marien Jezuk zolm dilea uprant, tinnem tea ballkak gheun, aplea sangata porot Nazaretant ieunk lamb provas korcho, oxem Juzen chintunk na. Tea pasot tim Bethlehemantuch ravlim. Hem xar Jeruzalema thaun sumar nnov kilometr pois aslem. Oxem kelolean, ballkak gheun Jeruzalemant aslolea Devmondirant vochon bhettounni korunk tankam sompem zatolem aslem.—Lev. 12:2, 6-8; Luk. 2:22-24.

Jehovachea dutan Mariek sanglolem ki tichea putak “Davidachem xinvason” melltolem ani to “raza zaun . . . raj choloitolo.” Ani Jezu Davidachea xarantuch zolmolo. Tor Jezu hea xarant zolmonk kitem tori khas aslem, oxem ghoddie Juzek ani Mariek dislem astolem. (Luk. 1:32, 33; 2:11, 17) Tor fuddem kitem korchem tea vixim Jehova tankam ghoddie nirdexon ditolo, oxem chintun tim thoinch ravlim astolim.

Noketram polloun fuddar parkhupi, Jezuk mellonk aile tednam, Juze ani tachi famil thoim kitlo temp poriant ravtalim tem ami nokllo. Punn tim eka ghorant ravtalim, ani Jezu ballok nhoi, punn ek ‘bhurgo’ aslo mhunn Bible sangta. (Mt. 2:11) Tor Nazaretant voichea bodlek, thoddo temp poriant tim Bethlehemantuch ravlim oxem dison ieta.

Herodan ‘Bethlehemant aslolea don vorsanchea ani tache poros unnem piraiechea soglea cheddea bhurgeank’ marun uddounk hukum dilo. (Mt. 2:16) Ani hea vixim eka devdutan Juzek xittkaunni dilʼli. Dekhun to Marie ani Jezuk gheun Ejipttant pollon gelo. Ani Herod moro poriant, to Ejipttantuch ravlo. Uprant, to aple familik gheun Nazaretant gelo. Tor to Bethlehemant porot kiteak ieunk na? Karonn Herodacho put Arkelav, Judeiant raj choloitalo, ani to ekdom krur munis aslo. Tea bhair thoim ailear tankam dhoko asa mhunn devdutan porot Juzek xittkaunni dilʼli. Punn Nazaretant tankam kosloch dhoko naslo, ani tim Jezuk bore toren vaddoun taka Jehova vixim xikounn diunk xoktalim.—Mt. 2:19-22; 13:55; Luk. 2:39, 52.

Jezun aplo jiv bolidan korun herank sorgar voichi vatt ukti korchea poilim, Juze chodd korun bhair poddlo astolo. Tor hacho orth, Juze heach prithumer jivont zatolo. Tea vellar, zaitim zannam taka mellonk pavtolim ani Jezu zolmolʼlea uprant to ani Marie Bethlehemantuch kiteak ravlim tea vixim anik zannam zaunk pavtolim.